੩. ਨਾਮੇ

ਪਟਿਜਾਨਿਸ੍ਸਨ੍ਤੀਤਿ ਵਤ੍ਤਮਾਨੇ ਅਨਾਗਤਵਚਨਂ, ਪਟਿਜਾਨਨ੍ਤੀਤਿ ਅਤ੍ਥੋ. ਇਤਰਮ੍ਪਨ ਭੂਤੇ ਭਵਿਸ੍ਸਤੀਤਿ ਆਸਿ, ਕਰਿਸ੍ਸਤੀਤਿ ਅਕਰਿ, ਚੇਤੇ ਸ੍ਸਸੀਤਿ ਚੇਤਿਤਾ ਅਸਿ, ਭੁਞ੍ਜਿਸ੍ਸਸੀਤਿ ਭੁਞ੍ਜਿਤਾ ਅਸਿ. ਅਨੋਕਪ੍ਪਨਾ ਅਸ੍ਸਦ੍ਧਾ. ਅਮਰਿਸਨਂ ਅਕ੍ਖਮਾ. ਇਮਿਨਾਵਾਤਿ ਅਤ੍ਥਿਵਚਨੇ ਉਪਪਦੇ ਕੋਧਾ ਸਦ੍ਧਾਸੁ ਗਮ੍ਮਮਾਨੇਸ੍ਵ-ਸਤੀਪਿ ਵਚਨਨ੍ਤਰੇ ਇਮਿਨਾਵ ਸਾਮਞ੍ਞਵਚਨੇਨ ਸਿਦ੍ਧਨ੍ਤਿ ਅਤ੍ਥੋ. ਗਰਹਾਵਮਾਤਿ ਤਸ੍ਸ ਹੇਤੁਵਚਨਂ. ਤਥਾਹਿਚ੍ਚਾਦਿਨਾ ਗਰਹਾਵਗਮਮੇਵ ਸਮਤ੍ਥੇਤਿ. ਅਤ੍ਥਿਨਾਮ ਈਦਿਸਨ੍ਤਿ [ਅਤ੍ਥਿਨਾਮਾਤਿ (ਪੋਤ੍ਥਕੇ)] ਆਭਿਦੋਸਿਕਸ੍ਸ ਕੁਮ੍ਮਾਸਸ੍ਸ ਪਰਿਭੁਞ੍ਜਨਂ ਵਿਜ੍ਜਤੇ ਨਾਮਾਤਿ ਅਤ੍ਥੋ. ਵਿਜ੍ਜਮਾਨਮ੍ਪਿ ਤਂ ਅਸਦ੍ਦਹਨ੍ਤੋ ਅਮਰਿਸਨ੍ਤੋ ਏਵਂ ਵਦਤਿ. ਨਤ੍ਥੀਤਿ ਮਞ੍ਞੇਤਿ ਅਧਿਪ੍ਪਾਯੋ, ਤੇਨਾਹ- ‘ਪਚ੍ਚਕ੍ਖਮਪੀ’ਤਿ [ਈਦਿਸਮ੍ਪੀਤਿ] ਆਦਿ. ਯੋਪੀਤਿ ਸਦ੍ਦਸ੍ਸ ਸੋਪੀਤਿ ਤਸਦ੍ਦੇਨ ਸਮ੍ਬਨ੍ਧੋ ਵੇਦਿਤਬ੍ਬੋ. ਅਤ੍ਥੀਤਿ ਵਿਜ੍ਜਮਾਨਤ੍ਥੇਤਿ ਵੁਤ੍ਤਵਿਜ੍ਜਮਾਨਤ੍ਥੋ ਵਕ੍ਖਮਾਨਪਕ੍ਖਤ੍ਤਯੇਪਿ ਦਟ੍ਠਬ੍ਬੋ.

ਨਨੁ ਅਤ੍ਥਿਨਾਮ ਤਾਤਾਤਿ ਏਤ੍ਤਕੇ ਵੁਤ੍ਤੇ ਪਠਮੋ ਅਤ੍ਥਿਨੁਖੋਚ੍ਚਾਦਿਕੋ ਨਿਸੀਦਿਤ੍ਵਾਤਿ ਸਦ੍ਦਪਰਿਯਨ੍ਤੋ ਚ, ਦੁਤਿਯੋ ਅਤ੍ਥਿਨੁਖੋਚ੍ਚਾਦਿਕੋ ਨਿਸੀਦਿਤ੍ਵਾਤਿ ਸਦ੍ਦਪਰਿਯਨ੍ਤੋ ਚ ਤਤਿਯੋ ਅਤ੍ਥਿਮਞ੍ਞੇਚ੍ਚਾਦਿਕੋ ਜਿਗੁਚ੍ਛਨੇਯ੍ਯਨ੍ਤਿ ਸਦ੍ਦਪਰਿਯਨ੍ਤੋ ਚ ਵਚਨਪ੍ਪਬਨ੍ਧੋ ਕਥਂ ਲਬ੍ਭਤੀਤਿ ਮਨਸਿ ਨਿਧਾਯਾਹ- ‘ਸੋਪਨਾ’ਤਿਆਦਿ. ਇਮਿਨਾਤਿ ‘ਅਤ੍ਥਿਯੇਵਿਹਾਪਿ ਨਿਨ੍ਦਾਵਗਮੋ’ਤਿ ਵਚਨੇਨ. ਠਾਨਭੋਜਨੇ ਗਰਹਤੀਤਿ ਸਮ੍ਬਨ੍ਧੋ. ਵੁਤ੍ਤਂ ਸਕ੍ਕਤਾਨੁਸਾਰੇਨ. ਨਿਸ੍ਸਾਯਨਿਸ੍ਸਾਯਾਤਿ ਯਤ੍ਥ ਭਗਵਾ ਨਿਸਿਨ੍ਨੋ ਤਂ ਠਾਨਂ ਨਿਸ੍ਸਾਯ ਨਿਸ੍ਸਾਯ.