પઠમગાથાસઙ્ગણિકં

સત્તનગરેસુ પઞ્ઞત્તસિક્ખાપદવણ્ણના

૩૩૫. અડ્ઢુડ્ઢસતાનીતિ પઞ્ઞાસાધિકાનિ તીણિ સતાનિ. વિગ્ગહપદેન મનુસ્સવિગ્ગહં વુત્તં.

અતિરેકન્તિ પઠમકથિનં. કાળકન્તિ સુદ્ધકાળકં. ભૂતન્તિ ભૂતારોચનં. ભિક્ખુનીસુ ચ અક્કોસોતિ ‘‘યા પન ભિક્ખુની ભિક્ખું અક્કોસેય્યા’’તિ (પાચિ. ૧૦૨૯) વુત્તં સિક્ખાપદં.

દ્વેપિ ચ ભેદાતિ દ્વે સઙ્ઘભેદસિક્ખાપદાનિ. અન્તરવાસકનામેન અઞ્ઞાતિકાય ભિક્ખુનિયા હત્થતો ચીવરપટિગ્ગહણં વુત્તં. સુત્તન્તિ સુત્તં વિઞ્ઞાપેત્વા વાયાપનં. વિકાલેતિ વિકાલભોજનં. ચારિત્તન્તિ પુરેભત્તં પચ્છાભત્તં ચારિત્તં. નહાનન્તિ ઓરેનદ્ધમાસનહાનં.

ચીવરં દત્વાતિ સમગ્ગેન સઙ્ઘેન ચીવરં દત્વા ખિય્યનં. ગિરગ્ગન્તિ નચ્ચગીતં. ચરિયાતિ અન્તોવસ્સં ચારિકચરણં. તત્થેવાતિ વસ્સંવુત્થાય ચારિકં અપક્કમિત્વા તત્થેવ નિવાસનં પટિચ્ચ પઞ્ઞત્તસિક્ખાપદં. છન્દદાનેનાતિ પારિવાસિકેન છન્દદાનેન.

પારાજિકાનિ ચત્તારીતિ ભિક્ખુનીનં અસાધારણાનિ. સોળસાતિ આદિતો પઞ્ચ સિક્ખાપદાનિ, કુલદૂસનઞ્ચાતિ છ, ભિક્ખુનીનં અસાધારણાનિ દસ નિસ્સગ્ગિયાનિ.

ચતુત્તિંસાતિ પઠમકથિનસુદ્ધકાળકચીવરપટિગ્ગહણરૂપિયચીવરવાયાપનકોસેય્યમિસ્સકએળકલોમધોવાપનદુતિયપત્તવજ્જિતાનિ ભિક્ખુવિભઙ્ગે દ્વાવીસતિ, ભિક્ખુનીનં અસાધારણાનિ દ્વાદસ ચાતિ ચતુત્તિંસ. છપઞ્ઞાસસતન્તિ વેસાલિયાદીસુ પઞ્ઞત્તાનિ દ્વત્તિંસસિક્ખાપદાનિ ઠપેત્વા સેસા છપઞ્ઞાસસતં.

દસ ગારય્હાતિ વોસાસઅપ્પટિસં વિદિતસિક્ખાપદદ્વયઞ્ચ ઠપેત્વા સેસાનિ દસ પાટિદેસનીયાનિ. દ્વે સત્તતિ સેખિયાનિ સુરુસુરુકારકસામિસેનહત્થેનપાનીયથાલકપટિગ્ગહણસસિત્થકપત્તધોવનાનિ તીણિ ઠપેત્વા સેસાનિ સેખિયાનિ.

સેય્યાતિ અનુપસમ્પન્નેન સહસેય્યસિક્ખાપદં. ખણનેતિ પથવીખણનં. ગચ્છ દેવતેતિ ભૂતગામસિક્ખાપદં વુત્તં. સપ્પાણકં સિઞ્ચન્તિ સપ્પાણોદકસિઞ્ચનં. મહાવિહારોતિ મહલ્લકવિહારો.

અઞ્ઞન્તિ અઞ્ઞવાદકં. દ્વારન્તિ યાવ દ્વારકોસા અગ્ગળટ્ઠપનં. સહધમ્મોતિ સહધમ્મિકં વુચ્ચમાનો. પયોપાનન્તિ સુરુસુરુકારકસિક્ખાપદં.

એળકલોમોતિ એળકલોમધોવાપનં. પત્તો ચાતિ દુતિયપત્તો. ઓવાદોતિ ભિક્ખુનુપસ્સયં ઉપસઙ્કમિત્વા ઓવાદો. ભેસજ્જન્તિ ચતુમાસપચ્ચયપવારણાસિક્ખાપદં. આરઞ્ઞિકોતિ ચતુત્થપાટિદેસનીયં. ઓવાદોતિ ઓવાદાય વા સંવાસાય વા અગમનં.

૩૩૭. ‘‘યે ચ યાવતતિયકા’’તિ પઞ્હસ્સ ‘‘ઇમે ખો યાવતતિયકા’’તિ વિસ્સજ્જનં વત્વા તદનન્તરં ‘‘સાધારણં અસાધારણ’’ન્તિઆદિપઞ્હાનં વિસ્સજ્જને વત્તબ્બે યસ્મા તં અવત્વા ‘‘કતિ છેદનકાની’’તિઆદિકે અટ્ઠ પઞ્હે અન્તરા વિસ્સજ્જેત્વા તેસં અનન્તરા ‘‘વીસં દ્વે સતાનિ ભિક્ખૂનં…પે… છચત્તારીસા ભિક્ખૂનં, ભિક્ખુનીહિ અસાધારણા’’તિઆદિના ઉક્કમેનેવ સાધારણાદિપઞ્હા વિસ્સજ્જિતા, તસ્મા તં ઉક્કમવિસ્સજ્જનકારણં દસ્સેતું ‘‘યસ્મા પન યે ચ યાવતતિયકાતિ અયં પઞ્હો’’તિઆદિમાહ.

૩૩૮. ધોવનઞ્ચ પટિગ્ગહોતિઆદિગાથા અટ્ઠકથાચરિયાનં ગાથાવ. છબ્બસ્સાનિ નિસીદનન્તિ દ્વે સિક્ખાપદાનિ. દ્વે લોમાતિ તિયોજનાતિક્કમધોવાપનવસેન દ્વે એળકલોમસિક્ખાપદાનિ. વસ્સિકા આરઞ્ઞકેન ચાતિ વસ્સિકસાટિકા પરિયેસનઅરઞ્ઞકેસુ સેનાસનેસુ વિહરણસિક્ખાપદેન સહ.

પણીતન્તિ પણીતભોજનવિઞ્ઞાપનં. ઊનન્તિ ઊનવીસતિવસ્સૂપસમ્પાદનં. માતુગામેન સદ્ધિન્તિ સંવિધાય ગમનં વુત્તં. યા સિક્ખાતિ યં સિક્ખાપદં. નિસીદને ચ યા સિક્ખાતિ પમાણાતિક્કન્તનિસીદનકારાપને યં સિક્ખાપદં. તથા વસ્સિકા યા ચ સાટિકાતિ એત્થાપિ.

પાળિયં સતં સત્તતિ છચ્ચેવિમે હોન્તિ ઉભિન્નં અસાધારણાતિ ભિક્ખૂનં ભિક્ખુનીહિ અસાધારણા છચત્તારીસ, ભિક્ખુનીનં ભિક્ખૂહિ અસાધારણા તિંસાધિકં સતઞ્ચાતિ એવં ઉભિન્નં અસાધારણા ચ છસત્તતિઅધિકં સતં સિક્ખાપદાનીતિ અત્થો. સતં સત્તતિ ચત્તારીતિ ઉભિન્નં સાધારણસિક્ખાનં ગણના ચતુસત્તતિઅધિકં સતં સિક્ખાપદાનીતિ અત્થો.

વિભત્તિયોતિ આપત્તિક્ખન્ધા ચેવ ઉપોસથપવારણાદયો ચ અધિપ્પેતા. તે હિ પારાજિકાદિભેદેન, ભિક્ખુઉપોસથાદિભેદેન ચ વિભજીયન્તિ. તેનાહ ‘‘વિભત્તિયો’’તિઆદિ. તેસન્તિ અટ્ઠન્નં પારાજિકાદીનં. દ્વીહીતિઆદિ વિવાદાધિકરણાદીનં સમથેહિ વૂપસમદસ્સનં.

સત્તનગરેસુ પઞ્ઞત્તસિક્ખાપદવણ્ણના નિટ્ઠિતા.

પારાજિકાદિઆપત્તિવણ્ણના

૩૩૯. ઇદન્તિ ‘‘પારાજિકન્તિ યં વુત્ત’’ન્તિઆદિના વુત્તં વચનં સન્ધાય વદતિ. ઇદઞ્હિ હેટ્ઠા ‘‘ગરુક લહુક’’ન્તિઆદિના ઉદ્ધટપઞ્હેસુ અનાગતમ્પિ ‘‘સબ્બાનિપેતાનિ વિયાકરોહિ, હન્દ વાક્યં સુણોમ તે’’તિ એત્થ યથાવુત્તાનિ અઞ્ઞાનિપિ ‘‘સબ્બાનિપેતાનિ વિયાકરોહિ, હન્દ વાક્યં સુણોમા’’તિ એવં ગહિતમેવાતિ દસ્સેન્તો ‘‘ઇમિના પન આયાચનવચનેન સઙ્ગહિતસ્સા’’તિઆદિ વુત્તં.

અતિવસ્સતીતિ ઓવસ્સતિ, વસ્સોદકં પવિસતીતિ અત્થો. ધમ્માનન્તિ યથા ચતુપચ્ચયે ધારયતીતિ ધમ્મો, તેસં. તેનાહ ‘‘સઙ્ખતધમ્માન’’ન્તિ. ગાથાસઙ્ગણિકન્તિ ગાથાસઙ્ગહો, તે તે અત્થા ગાથાહિ સઙ્ગહેત્વા ગણીયન્તિ કથીયન્તિ એત્થાતિ હિ ગાથાસઙ્ગણિકં.

પારાજિકાદિઆપત્તિવણ્ણના નિટ્ઠિતા.

પઠમગાથાસઙ્ગણિકવણ્ણનાનયો નિટ્ઠિતો.