੮੦. ਦਣ੍ਡਾ

ਦ੍ਵੇ ਹੋਨ੍ਤੀਤਿ ਇਕੋ ਈਚੇਤਿ ਦ੍ਵੇ ਹੋਨ੍ਤਿ, ਏਕਮੇਕਂਵਾਤਿ ਉਭਿਨ੍ਨਂ. ਵਾਸਦ੍ਦੋ ਦ੍ਵੇ ਹੋਨ੍ਤੀਤਿ ਏਤ੍ਥਾਪਿ ਦਟ੍ਠਬ੍ਬੋ. ਉਤ੍ਤਮੀਣੇਵ ਧਨਾ ਇਕੋਤਿ ਗਣਸੁਤ੍ਤਂ ਵਿਵਰਤਿ ‘ਉਤ੍ਤਮੀਣੇਵਾ’ਤਿਆਦਿ. ਕੇਨੇਤ੍ਥ ਸਮਾਸੋਤਿ ਆਹ- ‘ਸ੍ਯਾਦਿਸ੍ਯਾਦਿਨੇਕਤ੍ਥਨ੍ਤਿ ਸਮਾਸੋ’ਤਿ. ਉਤ੍ਤਮੀਣੋ ਧਨਸਾਮੀ. ਅਸਨ੍ਨਿਹਿਤੇ ਅਤ੍ਥਾਤਿ ਗਣਸੁਤ੍ਤਂ, ਅਸਨ੍ਨਿਹਿਤੇਤੀਮਸ੍ਸ ਅਤ੍ਥਂ ਵਿਵਰਤਿ ‘ਅਪ੍ਪਤ੍ਤੇ’ਤਿ. ਅਸਮ੍ਪਤ੍ਤੇਤਿ ਅਤ੍ਥੋ. ਅਸਨ੍ਨਿਹਿਤੇਤਿ ਚ ਅਤ੍ਥੋ ਇਚ੍ਚਸ੍ਸ ਵਿਸੇਸਨਂ. ਅਤ੍ਥਨਂ ਅਸਨ੍ਨਿਹਿਤੇ ਅਤ੍ਥੇ ਆਸਿਸਨਂ ਅਤ੍ਥੋ, ਸੋ ਅਸ੍ਸ ਅਤ੍ਥੀਤਿ ਅਤ੍ਥਿਕੋ ਅਤ੍ਥੀ. ਤਦਨ੍ਤਾਚਾਤਿ ਗਣਸੁਤ੍ਤਂ, ਅਸਨ੍ਨਿਹਿਤੇਤ੍ਯਨੁਵਤ੍ਤਤੇ, ਅਸਨ੍ਨਿਹਿਤੋਪਾਧਿਕਾ ਅਤ੍ਥਨ੍ਤਾ ਚ ਇਕ ਈਪ੍ਪਚ੍ਚਯੋ ਭਵਤੀਤ੍ਯਤ੍ਥੋ. ਵਣ੍ਣਨ੍ਤਾਈਯੇਵਾਤਿ ਗਣਸੁਤ੍ਤਂ, ਬ੍ਰਹ੍ਮਾਨਂ ਦੇਵਾਨਂ ਵਣ੍ਣੋਤਿ ਵਾ ਸਮਾਸੋ. ਹਤ੍ਥਦਨ੍ਤੇਹਿ ਜਾਤਿਯਨ੍ਤਿ ਗਣਸੁਤ੍ਤਂ.

ਜਾਤਿਯਨ੍ਤਿ ਪਚ੍ਚਯਵਿਸੇਸਨਂ. ਵਣ੍ਣਤੋ ਬ੍ਰਹ੍ਮਚਾਰਿਮ੍ਹੀਤਿ ਗਣਸੁਤ੍ਤਂ. ਬ੍ਰਹ੍ਮਸਦ੍ਦੇਨ ਨਿਯਮਵਿਸੇਸੋ ਵੁਚ੍ਚਤਿਚ੍ਚਾਹ-‘ਵਿਜ੍ਜੇ’ਚ੍ਚਾਦਿ. ਤਸ੍ਮਿਞ੍ਚਨਿਯਮਵਿਸੇਸਚਰਣੇ ਤਿਣ੍ਣਂ ਬ੍ਰਾਹ੍ਮਣਾਦੀਨਮੇਵਾਧਿਕਾਰੋ, ਨਸੁਦ੍ਦਸ੍ਸਾਤਿ ਦਸ੍ਸੇਨ੍ਤੋ ਆਹ- ‘ਤਞ੍ਚੇ’ਚ੍ਚਾਦਿ. ਤੇਵਣ੍ਣਿਕੋ ਵਣ੍ਣੀਤਿ ਵੁਚ੍ਚਤੀਤਿ ਸਮ੍ਬਨ੍ਧੋ. ਤੀਸੁ ਵਣ੍ਣੇਸੁ ਭਵੋ ਤਦਨ੍ਤੋਗਧਤ੍ਤਾ ਤੇਵਣ੍ਣਿਕੋਤਿ ਭਵਤ੍ਥੇ ਣਿਕੋ. ਵਣ੍ਣਸਦ੍ਦੋ ਬ੍ਰਾਹ੍ਮਣਾਦਿਵਣ੍ਣਵਚਨੋ. ਤਤ੍ਰ ਬ੍ਰਹ੍ਮਚਾਰਿਮ੍ਹਿਤ੍ਯਨੇਨ ਸੁਦ੍ਦੋ ਬ੍ਯਵਚ੍ਛਿਜ੍ਜਤੇ.

ਅਥਵਾ ਬ੍ਰਹ੍ਮਨ੍ਤਿ ਨਿਬ੍ਬਾਨਂ ਤਦਤ੍ਥੋ ਗਨ੍ਥੋਪਿ, ਤਂ ਬ੍ਰਹ੍ਮਂ ਨਿਬ੍ਬਾਨਂ ਧਮ੍ਮਂ ਵਾ ਤੇਪਿਟਕਂ ਚਰਤੀਤਿ ਬ੍ਰਹ੍ਮਚਾਰੀ, ਯਤਿ. ਯਤਯੋਪਿ ਹਿ ਵਣ੍ਣੀਤਿ ਬ੍ਰਹ੍ਮਚਾਰਿਨੋਤਿ ਵੁਚ੍ਚਨ੍ਤਿ. ਵਣ੍ਣੀਲਿਙ੍ਗੀਤਿ ਹਿ ਵੁਤ੍ਤੇ ਤਿਲਿਙ੍ਗਵਾਤਿ ਅਤ੍ਥੋ. ਵਣ੍ਣ ਸਦ੍ਦੋ ਪਨੇਤ੍ਥ ਯਥਾਵੁਤ੍ਤ ਬ੍ਰਹ੍ਮਪਰਿਯਾਯੋ. ਪੋਕ੍ਖਰਾਦਿਤੋ ਦੇਸੇਤਿ ਗਣਸੁਤ੍ਤਂ. ਦੇਸੋ ਚੇਤ੍ਥ ਯਤ੍ਥ(ਤ੍ਥਿ ਪੋਕ੍ਖਰਾਦੀਨਿ ਸੋ). ਪਦੁਮਗਚ੍ਛ ਪੋਕ੍ਖਰਣੀਨਂ ਵਾਚਕਸ੍ਸਾਤਿ ਇਮਿਨਾ ਪਦੁਮਾਨਿ ਅਸ੍ਸਂ ਸਨ੍ਤੀਤਿ ਪਦੁਮਿਨੀਤਿ ਪੋਕ੍ਖਰਣੀਪਿ ਵੁਚ੍ਚਤੀਤਿ ਦਸ੍ਸੇਤਿ. ਨਾਵਾ ਅਤ੍ਥੀਤਿ ਨਾਵਿਕੋ, ਯਾਗਮੇ ਨਾਵਾਯਿਕੋ. ਸੁਖਦੁਕ੍ਖਾ ਈ, ਬਲਾ ਬਾਹੂਰੁਪੁਬ੍ਬਾ ਚੇਤਿ ਚ ਗਣਸੁਤ੍ਤਾਨਿ.