੧੨. ਨਕ੍ਖ

ਤਤਿਯਨ੍ਤਤੋ ਵਿਜ੍ਝਤ੍ਥਂ ਤੇਨਾਤਿ ਅਨੁਵਤ੍ਤਤੇਤਿ ਸਮ੍ਬਨ੍ਧੋ. ਸੁਤ੍ਤੇ ਅਯਮਤ੍ਥੋ ‘‘ਇਨ੍ਦੁਯੁਤ੍ਤੇਨ ਨਕ੍ਖਤ੍ਤੇਨ ਲਕ੍ਖਿਤੋ ਚੇ ਕਾਲੋ, ਤਦਾ ਤੇਨ ਲਕ੍ਖਿਤੇ ਕਾਲੇਤ੍ਯਸ੍ਮਿਂ ਅਤ੍ਥੇ ਤਤਿਯਨ੍ਤਤੋ ਨਕ੍ਖਤ੍ਤਾ ਣੋ ਹੋਤੀ’’ਤਿ. ਸੁਤ੍ਤਵਿਵਰਣੇ ਤੁ ਤਞ੍ਚੇਤ੍ਯਾਦਿਕਮਧਿਪ੍ਪਾਯਵਸੇਨ ਵੁਤ੍ਤਂ. ਤੇਨਾਤ੍ਯਨੁਵੁਤ੍ਤਿਯਾ ਤਤਿਯਨ੍ਤਤੋਤਿ ਲਬ੍ਭਤਿ ਨਕ੍ਖਤ੍ਤੇਨਾਤਿ ਸੁਤਤ੍ਤਾਤਿ, ਕਾਲੇਤਿ ਪਨ ਅਤ੍ਥਨਿਦ੍ਦੇਸਤੋ ਣਪ੍ਪਚ੍ਚਯਾਧੇਯ੍ਯਸ੍ਸ ਕਾਲੋ ਆਧਾਰੋਤਿ ਵਿਞ੍ਞਾਯਤੀਤਿ ‘ਲਕ੍ਖਿਤੇ ਕਾਲੇ’ਤਿ ਵੁਤ੍ਤਂ, ਵਿਸੇਸ੍ਸਗਤਵਿਭਤ੍ਤਿਯਾ ਵਿਚਾਰਿਤਾਯ ਵਿਸੇਸਨ ਗਤਾ ਚ (ਵਿਚਾਰਿਤਾ) ਨਾਮਾਤਿ ਆਹ- ‘ਨਕ੍ਖਤ੍ਤੇਨੇ’ਤਿਚ੍ਚਾਦਿ, ਇਹ ਕੇਚਿ ਖਨ੍ਧਪਞ੍ਚਕਸਙ੍ਖਾਤਂ ਕਿਰਿਯਾਸਭਾਵਮਿਚ੍ਛਨ੍ਤਿ ਅਨਿਚ੍ਚਂ, ਅਪਰੇ ਤੁ ਦਬ੍ਬਸਭਾਵਂ ਨਿਚ੍ਚਂ. ਤਸ੍ਸੋ ਭਯਸ੍ਸਪਿ ਕਾਲਸ੍ਸ ਚਨ੍ਦਯੁਤ੍ਤੇਨ ਫੁਸ੍ਸਾਦਿਨਾ ਲਕ੍ਖਿਯਭਾਵਾ ਲਕ੍ਖਣੇ ਤਤਿਯਾ ਯੁਤ੍ਤਨ੍ਤਿ ਵਤ੍ਤੁਮਾਹ- ‘ਕਿਰਿਯਾ ਰੂਪੋ ਕਾਲੋ’ਚ੍ਚਾਦਿ.

ਵਿਸੇਸਾਵਸਾਯੋਤਿ ਕਾਲਸ੍ਸ ਵਿਸੇਸਾਵਧਾਰਣਤ੍ਥਮੇਵ ਹਿ ‘ਫੁਸ੍ਸੀ ਰਤ੍ਤਿ’ਚ੍ਚਾਦਿ. ਲੋਕੇ ਪਯੁਜ੍ਜਤੇ. ਗੁਰੁਨਾਤਿ ਏਤ੍ਥ ਗੁਰੁ ਜੀਵੋ, ਨ ਨਕ੍ਖਤ੍ਤਂ, ਚਨ੍ਦਯੁਤ੍ਤਤਾ ਪਨੇਤ੍ਥ ਅਤ੍ਥਿ… ਚਨ੍ਦਯੁਤ੍ਤੇਨ ਗੁਰੁਨਾ ਰਤ੍ਤਿਯਾ ਲਕ੍ਖਿਤਤ੍ਤਾ. ਕਤ੍ਤਿਕਾਯ ਲਕ੍ਖਿਤੋ ਮੁਹੁਤ੍ਤੋਤਿ ਏਤ੍ਥ ਚਨ੍ਦਂ ਵਿਨਾ ਕਤ੍ਤਿਕਾਯ ਤੁ ਕੇਵਲਾਯ ਮੁਹੁਤ੍ਤੋ ਕਾਲੋ ਲਕ੍ਖਿਤੋ ‘ਕਤ੍ਤਿਕਾ ਮੁਹੁਤ੍ਤੋ’ਤਿ. ਫੁਸ੍ਸੇਨ ਲਕ੍ਖਿਤਾ ਅਤ੍ਥਸਿਦ੍ਧੀਤਿ ਏਤ੍ਥ ਫੁਸ੍ਸੇਨਿਨ੍ਦੁਯੁਤ੍ਤੇਨ ਅਤ੍ਥਸਿਦ੍ਧਿ ਲਕ੍ਖਿਤਾ ਨ ਕਾਲੋ ਫੁਸ੍ਸੋਤਿ. ਨਕ੍ਖਤ੍ਤਯੁਤ੍ਤਸ੍ਸ ਕਾਲਸ੍ਸ ਰਤ੍ਯਾਦਿਵਿਸੇਸਾਪਰਾਮਾਸੇਨ ਨਕ੍ਖਤ੍ਤਵਾਚਿਤੋ ਉਪ੍ਪਨ੍ਨਸ੍ਸ ਪਚ੍ਚਯਸ੍ਸ ਸੁਤ੍ਤਨ੍ਤਰੇਨ ਲੋਪਂ ਵਿਧਾਯ ਪੁਨ ਅਞ੍ਞੇਨ ਸੁਤ੍ਤੇਨ ਯੁਤ੍ਤਾਤਿ ਦੇਸਵਿਧਾਨੇਨ ਸਕਲਿਙ੍ਗਸਙ੍ਖ੍ਯਾਯੁਤ੍ਤੇਹਿ-ਟ੍ਠਮਭਿਧਾਨਂ ਪਰੇਹਿ, ਤਦਾਹ- ‘ਅਹੋ ਰਤ੍ਤੋ’ਚ੍ਚਾਦਿ.

ਰਤ੍ਯਾਦਿਵਿਸੇਸਾਪਰਾਮਾਸੇਨਾਤਿ ਫੁਸ੍ਸੀ ਰਤ੍ਤਿ ਫੁਸ੍ਸੋ ਅਹੋਤਿ ਏਵਂ ਰਤ੍ਯਾਦਿਵਿਸੇਸਸ੍ਸ ਅਪਰਾਮਾਸੇਨ ਅਸਮ੍ਮਸ੍ਸੇਨ ਅਗ੍ਗਹਣੇਨ. ਸਕਲਿਙ੍ਗਸਙ੍ਖ੍ਯਾਯੁਤ੍ਤੇਨਾਤਿ ਫੁਸ੍ਸਕਤ੍ਤਿਕਾਦੀਨਂ ਯਂਯਂ ਲਿਙ੍ਗਂ ਯਾਯਾ ਸਙ੍ਖ੍ਯਾ, ਅਤ੍ਤਨਿਯੇਹਿ ਤੇਹਿ ਤੇਹਿ ਲਿਙ੍ਗੇਹਿ ਤਾਹਿਤਾਹਿ ਚ ਸਙ੍ਖ੍ਯਾਹਿ ਯੁਤ੍ਤੇਨ ਨਕ੍ਖਤ੍ਤਸਦ੍ਦੇਨ. ਨ ਤਦੁਪਲਕ੍ਖਿਤੋ ਕਾਲੋਤਿ ਕਤ੍ਤਿਕਾ ਸਦ੍ਦੋਬਹੁਵਚਨਨ੍ਤੋ ਬਹੁਤਾਰਕਤ੍ਤਾ ਕਤ੍ਤਿਕਾਯ, ਤਾਯਕਤ੍ਤਿਕਾਯ ਲਕ੍ਖਿਤੋਕਾਲੋਪਰੇਹਿਵਿਯ ਨ ਕਥੀਯਤੀਤਿ ਅਤ੍ਥੋ. ਅਥ ਤਦੁਪਲਕ੍ਖਿਤਸ੍ਸਕਾਲਸ੍ਸੇਵਕਤ੍ਤਿਕਾਸਦ੍ਦੇਨਾਭਿਧਾਨੇ ਕੋ ਦੋਸੋ ਯੇ ਨੇਵਮੁਚ੍ਚਤੇਚ੍ਚਾਹ- ‘ਅਜ੍ਜੇਤਿ’ਚ੍ਚਾਦਿ. ਇਮਿਨਾ ਚ ਪਰਮਤੇ ਦੋਸੋ ਉਬ੍ਭਾਵਿਤੋ, ਤਦਤ੍ਥਤ੍ਤੇ ਸਤੀਤਿ ਤਦੁਪਲਕ੍ਖਿਤਕਾਲਤ੍ਥਤ੍ਤੇ ਸਤਿ.

ਸਤ੍ਤਮੀ ਸਿਯਾਤਿ ਨਕ੍ਖਤ੍ਤਸਦ੍ਦਾ ਤਦ੍ਧਿਤਲੋਪਨ੍ਤਾ ਫੁਸ੍ਸੇਨ ਪਾਯਸਂ ਭੁਞ੍ਜੇਯ੍ਯ, ਫੁਸ੍ਸੇ ਪਾਯਸਂ ਭੁਞ੍ਜੇਯ੍ਯਾ’ਤ੍ਯਾਦੋ ਆਧੇਯ੍ਯਨ੍ਤਰਾਪੇਕ੍ਖਾ ਸਿਯਾ ਸਤ੍ਤਮੀ, ਯਾ ਸੁਤ੍ਤਨ੍ਤਰੇਨ ਵਿਧੀਯਤਿ ਪਾਣਿਨੀਯੇਹਿ, ਤਤੋ ‘ਅਜ੍ਜਕਤ੍ਤਿਕਾ’ਤੇਤ੍ਥਾਪ੍ਯਾਧੇਯ੍ਯਨ੍ਤਰਾਪੇਕ੍ਖਾ ਸਤ੍ਤਮੀ ਸਿਯਾ ਲੋਪਨ੍ਤਤ੍ਤਾ ‘ਅਜ੍ਜਕਤ੍ਤਿਕਾਸੂ’ਤਿ, ਨ ਪਠਮਾ. ਪਠਮਾਯੇਵ ਪਨਾਯਂ ਪਯੋਗੋ ‘ਅਜ੍ਜਕਤ੍ਤਿਕਾ,ਤਿ. ਅਜ੍ਜੇਤ੍ਯਧਿਕਰਣਪ੍ਪਧਾਨੋ ਅਹੋਰਤ੍ਤਕਾਲਵਾਚੀ ਸਦ੍ਦੋ, ਕਤ੍ਤਿਕਾਸਦ੍ਦੋਪਿ ਤਦ੍ਧਿਤਲੋਪੇਨ ਤਕ੍ਕਾਲਾਭਿਧਾਯਕੋ, ਤਤੋ ਯੇਵਉਭਿਨ੍ਨਮ੍ਪਿਸਾਮਾਨਾਧਿਕਰਣ੍ਯਾ ਕਤ੍ਤਿਕਾਯੋਪ੍ਯਧਿਕਰਣਂ ਸਮ੍ਪਜ੍ਜਨ੍ਤੇ, ਤਞ੍ਚ ਨ ਵਿਨਾਧੇਯ੍ਯੇਨ ਹੋਤੀਤ੍ਯਾਧੇਯ੍ਯਨ੍ਤਰਾਪੇਕ੍ਖਾਯਂ ਤੇਸੁ ਸਤ੍ਤਮੀਯੇਵ ਸਿਯਾ, ਨ ਪਠਮਾ (ਉਪ) ਪਜ੍ਜੇਯ੍ਯਾਤ੍ਯਧਿਪ੍ਪਾਯੋ. ਅਤ੍ਤਨੋਦਾਨਿ ਦਸ੍ਸਨੇ ਸਤ੍ਤਮਿਯਾ ਅਪ੍ਪਸਙ੍ਗਂ ਪਠਮਾਯੇਵੋਪਪਤ੍ਤਿਂ ਦਸ੍ਸੇਤੁਮਾਹ- ‘ਚਨ੍ਦੇ ਪਨੂਪਚਾਰੇਨੇ’ਚ੍ਚਾਦਿ, ਨਾਧੇਯ੍ਯਨ੍ਤਰਾਪੇਕ੍ਖਾਚ੍ਚਨੇਨ ਸਤ੍ਤਮਿਯਾ ਅਪ੍ਪਸਙ੍ਗਮਾਹ. ਏਵਞ੍ਚਰਹਿ ਵਚਨਮਨ੍ਤਰੇਨ ਪਰੇਸਂ ਵਿਯ ਸਤ੍ਤਮੀਵਿਧਾਯਕਂ ਕਥਂ ਕਤ੍ਤਿਕਾਯ ਜਾਤੋਚ੍ਚਾਸਙ੍ਕਿਯ ਤਮ੍ਪਟਿਪਾਦੇਤੁਮਾਹ- ‘ਕਤ੍ਤਿਕਾਯ ਜਾਤੋ’ਚ੍ਚਾਦਿ. ਬਹੁਵਚਨਨ੍ਤਤ੍ਤੇਪਿ ਕਤ੍ਤਿਕਾਯ ਜਾਤਿਯਮੇਕ ਵਚਨਨ੍ਤਂ. ਪਕਾਰਨ੍ਤਰਮਾਹ- ‘ਲੋਪੋਤਿ’ਚ੍ਚਾਦਿ. ਲੋਪੇਨਾਤਿ ਕਤ੍ਤਿਕਾਹਿ ਇਨ੍ਦੁਯੁਤ੍ਤਾਹਿ ਲਕ੍ਖਿਤੋ ਕਾਲੋਤਿ ਵਿਗ੍ਗਯ੍ਹ ਕਤਣਪ੍ਪਚ੍ਚਯਸ੍ਸ ਲੋਪੇਨ.