੧. ਵਤ੍ਤ

ਤਦਤ੍ਥਸ੍ਸੇਵਾਤਿ ਤਸ੍ਸ ਕ੍ਰਿਯਤ੍ਥਸ੍ਸ. ਯੋ ਕਿਰਿਯਾਸਙ੍ਖਾਤੋ ਅਤ੍ਤੋ ਤਸ੍ਸੇਵ. ਏਤੇਨ ਆਧਾਰਮੇਤਂ ਕ੍ਰਿਯਤ੍ਥਸ੍ਸਾਤਿ ਞਾਪੇਤਿ. ਨਹਿਚ੍ਚਾਦਿਨਾ ਤਦਤ੍ਥਸ੍ਸੇਵ ਵਿਸੇਸਨੇ ਕਾਰਣਮਾਹ. ਸੁਤ੍ਤਂਵਿਨਾਤਿਪਰੇਸਂਵਿਯ ਸੁਤ੍ਤਂ ਵਿਨਾ. ਤਾਪਿ ਵਤ੍ਤਮਾਨੇਯੇਵ ਭਵਿਸ੍ਸਨ੍ਤੀਤਿ ਇਮਿਨਾ ਵਤ੍ਤੁਮਿਟ੍ਠਤ੍ਤਾਤਿ ਏਤ੍ਥ ਸੇਸਵਚਨਮਵਬੋਧੇਤਿ. ਏਵਕਾਰੇਨਾ (ਤਿ ਵਤ੍ਤਮਾਨਸ੍ਸੇਵਾਤਿ ਏਤ੍ਥ ਏਵਸਦ੍ਦੇਨ.) ਤਬ੍ਬਿਵਚ੍ਛਾਤਿ ਵਤ੍ਤਮਾਨਵਚਨਿਚ੍ਛਾ.

ਤਂਸਮੀਪਸ੍ਸਾਤਿ ਏਤ੍ਥ ਤਸਦ੍ਦੇਨ ਮਹਾਕਸ੍ਸਪਸ੍ਸ ਸੁਭਦ੍ਦਵਚਨਾਨੁਸ੍ਸਰਣਸਙ੍ਖਾਤੋ ਮਰਣਪ੍ਪਤ੍ਤਿਹੇਤੁ ਦੁਕ੍ਖਾਨੁਭਵਸਙ੍ਖਾਤੋ ਚ ਕਿਰਿਯਾਵਿਸੇਸੋ ਪਰਿਗ੍ਗਹਿਤੋ, ਤੇ ਵਾ ਵਤ੍ਤਮਾਨਕਿਰਿਯਾਵਿਸੇਸਾਤਿ ਤੇਸਮੁਭਿਨ੍ਨਮਾਸਨ੍ਨਾਨਿ ਕਮੇਨ ਅਧਮ੍ਮਦੀਪਨਮਰਣਾਨਿ, ਤੇਨਾਹ-ਦੀਪਨ ਮਰਣਾਨਮਾਸਨ੍ਨਤ੍ਤਾ’ਤਿ. ਏਵਂ ਮਞ੍ਞਤੇ ‘‘ਤਕ੍ਕਾਲਵਤ੍ਤਮਾਨਕਿਰਿਯਾਵਿਸੇਸਸ੍ਸ ਦੀਪਨਮਰਣਸਙ੍ਖਾਤਂ ਤਂਸਮੀਪਤਾਵਿਪਿ ਕਿਰਿਯਨ੍ਤਰਂ ਵਤ੍ਤਮਾਨਗ੍ਗਹਣੇਨ ਤਂਸਾਮੀਪ੍ਯਂ ਗਯ੍ਹਤਿ, ਯਥਾ (ਗਙ੍ਗਾਸਮੀਪੋ) ਦੇਸੋ ਗਙ੍ਗਾਤਿ ਵੁਚ੍ਚਤਿ ਤਤੋ ‘ਗਙ੍ਗਾਯਂ ਗਾਵੋ’ਤਿ ਸਿਯਾ’’ਤਿ. ਪੁਰੇ ਇਚ੍ਚਾਦਿਨਾ ਪਕ੍ਖਨ੍ਤਰਂ ਵਿਰਚਿਤਂ ਵੁਤ੍ਤਿਕਾਰੇਨ, ਤਦੁਪਦਸ੍ਸੇਤੁਂ ਮੁਖਯਤਿ ‘ਸਭਾਵਤੋ’ ਇਚ੍ਚਾਦਿ.

ਕਿਰਿਯਾਕਾਲੋਤਿ ਵਤ੍ਤਮਾਨਕਿਰਿਯਾਕਾਲੋ. ਅਵਸਿਸ੍ਸਤੀਤਿ ਪੁਰੇਪੁਰਾਸਦ੍ਦੇਹਿ ਦੀਪਿਤਅਨਾਗਤਕਾਲਤੋ ਅਵਸਿਸ੍ਸਤਿ. ਕਿਰਿਯਾ ਕਾਲੇਤਿ ਦੀਪਨਮਰਣਕਿਰਿਯਾਕਾਲੇ. ਤਸ੍ਸਾਤਿ ਦੀਪਨਮਰਣਸ੍ਸ. ਵਤ੍ਤਮਾਨਤ੍ਤਾਤਿ ਏਤ੍ਥ ਵਤ੍ਤਮਾਨੇਯੇਵ ਭਵਿਸ੍ਸਨ੍ਤੀਤਿ ਸੇਸੋ. ਅਨੇਨਾਤਿ ਪੁਰੇਚ੍ਚਾਦਿਵੁਤ੍ਤਿਵਚਨੇਨ. ਪੁਰੇਪੁਰਾਸਦ੍ਦੇਹਿ ਅਨਾਗਤਕਾਲਾਵਗਮੇ ਸਤਿ ਦਿਪ੍ਪਤਿ ਮਰਤੀਤਿ ਏਤ੍ਥ ਦੀਪਨਮਰਣਕਿਰਿਯਾਕਾਲੋ ਮੁਖ੍ਯੇ ਤਦਾ ਵਤ੍ਤਤੀਤਿਆਹ- ‘ਮੁਖ੍ਯਂ ਵਤ੍ਤਮਾਨਤ੍ਤਮਾਹੇ’ਤਿ. ਪੁਨ ਪਕ੍ਖਨ੍ਤਰਮੁਪਨੀਤਂ ਕਾਲੇਚ੍ਚਾਦਿਨਾ ਵੁਤ੍ਤਿਕਾਰੇਨ, ਤਮੁਪਦਸ੍ਸੇਤੁਂ ਮੁਖਮਾਵਤ੍ਤਯਤਿ ‘ਅਨਾਗਤੇ’ਚ੍ਚਾਦਿ.

ਵੁਤ੍ਤਿਯਂ ਕਾਲਬ੍ਯਤ੍ਤਯੋਤਿ ਕਾਲਾਤਿਵਤ੍ਤਨਂ, ਵਤ੍ਤਮਾਨਕਾਲਾਤਿਕ੍ਕਮੇਨ ਅਨਾਗਤਕਾਲੇਪਿ ਬਾਹੁਲਕਾਤ੍ਯਾਦਯੋ ਹੋਨ੍ਤੀਤਿ ਅਧਿਪ੍ਪਾਯੋ. ਤਦੇਵ ਸਮਤ੍ਥੇਤਿ ‘ਭਵਨ੍ਤੇਵ’ਇਚ੍ਚਾਦਿਨਾ. ਤ੍ਯਾਦਯੋਤੀਮਿਨਾ ਸਬ੍ਬੇਸਂ ਆਖ੍ਯਾਤਿਕਾਨਂ ਗਹਣਂ. ਲਸ੍ਸ ਦੀਘੋਤਿ ਸਮ੍ਬਨ੍ਧੋ. ਗਚ੍ਛਤੀਤਿ ਸਕ੍ਕਸ੍ਸ ਸਹਭਾਵਂ ਗਮਿਸ੍ਸਤੀਤਿ ਅਤ੍ਥੋ.