૨૩૭. ચતુવગ્ગકરણાદિકથા

૩૮૮. યદિદં કમ્મન્તિ યોજના. તેસન્તિ સઙ્ઘાનં. કમ્મપ્પત્તોતિ એત્થ કમ્મેન, કમ્મસ્સ વા પત્તોતિ અત્થં પટિક્ખિપન્તો આહ ‘‘કમ્મં પત્તો’’તિ. ‘‘સબ્બકમ્મેસુ કમ્મપત્તો’’તિ પાળિનયેન ‘‘કમ્મેસુ પત્તો’’તિ અત્થોપિ યુજ્જતિ. લોકવોહારવસેન ‘‘કમ્મેન કમ્મસ્સ વા પત્તો’’તિ અત્થોપિ યુજ્જતેવ.

૩૮૯. પરિસતોતિ પરિસકારણા. તત્થાતિ ‘‘ચતુવગ્ગકરણઞ્ચે ભિક્ખવે’’તિઆદિપાઠે, ચતુવીસતિપુગ્ગલેસુ વા. કમ્મનાનાસંવાસકોતિ ઉક્ખેપનીયકમ્મકતો. લદ્ધિનાનાસંવાસકોતિ ઉક્ખિત્તાનુવત્તકો. ‘‘હુત્વા’’તિ ઇમિના ‘‘ભિક્ખુનીચતુત્થો’’તિઆદીસુ ચતુવીસતિયા ઠાનેસુ કિરિયાવિસેસનભાવં દસ્સેતિ. ભિક્ખુની ચતુત્થી એતસ્સાતિ ભિક્ખુનીચતુત્થો, ચતુવગ્ગો સઙ્ઘોતિઆદિના વચનત્થો કાતબ્બો.

૩૯૩. પરિવાસાદીતિઆદિસદ્દેન મૂલાયકસ્સનમાનત્તઅબ્ભાનાનિ સઙ્ગણ્હાતિ. તેસન્તિ પરિવાસાદિકમ્માનં. પરતોતિ પરસ્મિં ચૂળવગ્ગે (ચૂળવ. અટ્ઠ. ૭૫ આદયો).

૩૯૪. પટિકુટ્ઠકતકમ્મસ્સાતિ પટિકુટ્ઠસ્સ હુત્વા કતસ્સ કમ્મસ્સ. પકતત્તસ્સાતિ એત્થ પકતિસીલસઙ્ખાતો અત્તા સભાવો એતસ્સાતિ પકતત્તોતિ અત્થં દસ્સેન્તો આહ ‘‘અવિપન્નસીલસ્સા’’તિ. સઙ્ઘાદિસેસં અનાપજ્જન્તસ્સાપિ અવિપન્નસીલત્તા વુત્તં ‘‘પારાજિકં અનજ્ઝાપન્નસ્સા’’તિ. ઇમિના સઙ્ઘાદિસેસં આપજ્જન્તોપિ પકતત્તોયેવાતિ દસ્સેતિ. સોપિ હિ ઇધ અવિપન્નસીલો નામ, અઞ્ઞત્થ પન સઙ્ઘાદિસેસસ્સ સીલવિપત્તિભાવતો તં આપજ્જન્તોપિ વિપન્નસીલોયેવ નામ. આનન્તરિકસ્સાતિ એત્થ અનન્તરસદ્દસ્સ સમ્બન્ધઞ્ચ ણિકપચ્ચયસ્સ અત્થઞ્ચ દસ્સેન્તો આહ ‘‘અત્તનો અનન્તરં નિસિન્નસ્સા’’તિ. તત્થ ‘‘અત્તનો’’તિ ઇમિના અનન્તરસદ્દસ્સ સમ્બન્ધં દસ્સેતિ. ‘‘નિસિન્નસ્સા’’તિ ઇમિના ણિકપચ્ચયસ્સ અત્થં દસ્સેતિ.