੧੩. ਸਾਸ੍ਸ

ਸੇਤਿ ਪਠਮਨ੍ਤਾਤਿ ਸਾਤਿ ਨਿਦ੍ਦਿਟ੍ਠਪਠਮਨ੍ਤਾ, ਯਂ ਪਠਮਨ੍ਤਨ੍ਤਿ ਸਾਚੇਤਿ ਦਸ੍ਸਿਤਂ ਪਠਮਨ੍ਤਮਾਹ. ਪਠਮਨ੍ਤਸ੍ਸ ਦੇਵਤਾਪੁਣ੍ਣਮਾਸਿਤ੍ਤਭਾਵਤੋ ਤਦਤ੍ਥਮਭੇਦੇਨਾਹ- ‘ਸਾ’ਤਿ. ਕਾ ਸਾ ਦੇਵਤਾਚ੍ਚਾਹ- ‘ਲੋਕਪ੍ਪਸਿਦ੍ਧਾਯੇਵ ਦੇਵਤਾ’ਤਿ. ਯਾਗਸਮ੍ਪਦਾਨਮ੍ਪਿ ਲੋਕੇ ਦੇਵਤਾਤਿ ਪਸਿਦ੍ਧਨ੍ਤਿ ਯਾਗਸ੍ਸ ਯਜਿਤਬ੍ਬਸ੍ਸ ਪੁਰੋਡਾਸਾਦਿਨੋ ਸਮ੍ਪਦਾਨਮ੍ਪਿ ਪਟਿਗ੍ਗਾਹਕੋ ਪਿਨ੍ਦਾਦਿ ਲੋਕੇ ਦੇਯ੍ਯਸ੍ਸ ਪੁਰੋਡਾਸਾਦਿਨੋ ਦੇਵਤਾ ਸਾਮੀਤਿ ਪਸਿਦ੍ਧਨ੍ਤ੍ਯਤ੍ਥੋ, ਇਨ੍ਦੋ ਦੇਵਤਾ ਅਸ੍ਸ ਇਨ੍ਦਂ, ਆਦਿਚ੍ਚੋ ਦੇਵਤਾ ਅਸ੍ਸ ਆਦਿਚ੍ਚਂ, ਹਵਿ ਪੁਰੋਡਾਸਾਦਿ ਯਾਗਦਬ੍ਬਂ.

ਮਨ੍ਤਥੋਮਨੀਯਮ੍ਪਿ ਦੇਵਤਾਤਿ ਪਸਿਦ੍ਧਨ੍ਤਿ ਯੇਨ ਮਨ੍ਥੇਨ ਯੋ ਥੂਯਤੇ ਸੋ ਤਸ੍ਸ ਮਨ੍ਤਸ੍ਸ ਦੇਵਤਾ ਸਾਮੀਤਿ ਲੋਕੇ ਪਸਿਦ੍ਧਨ੍ਤ੍ਯਤ੍ਥੋ ਮਹਿਨ੍ਦੋ ਯਮੋ ਵਰੁਣੋ ਦੇਵਤਾ ਅਸ੍ਸਾਤਿ ਵਿਗ੍ਗਹੋ. ਵੁਤ੍ਤਨਯ ਮੇਵਾਤਿ ‘‘ਨਕ੍ਖਤ੍ਤੇਨਿਨ੍ਦੁਯੁਤ੍ਤੇਨ ਕਾਲੇ’’ਤਿ ਸੁਤ੍ਤੇ ਵੁਤ੍ਤਨਯਮੇਵ. ਜਾਤ੍ਯੇਕਵਚਨਂ ਮਘਾਯਾਤਿ, ਤਾਰਕਰੂਪਾਨਮ੍ਪਨ ਬਹੁਤ੍ਤਾ ਮਘਾਸਦ੍ਦੋ ਬਹੁਵਚਨਨ੍ਤੋ. ਪਾਣਿਨੀਯਾ ‘‘ਸਾਸ੍ਮਿਂ ਪੁਣ੍ਣਮਾਸੀਤਿ ਸਞ੍ਞਾਯ’’ਨ੍ਤਿ (੪-੨-੨੧) ਸੁਤ੍ਤਯਿਤ੍ਵਾ ਫੁਸ੍ਸੀ ਪੁਣ੍ਣਮਾਸੀ ਅਸ੍ਮਿਂ ਫੁਸ੍ਸੋ ਮਾਸੋ ਫੁਸ੍ਸੋ ਅਦ੍ਧਮਾਸੋ ਫੁਸ੍ਸੋ ਸਂਵਚ੍ਛਰੋਤਿ ਸਞ੍ਞਾਯਂ ਪਟਿਪਾਦੇਨ੍ਤਿ, ਤੇਨ ਤੇਸਂ ਫੁਸ੍ਸੀ ਪੁਣ੍ਣਮਾਸੀ ਅਸ੍ਮਿਂ ਪਞ੍ਚਦਸਰਤ੍ਤੇਤਿ ਏਤ੍ਥ ਚ ਭਤਕਮਾਸੇ ਚ ਤਦ੍ਧਿਤੋ ਨ ਭਵਤਿ. ਇਧ ਪਨ ‘ਸਞ੍ਞਾਯ’ਨ੍ਤਿ ਵਚਨਾਭਾਵੇ ਭਤਕਮਾਸੇਪਿ ਛਟ੍ਠ੍ਯਤ੍ਥੇ ਭਵਤੀਤ੍ਯਾਸਙ੍ਕ ਵਿਰਚਯਤਿ ‘ਭਤਕਮਾਸੇਪਿ’ਚ੍ਚਾਦਿ. ਪੁਣ੍ਣੋ ਮਾ ਇਚ੍ਚਤ੍ਰ ਮਾਸਦ੍ਦੋ ਚਨ੍ਦਪਰਿਯਾਯੋਤਿ ਆਹ- ‘ਮਾਸਦ੍ਦੇਨੇ’ਚ੍ਚਾਦਿ. ਪੁਣ੍ਣੋ ਮਾ ਅਸ੍ਸਨ੍ਤਿ ਨਿਬ੍ਬਚਨਾਤਿ ਏਤ੍ਥ ਪੁਣ੍ਣਮਾਸੀਸਦ੍ਦਸ੍ਸ ਪੁਣ੍ਣੋ ਮਾ ਅਸ੍ਸਨ੍ਤਿ ਨੀਹਰਿਤ੍ਵਾ ਵਚਨਾਤਿ ਅਤ੍ਥੋ. ਵੁਤ੍ਤਿਯਾ ਅਤ੍ਥਸ੍ਸ ਫੁਟੀਕਰਣਾਯ ਵੁਤ੍ਤਂ- ‘ਸੋ ਪੁਣ੍ਣੋ ਤਿਆਦਿ. ਤਸ੍ਸਨ੍ਤਿ ਪੁਣ੍ਣਮਾਸਿਯਂ. ਸਾਪੁਣ੍ਣਮਾਸੀ, ਭਤਕਸ੍ਸ ਭਤਿਯਾ ਕਮ੍ਮਕਾਰਕਸ੍ਸ ਯੋ ਤਿਂਸਤਿ ਰਤ੍ਤੋ ਮਾਸੋ ਪਰਿਬ੍ਬਯਨਿਯਮਿਤੋ, ਤਸ੍ਸ ਸਮ੍ਬਨ੍ਧਿਨੀ ਨੇਤਿ ਸਮ੍ਬਨ੍ਧੋ.

ਯਸ੍ਸਞ੍ਚਤਿਥੀਯਨ੍ਤਿ ਅਨਿਯਮੇਨ ਪਟਿਪਦਾਦਿਮਾਹ. ਅਤੋਏਵ ਚ ਨਿਪਾਤਨਾਤਿ ਇਮਸ੍ਮਾਵ ਨਿਪਾਤਨਾ, ਤੇਨੇਵਾਹ- ‘ਸੁਤ੍ਤੇ ਵਚਨਮੇਵ ਨਿਪਾਤਨ’ਨ੍ਤਿ. ਮਾਸਸੁਤਿਯਾਚ੍ਚਾਦੋ ਸਾਧਿਪ੍ਪਾਯਮਤ੍ਥਂ ਵਿਵਰਤਿ ‘ਯਦਿਪਿ’ਚ੍ਚਾਦਿਨਾ. ਅਸ੍ਸਾਤਿ ਸਾਮਞ੍ਞਵਚਨੇਪਿ ‘ਸਾਸ੍ਸ ਦੇਵਤਾ ਪੁਣ੍ਣਮਾਸੀ’ਤਿ ਸੁਤ੍ਤੇ ਅਸ੍ਸਾਤਿ ਅਵਿਸੇਸਵਚਨੇਪਿ ਸੋਯੇਵ ਪੁਣ੍ਣਮਾਸੀਸਦ੍ਦੇ ਸੂਯਮਾਨੋ ਮਾਸੋਯੇਵ ਛਟ੍ਠ੍ਯਤ੍ਥੋ ਵਿਞ੍ਞਾਯਤੀਤਿ ਸਮ੍ਬਨ੍ਧੋ.

ਪਞ੍ਚਦਸਰਤ੍ਤਾਦੋਤਿ ਪਰੇਸਂ ਸਞ੍ਞਾਗਹਣੇਨ ਨਿਵਤ੍ਤਿਤਪਞ੍ਚਦਸਰਤ੍ਤਾਦੋ. ਅਥ ਅਦ੍ਧਮਾਸਸਂਵਚ੍ਛਰਾਨਮ੍ਪਿ ਉਦਾਹਰਣਤ੍ਤੇ ਨੋਪਞ੍ਞਾਸੋ ਕਸ੍ਮਾ ਨ ਕਤੋਚ੍ਚਾਹ- ‘ਅਦ੍ਧਮਾਸਸਂਵਚ੍ਛਰਾਨ’ਮਿਚ੍ਚਾਦਿ. ਏਵਮ੍ਮਞ੍ਞਤੇ ‘‘ਅਦ੍ਧਮਾਸਸਂਵਚ੍ਛਰਾਨਂ ਨ ਪਚ੍ਚਯੇਨੋਜੁਕਮਭਿਧਾਨਮਪਿ ਤੁ ਸਂਵਚ੍ਛਰੇਪਿ ਫੁਸ੍ਸਾਦਿਮਾਸਸਮ੍ਭਵਾਸ੍ਮਿਂ ਸਂਵਚ੍ਛਰੇ ਫੁਸ੍ਸੇਨ ਮਾਸੇਨ ਸਮ੍ਬਨ੍ਧਾ ਫੁਸ੍ਸੋਤ੍ਯੁਪਚਾਰੀਯਤੇ, ਯਥਾ ਚ ਫੁਸ੍ਸਾਦਿਮਾਸਸ੍ਸ ਸਮ੍ਬਨ੍ਧੀ ਅਦ੍ਧਮਾਸੋ ਫੁਸ੍ਸੋ ਅਦ੍ਧਮਾਸੋਤ੍ਯੁਪਚਾਰੀਯਤੇ, ਨ ਪਨੋਜੁਕਨ੍ਤਿ ਤੇਸਮੁਦਾਹਰਣਤ੍ਤੇ ਨਾਨੁਪਾਦਾਨ’’ਨ੍ਤਿ.