૪. સમથક્ખન્ધકવણ્ણના

સમ્મુખાવિનયકથાવણ્ણના

૧૮૬-૧૮૭. યત્થ યત્થ કમ્મવાચાય ‘‘અય’’ન્તિ વા ‘‘ઇમે’’તિ વા સમ્મુખાનિદ્દેસનિયમો અત્થિ, સબ્બં તં કમ્મં સમ્મુખાકરણીયમેવ, ન કેવલં તજ્જનીયાદિપઞ્ચવિધમેવ. પઞ્ચવિધસ્સેવ પન ઉદ્ધરિત્વા દસ્સનં કમ્મક્ખન્ધકે તાવ તસ્સેવ પાળિઆરુળ્હત્તા, ચતુવીસતિયા પારાજિકેસુ વિજ્જમાનેસુ પારાજિકકણ્ડે આગતાનંયેવ ચતુન્નં ઉદ્ધરિત્વા દસ્સનં વિયાતિ વેદિતબ્બં. તત્થ ‘‘પુગ્ગલસ્સ સમ્મુખતા હત્થપાસૂપગમનમેવા’’તિ વુત્તં, તં કારણં સમ્મુખાકરણીયસ્સપિ સમ્મુખાનિદ્દેસનિયમાભાવતો. કામં અયમત્થો કમ્મક્ખન્ધકેયેવ ‘‘તીહિ, ભિક્ખવે, અઙ્ગેહિ સમન્નાગતં તજ્જનીયકમ્મં અધમ્મકમ્મઞ્ચ હોતિ…પે… અસમ્મુખાકતં હોતી’’તિ (ચૂળવ. ૪) વચનેનેવ સિદ્ધો, તત્થ પન આપત્તિ ન દસ્સિતા. ઇધ ‘‘યો કરેય્ય, આપત્તિ દુક્કટસ્સા’’તિ તત્થ ભવિતબ્બાપત્તિદસ્સનત્થં ઇદં આરદ્ધન્તિ વેદિતબ્બં. ‘‘સમ્મુખાવિનયપતિરૂપકેન વૂપસન્તમ્પિ સમ્મુખાવિનયેનેવ વૂપસન્તગણનં ગચ્છતીતિ દસ્સેતું ‘અધમ્મવાદી પુગ્ગલો’તિઆદિ આરદ્ધ’’ન્તિ વુત્તં, લિખિતઞ્ચ. એવં વૂપસન્તં સમ્મુખાવિનયપતિરૂપકેન વૂપસન્તં નામ હોતિ, ન સમ્મુખાવિનયેન ચ અઞ્ઞેન કેનચીતિ દસ્સેતું ઇદમારદ્ધન્તિ આચરિયો.

સતિવિનયકથાવણ્ણના

૧૯૫. દબ્બસ્સ કમ્મવાચાય ‘‘સઙ્ઘો ઇમં આયસ્મન્તં દબ્બ’’ન્તિ સમ્મુખાનિદ્દેસો નત્થિ, તથાપિ ‘‘પઠમં દબ્બો યાચિતબ્બો’’તિ વચનેન સમ્મુખાકરણીયતા તસ્સ સિદ્ધા. તથા અઞ્ઞત્થાપિ યથાસમ્ભવં લેસો વેદિતબ્બો. સતિવેપુલ્લપ્પત્તસ્સ દાતબ્બો વિનયો સતિવિનયો.

અમૂળ્હવિનયકથાવણ્ણના

૧૯૬-૭. ‘‘યસ્સ ઉમ્મત્તકસ્સ તંતંવીતિક્કમતો અનાપત્તિ, તાદિસસ્સેવ અમૂળ્હવિનયં દાતું વટ્ટતીતિ અમૂળ્હસ્સ કત્તબ્બવિનયો અમૂળ્હવિનયો’’તિ લિખિતં, તં યુત્તં ‘‘સઙ્ઘો ગગ્ગસ્સ ભિક્ખુનો અમૂળ્હસ્સ અમૂળ્હવિનયં દેતી’’તિ વચનતો. ‘‘તીણિમાનિ, ભિક્ખવે, અધમ્મિકાનિ અમૂળ્હવિનયસ્સ દાનાની’’તિ ઇમસ્સ વિભઙ્ગે ‘‘ન સરામી’’તિ વચનં વીતિક્કમકાલં સન્ધાય તસ્સ વિભઙ્ગસ્સ પવત્તત્તા. અમૂળ્હવિનયદાનકાલે પનસ્સ અમૂળ્હતા વિનિચ્છિતબ્બા.

પટિઞ્ઞાતકરણકથાવણ્ણના

૨૦૦. ‘‘અપ્પટિઞ્ઞાય ભિક્ખૂનં કમ્માનિ કરોન્તી’’તિ આરભન્તસ્સ કારણં વુત્તમેવ. પટિઞ્ઞાતેન કરણં પટિઞ્ઞાતકરણં.

તસ્સપાપિયસિકાકથાવણ્ણના

૨૦૭. ‘‘તીહિ, ભિક્ખવે, અઙ્ગેહિ સમન્નાગતં તસ્સપાપિયસિકાકમ્મ’’ન્તિ આરભિત્વા પઞ્ચ અઙ્ગાનિ દસ્સેત્વા પાળિ ગતા, ‘‘સા પેય્યાલેન સઙ્ખિપિત્વા ગતાતિ ઞાતબ્બ’’ન્તિ લિખિતં. તથા સુક્કપક્ખેપિ.

તિણવત્થારકાદિકથાવણ્ણના

૨૧૪. ‘‘સબ્બેહેવ એકજ્ઝં સન્નિપતિતબ્બ’’ન્તિ છન્દદાનસ્સ પટિક્ખિત્તત્તા પવારણક્ખન્ધકટ્ઠકથાયઞ્ચ ‘‘ભિન્નસ્સ હિ સઙ્ઘસ્સ સમગ્ગકરણકાલે, તિણવત્થારકસમથે, ઇમસ્મિઞ્ચ પવારણસઙ્ગહેતિ ઇમેસુ તીસુ ઠાનેસુ છન્દં દાતું ન વટ્ટતી’’તિ (મહાવ. અટ્ઠ. ૨૪૧) વુત્તત્તા ઇધ આગન્ત્વા વા છન્દં દત્વા પરિવેણાદીસુ નિસિન્નાતિ ઇદં વિરુજ્ઝતિ વિય ખાયતીતિ ચે? ન ખાયતિ અધિપ્પાયઞ્ઞૂનં. અયઞ્હેત્થ અધિપ્પાયો – વિસુજ્ઝિતુકામેહિ સબ્બેહેવ સન્નિપતિતબ્બં, અસન્નિપતિતસ્સ નત્થિ સુદ્ધિ છન્દદાયકસ્સ. કેવલં તં કમ્મં સન્નિપતિતાનં સમ્પજ્જતિ. અટ્ઠકથાયં વિસુજ્ઝિતુકામાનં છન્દં દાતું ન વટ્ટતીતિ અધિપ્પાયો. ઇતરથા પાળિયા ચ વિરુજ્ઝતિ. ‘‘ઠપેત્વા યે ન તત્થ હોતી’’તિ હિ અયં પાળિ સન્નિપાતં આગન્ત્વા છન્દં દત્વા ઠિતાનં અત્થિતં દીપેતિ. નિસ્સીમગતે સન્ધાય વુત્તં સિયાતિ ચે? નિસ્સીમગતે ઠપેત્વા ઇધ કિં, તસ્મા યો સામગ્ગીઉપોસથે છન્દં દત્વા તિટ્ઠતિ ચે, નાનાસંવાસકભૂમિયંયેવ તિટ્ઠતિ, તસ્સ છન્દદાયકસ્સ પવારણસઙ્ગહોપિ નત્થિ. યો ચ તિણવત્થારકકમ્મે નાગચ્છતિ, સો તાહિ આપત્તીહિ ન સુજ્ઝતીતિ વેદિતબ્બં. યસ્સ એતં ન રુચ્ચતિ, તસ્સ પરિવારે વુત્તપરિસતો કમ્મવિપત્તિલક્ખણં વિરુજ્ઝતિ, તત્થ હિ કેવલં છન્દારહાનં છન્દો અનાહટો હોતિ સચે, અકતં તબ્બિપરીતેન સમ્પત્તિદીપનતોતિ વુત્તં હોતિ. તથા પત્તકલ્લલક્ખણમ્પિ વિરુજ્ઝતિ. તેસુ તીસુ ઠાનેસુ કમ્મપ્પત્તાયેવ સબ્બે, ન તત્થ છન્દારહો અત્થીતિ ચે? ન, ચતુવગ્ગાદિકરણવિભાજને અવિસેસેત્વા છન્દારહસ્સ આગતત્તા, તં સામઞ્ઞતો વુત્તં. ઇદઞ્ચ આવેણિકલક્ખણં, તેનેવ સતિપિ દિટ્ઠાવિકમ્મે ઇદં પટિકુટ્ઠકતં ન હોતીતિ ચે? ન, નાનત્તસભાવતો. ઇધ હિ યે પન ‘‘ન મેતં ખમતી’તિ અઞ્ઞમઞ્ઞં દિટ્ઠાવિકમ્મં કરોન્તી’’તિ (ચૂળવ. અટ્ઠ. ૨૧૪) વચનતો ન સઙ્ઘસ્સ દિટ્ઠાવિકમ્મં કતં. તસ્મિં સતિ પટિકુટ્ઠકતમેવ હોતિ. અઞ્ઞથા પુબ્બભાગા તા ઞત્તિયો નિરત્થિકા સિયું, ન ચ પરિવારટ્ઠકથાયં છન્દારહાધિકારે નયો દિન્નો. પવારણક્ખન્ધકટ્ઠકથાયં ‘‘તીસુ ઠાનેસુ છન્દં દાતું ન વટ્ટતી’’તિ (મહાવ. અટ્ઠ. ૨૪૧) વુત્તત્તા વિરુજ્ઝતીતિ ચે? ન, અટ્ઠકથાય પમાણભાવે સતિ ‘‘ઇધ છન્દં દત્વા પરિવેણાદીસુ નિસિન્ના’’તિઆદિ વચને સુદ્ધિકામતો એવ ગહિતે સબ્બં ન વિરુજ્ઝતીતિ એકે. ‘‘આગન્ત્વા વા છન્દં દત્વા પરિવેણાદીસુ નિસિન્ના, તે આપત્તીહિ ન વુટ્ઠહન્તી’’તિ ઇદં ન વત્તબ્બં. કસ્મા? હેટ્ઠા ‘‘સબ્બેહેવ એકજ્ઝં સન્નિપતિતબ્બ’’ન્તિ છન્દદાનસ્સ પટિક્ખેપવચનતો અટ્ઠકથાયં ‘‘તીસુ ઠાનેસુ છન્દં દાતું ન વટ્ટતી’’તિ વુત્તત્તા, અન્ધકટ્ઠકથાયમ્પિ તથેવ વુત્તત્તા ચાતિ? ન, એકજ્ઝમેવ કમ્મે કરીયમાને યો ઇધ ‘‘સુણાતુ મે, ભન્તે, સઙ્ઘો, અમ્હાકં…પે… ગિહિપટિસંયુત્ત’’ન્તિ સાધારણઞત્તિં ઠપેત્વા પુન ‘‘સુણન્તુ મે, આયસ્મન્તા’’તિઆદિના અસાધારણઞત્તિયો ઠપેત્વા ‘‘સુણાતુ મે, ભન્તે સઙ્ઘો, અમ્હાકં…પે… એવમેતં ધારયામી’’તિ એકતોપક્ખિકાનં સન્ધિયા કતાય તદનન્તરે કેનચિ કરણીયેન છન્દં દત્વા ગચ્છતિ, તસ્સ આપત્તીહિ વુટ્ઠાનં નત્થિ. અપરેસમ્પિ એકતોપક્ખિકાનં અબ્ભન્તરે ઠિતત્તા વિભૂતત્તા કરણસ્સ અયમત્થોવ વુત્તો. સાધારણવસેન દુતિયાય ઞત્તિયા ઠપિતાય યે તસ્મિં ખણે ઞત્તિદુતિયકમ્મવાચાસુ અનારદ્ધાસુ, અપરિયોસિતાસુ વા છન્દં દત્વા ગચ્છન્તિ, તેસમ્પિ ન વુટ્ઠાતિ એવ. યે ન તત્થ હોન્તીતિ પદસ્સ ચ યે વુત્તપ્પકારેન નયેન તત્થ ન હોન્તીતિ અત્થો ગહેતબ્બો. વુત્તપ્પકારત્થદીપનત્થઞ્ચ અટ્ઠકથાયં ‘‘છન્દં દત્વા પરિવેણાદીસુ નિસિન્ના’’તિ ઇદમેવ અવત્વા ‘‘યે પન તેહિ વા સદ્ધિં આપત્તિં આપજ્જિત્વાપિ તત્થ અનાગતા, આગન્ત્વા વા છન્દં દત્વા પરિવેણાદીસુ નિસિન્ના’’તિ વુત્તં, એવં પુબ્બેનાપરં સન્ધીયતિ. ‘‘પાળિયા ચ તત્થ દિટ્ઠાવિકમ્મેન કમ્મસ્સ અકુપ્પતા વેદિતબ્બા’’તિ વુત્તં.

અધિકરણકથાવણ્ણના

૨૨૦. ચિત્તુપ્પાદો વિવાદો. વિવાદસદ્દોપિ કારણૂપચારેન કુસલાદિસઙ્ખ્યં ગચ્છતિ. તં સન્ધાય ‘‘સમથેહિ ચ અધિકરણીયતાય અધિકરણ’’ન્તિ વુત્તં. અથ વા વિવાદહેતુભૂતસ્સ ચિત્તુપ્પાદસ્સ વૂપસમેન સમ્ભવસ્સ સદ્દસ્સપિ વૂપસમો હોતીતિ ચિત્તુપ્પાદસ્સપિ સમથેહિ અધિકરણીયતા પરિયાયો સમ્ભવતિ. ‘‘કુસલચિત્તા વિવદન્તી’’તિ વુત્તવિવાદેપિ ‘‘વિપચ્ચતાય વોહારો’’તિ વુત્તં, ન વુત્તવચનહેતુવસેનાતિ વેદિતબ્બં.

૨૨૨. ‘‘આપત્તિઞ્હિ આપજ્જન્તો કુસલચિત્તો વા’’તિ વચનતો કુસલમ્પિ સિયાતિ ચે? ન તં આપત્તાધિકરણં સન્ધાય વુત્તં, યો આપત્તિં આપજ્જતિ, સો તીસુ ચિત્તેસુ અઞ્ઞતરચિત્તસમઙ્ગી હુત્વા આપજ્જતીતિ દસ્સનત્થં ‘‘યં કુસલચિત્તો આપજ્જતી’’તિઆદિ વુત્તં. યો ‘‘પઞ્ઞત્તિમત્તં આપત્તાધિકરણ’’ન્તિ વદેય્ય, તસ્સ અકુસલાદિભાવોપિ આપત્તાધિકરણસ્સ ન યુજ્જતેવ વિવાદાધિકરણાદીનં વિયાતિ ચે? ન, ‘‘નત્થાપત્તાધિકરણં કુસલ’’ન્તિ ઇમિના વિરોધસમ્ભવતો. અનુગણ્ઠિપદે પન ‘‘આપત્તાધિકરણં નામ તથાપવત્તમાનઅકઉસલચિત્તુપ્પાદરૂપક્ખન્ધાનમેતં અધિવચનં. અવસિટ્ઠેસુ કુસલાબ્યાકતપઞ્ઞત્તીસુ ‘આપત્તાધિકરણં સિયા અકુસલં સિયા અબ્યાકત’ન્તિ વચનતો પઞ્ઞત્તિતાવ પટિસિદ્ધા કુસલત્તિકે અપરિયાપન્નત્તા. કુસલપટિસેધેનેવ તેન સમાનગતિકત્તા કિરિયાબ્યાકતાનમ્પિ પટિસેધો વેદિતબ્બો, કિરિયાબ્યાકતાનં વિય અનુગમનતો વિપાકાબ્યાકતાનમ્પિ પટિસેધો કતોવ હોતિ, તથાપિ અબ્યાકતસામઞ્ઞતો રૂપક્ખન્ધેન સદ્ધિં વિપાકકિરિયાબ્યાકતાનમ્પિ અધિવચનન્તિ વેદિતબ્બ’’ન્તિ વુત્તં. તત્થ ‘‘કુસલચિત્તં અઙ્ગં હોતી’’તિ વિનયે અપકતઞ્ઞુનો સન્ધાય વુત્તં અપ્પહરિતકરણાદિકે સતિ. તસ્માતિ યસ્મા ‘‘નત્થિ આપત્તાધિકરણં કુસલ’’ન્તિ વત્તું ન સક્કા, તસ્મા કુસલચિત્તં અઙ્ગં ન હોતીતિ અત્થો. યદિ એવં કસ્મા ‘‘તિચિત્તં તિવેદન’’ન્તિ વુચ્ચતીતિ ચે? તં દસ્સેતું ‘‘નયિદ’’ન્તિઆદિ આરદ્ધન્તિ એકે. આપત્તિસમુટ્ઠાપકચિત્તં અઙ્ગપ્પહોનકચિત્તં નામ. ‘‘એકન્તતોતિ યેભુય્યેનાતિ અત્થો, ઇતરથા વિરુજ્ઝતિ. કસ્મા? ‘યસ્સા સચિત્તકપક્ખે ચિત્તં અકુસલમેવ હોતી’તિ (કઙ્ખા. અટ્ઠ. પઠમપારાજિકવણ્ણના) વુત્તત્તા’’તિ વદન્તિ. તેન કિં? વિપાકો નત્થિ, કસ્મા? એકન્તાકુસલત્તા, તસ્મા કથાવ તત્થ નત્થિ. યત્થ પન અત્થિ, તં દસ્સેન્તો ‘‘યં પન પણ્ણત્તિવજ્જ’’ન્તિઆદિમાહ. અસઞ્ચિચ્ચ પન કિઞ્ચિ અજાનન્તસ્સ…પે… અબ્યાકતં હોતીતિ ભિક્ખુમ્હિ કમ્મટ્ઠાનગતચિત્તેન નિપન્ને, નિદ્દાયન્તે વા માતુગામો ચે સેય્યં કપ્પેતિ, તસ્સ ભિક્ખુનો વિજ્જમાનમ્પિ કુસલચિત્તં આપત્તિયા અઙ્ગં ન હોતિ, તસ્મા તસ્મિં ખણે સેય્યાકારેન વત્તમાનરૂપમેવ આપત્તાધિકરણં નામ. ભવઙ્ગચિત્તે વિજ્જમાનેપિ એસેવ નયો. તસ્મિઞ્હિ ખણે ઉટ્ઠાતબ્બે જાતે અનુટ્ઠાનતો રૂપક્ખન્ધોવ આપત્તિ નામ, ન વિપાકેન સદ્ધિં. સચે પન વદેય્ય, તસ્સ એવંવાદિનો અચિત્તકાનં કુસલચિત્તં આપજ્જેય્ય. કિં વુત્તં હોતિ? એળકલોમં ગહેત્વા કમ્મટ્ઠાનમનસિકારેન તિયોજનં અતિક્કમન્તસ્સ, પણ્ણત્તિં અજાનિત્વા પદસો ધમ્મં વાચેન્તસ્સ ચ આપજ્જિતબ્બાપત્તિયા કુસલચિત્તં આપજ્જેય્યાતિ. આપજ્જતિયેવાતિ ચે? નાપજ્જતિ. કસ્મા? ‘‘નત્થિ આપત્તાધિકરણં કુસલ’’ન્તિ વચનતો.

ચલિતો કાયો, પવત્તા વાચા, અઞ્ઞતરમેવ અઙ્ગન્તિ અઞ્ઞતરમેવ આપત્તીતિ અત્થો. કેવલં પઞ્ઞત્તિયા અકુસલાદિભાવાસમ્ભવતો આપત્તિતા ન યુજ્જતિ. આપત્તિં આપજ્જન્તો તીસુ અઞ્ઞતરસમઙ્ગી હુત્વા આપજ્જતીતિ દસ્સનત્થં ‘‘યં કુસલચિત્તો’’તિઆદિ વુત્તં. તસ્સત્થો – પથવીખણનાદીસુ કુસલચિત્તક્ખણે વીતિક્કમવસેન પવત્તરૂપસમ્ભવતો કુસલચિત્તો વા અબ્યાકતાપત્તિં આપજ્જતિ. તથા અબ્યાકતચિત્તો વા અબ્યાકતરૂપસઙ્ખાતં અબ્યાકતાપત્તિં આપજ્જતિ, પાણાતિપાતાદીસુ અકુસલચિત્તો વા અકુસલાપત્તિં આપજ્જતિ, રૂપં પનેત્થ અબ્બોહારિકં. સુપિનપસ્સનકાલાદીસુ પાણાતિપાતાદિં કરોન્તો સહસેય્યાદિવસેન આપજ્જિતબ્બાપત્તિં આપજ્જન્તો અકુસલચિત્તો અબ્યાકતાપત્તિં આપજ્જતીતિ વેદિતબ્બો. ઇદં વુચ્ચતિ આપત્તાધિકરણં અકુસલન્તિ અકુસલચિત્તુપ્પાદો. પોરાણગણ્ઠિપદેસુ પન ‘‘પુથુજ્જનો કલ્યાણપુથુજ્જનો સેક્ખો અરહાતિ ચત્તારો પુગ્ગલે દસ્સેત્વા તેસુ અરહતો આપત્તાધિકરણં અબ્યાકતમેવ, તથા સેક્ખાનં, તથા કલ્યાણપુથુજ્જનસ્સ અસઞ્ચિચ્ચ વીતિક્કમકાલે અબ્યાકતમેવ. ઇતરસ્સ અકુસલમ્પિ હોતિ અબ્યાકતમ્પિ. યસ્મા ચસ્સ સઞ્ચિચ્ચ વીતિક્કમકાલે અકુસલમેવ હોતિ, તસ્મા વુત્તં ‘નત્થિ આપત્તાધિકરણં કુસલ’ન્તિ. સબ્બત્થ અબ્યાકતં નામ તસ્સ વિપાકાભાવમત્તં સન્ધાય એવંનામકં જાત’’ન્તિ લિખિતં, વિચારેત્વા ગહેતબ્બં.

૨૨૪. વિવાદો વિવાદાધિકરણન્તિ યો કોચિ વિવાદો, સો સબ્બો કિં વિવાદાધિકરણં નામ હોતીતિ એકપુચ્છા. ‘‘વિવાદો અધિકરણન્તિ વિવાદાધિકરણમેવ વિવાદો ચ અધિકરણઞ્ચાતિ પુચ્છતિ. તદુભયં વિવાદાધિકરણમેવાતિ પુચ્છતીતિ વુત્તં હોતી’’તિ પોરાણગણ્ઠિપદે વુત્તં. કેસુચિ પોત્થકેસુ અયં પુચ્છા નત્થિ. યદિ એવં ઇમાય ન ભવિતબ્બં વિવાદો વિવાદાધિકરણં, વિવાદાધિકરણં વિવાદો, વિવાદાધિકરણં વિવાદો ચેવ અધિકરણઞ્ચાતિ પઞ્ચપઞ્હાહિ ભવિતબ્બં સિયા. કેસુચિ પોત્થકેસુ તિસ્સો, કેસુચિ ચતસ્સો, પઞ્ચ નત્થિ. તત્થ દ્વે વિભત્તા. ઇતરાસુ અધિકરણં વિવાદોતિ યં કિઞ્ચિ અધિકરણં, વિવાદસઙ્ખ્યમેવ ગચ્છતિ, વિવાદો અધિકરણન્તિ યો કોચિ વિવાદો, સો સબ્બો અધિકરણસઙ્ખ્યં ગચ્છતીતિ પુચ્છતિ. એસ નયો સબ્બત્થ.

૨૨૮. સમ્મુખાવિનયસ્મિન્તિ સમ્મુખાવિનયભાવે.

૨૩૦. ‘‘અન્તરેનાતિ કારણેના’’તિ લિખિતં.

૨૩૩. ઉબ્બાહિકાય ખિય્યનકે પાચિત્તિ ન વુત્તા તત્થ છન્દદાનસ્સ નત્થિતાય.

૨૩૬. તસ્સ ખો એતન્તિ એસોતિ અત્થો ‘‘એતદગ્ગ’’ન્તિ એત્થ વિય.

૨૩૮. ‘‘કા ચ તસ્સ પાપિયસિકા’’તિ કિર પાઠો.

૨૪૨. ‘‘કિચ્ચમેવ કિચ્ચાધિકરણ’’ન્તિ વચનતો અપલોકનકમ્માદીનમેતં અધિવચનં, તં વિવાદાધિકરણાદીનિ વિય સમથેહિ સમેતબ્બં ન હોતિ, કિન્તુ સમ્મુખાવિનયેન સમ્પજ્જતીતિ અત્થો.

સમથક્ખન્ધકવણ્ણના નિટ્ઠિતા.