੨੮. ਤਂਹਨ੍ਤਿ

ਬਹੁਮ੍ਹਿ ਭੂਤਾਨਗਤੇਸੁਪਿ ਪਚ੍ਚਯਭਾਵੇ ਕਾਰਣਮਾਹ-‘ਸਙ੍ਖ੍ਯਾਕਾਲਾਨਮਵਿਵਚ੍ਛਿਤਤ੍ਤਾ’ਤਿ, ਸੁਤ੍ਤੇ ਵੁਤ੍ਤਾਯ ਏਕਸਙ੍ਖ੍ਯਾਯ ਵੁਤ੍ਤਮਾਨਕਾ ਲਸ੍ਸੇਵ ਚ ਵਤ੍ਤੁਮਨਿਚ੍ਛਿਤਤ੍ਤਾਤਿ ਅਤ੍ਥੋ.

ਤਦੁਪਾਦਾਨਨ੍ਤੂਤਿ ਤੇਸਮੇਕਵਚਨਾਦੀਨਮੁਪਾਦਾਨਨ੍ਤੁ. ਤਂ ਨਾਨਨ੍ਤਰੀਯ ਕਤ੍ਤਾਤਿ ਉਪਲਕ੍ਖਣਵਸੇਨ ਤੇਸਂ ਵਚਨਕਾਲਨ੍ਤਰਾਨਮਵਿਨਾਭਾਵਿਤ੍ਤਾਤਿ ਅਧਿਪ੍ਪਾਯੋ. ਹਨ੍ਤਿਚ੍ਚਾਦਿਤ੍ਯਾਦ੍ਯਨ੍ਤਸ੍ਸ ਕਿਰਿਯਾਪ੍ਪਧਾਨਤ੍ਤੇ ਕਥਂ ਣਾਦੀਨਂ ਤਦਤ੍ਥੇ ਜਾਯਮਾਨਾਨਂ ਸਾਧਨਪ੍ਪਧਾਨਤ੍ਤ ਮਿਚ੍ਚਤ੍ਰ ਹੇਤੁਮਾਹ ‘ਸਭਾਵਤੋ’ਤਿ. ਮੀਨੇ ਹਨ੍ਤੀਤਿ ਮੇਨਿਕੋ. ਅਜਿਵ੍ਹਾ ਅਨਿਮਿਸਾ ਚ ਮਚ੍ਛਾ, ਦਿਟ੍ਠੋਵ ਸਨ੍ਦਿਟ੍ਠਨ੍ਤਿ ਇਮਿਨਾ ਸਂਸਦ੍ਦਸ੍ਸ ਵਿਸੁਂ ਅਤ੍ਥਭਾਵਂ ਦਸ੍ਸੇਤਿ. ਲੋਕੁਤ੍ਤਰਧਮ੍ਮੋਤਿ ਨਵਵਿਧੋ ਲੋਕੁਤ੍ਤਰਧਮ੍ਮੋ, ਫਲਧਮ੍ਮੋਪਿ ਹੇਟ੍ਠਿਮੋ ਸਕਦਾਗਾਮਿਵਿਪਸ੍ਸਨਾਦੀਨਂ ਪਚ੍ਚਯਭਾਵੇਨ ਉਪਰਿਮਗ੍ਗਾਧਿਗਮਸ੍ਸ ਉਪਨਿਸ੍ਸਯਭਾਵਤੋ ਪਰਿਯਾਯਤੋ ਦਿਸ੍ਸਮਾਨੋਵ ਵਟ੍ਟਭਯਂ ਨਿਵਤ੍ਤੇਤਿ, ਭਾਵਨਾਭਿਸਮਯਵਸੇਨ ਮਗ੍ਗਧਮ੍ਮੋ ਸਚ੍ਛਿਕਿਰਿਯਾਭਿਸਮਯਵਸੇਨ ਨਿਬ੍ਬਾਨਧਮ੍ਮੋ.

ਵਟ੍ਟਭਯਨ੍ਤਿ ਕਮ੍ਮਕਿਲੇਸਵਿਪਾਕਸਙ੍ਖਾਤਂ ਤਿਵਿਧਵਟ੍ਟਭਯਂ. ਵਿਧਾਨ ਵਚਨਨ੍ਤਿ ਅਪ੍ਪਤ੍ਤੇ-ਤ੍ਥੇ ਨਿਯੋਗਸਙ੍ਖਾਤਵਿਧਿਨੋ ਪਕਾਸਤਂ ਏਹਿਪਸ੍ਸ ਵਚਨਂ. ਪਰਿਸੁਦ੍ਧਤ੍ਤਾਤਿ ਕਿਲੇਸਮਲਵਿਰਹੇਨ ਸਬ੍ਬਥਾ ਵਿਸੁਦ੍ਧਤ੍ਤਾ. ਅਮਨੁਞ੍ਞਮ੍ਪਿ ਕਦਾਚਿ ਸਪ੍ਪਯੋਜਨਂ ਯਥਾਸਭਾਵਪ੍ਪਕਾਸਨੇਨ ਦਸ੍ਸੇਤਬ੍ਬਂ ਭਵੇਯ੍ਯਾਤਿ ਤਦਭਾਵਂ ਦਸ੍ਸੇਤਿ. ਤੇਨਾਹ ‘ਵਿਜ੍ਜਮਾਨਮ੍ਪਿ ਚੇ’ਚ੍ਚਾਦਿ. ਨਨੁ ਚ ਏਹਿਪਸ੍ਸਾਤਿ ਤ੍ਯਾਦ੍ਯਨ੍ਤਾ, ਤਸ੍ਮਾ ਨੇਤੇਤਿ ਪਚ੍ਚਯੋ ਪਪ੍ਪੋਤਿ, ਤਥਾਹਿ ਪਾਟਿਪਦਿਕਤੋ ਪਚ੍ਚਯਵਿਧਾਨਮ੍ਪਟਿਪਾਦਿਤਂ, ਨ ਤ੍ਯਾਦ੍ਯਨ੍ਤਤੋ ਨਾਪਿ ਵਾਕ੍ਯਤੋ, ਤਸ੍ਮਾ ਕਥਮੇਹਿਪਸ੍ਸਿਕੋਤਿ ਹੋਤੀਤਿ ਆਹ-‘ਏਹਿਪਸ੍ਸਸਦ੍ਦੋਚਾਯ’ਮਿਚ੍ਚਾਦਿ. ਪਦਸਮੁਦਾਯਸ੍ਸਾਨੁਕਰਣੋਤਿ ਪਦਸਮੂਹਸ੍ਸ ਅਨੁਕਰਣਭੂਤੋ ਏਕੋ ਏਹਿਪਸ੍ਸਸਦ੍ਦੋ. ਅਥਵਾ ਏਹਿ ਆਗਚ੍ਛ ਇਮਂ ਧਮ੍ਮਂ ਪਸ੍ਸਾਤਿ ਯੋ ਅਪ੍ਪਤ੍ਤੇ-ਤ੍ਥੇ ਨਿਯੋਗਸਙ੍ਖਾਤੋ ਵਿਧਿ, ਤਬ੍ਬਾਚਕੋ ਯਨ੍ਨਿਪਾਤੋ ਏਹਿਪਸ੍ਸਾਤਿ, ਏਹਿਪਸ੍ਸਵਿਧਿਂ ਅਰਹਤੀਤਿ ਏਹਿਪਸ੍ਸਿਕੋ, ਅਥਵਾ ਏਹਿਚ੍ਚੇਵ ਨਿਪਾਤੋ, ਦਸ੍ਸਨਂ ਞਾਪਨਂ ਪਸ੍ਸੋ, ਏਹੀਤਿ ਪਸ੍ਸੋ ਞਾਪਨਂ ਏਹਿਪਸ੍ਸੋ, ਏਹਿਪਸ੍ਸਂ ਅਰਹਤੀਤਿ ਏਹਿਪਸ੍ਸਿਕੋ.