੫. ਪਟਿਸਮ੍ਭਿਦਾਕਥਾਵਣ੍ਣਨਾ

੪੩੨-੪੩੩. ਇਦਾਨਿ ਪਟਿਸਮ੍ਭਿਦਾਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਯਂਕਿਞ੍ਚਿ ਅਰਿਯਾਨਂ ਞਾਣਂ, ਸਬ੍ਬਂ ਲੋਕੁਤ੍ਤਰਮੇਵਾ’’ਤਿ ਗਹੇਤ੍ਵਾ ‘‘ਸਬ੍ਬਂ ਞਾਣਂ ਪਟਿਸਮ੍ਭਿਦਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸਮ੍ਮੁਤਿਞਾਣਪਞ੍ਹੇਸੁ ਪਥਵੀਕਸਿਣਸਮ੍ਮੁਤਿਯਂ ਸਮਾਪਤ੍ਤਿਞਾਣਂ ਸਨ੍ਧਾਯ ਪਟਿਕ੍ਖਿਪਤਿ, ਨਿਰੁਤ੍ਤਿਞਾਣਂ ਸਨ੍ਧਾਯ ਪਟਿਜਾਨਾਤਿ. ਯੇ ਕੇਚਿ ਸਮ੍ਮੁਤਿਨ੍ਤਿ ਪਞ੍ਹੇ ਪੁਥੁਜ੍ਜਨੇ ਸਨ੍ਧਾਯ ਪਟਿਕ੍ਖਿਪਤਿ. ਚੇਤੋਪਰਿਯਾਯਪਞ੍ਹੇਸੁ ਪੁਥੁਜ੍ਜਨਸ੍ਸ ਞਾਣਂ ਸਨ੍ਧਾਯ ਪਟਿਕ੍ਖਿਪਤਿ, ਅਰਿਯਸ੍ਸ ਞਾਣਂ ਸਨ੍ਧਾਯ ਪਟਿਜਾਨਾਤਿ. ਸਬ੍ਬਾ ਪਞ੍ਞਾਤਿਪਞ੍ਹੇਸੁ ਕਸਿਣਸਮਾਪਤ੍ਤਿਪਞ੍ਹਂ ਸਨ੍ਧਾਯ ਪਟਿਕ੍ਖਿਪਤਿ, ਲੋਕੁਤ੍ਤਰਂ ਸਨ੍ਧਾਯ ਪਟਿਜਾਨਾਤਿ. ਪਥਵੀਕਸਿਣਸਮਾਪਤ੍ਤਿਨ੍ਤਿਆਦਿ ‘‘ਯਾ ਏਤੇਸੁ ਏਤ੍ਤਕੇਸੁ ਠਾਨੇਸੁ ਪਞ੍ਞਾ, ਕਿਂ ਸਬ੍ਬਾ ਸਾ ਪਟਿਸਮ੍ਭਿਦਾ’’ਤਿ ਪੁਚ੍ਛਨਤ੍ਥਂ ਵੁਤ੍ਤਂ. ਤੇਨ ਹਿ ਸਬ੍ਬਂ ਞਾਣਨ੍ਤਿ ਯਸ੍ਮਾ ਸਬ੍ਬਾ ਲੋਕੁਤ੍ਤਰਪਞ੍ਞਾ ਪਟਿਸਮ੍ਭਿਦਾ, ਤਸ੍ਮਾ ਸਬ੍ਬਨ੍ਤਿ ਵਚਨਂ ਸਾਮਞ੍ਞਫਲੇਨ ਸਦ੍ਧਿਂ ਪਤਿਟ੍ਠਾਪੇਤੀਤਿ.

ਪਟਿਸਮ੍ਭਿਦਾਕਥਾਵਣ੍ਣਨਾ.