સેદમોચનગાથા

અવિપ્પવાસપઞ્હાવણ્ણના

૪૭૯. સેદમોચનગાથાસુ અકપ્પિયસમ્ભોગોતિ અનુપસમ્પન્નેહિ સદ્ધિં કાતું પટિક્ખિત્તો ઉપોસથાદિસંવાસો એવ વુત્તો. પઞ્હા મેસાતિ એત્થ મ-કારો પદસન્ધિકરો. એસાતિ ચ લિઙ્ગવિપલ્લાસવસેન વુત્તં, પઞ્હો એસોતિ અત્થો. પઞ્હ-સદ્દો વા દ્વિલિઙ્ગો દટ્ઠબ્બો. તેનાહ ‘‘એસા પઞ્હા’’તિઆદિ.

ગરુભણ્ડં સન્ધાયાતિ ગરુભણ્ડેન ગરુભણ્ડપરિવત્તનં સન્ધાય. દસાતિ દસ અવન્દિયપુગ્ગલે. એકાદસેતિ અભબ્બપુગ્ગલે. સિક્ખાય અસાધારણોતિ ખુરભણ્ડં ધારેતું અનુઞ્ઞાતસિક્ખાપદેન ભિક્ખૂહિ અસાધારણસિક્ખાપદોતિ અત્થો.

ઉબ્ભક્ખકે ન વદામીતિ અક્ખતો ઉદ્ધં સીસે ઠિતમુખમગ્ગેપિ પારાજિકં સન્ધાય ન વદામિ. અધોનાભિન્તિ નાભિતો હેટ્ઠા ઠિતવચ્ચપસ્સાવમગ્ગેપિ વિવજ્જિય અઞ્ઞસ્મિં સરીરપ્પદેસે મેથુનધમ્મપચ્ચયા કથં પારાજિકો સિયાતિ અત્થો.

છેજ્જવત્થુન્તિ પારાજિકં.

અવિપ્પવાસપઞ્હાવણ્ણના નિટ્ઠિતા.

પારાજિકાદિપઞ્હાવણ્ણના

૪૮૦. દુસ્સકુટિઆદીનીતિ આદિ-સદ્દેન અચ્છતરતિપુપટ્ટાદીહિ, તિણપણ્ણાદીહિ ચ પટિચ્છન્નકુટિયો સઙ્ગણ્હાતિ. તાદિસાય હિ કુટિયા બહિ ઠત્વા અન્તો ઠિતાય ઇત્થિયા મગ્ગે દુસ્સાદિના સન્થતં કત્વા પવેસેન્તોપિ પારાજિકો સિયા. લિઙ્ગપરિવત્તં સન્ધાય વુત્તાતિ લિઙ્ગે પરિવત્તે પટિગ્ગહણસ્સ વિજહનતો પુન અપ્પટિગ્ગહેત્વા પરિભુઞ્જનાપત્તિં સન્ધાય વુત્તં.

પાળિયં ભિક્ખૂ સિયા વીસતિયા સમાગતાતિ વીસતિયા સઙ્ખાતાય ભિક્ખૂ સમાગતા, એતેન સબ્બકમ્મારહતં સઙ્ઘસ્સ દસ્સેતિ.

નિવત્થોતિ ગાથાય અન્તરવાસકેન નિવત્થો ઉત્તરાસઙ્ગેન દિગુણં કત્વા પારુતસઙ્ઘાટિયો. ઇતિ તાનિ તીણિપિ ચીવરાનિ કાયે ગતાનેવ ભિક્ખુનિયા બિન્દુમત્તં કાળકં ઉદકેન ધોવિતમત્તે નિસ્સગ્ગિયાનિ હોન્તીતિ અત્થો.

ઇત્થિં હનેતિ ગાથાય ન માતુભૂતં ઇત્થિં હનેય્ય, ન પિતુભૂતં પુરિસં હનેય્ય. અનરિયન્તિ તઞ્ચ અનરહન્તમેવ હનેય્ય, એતેન અરહન્તઘાતકોપિ ન હોતીતિ દસ્સેતિ. અનન્તરં ફુસેતિ આનન્તરિયં ફુસતીતિ અત્થો.

૪૮૧. સુપ્પતિટ્ઠિત-નિગ્રોધસદિસન્તિ યોજનવિત્થતં રુક્ખં સન્ધાય વુત્તં.

સત્તરસકેસૂતિ ભિક્ખુનીનં પઞ્ઞત્તસત્તરસસઙ્ઘાદિસેસેસુ.

પારાજિકાદિપઞ્હાવણ્ણના નિટ્ઠિતા.