૧૭૮. સીહસેનાપતિવત્થુકથા

૨૯૦. ધમ્મસ્સ ચ અનુધમ્મન્તિ એત્થ ધમ્મસદ્દો કારણત્થોતિ આહ ‘‘કારણસ્સ અનુકારણ’’ન્તિ. ‘‘પરેહી’’તિ પદં ‘‘વુત્ત’’ઇતિ પદે કત્તા. ‘‘વુત્તકારણેના’’તિપદં ‘‘સકારણો’’તિપદે કરણં. કોચિ અપ્પમત્તકોપિ તુમ્હાકં વાદોતિ યોજના. ‘‘વિઞ્ઞૂહી’’તિ પદં ‘‘ગરહિતબ્બ’’ઇતિ પદે કત્તા. ‘‘ગરહિતબ્બકારણ’’ન્તિ પદં ‘‘ન આગચ્છતી’’તિ પદે કમ્મં. અનબ્ભક્ખાતુકામાતિ એત્થ અભિત્યૂપસગ્ગો અભિભવનત્થો આપુબ્બો ખાધાતુ પકથનત્થોતિ આહ ‘‘અભિભવિત્વા ન આચિક્ખિતુકામા’’તિ.

૨૯૩. અનુવિચ્ચકારન્તિ એત્થ અનુવિચ્ચસદ્દો વિચધાતુ ત્વાપચ્ચયન્તોતિ આહ ‘‘અનુવિચિત્વા’’તિ. ‘‘ચિન્તેત્વા’’તિ ઇમિના વિચધાતુયા ઞાણત્થં દસ્સેતિ. ‘‘કાતબ્બ’’ન્તિ ઇમિના કાતબ્બન્તિ કારન્તિ વચનત્થં દસ્સેતિ. પટાકન્તિ ધજપટાકં. ‘‘આહિણ્ડેય્યુ’’ન્તિ ઇમિના પરિયાયેય્યુન્તિ એત્થ પરિપુબ્બઆપુબ્બ યાધાતુયા ગત્યત્થં દસ્સેતિ. પાળિયં ‘‘પરિહરેય્યુ’’ન્તિપિ પાઠો. આહિણ્ડેય્યુન્તિ આહિણ્ડન્તિ. મુદ્ધજો તતિયક્ખરો. ઓપાનભૂતન્તિ એત્થ ઓપાનો વિય ભૂતો ઓપાનભૂતોતિ અત્થં દસ્સેન્તો આહ ‘‘પટિયત્તઉદપાનો વિય ઠિત’’ન્તિ. ‘‘ઉદપાનો’’તિ ઇમિના ઓપાનસદ્દો ઉદપાનત્થોતિ દસ્સેતિ. ઉદપાનો હિ સબ્બે જના ઓસરિત્વા પિવન્તિ એત્થાતિ ઓપાનોતિ વુચ્ચતિ. ઇમેસન્તિ નિગણ્ઠાનં. હીતિ સચ્ચં, યસ્મા વા. સમ્પત્તાનં દાનં દાતબ્બમેવ, તસ્મા મા ઉપચ્છિન્દિત્થાતિ યોજના. ઉદ્દિસ્સાતિ ત્વાપચ્ચયન્તસદ્દો ‘‘કત’’ન્તિ ઉત્તરપદેન સમાસોતિ આહ ‘‘ઉદ્દિસિત્વા કત’’ન્તિ. એસેવ નયો ‘‘પટિચ્ચકમ્મ’’ન્તિ એત્થાપિ.

૨૯૪. પટિચ્ચકમ્મન્તિ એતં નામં નિમિત્તકમ્મસ્સ અધિવચનન્તિ યોજના. યોતિ યો કોચિ જનો. વધકસ્સ પાણઘાતકમ્મં હોતિ વિય, તસ્સાપિ હોતીતિ યોજના. ન જીરન્તીતિ એત્થ જરધાતુ ગત્યત્થોતિ આહ ‘‘ન ગચ્છન્તી’’તિ.