૮. ચીવરક્ખન્ધકવણ્ણના

જીવકવત્થુકથાવણ્ણના

૩૨૬. રાજગહકોતિ રાજગહવાસી.

૩૨૮. અમોહજાતિકત્તા ન ચિરસ્સેવ વિઞ્ઞુતં પાપુણિ. અહં તે પિતા, કેનટ્ઠેન? યસ્મા ત્વં મયા પોસાપિતો.

૩૨૯. ‘‘સક્કે વિસ્સટ્ઠમત્તે’’તિ પાઠો, અટ્ઠમસિક્ખાપદે વિસ્સટ્ઠમત્તોવ.

પજ્જોતરાજવત્થુકથાવણ્ણના

૩૩૪. ભુઞ્જિતું નિસિન્નસ્સાતિ એત્થ ‘‘ધમ્મપદે ‘બહિનગરે દિસ્વા’તિ વુત્તં, તસ્મા દ્વીસુ દિવસેસુ દિન્નં તેન તેસુ એકેકં ગહેત્વા દ્વીસુ અટ્ઠકથાસુ વુત્તન્તિ યુજ્જતી’’તિ વદન્તિ.

સમત્તિંસવિરેચનકથાવણ્ણના

૩૩૬. કબળે કબળેતિ એત્થ કિઞ્ચાપિ ગુળાદીસુ પક્ખિત્તં, તં પન ભગવાવ પરિભુઞ્જિ, તસ્મા નત્થિ દોસો.

વરયાચનકથાવણ્ણના

૩૩૭. મહાપિટ્ઠિયકોજવં નામ અતિરેકચતુરઙ્ગુલપુપ્ફં કિર.

કમ્બલાનુજાનનાદિકથાવણ્ણના

૩૪૦. ઉપચારેતિ સુસાનસ્સ ઉપચારે. બહિપિ વટ્ટતીતિ એકે. કતિકકરણં દસ્સેત્વા ‘‘મય્હં સન્તકં તવ ચ મમ ચ હોતૂતિ વત્વા ઇતરેન ચ તથાવુત્તે વટ્ટતી’’તિ સમાનપરિક્ખારવિધિં વદન્તિ.

૩૪૨. ‘‘ખણ્ડસીમાયપિ સમ્મન્નિતું વટ્ટતીતિ વુત્તત્તા સેસકમ્માનિપિ તત્થ નિસીદિત્વા કાતું વટ્ટતી’’તિ વુત્તં. ‘‘એવં સન્તે ચોરિકાય કતસદિસં હોતિ, તસ્મા ન વટ્ટતી’’તિ દીપવાસિનો વદન્તિ કિર. ‘‘ચોરિકાય ગહિતત્તા ન પાપુણાતીતિ સેનાસનક્ખન્ધકે આગતસુત્તઞ્ચ સાધક’’ન્તિ વદન્તિ, તસ્મા તેસં મતેન ઇદં આવેણિકલક્ખણન્તિ વેદિતબ્બં.

ભણ્ડાગારસમ્મુતિઆદિકથાવણ્ણના

૩૪૩. ‘‘ઇદં પન ભણ્ડાગારન્તિ આવેણિકલક્ખણ’’ન્તિ વુત્તં.

ચીવરરજનકથાવણ્ણના

૩૪૪. ગોમયે આપત્તિ નત્થિ, વિરૂપત્તાવારિતં. ‘‘કુઙ્કુમપુપ્ફં ન વટ્ટતી’’તિ વદન્તિ. ‘‘અલ્લિકાયા’’તિપિ પાઠો અત્થિ.

નિસીદનાદિઅનુજાનનકથાવણ્ણના

૩૫૩. અટ્ઠાનમેતન્તિ એત્થ રૂપકણ્ડે ‘‘ચતુસમુટ્ઠાનિક’’ન્તિ વુત્તત્તા કમ્મસમુટ્ઠાનં રાગચિત્તાભાવા ન મુચ્ચતીતિ વા રાગપચ્ચયે સતિ કમ્મસમુટ્ઠાનં હોતીતિ વા વિચારેત્વા ગહેતબ્બં કથાવત્થુના ચ.

૩૬૨. અગ્ગળગુત્તિયેવ પમાણન્તિ ઇમેહિ ચતૂહિ નિક્ખેપકારણેહિ ઠપેન્તેન અગ્ગળગુત્તિવિહારેયેવ ઠપેતું વટ્ટતીતિ અધિપ્પાયો.

સઙ્ઘિકચીવરુપ્પાદકથાવણ્ણના

૩૬૩. નો ચે અત્થતં હોતિ ‘‘એકં ચીવરમાસ’’ન્તિ ન વત્તબ્બં. કસ્મા? ‘‘અનુજાનામિ, ભિક્ખવે, તસ્સેવ તાનિ ચીવરાનિ યાવ ચીવરમાસા’’તિ વચનસ્સ અભાવતો, તસ્મા અનત્થતકથિનસ્સ અનનુઞ્ઞાતન્તિ ચે? ન, હેટ્ઠા અનુઞ્ઞાતત્તા, તતો લીનત્થદીપનત્થમિધ તથા વુત્તત્તા ચ. હેટ્ઠા હિ ‘‘અકાલચીવરં નામ અનત્થતે કથિને એકાદસમાસે ઉપ્પન્નં, અત્થતે કથિને સત્તમાસે ઉપ્પન્નં, કાલેપિ આદિસ્સ દિન્નં, એતં અકાલચીવરં નામા’’તિ (પારા. ૫૦૦) વચનતો અનત્થતકથિનાનં એકચીવરમાસે ઉપ્પન્નં, તેસંયેવ હોતીતિ સિદ્ધં, તસ્મા ઇધ તં અવત્વા એકોપિ તયો ગણપૂરકે લભિત્વા કથિનં અત્થરિતું લભતીતિ ઇમં લીનત્થં પકાસેતું ‘‘યાવ કથિનસ્સ ઉબ્ભારાયા’’તિ વુત્તં. ઇતરથા અયમત્થો ન ઞાયતિ. ‘‘જાનિતબ્બો ચ વિનયધરેહીતિ તથા વુત્તોતિ અપરે’’તિ વુત્તં. અત્થતં હોતિ, પઞ્ચ માસે સબ્બં તસ્સેવ ભિક્ખુનો હોતીતિ સમ્બન્ધો. અચ્ચન્તસંયોગવસેન ઉપયોગવચનં. ‘‘ઇધ વસ્સંવુત્થસઙ્ઘસ્સા’’તિ નિયમિતત્તા ‘‘વસ્સાવાસિકં દેમા’’તિ એત્થ ચ ‘‘ઇધા’’તિ અધિકારત્તા તસ્મિં વુત્તે લભતિ. ‘‘પિટ્ઠિસમયે ઉપ્પન્નત્તાતિ ચીવરકાલસ્સાસન્નત્તા ચ અનત્થતકથિનાનમ્પિ વુત્થવસ્સાનઞ્ચ અનુઞ્ઞાતટ્ઠાનત્તા એવ વુત્ત’’ન્તિ અઞ્ઞતરસ્મિં ગણ્ઠિપદે લિખિતં. કેચિ પન ‘‘યં પન ઇદં ‘ઇધ વસ્સંવુત્થસઙ્ઘસ્સા’તિઆદિં કત્વા યાવ ‘અનાગતવસ્સે’તિ પદં, તાવ પુચ્છિત્વા ‘કસ્મા? પિટ્ઠિસમયે ઉપ્પન્નત્તા’તિ ઇદં પરતો ‘તત્ર સમ્મુખીભૂતાનં સબ્બેસં પાપુણાતી’તિ ઇમસ્સ પરિયોસાને ‘કસ્મા? પિટ્ઠિસમયે ઉપ્પન્નત્તા’તિ લિખિતબ્બં. કસ્માતિ ચે? પરતો ‘ચીવરમાસતો પટ્ઠાય યાવ હેમન્તસ્સા’તિ વુત્તેન નિબ્બિસેસત્તા, તસ્મા એવ એકચ્ચેસુ પણ્ડિતન્તિ વદન્તી’’તિ વદન્તિ. ઇધ પન ઇધ-સદ્દેન વિસેસિતં, તત્થ નત્થિ, તસ્મા અઞ્ઞમઞ્ઞવિરોધો નત્થીતિ ગહેતબ્બં. ‘‘મય્હિમાનિ ચીવરાનિ પાપુણન્તી’’તિ વચનમેવાધિટ્ઠાનં, ઇદમેત્થ ઉક્કટ્ઠવસેન વુત્તં. ‘‘મય્હિમાનિ ચીવરાની’તિ વુત્તેપિ અધિટ્ઠિતમેવ હોતી’’તિ વુત્તં. ‘‘મય્હિમાની’તિ વુત્તે તસ્સ ચીવરાનિ નામ નત્થિ, તસ્મા ‘ચીવરાનિ પાપુણન્તી’તિ વત્તબ્બમેવા’’તિ વદન્તિ. દુગ્ગહિતાનીતિ સઙ્ઘિકાનેવ હોન્તિ. ‘‘ગહિતમેવ નામા’તિ ઇમસ્સ ઇદં પત્તન્તિ કિઞ્ચાપિ ન વિદિતં, તે પન ભાગા તેસં અત્થતો પત્તાયેવાતિ અધિપ્પાયો’’તિ લિખિતં. ‘‘એકસ્મિં અપતિતે પુન આગતા લભન્તી’’તિ વુત્તં.

ઉપનન્દસક્યપુત્તવત્થુકથાવણ્ણના

૩૬૪. ‘‘ન, ભિક્ખવે, અઞ્ઞત્ર વસ્સંવુત્થેના’’તિ ચીવરસમયં ઉપાદાય પટિક્ખેપો કતો.એકસ્મિં વિહારે ‘‘રાજવિહારે વિય નાનાપરિવેણેસુ વા ઇધ વા વુત્થા લભતૂ’’તિ વત્વા દિન્નં. ‘‘સત્તાહવારેન અરુણમેવ ઉટ્ઠાપેતીતિ એતં વચનમત્તમેવ એકવિહારે સત્તાહકિચ્ચાભાવા’’તિ ચ લિખિતં.

મતસન્તકકથાવણ્ણના

૩૬૯. ભિક્ખુસ્સાતિ ભિક્ખુસ્મિં કાલંકતે. તત્થ ‘‘પત્તચીવરે’’તિ પધાનપરિક્ખારદસ્સનમુખેન સબ્બપરિક્ખારનિદસ્સનન્તિ વેદિતબ્બં. અધમ્મેન ઉપ્પન્નઞ્ચેતં હોતિ, સઙ્ઘસ્સ કપ્પિયમેવ મતત્તાતિ એકે. નોતિ તક્કો પત્તચતુક્કે સબ્બથા અકપ્પિયપત્તનયવિરોધતો. અધમ્મેન ઉપ્પન્નસેનાસને ચ વસતો અનાપત્તિ. અઞ્ઞતરસ્મિં આવાસે દ્વે ભિક્ખૂ વસન્તિ, તત્થ ચેકો કાલંકતો, ઇતરો તસ્સ પરિક્ખારં અપાપેત્વા તં થેય્યચિત્તેન ગણ્હાતિ, સઙ્ઘસન્તકં ગહિતં હોતિ, ભણ્ડગ્ઘેન કારેતબ્બો. અનાવાસે ગણ્હાતિ, ન કારેતબ્બો અસ્સામિકસ્સ ગહિતત્તા. મરણસમયે વત્તું અસહન્તો ચે ચિત્તેનેવ દેતિ, પુઞ્ઞં પસવતિ, સઙ્ઘોવ તસ્સ સામી. પરો વા અવિસ્સાસિકો સયમેવ ગણ્હાતિ, ગહણં ન રુહતિ, થેય્યચિત્તેન ચે, ભણ્ડગ્ઘેન કારેતબ્બો. તસ્સ ચ આવાસગતસ્સ કો સામી. ‘‘સઙ્ઘો સામી’’તિ વચનતો સઙ્ઘેન બલક્કારેન સો વારેતબ્બોતિ એકે. જીવમાનકાલે ગહિતત્તા ન સઙ્ઘો સામીતિ એકે. સામિકો ચે સયં પસ્સિત્વા અચ્છિન્દિતું લભતિ, સઙ્ઘોપિ લભતિ સામિઠાને ઠિતત્તાતિ ઇતરે, વિચારેત્વા ગહેતબ્બં.

મતકસ્સ હિરઞ્ઞાદિઅકપ્પિયભણ્ડં હોતિ. ઉગ્ગહિતઞ્ચેતં હોતિ, ઉગ્ગહિતે વુત્તનયેન પટિપજ્જિતબ્બં. ધમ્મેન ઉપ્પન્નં ચે, કપ્પિયકારકો આચિક્ખિતબ્બો. દાસો ચે ગહિતો હોતિ, ન સઙ્ઘો સામી, આરામિકો ચે, સઙ્ઘો સામી. ગાવીમહિંસીઆદયો હોન્તિ, આવાસગતાનં સઙ્ઘો સામી, અનાવાસગતાનં ન સઙ્ઘો સામી. સઙ્ઘો ચે આવાસં આનેત્વા અત્તનો સન્તકં કત્વા પચ્છા સમીપે બહિસીમાય ઠપેતિ, કારકસઙ્ઘો સામી, તથા આરામિકે. મતકસ્સ પરિક્ખારો નિક્ખેપવસેન ઠપિતો હોતિ, એસોવ સામી. મહગ્ઘો ચે હોતિ, સેસસ્સ સઙ્ઘો સામી. ‘‘કેનચિ ગિલાનુપટ્ઠાકેના’’તિ વત્તબ્બક્કમો એતેન દસ્સિતો. પુન ઉપટ્ઠાકાનં બહુભાવે સતિ સબ્બેસં દાતબ્બકમ્મં દસ્સેન્તેન ભગવતા કમ્મવાચાયં ‘‘ગિલાનુપટ્ઠાકાન’’ન્તિ વુત્તં. સામણેરવારે ‘‘ચીવર’’ન્તિ પાઠો. ‘‘ઇમં તુય્હં દેમિ દદામિ દજ્જામિ ઓણોજેમિ પરિચ્ચજામિ વિસ્સજ્જામિ નિસ્સજ્જામી’તિ વા ‘ઇત્થન્નામસ્સ દેમિ…પે… નિસ્સજ્જામી’તિ વા વદતિ, ‘સમ્મુખા વા પરમ્મુખા વા વુત્તે દિન્નંયેવ હોતી’તિ દાનલક્ખણસ્સ ચ ‘તુય્હં ગણ્હાહી’તિ વુત્તે ‘મય્હં ગણ્હામી’તિ વદતિ, ‘સુદિન્નં સુગ્ગહિતઞ્ચા’તિ (પારા. અટ્ઠ. ૨.૪૬૯) ગહણલક્ખણસ્સ ચ વુત્તત્તા ‘મમ સન્તકં તવ ચ મમ ચ હોતૂ’તિ એવમાદિવચનેન સમાનપરિક્ખારં કાતું વટ્ટતીતિ આચરિયા’’તિ લિખિતં.

અનુગણ્ઠિપદે પન અતીવ પપઞ્ચં કત્વા પુન ‘‘ઇદમેત્થ આચરિયાનં સન્નિટ્ઠાનં – સચેસમ્બહુલા, દ્વે વા સમાનપરિક્ખારં કત્તુકામા હોન્તિ, તે સબ્બે અત્તનો સન્તકં વત્તમાનં ઉપ્પજ્જનકેન સદ્ધિં પેસલસ્સ એકસ્સ પરિચ્ચજન્તિ, સો પુન તેસમેવ પરિચ્ચજતિ, એત્તાવતા તે સમાનપરિક્ખારિકા હોન્તીતિ. ઇદં સમાનપરિક્ખારલક્ખણં પાળિઆદીસુ વુત્તલક્ખણેયેવ પતનતો અચલપ્પત્તં હોતિ, તથાપિ પોરાણવિધિં અજ્ઝોત્થરિત્વા વત્તનતો પટિસેધેતબ્બો, આચરિયાનં મતાનુસારેન કાતબ્બં કાતુકામેનાતિ અપરે’’તિ વુત્તં, ‘‘વસ્સંવુત્થસામણેરો પઞ્ચસુ સિક્ખાપદેસુ એકં અતિક્કમિત્વા પુન ગહિતો લાભં ન લભતિ, અન્તિમવત્થું અજ્ઝાપન્નો નામ હોતી’’તિ વદન્તિ.

વસ્સંવુત્થાનંઅનુપ્પન્નચીવરકથાવણ્ણના

૩૭૫. ઉપ્પન્ને ચીવરે અભાજિતે પક્કમતીતિ એત્થ ‘‘સઙ્ઘેન તત્રુપ્પાદતો એકેકસ્સ ભિક્ખુનો એત્તકં વસ્સાવાસિકં દાતું સઙ્ઘસ્સ રુચ્ચતી’’તિ સાવિતેપિ વિબ્ભમતિ, તતો ન લભતિ, પુન પબ્બજિત્વા ઉપસમ્પજ્જિત્વા ચીવરભાજનં સમ્ભાવેન્તોપિ ન લભતિયેવ પુબ્બપકતિતો ભટ્ઠત્તા. અથ પાપિતે વિબ્ભમતિ, લભતી’’તિ ચ વુત્તં.

સઙ્ઘેભિન્નેચીવરુપ્પાદકથાવણ્ણના

૩૭૬. પરસમુદ્દેતિ જમ્બુદીપે.

અટ્ઠચીવરમાતિકાકથાવણ્ણના

૩૭૯. યસ્મા અપરિક્ખિત્તસ્સ પરિક્ખેપારહટ્ઠાનં દુબ્બિજાનં, તસ્મા ‘‘અપિચા’’તિઆદિ વુત્તં. તત્થ ધુવસન્નિપાતટ્ઠાનમ્પિ પરિયન્તગતમેવ ગહેતબ્બં. ‘‘મહાપચ્ચરિયં પન ભિક્ખૂસુપિ…પે… પાપુણાતીતિ ‘ઉપચારસીમાય દેમા’તિ એવં દિન્નમેવ સન્ધાયા’’તિ લિખિતં. ‘‘સમાનસંવાસકસીમાયા’’તિ વુત્તે ખણ્ડસીમાદીસુ ઠિતાનં ન પાપુણાતિ તાસં વિસું સમાનસંવાસકસીમત્તા. સમાનસંવાસકઅવિપ્પવાસસીમાનં ઇદં નાનત્તં – ‘‘અવિપ્પવાસસીમાય દમ્મી’’તિ દિન્નં ગામટ્ઠાનં ન પાપુણાતિ. કસ્મા? ‘‘ઠપેત્વા ગામઞ્ચ ગામૂપચારઞ્ચા’’તિ વુત્તત્તા. ‘‘સમાનસંવાસકસીમાયા’’તિ દિન્નં પન યસ્મિં ઠાને અવિપ્પવાસસીમા અત્થિ, તત્થ ઠિતાનં, ઇતરત્ર ઠિતાનઞ્ચ પાપુણાતિ. ‘‘ખણ્ડસીમાયં ઠત્વા ‘સીમટ્ઠકસઙ્ઘસ્સ દમ્મી’તિ વુત્તે ઉપચારસીમાય એવ પરિચ્છિન્દિત્વા દાતબ્બ’’ન્તિ વુત્તં. ‘‘અવિપ્પવાસસીમાય દેમા’’તિ ખણ્ડસીમાયં ઠત્વા દિન્ને તત્થેવ પાપુણાતીતિ કેચિ. યોજનસતમ્પિ પૂરેત્વા નિસીદન્તીતિ એત્થ વિહારૂપચારે હત્થપાસેન, બહિગામાદીસુ દ્વાદસહત્થેન ઉપચારોતિ એકે. ‘‘ઇમસ્મિં વિહારે સઙ્ઘસ્સા’’તિ વુત્તે એકાબદ્ધા હુત્વાપિ પરિક્ખેપપરિક્ખેપારહટ્ઠાનં અતિક્કમિત્વા ઠિતાનં ન પાપુણાતીતિ એકે. ‘‘ભિક્ખુનિવિહારતો બહિ યત્થ કત્થચિ ઠત્વા ‘સઙ્ઘસ્સા’તિ વુત્તે ભિક્ખુસઙ્ઘોવ સામી’’તિ વદન્તિ. એકોપિ ગન્ત્વાતિ એત્થ સબ્બેસં વા પાપેત્વા ગન્તબ્બં, આનેત્વા વા પાપેતબ્બં, ઇતરથા ગતસ્સ ન પાપુણાતિ. સમાનલાભકતિકા મૂલાવાસે સતિ સિયા, મૂલાવાસવિનાસેન કતિકાપિ વિનસ્સતિ. સમાનલાભવચનં સતિ દ્વીસુ, બહૂસુ વા યુજ્જતિ. તેનેવ એકસ્મિં અવસિટ્ઠે યુજ્જતીતિ નો મતિ.

‘‘તાવકાલિકકાલેન, મૂલચ્છેદવસેન વા;

અઞ્ઞેસં કમ્મં અઞ્ઞસ્સ, સિયા નાવાસસઙ્ગમો’’તિ. –

આચરિયો.

સબ્બત્થ દિન્નમેવાતિ ‘‘સમાનભાગોવ હોતી’’તિ વદન્તિ. ‘‘એકમેકં અમ્હાકં પાપુણાતીતિ ચે વદતિ, વટ્ટતી’’તિ વદન્તિ વિભાગસ્સ કતત્તા. ‘‘ભિક્ખુસઙ્ઘસ્સ ચીવરે દિન્ને પંસુકૂલિકાનં ન વટ્ટતી’’તિ વદન્તિ. ‘‘ઉભતોસઙ્ઘસ્સા’’તિ વુત્તે ‘‘ભિક્ખુસઙ્ઘસ્સા’’તિ અવુત્તત્તા ભિક્ખુનિસઙ્ઘેન મિસ્સિતત્તા, તત્થ અપરિયાપન્નત્તા ચ પુગ્ગલો વિસું લભતિ. એવં સન્તે ‘‘ભિક્ખુસઙ્ઘસ્સ ચ ભિક્ખુનિસઙ્ઘસ્સ ચ દમ્મી’’તિ વુત્તેપિ ‘‘ઉભતોસઙ્ઘસ્સ દિન્નમેવ હોતી’’તિ ઇમિના વિરુજ્ઝતીતિ ચે? ન વિરુજ્ઝતિ, તં દ્વિન્નં સઙ્ઘાનં દિન્નભાવમેવ દીપેતિ, ન ઉભતોસઙ્ઘપઞ્ઞત્તિં, તસ્મા એવ ‘‘ભિક્ખુસઙ્ઘસ્સ ચ ભિક્ખુનિસઙ્ઘસ્સ ચ તુય્હઞ્ચા’’તિ વારો ન વુત્તો. અથ વા અટ્ઠકથાવચનમેવ પમાણં, ન વિચારણાતિ એકે. યસ્મા એકો અદ્ધાનાદિયકો વિય દુવિધો ન હોતિ, તસ્મા ઉભતોસઙ્ઘગ્ગહણેન એકો ભિક્ખુ ન ગહિતોતિ. ‘‘સબ્બાવાસસ્સ ચ ચેતિયસ્સ ચ ધમ્મસ્સ ચા’તિ વુત્તે સબ્બવિહારેસુ ચેતિયધમ્માનં એકેકસ્સ ભિક્ખુનો ભાગો દાતબ્બો’’તિ વદન્તિ. ‘‘ભિક્ખુસઙ્ઘસ્સ ચ ચેતિયસ્સ ચા’’તિ વુત્તે ન વિરુજ્ઝતીતિ ચે? ન, તત્થ ‘‘ભિક્ખુસઙ્ઘસ્સા’’તિ વુત્તત્તા, ઇધ વિહારેન ઘટિતત્તા ચ તમ્હિ તમ્હિ વિહારે એકભાગં લભિતબ્બમેવાતિ પરિહરન્તિ. અત્તનો પાપેત્વાતિ વિકાલે અપરિભોગત્તા સકલોપિ વટ્ટેય્યાતિ ચે? ‘‘ભિક્ખુસઙ્ઘસ્સ હરા’’તિ વુત્તત્તા, તેન ‘‘હરામી’’તિ ગહિતત્તા ચ ન વટ્ટતિ. પચ્છિમવસ્સંવુત્થાનમ્પીતિ એત્થ અપિ-સદ્દો અવધારણત્થો, પચ્છિમવસ્સંવુત્થાનમેવાતિ અત્થો, ઇતરથા સમુચ્ચયત્થે ગહિતે ‘‘લક્ખણઞ્ઞૂ વદન્તી’’તિ વચનં નિરત્થકં સિયા. કસ્માતિ આરભિત્વા પપઞ્ચં કરોન્તિ. કિં તેન, પરતો ‘‘ચીવરમાસતો પટ્ઠાય…પે… અતીતવસ્સંવુત્થાનમેવ પાપુણાતી’’તિ ઇમિના સિદ્ધત્તા ન વિચારિતં, તેન વુત્તં ‘‘લક્ખણઞ્ઞૂ’’તિ અચલવસેન. સચે પન બહિઉપચારસીમાય ઠિતો…પે… સમ્પત્તાનં સબ્બેસં પાપુણાતીતિ યત્થ કત્થચિ વુત્થવસ્સાનન્તિ અધિપ્પાયો ‘‘યત્થ કત્થચિ વુત્થવસ્સાનં સબ્બેસં સમ્પત્તાનં પાપુણાતી’’તિ (કઙ્ખા. અટ્ઠ. અકાલચીવરસિક્ખાપદવણ્ણના) કઙ્ખાવિતરણિયં વુત્તત્તા. ગિમ્હાનં પઠમદિવસતો પટ્ઠાય વુત્તે પન યસ્મા અનન્તરાતીતં હેમન્તં એવ વુત્થા નામ હોન્તિ, ન વસ્સં, તસ્મા ‘‘માતિકા આરોપેતબ્બા’’તિ વુત્તં. યે વા થેરેહિ પેસિતા, તેસં પાપુણાતીતિ કિર અત્થો.

ચીવરક્ખન્ધકવણ્ણના નિટ્ઠિતા.