੫. ਪਞ੍ਚਮਵਗ੍ਗੋ

੧. ਵਿਮੁਤ੍ਤਿਕਥਾਵਣ੍ਣਨਾ

੪੧੮. ਇਦਾਨਿ ਵਿਮੁਤ੍ਤਿਕਥਾ ਨਾਮ ਹੋਤਿ. ਤਤ੍ਥ ਵਿਪਸ੍ਸਨਾ, ਮਗ੍ਗੋ, ਫਲਂ, ਪਚ੍ਚਵੇਕ੍ਖਣਨ੍ਤਿ ਚਤੁਨ੍ਨਂ ਞਾਣਾਨਂ ਵਿਮੁਤ੍ਤਿਞਾਣਨ੍ਤਿ ਨਾਮਂ. ਤੇਸੁ ਵਿਪਸ੍ਸਨਾਞਾਣਂ ਨਿਚ੍ਚਨਿਮਿਤ੍ਤਾਦੀਹਿ ਵਿਮੁਤ੍ਤਤ੍ਤਾ, ਤਦਙ੍ਗਵਿਮੁਤ੍ਤਿਭਾਵੇਨ ਵਾ ਵਿਮੁਤ੍ਤਤ੍ਤਾ ਵਿਮੁਤ੍ਤਿਞਾਣਂ. ਮਗ੍ਗੋ ਸਮੁਚ੍ਛੇਦਵਿਮੁਤ੍ਤਿ, ਫਲਂ ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿ, ਪਚ੍ਚਵੇਕ੍ਖਣਞਾਣਂ ਪਨ ਵਿਮੁਤ੍ਤਿਂ ਜਾਨਾਤੀਤਿ ਵਿਮੁਤ੍ਤਿਞਾਣਂ. ਏਵਂ ਚਤੁਬ੍ਬਿਧੇ ਵਿਮੁਤ੍ਤਿਞਾਣੇ ਨਿਪ੍ਪਰਿਯਾਯੇਨ ਫਲਞਾਣਮੇਵ ਵਿਮੁਤ੍ਤਿ. ਸੇਸਾਨਿ ‘‘ਵਿਮੁਤ੍ਤਾਨੀ’’ਤਿ ਵਾ ‘‘ਅਵਿਮੁਤ੍ਤਾਨੀ’’ਤਿ ਵਾ ਨ ਵਤ੍ਤਬ੍ਬਾਨਿ. ਤਸ੍ਮਾ ‘‘ਇਦਂ ਨਾਮ ਵਿਮੁਤ੍ਤਿਞਾਣਂ ਵਿਮੁਤ੍ਤ’’ਨ੍ਤਿ ਅਵਤ੍ਵਾ ਅਵਿਸੇਸੇਨੇਵ ‘‘ਵਿਮੁਤ੍ਤਿਞਾਣਂ ਵਿਮੁਤ੍ਤ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਪਰਵਾਦਿਸ੍ਸ. ਪੁਨ ਯਂਕਿਞ੍ਚੀਤਿ ਪੁਟ੍ਠੋ ਪਚ੍ਚਵੇਕ੍ਖਣਾਦੀਨਿ ਸਨ੍ਧਾਯ ਪਟਿਕ੍ਖਿਪਤਿ. ਪਟਿਪਨ੍ਨਸ੍ਸਾਤਿ ਪੁਟ੍ਠੋ ਮਗ੍ਗਞਾਣਸ੍ਸ ਅਨਾਸਵਤਂ ਸਨ੍ਧਾਯ ਪਟਿਜਾਨਾਤਿ. ਯਸ੍ਮਾ ਪਨ ਤਂ ਸੋਤਾਪਨ੍ਨਸ੍ਸ ਫਲੇ ਠਿਤਸ੍ਸ ਞਾਣਂ ਨ ਹੋਤਿ, ਤਸ੍ਮਾ ਵਿਮੁਤ੍ਤਂ ਨਾਮ ਨ ਹੋਤੀਤਿ ਚੋਦਨਤ੍ਥਂ ਪੁਨ ਸਕਵਾਦੀ ਸੋਤਾਪਨ੍ਨਸ੍ਸਾਤਿਆਦਿਮਾਹ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

ਵਿਮੁਤ੍ਤਿਕਥਾਵਣ੍ਣਨਾ.

੨. ਅਸੇਖਞਾਣਕਥਾਵਣ੍ਣਨਾ

੪੨੧. ਇਦਾਨਿ ਅਸੇਖਕਥਾ ਨਾਮ ਹੋਤਿ. ਤਤ੍ਥ ਯਸ੍ਮਾ ਆਨਨ੍ਦਤ੍ਥੇਰਾਦਯੋ ਸੇਖਾ ‘‘ਉਲ਼ਾਰੋ ਭਗਵਾ’’ਤਿਆਦਿਨਾ ਨਯੇਨ ਅਸੇਖੇ ਜਾਨਨ੍ਤਿ, ਤਸ੍ਮਾ ‘‘ਸੇਖਸ੍ਸ ਅਸੇਖਞਾਣਂ ਅਤ੍ਥੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਜਾਨਾਤਿ ਪਸ੍ਸਤੀਤਿ ਇਦਂ ਅਤ੍ਤਨਾ ਅਧਿਗਤਸ੍ਸ ਜਾਨਨਵਸੇਨ ਵੁਤ੍ਤਂ. ਗੋਤ੍ਰਭੁਨੋਤਿਆਦਿ ਹੇਟ੍ਠਿਮਾਯ ਭੂਮਿਯਂ ਠਿਤਸ੍ਸ ਉਪਰੂਪਰਿਞਾਣਸ੍ਸ ਅਭਾਵਦਸ੍ਸਨਤ੍ਥਂ ਵੁਤ੍ਤਂ. ਨਨੁ ਆਯਸ੍ਮਾ ਆਨਨ੍ਦੋ ਸੇਖੋ ‘‘ਉਲ਼ਾਰੋ ਭਗਵਾ’’ਤਿ ਜਾਨਾਤੀਤਿ ਪਰਵਾਦੀ ਅਸੇਖੇ ਭਗਵਤਿ ਪਵਤ੍ਤਤ੍ਤਾ ਤਂ ਅਸੇਖਞਾਣਨ੍ਤਿ ਇਚ੍ਛਤਿ, ਨ ਪਨੇਤਂ ਅਸੇਖਂ. ਤਸ੍ਮਾ ਏਵਂ ਪਤਿਟ੍ਠਾਪਿਤਾਪਿ ਲਦ੍ਧਿ ਅਪ੍ਪਤਿਟ੍ਠਾਪਿਤਾਵ ਹੋਤੀਤਿ.

ਅਸੇਖਞਾਣਕਥਾਵਣ੍ਣਨਾ.

੩. ਵਿਪਰੀਤਕਥਾਵਣ੍ਣਨਾ

੪੨੪. ਇਦਾਨਿ ਵਿਪਰੀਤਕਥਾ ਨਾਮ ਹੋਤਿ. ਤਤ੍ਥ ‘‘ਯ੍ਵਾਯਂ ਪਥਵੀਕਸਿਣੇ ਪਥਵੀਸਞ੍ਞੀ ਸਮਾਪਜ੍ਜਤਿ, ਤਸ੍ਸ ਤਂ ਞਾਣਂ ਵਿਪਰੀਤਞਾਣ’’ਨ੍ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ, ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਪਥਵਿਂ ਨਿਸ੍ਸਾਯ ਉਪ੍ਪਨ੍ਨਨਿਮਿਤ੍ਤਞ੍ਹਿ ਨ ਪਥਵੀਯੇਵ, ਤਤ੍ਰ ਚਾਯਂ ਪਥਵੀਸਞ੍ਞੀ. ਤਸ੍ਮਾ ਵਿਪਰੀਤਞਾਣਨ੍ਤਿ ਅਯਮੇਤਸ੍ਸ ਅਧਿਪ੍ਪਾਯੋ. ਤਤੋ ਸਕਵਾਦੀ ‘‘ਲਕ੍ਖਣਪਥਵੀਪਿ ਸਸਮ੍ਭਾਰਪਥਵੀਪਿ ਨਿਮਿਤ੍ਤਪਥਵੀਪਿ ਪਥਵੀਦੇਵਤਾਪਿ ਸਬ੍ਬਾ ਪਥਵੀਯੇਵ, ਤਾਸੁ ਪਥਵੀਤਿ ਞਾਣਂ ਵਿਪਰੀਤਂ ਨ ਹੋਤਿ. ਅਨਿਚ੍ਚੇ ਨਿਚ੍ਚਨ੍ਤਿਆਦਿਵਿਪਰਿਯੇਸੋ ਪਨ ਵਿਪਰੀਤਞਾਣਂ ਨਾਮ. ਕਿਂ ਤੇ ਇਦਂ ਏਤੇਸੁ ਅਞ੍ਞਤਰ’’ਨ੍ਤਿ ਚੋਦੇਤੁਂ ਅਨਿਚ੍ਚੇ ਨਿਚ੍ਚਨ੍ਤਿਆਦਿਮਾਹ. ਇਤਰੋ ਵਿਪਲ੍ਲਾਸਲਕ੍ਖਣਾਭਾਵਂ ਸਨ੍ਧਾਯ ਪਟਿਕ੍ਖਿਪਤਿ, ਪਥਵੀਨਿਮਿਤ੍ਤਂ ਸਨ੍ਧਾਯ ਪਟਿਜਾਨਾਤਿ.

ਕੁਸਲਨ੍ਤਿ ਸੇਕ੍ਖਪੁਥੁਜ੍ਜਨਾਨਂ ਞਾਣਂ ਸਨ੍ਧਾਯ ਵੁਤ੍ਤਂ. ਅਤ੍ਥਿ ਅਰਹਤੋਤਿ ਪਞ੍ਹੇਸੁਪਿ ਵਿਪਲ੍ਲਾਸਲਕ੍ਖਣਾਭਾਵੇਨ ਪਟਿਕ੍ਖਿਪਤਿ. ਪਥਵੀਨਿਮਿਤ੍ਤਂ ਸਨ੍ਧਾਯ ਪਟਿਜਾਨਾਤਿ. ਸਬ੍ਬੇਵ ਪਥਵੀਤਿ ਸਬ੍ਬਂ ਤਂ ਪਥਵੀਕਸਿਣਂ ਲਕ੍ਖਣਪਥਵੀਯੇਵ ਹੋਤੀਤਿ ਪੁਚ੍ਛਤਿ. ਸਕਵਾਦੀ ਤਥਾ ਅਭਾਵਤੋ ਪਟਿਕ੍ਖਿਪਤਿ. ਨਨੁ ਪਥਵੀ ਅਤ੍ਥਿ, ਅਤ੍ਥਿ ਚ ਕੋਚਿ ਪਥਵਿਂ ਪਥਵਿਤੋ ਸਮਾਪਜ੍ਜਤੀਤਿ ਪੁਚ੍ਛਾ ਸਕਵਾਦਿਸ੍ਸ. ਤਸ੍ਸਤ੍ਥੋ – ਨਨੁ ਨਿਮਿਤ੍ਤਪਥਵੀ ਅਤ੍ਥਿ, ਅਤ੍ਥਿ ਚ ਕੋਚਿ ਤਂ ਪਥਵਿਂ ਪਥਵਿਤੋਯੇਵ ਸਮਾਪਜ੍ਜਤਿ, ਨ ਆਪਤੋ ਵਾ ਤੇਜਤੋ ਵਾਤਿ. ਪਥਵੀ ਅਤ੍ਥੀਤਿਆਦਿ ‘‘ਯਦਿ ਯਂ ਯਥਾ ਅਤ੍ਥਿ, ਤਂ ਤਥਾ ਸਮਾਪਜ੍ਜਨ੍ਤਸ੍ਸ ਞਾਣਂ ਵਿਪਰੀਤਂ ਹੋਤਿ, ਨਿਬ੍ਬਾਨਂ ਅਤ੍ਥਿ, ਤਮ੍ਪਿ ਸਮਾਪਜ੍ਜਨ੍ਤਸ੍ਸ ਸਬ੍ਬਵਿਪਰਿਯੇਸਸਮੁਗ੍ਘਾਤਨਂ ਮਗ੍ਗਞਾਣਮ੍ਪਿ ਤੇ ਵਿਪਰੀਤਂ ਹੋਤੂ’’ਤਿ ਦਸ੍ਸਨਤ੍ਥਂ ਵੁਤ੍ਤਨ੍ਤਿ.

ਵਿਪਰੀਤਕਥਾਵਣ੍ਣਨਾ.

੪. ਨਿਯਾਮਕਥਾਵਣ੍ਣਨਾ

੪੨੮-੪੩੧. ਇਦਾਨਿ ਨਿਯਾਮਕਥਾ ਨਾਮ ਹੋਤਿ. ਤਤ੍ਥ ਯੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਸ੍ਸਤਿ, ਤਂ ‘‘ਭਬ੍ਬੋ ਏਸ ਧਮ੍ਮਂ ਅਭਿਸਮੇਤੁ’’ਨ੍ਤਿ ਯਸ੍ਮਾ ਭਗਵਾ ਜਾਨਾਤਿ, ਤਸ੍ਮਾ ‘‘ਅਨਿਯਤਸ੍ਸ ਪੁਥੁਜ੍ਜਨਸ੍ਸੇਵ ਸਤੋ ਪੁਗ੍ਗਲਸ੍ਸ ਨਿਯਾਮਗਮਨਾਯ ਞਾਣਂ ਅਤ੍ਥੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਉਤ੍ਤਰਾਪਥਕਾਨਂ; ਤੇ ਸਨ੍ਧਾਯ ਅਨਿਯਤਸ੍ਸਾਤਿ ਪੁਚ੍ਛਾ ਸਕਵਾਦਿਸ੍ਸ. ਤਤ੍ਥ ਨਿਯਾਮਗਮਨਾਯਾਤਿ ਨਿਯਾਮੋ ਵੁਚ੍ਚਤਿ ਮਗ੍ਗੋ, ਮਗ੍ਗਗਮਨਾਯ ਮਗ੍ਗੋਕ੍ਕਮਨਾਯਾਤਿ ਅਤ੍ਥੋ. ਯਂ ਪਨਸ੍ਸ ਞਾਣਂ ਦਿਸ੍ਵਾ ਭਗਵਾ ‘‘ਭਬ੍ਬੋ ਅਯ’’ਨ੍ਤਿ ਜਾਨਾਤਿ, ਤਂ ਸਨ੍ਧਾਯ ਪਟਿਞ੍ਞਾ ਪਰਵਾਦਿਸ੍ਸ.

ਅਥਸ੍ਸ ਸਕਵਾਦੀ ਅਯੁਤ੍ਤਵਾਦਿਤਂ ਦੀਪੇਤੁਂ ਨਿਯਤਸ੍ਸਾਤਿ ਵਿਪਰੀਤਾਨੁਯੋਗਮਾਹ. ਤਤ੍ਥ ਪਠਮਪਞ੍ਹੇ ਮਗ੍ਗੇਨ ਨਿਯਤਸ੍ਸ ਅਨਿਯਾਮਗਮਨਾਯ ਞਾਣਂ ਨਾਮ ਨਤ੍ਥੀਤਿ ਪਟਿਕ੍ਖਿਪਤਿ. ਦੁਤਿਯੇ ਨਤ੍ਥਿਭਾਵੇਨ ਪਟਿਜਾਨਾਤਿ. ਤਤਿਯੇ ਅਨਿਯਤਸ੍ਸ ਨਤ੍ਥੀਤਿ ਪੁਟ੍ਠਤ੍ਤਾ ਲਦ੍ਧਿਵਿਰੋਧੇਨ ਪਟਿਕ੍ਖਿਪਤਿ. ਪੁਨ ਪਠਮਪਞ੍ਹਮੇਵ ਚਤੁਤ੍ਥਂ ਕਤ੍ਵਾ ਨਿਯਤਸ੍ਸ ਨਿਯਾਮਗਮਨਾਦਿਵਸੇਨ ਤਯੋ ਪਞ੍ਹਾ ਕਤਾ. ਤੇਸੁ ਪਠਮੇ ਯਸ੍ਮਾ ਆਦਿਮਗ੍ਗੇਨ ਨਿਯਤਸ੍ਸ ਪੁਨ ਤਦਤ੍ਥਾਯ ਞਾਣਂ ਨਤ੍ਥਿ, ਤਸ੍ਮਾ ਪਟਿਕ੍ਖਿਪਤਿ. ਦੁਤਿਯੇ ਨਤ੍ਥਿਭਾਵੇਨੇਵ ਪਟਿਜਾਨਾਤਿ. ਤਤਿਯੇ ਲਦ੍ਧਿਵਿਰੋਧੇਨੇਵ ਪਟਿਕ੍ਖਿਪਤਿ. ਪੁਨ ਪਠਮਪਞ੍ਹਂ ਅਟ੍ਠਮਂ ਕਤ੍ਵਾ ਅਨਿਯਤਸ੍ਸ ਅਨਿਯਾਮਗਮਨਾਦਿਵਸੇਨ ਤਯੋ ਪਞ੍ਹਾ ਕਤਾ. ਤੇਸਂ ਅਤ੍ਥੋ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਪੁਨ ਪਠਮਪਞ੍ਹਮੇਵ ਦ੍ਵਾਦਸਮਂ ਕਤ੍ਵਾ ਤਂਮੂਲਕਾ ਅਤ੍ਥਿ ਨਿਯਾਮੋਤਿਆਦਯੋ ਪਞ੍ਹਾ ਕਤਾ. ਤਤ੍ਥ ਯਸ੍ਮਾ ਨਿਯਾਮਗਮਨਾਯ ਞਾਣਂ ਨਾਮ ਮਗ੍ਗਞਾਣਮੇਵ ਹੋਤਿ, ਤਸ੍ਮਾ ਤਂ ਸਨ੍ਧਾਯ ਅਤ੍ਥਿ ਨਿਯਾਮੋਤਿ ਵੁਤ੍ਤਂ. ਇਤਰੋ ਪਨ ਨਿਯਾਮੋਤਿ ਵੁਤ੍ਤੇ ਪਟਿਕ੍ਖਿਪਤਿ, ਞਾਣਨ੍ਤਿ ਵੁਤ੍ਤੇ ਪਟਿਜਾਨਾਤਿ. ਸਤਿਪਟ੍ਠਾਨਾਦੀਸੁਪਿ ਏਸੇਵ ਨਯੋ. ਪਚ੍ਚਨੀਕਂ ਉਤ੍ਤਾਨਤ੍ਥਮੇਵ. ਗੋਤ੍ਰਭੁਨੋਤਿਆਦਿ ਯੇਨ ਯਂ ਅਪ੍ਪਤ੍ਤਂ, ਤਸ੍ਸ ਤਂ ਨਤ੍ਥੀਤਿ ਦਸ੍ਸਨਤ੍ਥਂ ਵੁਤ੍ਤਂ. ਭਗਵਾ ਜਾਨਾਤੀਤਿ ਅਤ੍ਤਨੋ ਞਾਣਬਲੇਨ ਜਾਨਾਤਿ, ਨ ਤਸ੍ਸ ਨਿਯਾਮਗਮਨਞਾਣਸਬ੍ਭਾਵਤੋ. ਤਸ੍ਮਾ ਇਮਿਨਾ ਕਾਰਣੇਨ ਪਤਿਟ੍ਠਿਤਾਪਿਸ੍ਸ ਲਦ੍ਧਿ ਅਪ੍ਪਤਿਟ੍ਠਿਤਾਯੇਵਾਤਿ.

ਨਿਯਾਮਕਥਾਵਣ੍ਣਨਾ.

੫. ਪਟਿਸਮ੍ਭਿਦਾਕਥਾਵਣ੍ਣਨਾ

੪੩੨-੪੩੩. ਇਦਾਨਿ ਪਟਿਸਮ੍ਭਿਦਾਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਯਂਕਿਞ੍ਚਿ ਅਰਿਯਾਨਂ ਞਾਣਂ, ਸਬ੍ਬਂ ਲੋਕੁਤ੍ਤਰਮੇਵਾ’’ਤਿ ਗਹੇਤ੍ਵਾ ‘‘ਸਬ੍ਬਂ ਞਾਣਂ ਪਟਿਸਮ੍ਭਿਦਾ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਸਮ੍ਮੁਤਿਞਾਣਪਞ੍ਹੇਸੁ ਪਥਵੀਕਸਿਣਸਮ੍ਮੁਤਿਯਂ ਸਮਾਪਤ੍ਤਿਞਾਣਂ ਸਨ੍ਧਾਯ ਪਟਿਕ੍ਖਿਪਤਿ, ਨਿਰੁਤ੍ਤਿਞਾਣਂ ਸਨ੍ਧਾਯ ਪਟਿਜਾਨਾਤਿ. ਯੇ ਕੇਚਿ ਸਮ੍ਮੁਤਿਨ੍ਤਿ ਪਞ੍ਹੇ ਪੁਥੁਜ੍ਜਨੇ ਸਨ੍ਧਾਯ ਪਟਿਕ੍ਖਿਪਤਿ. ਚੇਤੋਪਰਿਯਾਯਪਞ੍ਹੇਸੁ ਪੁਥੁਜ੍ਜਨਸ੍ਸ ਞਾਣਂ ਸਨ੍ਧਾਯ ਪਟਿਕ੍ਖਿਪਤਿ, ਅਰਿਯਸ੍ਸ ਞਾਣਂ ਸਨ੍ਧਾਯ ਪਟਿਜਾਨਾਤਿ. ਸਬ੍ਬਾ ਪਞ੍ਞਾਤਿਪਞ੍ਹੇਸੁ ਕਸਿਣਸਮਾਪਤ੍ਤਿਪਞ੍ਹਂ ਸਨ੍ਧਾਯ ਪਟਿਕ੍ਖਿਪਤਿ, ਲੋਕੁਤ੍ਤਰਂ ਸਨ੍ਧਾਯ ਪਟਿਜਾਨਾਤਿ. ਪਥਵੀਕਸਿਣਸਮਾਪਤ੍ਤਿਨ੍ਤਿਆਦਿ ‘‘ਯਾ ਏਤੇਸੁ ਏਤ੍ਤਕੇਸੁ ਠਾਨੇਸੁ ਪਞ੍ਞਾ, ਕਿਂ ਸਬ੍ਬਾ ਸਾ ਪਟਿਸਮ੍ਭਿਦਾ’’ਤਿ ਪੁਚ੍ਛਨਤ੍ਥਂ ਵੁਤ੍ਤਂ. ਤੇਨ ਹਿ ਸਬ੍ਬਂ ਞਾਣਨ੍ਤਿ ਯਸ੍ਮਾ ਸਬ੍ਬਾ ਲੋਕੁਤ੍ਤਰਪਞ੍ਞਾ ਪਟਿਸਮ੍ਭਿਦਾ, ਤਸ੍ਮਾ ਸਬ੍ਬਨ੍ਤਿ ਵਚਨਂ ਸਾਮਞ੍ਞਫਲੇਨ ਸਦ੍ਧਿਂ ਪਤਿਟ੍ਠਾਪੇਤੀਤਿ.

ਪਟਿਸਮ੍ਭਿਦਾਕਥਾਵਣ੍ਣਨਾ.

੬. ਸਮ੍ਮੁਤਿਞਾਣਕਥਾਵਣ੍ਣਨਾ

੪੩੪-੪੩੫. ਇਦਾਨਿ ਸਮ੍ਮੁਤਿਞਾਣਕਥਾ ਨਾਮ ਹੋਤਿ. ਤਤ੍ਥ ਸਮ੍ਮੁਤਿਸਚ੍ਚਂ ਪਰਮਤ੍ਥਸਚ੍ਚਨ੍ਤਿ ਦ੍ਵੇ ਸਚ੍ਚਾਨਿ. ਯੇ ਪਨ ਏਵਂ ਵਿਭਾਗਂ ਅਕਤ੍ਵਾ ਸਚ੍ਚਨ੍ਤਿ ਵਚਨਸਾਮਞ੍ਞੇਨ ਸਮ੍ਮੁਤਿਞਾਣਮ੍ਪਿ ‘‘ਸਚ੍ਚਾਰਮ੍ਮਣਮੇਵਾ’’ਤਿ ਵਦਨ੍ਤਿ, ਸੇਯ੍ਯਥਾਪਿ ਅਨ੍ਧਕਾ; ਤੇ ਅਯੁਤ੍ਤਵਾਦਿਨੋਤਿ ਤੇਸਂ ਵਾਦਵਿਸੋਧਨਤ੍ਥਂ ਅਯਂ ਕਥਾ ਆਰਦ੍ਧਾ. ਤਤ੍ਥ ਨ ਵਤ੍ਤਬ੍ਬਨ੍ਤਿ ਪੁਚ੍ਛਾ ਪਰਵਾਦਿਸ੍ਸ, ਪਰਮਤ੍ਥਸਚ੍ਚਂ ਸਨ੍ਧਾਯ ਪਟਿਞ੍ਞਾ ਸਕਵਾਦਿਸ੍ਸ. ਸਮ੍ਮੁਤਿਸਚ੍ਚਮ੍ਹੀਤਿ ਸਮ੍ਮੁਤਿਂ ਅਨੁਪਵਿਟ੍ਠੇ ਸਚ੍ਚਮ੍ਹਿ. ਪਚ੍ਚਤ੍ਤੇ ਵਾ ਭੁਮ੍ਮਵਚਨਂ, ਸਮ੍ਮੁਤਿਸਚ੍ਚਨ੍ਤਿ ਅਤ੍ਥੋ. ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਞ੍ਞੇਵਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਤਤੋ ਨਂ ‘‘ਯਦਿ ਤਂ ਅਵਿਸੇਸੇਨ ਸਚ੍ਚਾਰਮ੍ਮਣਞ੍ਞੇਵ, ਤੇਨ ਞਾਣੇਨ ਦੁਕ੍ਖਪਰਿਞ੍ਞਾਦੀਨਿ ਕਰੇਯ੍ਯਾ’’ਤਿ ਚੋਦੇਤੁਂ ਤੇਨ ਞਾਣੇਨਾਤਿਆਦਿਮਾਹ.

ਸਮ੍ਮੁਤਿਞਾਣਕਥਾਵਣ੍ਣਨਾ.

੭. ਚਿਤ੍ਤਾਰਮ੍ਮਣਕਥਾਵਣ੍ਣਨਾ

੪੩੬-੪੩੮. ਇਦਾਨਿ ਚਿਤ੍ਤਾਰਮ੍ਮਣਕਥਾ ਨਾਮ ਹੋਤਿ. ਤਤ੍ਥ ਚੇਤੋਪਰਿਯਾਯੇ ਞਾਣਨ੍ਤਿ ਵਚਨਮਤ੍ਤਮੇਵ ਗਹੇਤ੍ਵਾ ‘‘ਤਂ ਞਾਣਂ ਚਿਤ੍ਤਾਰਮ੍ਮਣਮੇਵਾ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਏਤਰਹਿ ਅਨ੍ਧਕਾਨਂ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥਸ੍ਸ ‘‘ਯੋ ਸਰਾਗਾਦਿਵਸੇਨ ਚਿਤ੍ਤਂ ਜਾਨਾਤਿ, ਤਸ੍ਸ ਰਾਗਾਦਯੋਪਿ ਆਰਮ੍ਮਣਾ ਹੋਨ੍ਤਿ, ਤਸ੍ਮਾ ਨ ਵਤ੍ਤਬ੍ਬਂ ਤਂ ਚਿਤ੍ਤਾਰਮ੍ਮਣਞ੍ਞੇਵਾ’’ਤਿ ਚੋਦਨਤ੍ਥਂ ਨਨੁ ਅਤ੍ਥਿ ਕੋਚੀਤਿਆਦਿ ਆਰਦ੍ਧਂ. ਫਸ੍ਸਾਰਮ੍ਮਣੇਤਿ ਫਸ੍ਸਸਙ੍ਖਾਤੇ ਆਰਮ੍ਮਣੇ. ਵੇਦਨਾਰਮ੍ਮਣੇਤਿਆਦੀਸੁਪਿ ਏਸੇਵ ਨਯੋ. ਪੁਨ ਫਸ੍ਸਾਰਮ੍ਮਣੇ ਞਾਣਂ ਨ ਵਤ੍ਤਬ੍ਬਨ੍ਤਿ ਪੁਟ੍ਠੋ ਫਸ੍ਸਸ੍ਸ ਫੁਸਨਲਕ੍ਖਣਂ ਮਨਸਿਕਰੋਤੋ ਫਸ੍ਸੋਵਾਰਮ੍ਮਣਂ ਹੋਤੀਤਿ ਪਟਿਜਾਨਾਤਿ. ਕਿਂ ਪਨੇਤਂ ਫਸ੍ਸਪਰਿਯਾਯੇ ਞਾਣਨ੍ਤਿ ਪੁਟ੍ਠੋ ਪਨ ਤਾਦਿਸਸ੍ਸ ਸੁਤ੍ਤਪਦਸ੍ਸ ਅਭਾਵਾ ਪਟਿਕ੍ਖਿਪਤਿ. ਵੇਦਨਾਦੀਸੁਪਿ ਏਸੇਵ ਨਯੋ. ਇਦਾਨਿ ਯਂ ਨਿਸ੍ਸਾਯ ਲਦ੍ਧਿ, ਤਦੇਵ ਦਸ੍ਸੇਤ੍ਵਾ ਲਦ੍ਧਿਂ ਪਤਿਟ੍ਠਾਪੇਤੁਂ ਨਨੁ ਚੇਤੋਪਰਿਯਾਯੇ ਞਾਣਨ੍ਤਿਆਦਿਮਾਹ. ਸਾ ਪਨੇਸਾ ਵਚਨਮਤ੍ਤਾਭਿਨਿਵੇਸੇਨ ਪਤਿਟ੍ਠਾਪਿਤਾਪਿ ਅਪ੍ਪਤਿਟ੍ਠਾਪਿਤਾਵ ਹੋਤੀਤਿ.

ਚਿਤ੍ਤਾਰਮ੍ਮਣਕਥਾਵਣ੍ਣਨਾ.

੮. ਅਨਾਗਤਞਾਣਕਥਾਵਣ੍ਣਨਾ

੪੩੯-੪੪੦. ਇਦਾਨਿ ਅਨਾਗਤਞਾਣਕਥਾ ਨਾਮ ਹੋਤਿ. ਤਤ੍ਥ ਅਨਾਗਤਂ ਨਾਮ ਅਨ੍ਤਰਮ੍ਪਿ ਅਤ੍ਥਿ, ਅਨਨ੍ਤਰਮ੍ਪਿ. ਤੇਸੁ ਅਨਨ੍ਤਰੇ ਏਕਨ੍ਤੇਨੇਵ ਞਾਣਂ ਨਤ੍ਥਿ. ਯਥਾ ਚ ਅਨਨ੍ਤਰੇ, ਤਥਾ ਏਕਵੀਥਿਏਕਜਵਨਪਰਿਯਾਪਨ੍ਨੇਪਿ. ਤਤ੍ਥ ਯੇ ਸਬ੍ਬਸ੍ਮਿਮ੍ਪਿ ਅਨਾਗਤੇ ਞਾਣਂ ਇਚ੍ਛਨ੍ਤਿ, ਸੇਯ੍ਯਥਾਪਿ ਅਨ੍ਧਕਾ; ਤੇ ਸਨ੍ਧਾਯ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਂ ਤੇ ਅਨਾਗਤੇ ਞਾਣਂ, ਕਿਂ ਤੇਨ ਅਨਨ੍ਤਰਂ ਅਨਾਗਤਂ ਮੂਲਾਦਿਵਸੇਨ ਜਾਨਾਤੀ’’ਤਿ ਚੋਦੇਤੁਂ ਅਨਾਗਤਂ ਮੂਲਤੋਤਿਆਦਿਮਾਹ. ਤਤ੍ਥ ਮੂਲਤੋਤਿਆਦੀਨਿ ਸਬ੍ਬਾਨਿ ਕਾਰਣਵੇਵਚਨਾਨੇਵ. ਕਾਰਣਞ੍ਹਿ ਯਂ ਅਤ੍ਤਨੋ ਫਲਂ ਕਰੋਤਿ, ਤਂ ਤਤ੍ਥ ਮੂਲਯਤਿ ਪਤਿਟ੍ਠਾਤੀਤਿ ਮੂਲਂ. ਤਤੋ ਚ ਤਂ ਹਿਨੋਤਿ ਪਵਤ੍ਤਯਤੀਤਿ ਹੇਤੁ. ਤਦੇਵ ਤਂ ਨਿਦੇਤਿ ‘‘ਹਨ੍ਦ ਨਂ ਗਣ੍ਹਥਾ’’ਤਿ. ਨਿਯ੍ਯਾਤੇਤਿ ਵਿਯਾਤਿ ਨਿਦਾਨਂ. ਤਤੋ ਤਂ ਸਮ੍ਭਵਤੀਤਿ ਸਮ੍ਭਵੋ. ਪਭਵਤੀਤਿ ਪਭਵੋ. ਤਤ੍ਥ ਚ ਤਂ ਸਮੁਟ੍ਠਾਤਿ, ਤਂ ਵਾ ਨਂ ਸਮੁਟ੍ਠਾਪੇਤੀਤਿ ਸਮੁਟ੍ਠਾਨਂ. ਤਦੇਵ ਨਂ ਆਹਰਤੀਤਿ ਆਹਾਰੋ. ਤਞ੍ਚਸ੍ਸ ਅਪਰਿਚ੍ਚਜਿਤਬ੍ਬਟ੍ਠੇਨ ਆਰਮ੍ਮਣਂ. ਤਦੇਵ ਚੇਤਂ ਪਟਿਚ੍ਚ ਏਤੀਤਿ ਪਚ੍ਚਯੋ. ਤਤੋ ਨਂ ਸਮੁਦੇਤੀਤਿ ਸਮੁਦਯੋਤਿ ਵੁਚ੍ਚਤਿ. ਯਸ੍ਮਾ ਪਨ ਅਨਨ੍ਤਰਂ ਚਿਤ੍ਤਂ ਏਤੇਹਾਕਾਰੇਹਿ ਨ ਸਕ੍ਕਾ ਜਾਨਿਤੁਂ, ਤਸ੍ਮਾ ਨ ਹੇਵਨ੍ਤਿ ਪਟਿਕ੍ਖਿਪਤਿ. ਅਨਾਗਤਂ ਹੇਤੁਪਚ੍ਚਯਤਨ੍ਤਿ ਯਾ ਅਨਨ੍ਤਰਾਨਾਗਤੇ ਚਿਤ੍ਤੇ ਹੇਤੁਪਚ੍ਚਯਤਾ, ਤਂ ਜਾਨਾਤਿ. ਯੇ ਤਤ੍ਥ ਧਮ੍ਮਾ ਹੇਤੁਪਚ੍ਚਯਾ ਹੋਨ੍ਤਿ, ਤੇ ਜਾਨਾਤੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਗੋਤ੍ਰਭੁਨੋਤਿਆਦਿ ਯਸ੍ਮਿਂ ਅਨਾਗਤੇ ਞਾਣਂ ਨ ਉਪ੍ਪਜ੍ਜਤਿ, ਤਂ ਸਰੂਪਤੋ ਦਸ੍ਸੇਤੁਂ ਵੁਤ੍ਤਂ. ਪਾਟਲਿਪੁਤ੍ਤਸ੍ਸਾਤਿ ਸੁਤ੍ਤਂ ਯਸ੍ਮਿਂ ਅਨਾਗਤੇ ਞਾਣਂ ਉਪ੍ਪਜ੍ਜਤਿ, ਤਂ ਦਸ੍ਸੇਤੁਂ ਆਹਟਂ. ਯਸ੍ਮਾ ਪਨੇਤਂ ਨ ਸਬ੍ਬਸ੍ਮਿਂ ਅਨਾਗਤੇ ਞਾਣਸ੍ਸ ਸਾਧਕਂ; ਤਸ੍ਮਾ ਅਨਾਹਟਮੇਵਾਤਿ.

ਅਨਾਗਤਞਾਣਕਥਾਵਣ੍ਣਨਾ.

੯. ਪਟੁਪ੍ਪਨ੍ਨਞਾਣਕਥਾਵਣ੍ਣਨਾ

੪੪੧-੪੪੨. ਇਦਾਨਿ ਪਟੁਪ੍ਪਨ੍ਨਞਾਣਕਥਾ ਨਾਮ ਹੋਤਿ. ਤਤ੍ਥ ਯੇਸਂ ‘‘ਸਬ੍ਬਸਙ੍ਖਾਰੇਸੁ ਅਨਿਚ੍ਚਤੋ ਦਿਟ੍ਠੇਸੁ ਤਮ੍ਪਿ ਞਾਣਂ ਅਨਿਚ੍ਚਤੋ ਦਿਟ੍ਠਂ ਹੋਤੀ’’ਤਿ ਵਚਨਂ ਨਿਸ੍ਸਾਯ ‘‘ਅਵਿਸੇਸੇਨ ਸਬ੍ਬਸ੍ਮਿਂ ਪਚ੍ਚੁਪ੍ਪਨ੍ਨੇ ਞਾਣਂ ਅਤ੍ਥੀ’’ਤਿ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਪਟੁਪ੍ਪਨ੍ਨੇਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਅਵਿਸੇਸੇਨ ਪਟੁਪ੍ਪਨ੍ਨੇ ਞਾਣਂ ਅਤ੍ਥਿ, ਖਣਪਚ੍ਚੁਪ੍ਪਨ੍ਨੇਪਿ ਤੇਨ ਭਵਿਤਬ੍ਬਂ. ਏਵਂ ਸਨ੍ਤੇ ਦ੍ਵਿਨ੍ਨਂ ਞਾਣਾਨਂ ਏਕਤੋ ਅਭਾਵਾ ਤੇਨੇਵ ਞਾਣੇਨ ਤਂ ਜਾਨਿਤਬ੍ਬਂ ਹੋਤੀ’’ਤਿ ਚੋਦਨਤ੍ਥਂ ਤੇਨਾਤਿ ਅਨੁਯੋਗੋ ਸਕਵਾਦਿਸ੍ਸ. ਤਤ੍ਥ ਪਠਮਪਞ੍ਹੇ ਤੇਨੇਵ ਤਂ ਜਾਨਿਤੁਂ ਨ ਸਕ੍ਕਾਤਿ ਪਟਿਕ੍ਖੇਪੋ ਇਤਰਸ੍ਸ. ਦੁਤਿਯਪਞ੍ਹੇ ਸਨ੍ਤਤਿਂ ਸਨ੍ਧਾਯ ਪਟਿਞ੍ਞਾ ਤਸ੍ਸੇਵ. ਪਟਿਪਾਟਿਤੋ ਭਙ੍ਗਂ ਪਸ੍ਸਨ੍ਤੋ ਭਙ੍ਗਾਨੁਪਸ੍ਸਨੇਨੇਵ ਭਙ੍ਗਾਨੁਪਸ੍ਸਨਾਞਾਣਂ ਪਸ੍ਸਤੀਤਿ ਅਧਿਪ੍ਪਾਯੋ. ਤੇਨ ਞਾਣੇਨ ਤਂ ਞਾਣਂ ਜਾਨਾਤੀਤਿਆਦੀਸੁਪਿ ਏਸੇਵ ਨਯੋ. ਤੇਨ ਫਸ੍ਸੇਨ ਤਂ ਫਸ੍ਸਨ੍ਤਿਆਦੀਨਿਸ੍ਸ ਲੇਸੋਕਾਸਨਿਵਾਰਣਤ੍ਥਂ ਵੁਤ੍ਤਾਨਿ. ਯਂ ਪਨੇਤੇਨ ਲਦ੍ਧਿਪਤਿਟ੍ਠਾਪਨਤ੍ਥਂ ਨਨੁ ਸਬ੍ਬਸਙ੍ਖਾਰੇਤਿਆਦਿ ਵੁਤ੍ਤਂ. ਤਤ੍ਥ ਨਯਤੋ ਤਂ ਞਾਣਂ ਦਿਟ੍ਠਂ ਹੋਤਿ, ਨ ਆਰਮ੍ਮਣਤੋਤਿ ਅਧਿਪ੍ਪਾਯੇਨ ਪਟਿਞ੍ਞਾ ਸਕਵਾਦਿਸ੍ਸ. ਤਸ੍ਮਾ ਏਵਂ ਪਤਿਟ੍ਠਿਤਾਪਿਸ੍ਸ ਲਦ੍ਧਿ ਅਪ੍ਪਤਿਟ੍ਠਿਤਾਵ ਹੋਤਿ.

ਪਟੁਪ੍ਪਨ੍ਨਞਾਣਕਥਾਵਣ੍ਣਨਾ.

੧੦. ਫਲਞਾਣਕਥਾਵਣ੍ਣਨਾ

੪੪੩-੪੪੪. ਇਦਾਨਿ ਫਲੇ ਞਾਣਕਥਾ ਨਾਮ ਹੋਤਿ. ਤਤ੍ਥ ‘‘ਬੁਦ੍ਧਾਪਿ ਸਤ੍ਤਾਨਂ ਅਰਿਯਫਲਪ੍ਪਤ੍ਤਿਯਾ ਧਮ੍ਮਂ ਦੇਸੇਨ੍ਤਿ ਸਾਵਕਾਪਿ, ਇਤਿ ਇਮਿਨਾ ਸਾਮਞ੍ਞੇਨ ਬੁਦ੍ਧਾਨਂ ਵਿਯ ਸਾਵਕਾਨਮ੍ਪਿ ਤੇਨ ਤੇਨ ਸਤ੍ਤੇਨ ਪਤ੍ਤਬ੍ਬੇ ਫਲੇ ਞਾਣਂ ਅਤ੍ਥੀ’’ਤਿ ਯੇਸਂ ਲਦ੍ਧਿ, ਸੇਯ੍ਯਥਾਪਿ ਅਨ੍ਧਕਾਨਂ; ਤੇ ਸਨ੍ਧਾਯ ਸਾਵਕਸ੍ਸਾਤਿ ਪੁਚ੍ਛਾ ਸਕਵਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ. ਅਥ ਨਂ ‘‘ਯਦਿ ਸਾਵਕਸ੍ਸ ਫਲੇ ਞਾਣਂ ਅਤ੍ਥਿ, ਯਥਾ ਬੁਦ੍ਧਾ ਸਮਾਨੇਪਿ ਸੋਤਾਪਤ੍ਤਿਫਲੇ ਅਤ੍ਤਨੋ ਞਾਣਬਲੇਨ ‘ਅਯਂ ਏਕਬੀਜੀ, ਅਯਂ ਕੋਲਂਕੋਲੋ, ਅਯਂ ਸਤ੍ਤਕ੍ਖਤ੍ਤੁਪਰਮੋ’ਤਿ ਫਲਸ੍ਸਕਤਂ ਪਞ੍ਞਪੇਨ੍ਤਿ, ਕਿਂ ਤੇ ਏਵਂ ਸਾਵਕੋਪੀ’’ਤਿ ਚੋਦੇਤੁਂ ਸਾਵਕੋ ਫਲਸ੍ਸ ਕਤਂ ਪਞ੍ਞਪੇਤੀਤਿ ਆਹ. ਇਤਰੋ ਪਟਿਕ੍ਖਿਪਤਿ.

ਅਤ੍ਥਿ ਸਾਵਕਸ੍ਸ ਫਲਪਰੋਪਰਿਯਤ੍ਤੀਤਿਆਦਿ ਫਲੇ ਞਾਣਸ੍ਸ ਅਤ੍ਥਿਤਾਯ ਪਚ੍ਚਯਪੁਚ੍ਛਨਤ੍ਥਂ ਵੁਤ੍ਤਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਬੁਦ੍ਧਾਨਂ ‘‘ਇਦਂ ਫਲਂ ਪਰਂ, ਇਦਂ ਓਪਰ’’ਨ੍ਤਿ ਏਵਂ ਫਲਾਨਂ ਉਚ੍ਚਾਵਚਭਾਵਜਾਨਨਸਙ੍ਖਾਤਾ ਫਲੇ ਪਰੋਪਰਿਯਤ੍ਤਿ ਨਾਮ ਅਤ੍ਥਿ. ਤਥਾ ਇਨ੍ਦ੍ਰਿਯਪੁਗ੍ਗਲਪਰੋਪਰਿਯਤ੍ਤਿਯੋ, ਤਾਸਂ ਅਤ੍ਥਿਤਾਯ ਤਸ੍ਸ ਤਸ੍ਸ ਪੁਗ੍ਗਲਸ੍ਸ ਤੇਸਂ ਤੇਸਂ ਇਨ੍ਦ੍ਰਿਯਾਨਂ ਵਸੇਨ ਤਂ ਤਂ ਫਲਂ ਜਾਨਨ੍ਤਿ, ਕਿਂ ਤੇ ਸਾਵਕਸ੍ਸਾਪਿ ਏਤਾ ਪਰੋਪਰਿਯਤ੍ਤਿਯੋ ਅਤ੍ਥੀਤਿ.

ਅਤ੍ਥਿ ਸਾਵਕਸ੍ਸ ਖਨ੍ਧਪਞ੍ਞਤ੍ਤੀਤਿਆਦੀਨਿਪਿ ‘‘ਯਦਿ ਤੇ ਸਾਵਕਸ੍ਸ ਬੁਦ੍ਧਾਨਂ ਵਿਯ ਫਲੇ ਞਾਣਂ ਅਤ੍ਥਿ, ਇਮਾ ਹਿ ਪਿਸ੍ਸ ਪਞ੍ਞਤ੍ਤੀਹਿ ਭਵਿਤਬ੍ਬਂ. ਕਿਮਸ੍ਸ ਤਾ ਅਤ੍ਥਿ, ਸਕ੍ਕੋਤਿ ਸੋ ਏਤਾ ਪਞ੍ਞਤ੍ਤਿਯੋ ਅਤ੍ਤਨੋ ਬਲੇਨ ਜਾਨਿਤੁਂ ਵਾ ਪਞ੍ਞਪੇਤੁਂ ਵਾ’’ਤਿ ਚੋਦਨਤ੍ਥਂ ਵੁਤ੍ਤਾਨਿ. ਸਾਵਕੋ ਜਿਨੋਤਿਆਦਿ ‘‘ਯਦਿ ਸਾਵਕਸ੍ਸ ਬੁਦ੍ਧਾਨਂ ਵਿਯ ਫਲੇ ਞਾਣਂ ਅਤ੍ਥਿ, ਏਵਂ ਸਨ੍ਤੇ ਸ੍ਵੇਵ ਜਿਨੋ’’ਤਿ ਚੋਦਨਤ੍ਥਂ ਵੁਤ੍ਤਂ. ਸਾਵਕੋ ਅਨੁਪ੍ਪਨ੍ਨਸ੍ਸਾਤਿ ਪਞ੍ਹੇਪਿ ਅਯਮੇਵ ਨਯੋ. ਅਞ੍ਞਾਣੀਤਿ ਪਞ੍ਹੇ ਅਵਿਜ੍ਜਾਸਙ੍ਖਾਤਸ੍ਸ ਅਞ੍ਞਾਣਸ੍ਸ ਵਿਹਤਤ੍ਤਾ ਪਟਿਕ੍ਖਿਤ੍ਤੋ, ਨ ਪਨਸ੍ਸ ਬੁਦ੍ਧਾਨਂ ਵਿਯ ਫਲੇ ਞਾਣਂ ਅਤ੍ਥਿ. ਤਸ੍ਮਾ ਅਪ੍ਪਤਿਟ੍ਠਿਤੋਵ ਪਰਵਾਦੀਵਾਦੋਤਿ.

ਫਲਞਾਣਕਥਾਵਣ੍ਣਨਾ.

ਪਞ੍ਚਮੋ ਵਗ੍ਗੋ.

ਮਹਾਪਣ੍ਣਾਸਕੋ ਸਮਤ੍ਤੋ.