૧૧. પઞ્ચસતિકક્ખન્ધકવણ્ણના

સઙ્ગીતિનિદાનકથાવણ્ણના

૪૩૭. છિન્નપાતન્તિ ભાવનપુંસકં, તેનાકારેન પતન્તીતિ અત્થો. ઉપદ્દુતા ચ મયં હોમાતિ અતીતત્થે વત્તમાનવચનં, અહુમ્હાતિ અત્થો. અથ વા તસ્મિં સતિ હોમ. ‘‘પઞ્ચ ભિક્ખુસતાની’’તિ ગણનવસેન વત્વા ‘‘વસ્સં વસન્તા’’તિ પુગ્ગલનિદ્દેસો કતો.

ખુદ્દાનુખુદ્દકકથાવણ્ણના

૪૪૩. ‘‘વસ્સિકસાટિકં અક્કમિત્વા’’તિ વચનતો ભગવતો ચતુત્થચીવરમ્પિ અત્થીતિ સિદ્ધં. તેનેવાહ ચીવરક્ખન્ધકે ‘‘ચતુત્થં ચીવરં પારુપી’’તિ.

૪૪૪. ‘‘અપિચ યથેવ મયા’’તિઆદિ સઙ્ગીતિયા અગ્ગહણાધિપ્પાયવસેન વુત્તં, કિન્તુ સુસઙ્ગીતા આવુસો થેરેહિ ધમ્મો ચ વિનયો ચ. અપિચાહં નામ તથેવાહં ધારેસ્સામીતિ યથેવ મયા ભગવતો સમ્મુખા સુતં સમ્મુખા પટિગ્ગહિતં, તથેવ થેરેહિ ભગવતા સયમેવ એતદગ્ગં આરોપિતેહિ, તસ્મા સુસઙ્ગહિતા સઙ્ગીતીતિ વુત્તં હોતિ.

બ્રહ્મદણ્ડકથાવણ્ણના

૪૪૫. ‘‘ત્વંયેવ આણાપેહી’’તિ એત્તકમેવ વુત્તં, થેરા પન બ્રહ્મદણ્ડં કત્વા વુત્તંયેવ ‘‘છન્નસ્સા’’તિઆદિમાહંસૂતિ વેદિતબ્બં. એત્થ ચ આનન્દત્થેરો વિય અઞ્ઞોપિ સઙ્ઘેન આણત્તો ભિક્ખુ બ્રહ્મદણ્ડકતેન ભિક્ખુના આલપિતું લભતિ, ન અઞ્ઞો. ઉજ્જવનિકાયાતિ પટિસોતગામિનિયા. આગમા નુ ખો ઇધ આગમા નુ ખ્વિધ. આગમા ખો ઇધ, તે ઓરોધા ઇધ આગમા ખો. ‘‘ભિસિચ્છવીતિ ભિસિત્થવિકા’’તિ લિખિતં. સબ્બેવિમેતિ સબ્બમેવ. કુલવં ગમેન્તીતિ નિરત્થકવિનાસં ગમેન્તિ. કુચ્છિતો લવો કુલવો, અનયવિનાસોતિ વુત્તં હોતિ. ઇમાય ખો પન ‘‘ધમ્મવિનયસઙ્ગીતિયા’’તિ વત્તબ્બે વિસેસેન વિનયસ્સ સાસનમૂલભાવદસ્સનત્થં, તસ્મિં ઠિતે સકલસાસનઠિતિસિદ્ધિદીપનત્થઞ્ચ ‘‘ઇદં વો કપ્પતિ, ઇદં વો ન કપ્પતી’’તિ વત્થુસ્મિં આરદ્ધત્તા, ઇમિસ્સા ચ પરિયત્તિયા વિનયપિટકત્તા ‘‘વિનયસઙ્ગીતિયા’’તિ ઇધ વુત્તં.

પઞ્ચસતિકક્ખન્ધકવણ્ણના નિટ્ઠિતા.