૨૩૯. દ્વેનિસ્સારણાદિકથા

૩૯૫. વત્થુતોતિ વત્થુકારણા. તત્થાતિ ‘‘દ્વેમા ભિક્ખવે’’તિઆદિપાઠે. ‘‘સન્ધાય વુત્ત’’ન્તિ ઇમિના ‘‘અપ્પત્તો’’તિઆદિસુત્તસ્સ નેય્યત્થભાવં દસ્સેતિ. હીતિ સચ્ચં, યસ્મા વા. તન્તિ પબ્બાજનીયકમ્મં. પુન તન્તિ પબ્બાજનીયકમ્મમેવ. એસ ભિક્ખુ અપ્પત્તોતિ સમ્બન્ધો. કસ્મા અપ્પત્તોતિ આહ ‘‘યસ્મા’’તિઆદિ. આવેણિકલક્ખણેનાતિ અવિના હુત્વા પવત્તેન લક્ખણેન. અત્તના અવિના હુત્વા અત્તનો સન્તકેન વિસું ભૂતેન લક્ખણેનાતિ વુત્તં હોતિ. યદિ અપ્પત્તો, કસ્મા સુનિસ્સારિતોતિ આહ ‘‘યસ્મા પનસ્સા’’તિઆદિ. અસ્સાતિ ભિક્ખુસ્સ, કરેય્યાતિ સમ્બન્ધો. તં ચે સઙ્ઘો તજ્જનીયકમ્માદિવસેન નિસ્સારેતિ, સુનિસ્સારિતોતિ સમ્બન્ધો. સોતિ ભિક્ખુ. યસ્મા અનુઞ્ઞાતા, તસ્મા સુનિસ્સારિતોતિ યોજના. કિત્તકેન અઙ્ગેન અનુઞ્ઞાતાતિ આહ ‘‘એકેનપિ અઙ્ગેના’’તિ.

૩૯૬. ઓસારણાતિ એત્થ ઓત્યૂપસગ્ગવસેન સરધાતુ પવેસનત્થોતિ આહ ‘‘પવેસના’’તિ. તત્થાતિ ‘‘ઓસારણા’’તિઆદિપાઠે. ઓસારેતીતિ એત્થ અબ્ભાનાદિવસેન પવેસનં પટિક્ખિપન્તો આહ ‘‘ઉપસમ્પદકમ્મવસેના’’તિ. સહસ્સક્ખત્તુમ્પીતિ પિસદ્દો ગરહત્થો. એકવારાદિકે પન કા નામ કથાતિ દસ્સેતિ. સાતિસારાતિ સદોસા. તથાતિ યથા આચરિયુપજ્ઝાયા સાતિસારા, તથા. સેસો કારકસઙ્ઘો સાતિસારોતિ સમ્બન્ધો. ‘‘હત્થચ્છિન્નાદયો પન દ્વત્તિંસ સુઓસારિતા’’તિ વુત્તત્તા અન્ધમૂગબધિરાનં અપબ્બજિતાનમ્પિ ઉપસમ્પદા રુહતીતિ દટ્ઠબ્બં. તેતિ હત્થચ્છિન્નાદયો દ્વત્તિંસ.

૩૯૭. અભૂતવત્થુવસેનાતિ અસચ્ચવત્થુવસેન, અસંવિજ્જમાનવત્થુવસેન વા. તત્થાતિ ‘‘ઇધ પન ભિક્ખવે’’તિઆદિપાઠે. પટિનિસ્સજ્જિતાતિ એત્થ તપચ્ચયસ્સ કમ્મત્થે પવત્તભાવં દસ્સેન્તો આહ ‘‘પટિનિસ્સજ્જિતબ્બા’’તિ.