૭. એળકલોમધોવાપનસિક્ખાપદવણ્ણના

૫૮૧. કિઞ્ચાપિ પુરાણચીવરધોવનસિક્ખાપદે ચીવરં ઠપેત્વા ‘‘અઞ્ઞં પરિક્ખારં ધોવાપેતી’’તિ (પારા. ૫૦૭) અનાપત્તિવારે વુત્તં. ઇમસ્સ પન સિક્ખાપદસ્સ ઉપ્પન્નકાલતો પટ્ઠાય એળકલોમધોવાપનાદિના આપત્તીતિ એકે. સા વા અનાપત્તિ મૂલાપત્તિતો એવ, ન ઇમમ્હાતિ એકે. એળકલોમાનં અપરિક્ખારત્તા ભટ્ઠં અગ્ગહણમેવાતિ એકે. ઇમસ્સ અન્તિમનયસ્સ અત્થપ્પકાસનત્થં ઇદં પઞ્હાકમ્મં – ‘‘ધોવાપેતી’’તિ ઇદં રજાપનવિજટાપનગ્ગહણેન નિપ્પદેસવાચિપદં, ઉદાહુ અગ્ગહણેન સપ્પદેસવાચિપદં. કિઞ્ચેત્થ યદિ નિપ્પદેસવાચિપદં, સબ્બત્થ ઇદમેવ વત્તબ્બં, ન ઇતરાનિ. અથ સપ્પદેસવાચિપદં, ‘‘અવુત્તા ધોવતિ, અપરિભુત્તં ધોવાપેતી’’તિ એત્થ વિરોધો. ‘‘અવુત્તા રજતિ વિજટેતિ, નિસ્સગ્ગિય’’ન્તિ અનિટ્ઠપ્પસઙ્ગતોતિ? દેસનાવિલાસમત્તં ભગવતો વચનં, કત્થચિ તિકપદવચનં, કત્થચિ એકપદવચનં, નિપ્પદેસપદમેવ તે વદન્તીતિ. સચે ‘‘કતભણ્ડં ધોવાપેતી’’તિ એત્થ પટિવિરોધો, ‘‘કતભણ્ડં વિજટાપેતિ, અનાપત્તી’’તિ અનિટ્ઠપ્પસઙ્ગતો અનાપત્તિ એવાતિ ચે? ન, અકતભણ્ડસ્સ સુદ્ધલોમસ્સ વિજટાપનં ઇતો વા દાતબ્બં. ઉદકાદિધોવનવસેન પિણ્ડેત્વા ઠિતાનં વિજટાપનં લબ્ભતીતિ ચે? પુરાણસન્થતસ્સ વિજટાપને અનાપત્તિયા ભવિતબ્બં, ન ચ તં યુત્તં ‘‘અપરિભુત્તં ધોવાપેતી’’તિ વચનતો. તેન પરિભુત્તં ધોવાપેતિ રજાપેતિ વિજટાપેતિ, નિસ્સગ્ગિયમેવાતિ સિદ્ધં હોતિ, તઞ્ચ પરિભુત્તં નામ કતભણ્ડમેવ હોતિ. ન હિ સક્કા એળકલોમાનિ પરિભુઞ્જિતું, અઞ્ઞથા ‘‘પરિભુત્તં ધોવાપેતી’’તિ વચનં નિરત્થકં હોતિ. ન હિ એત્થ ‘‘પુરાણાનિ એળકલોમાનિ ધોવાપેય્ય વા’’તિ વચનં અત્થિ પુરાણચીવરસિક્ખાપદે વિય. તત્થ આદિન્નકપ્પવસેન, ઇધ તં લિખિતં. લેખદોસોતિ ચે? ન, વિસેસહેતુનો અભાવા, પુરાણચીવરસિક્ખાપદે અપરિભુત્તં કતભણ્ડં નામ, ‘‘કમ્બલકોજવસન્થતાદિ’’ન્તિ વચનતો ચ. કિઞ્ચાપિ ઇમિના સદ્દેન અયમત્થો સિદ્ધો, ‘‘ધોવાપેતી’’તિ ઇદં પન સિયા નિપ્પદેસં. સિયા સપ્પદેસં. તઞ્હિ ‘‘અવુત્તા ધોવતી’’તિઆદીસુ નિપ્પદેસં. ‘‘કતભણ્ડં ધોવાપેતી’’તિ એત્થ સપ્પદેસં. ‘‘અકતભણ્ડં ધોવાપેતિ રજાપેતિ, અનાપત્તી’’તિ ‘‘વિજટાપેતિ, અનાપત્તી’’તિ વચનપ્પમાણતો અનાપત્તિ એવાતિ ચે? ન, વચનપ્પમાણતો એવ આપત્તીતિ આપજ્જનતો. ‘‘અપરિભુત્તં ધોવાપેતી’’તિ વચનમેવ હિ તં અપરિભુત્તં સન્થતં વિજટાપેન્તસ્સ અનાપત્તીતિ દીપેતિ ચે? સિદ્ધં પરિભુત્તં વિજટાપેન્તસ્સ આપત્તિ એવાતિ.

એળકલોમધોવાપનસિક્ખાપદવણ્ણના નિટ્ઠિતા.