૧૨. સત્તસતિકક્ખન્ધકવણ્ણના

દસવત્થુકથાવણ્ણના

૪૪૬. નિક્ખિત્તમણિસુવણ્ણાતિ સિક્ખાપદેનેવ પટિક્ખિત્તમણિસુવણ્ણા. તત્થ મણિગ્ગહણેન સબ્બં દુક્કટવત્થુ, સુવણ્ણગ્ગહણેન સબ્બં પાચિત્તિયવત્થુ ગહિતં હોતિ. ભિક્ખગ્ગેન ભિક્ખુગણનાયાતિ વુત્તં હોતિ.

૪૪૭. મહિકાતિ હિમં. પોસાતિ સત્તા. સરજાતિ સકિલેસરજા. મગાતિ મગસદિસા. તસ્મિં તસ્મિં વિસયે, ભવે વા નેતીતિ નેત્તિ, તણ્હાયેતં અધિવચનં, તાય સહ વત્તન્તીતિ સનેત્તિકા.

૪૫૦-૨. અહોગઙ્ગોતિ પબ્બતસ્સ નામં. અનુમાનેસ્સામાતિ પઞ્ઞાપેસ્સામ. આસુતાતિ સજ્જિતા, ‘‘અસુત્તા’’તિ વા પાઠો, અનાવિલા અપક્કા તરુણા.

૪૫૩. ઉજ્જવિંસુ પટિસોતેન ગચ્છિંસુ.

૪૫૫. અપ્પેવ નામાતિ સાધુ નામ. મૂલા દાયકા પેસલકા. ‘‘કુલ્લકવિહારેનાતિ ખુદ્દકવિહારેના’’તિ લિખિતં. રૂપાવતારત્તા કુલ્લકવિહારો નામ. કથં પનેતં પઞ્ઞાયતિ, યેન સન્નિધિકતં યાવજીવિકં યાવકાલિકેન તદહુપટિગ્ગહિતેન સમ્ભિન્નરસં તદહુપટિગ્ગહિતસઙ્ખયં આગન્ત્વા સન્નિધિકતામિસસઙ્ખ્યમેવ ગચ્છતીતિ? વુચ્ચતે – ‘‘યાવકાલિકેન, ભિક્ખવે, યાવજીવિકં તદહુપટિગ્ગહિત’’ન્તિ વચનતો પુરેપટિગ્ગહિતં યાવજીવિકં તદહુપટિગ્ગહિતેનામિસેન ચે સમ્ભિન્નં, પુરેપટિગ્ગહિતસઙ્ખ્યમેવ ગચ્છતીતિ સિદ્ધં. અઞ્ઞથા ‘‘સત્તાહકાલિકેન, ભિક્ખવે, યાવજીવિકં પટિગ્ગહિતં સત્તાહં કપ્પતી’’તિ (મહાવ. ૩૦૫) વુત્તટ્ઠાને વિય ઇધાપિ ‘‘યાવકાલિકેન, ભિક્ખવે, યાવજીવિકં પટિગ્ગહિતં કાલે કપ્પતી’’તિ વદેય્ય, તઞ્ચાવુત્તં. તસ્મા પુરેપટિગ્ગહિતં તં આમિસસમ્ભિન્નં આમિસગતિકમેવાતિ વેદિતબ્બં. ગણ્ઠિપદે પન ‘‘સન્નિધિકારકં ખાદનીયં વા ભોજનીયં વા’’તિ (પાચિ. ૨૫૩) વુત્તં. બ્યઞ્જનમત્તં ન ગહેતબ્બં.

૪૫૭. ઇધાતિ ઇમસ્મિં પાઠે. ‘‘‘કાલે કપ્પતિ, વિકાલે ન કપ્પતી’તિ (મહાવ. ૩૦૫) વુત્તવચનમત્તેન ‘વિકાલે કપ્પતી’તિ વિકાલભોજનપાચિત્તિયં આવહં હોતીતિ અત્થો, ‘ન કપ્પતી’તિ સન્નિધિભોજનપાચિત્તિયં આવહં હોતીતિ અત્થો, યદિ સમ્ભિન્નરસં અજ્જપટિગ્ગહિતમ્પિ યાવજીવિકન્તિ અત્થો’’તિ લિખિતં. સુત્તવિભઙ્ગેતિ માતિકાસઙ્ખાતે સુત્તે ચ તસ્સ પદભાજનીયસઙ્ખાતે વિભઙ્ગે ચાતિ અત્થો. ઇદં આગતમેવ. કતરન્તિ? ‘‘અતિક્કામયતો છેદનક’’ન્તિ ઇદં.

તિવિદત્થિપમાણઞ્ચે, અદસં તં નિસીદનં;

નિસીદનં કથં હોતિ, સદસં તઞ્હિ લક્ખણં.

તિવિદત્થિપમાણં તં, દસા તત્થ વિદત્થિ ચે;

તંનિસીદનનામત્તા, તસ્મિં છેદનકં સિયા.

અનિસીદનનામમ્હિ, કથં છેદનકં ભવે;

ઇતિ ચે નેવ વત્તબ્બં, નિસીદનવિદત્થિતો.

કપ્પતે સદસામત્તં, નિસીદનમિતિ કારણં;

કથં યુજ્જતિ નો ચેતં, નિસીદનસ્સ નામકં.

નિસીદનન્તિ વુત્તત્તા, પમાણસમતિક્કમા;

તસ્સાનુમતિહેતુત્તા, તત્થ છેદનકં ભવે.

જાતરૂપકપ્પે –

જાતરૂપં પટિક્ખિત્તં, પુગ્ગલસ્સેવ પાળિયં;

ન સઙ્ઘસ્સાતિ સઙ્ઘસ્સ, તઞ્ચે કપ્પતિ સબ્બસો.

વિકાલભોજનઞ્ચાપિ, પુગ્ગલસ્સેવ વારિતં;

ન સઙ્ઘસ્સાતિ સઙ્ઘસ્સ, કપ્પતીતિ કથં સમં.

સત્તસતિકક્ખન્ધકવણ્ણના નિટ્ઠિતા.

ચૂળવગ્ગવણ્ણના નિટ્ઠિતા.

નમો તસ્સ ભગવતો અરહતો સમ્માસમ્બુદ્ધસ્સ