૧૧૮. પટિસ્સવદુક્કટાપત્તિકથા

૨૦૭. પટિસ્સવે આપત્તિ દુક્કટસ્સાતિ એત્થ કિં વસ્સાવાસપટિસ્સુતેયેવ દુક્કટાપત્તિ હોતીતિ આહ ‘‘ન કેવલ’’ન્તિઆદિ. એતસ્સેવાતિ વસ્સાવાસસ્સેવ. એવમાદિનાપીતિ પિસદ્દો ‘‘પટિસ્સવે’’તિ એત્થ યોજેતબ્બો. ‘‘પટિસ્સવેપી’’તિ હિ અત્થો. તસ્સ તસ્સાતિ કમ્મસ્સ. તઞ્ચ ખોતિ તઞ્ચ દુક્કટં વિસંવાદનપચ્ચયા હોતીતિ યોજના. પઠમમ્પીતિ પિસદ્દો ‘‘પચ્છાપી’’તિ પદં સમ્પિણ્ડેતિ. પઠમમ્પિ હિ પાચિત્તિયં, પચ્છાપિ દુક્કટન્તિ અત્થો.

સો તદહેવ અકરણીયોતિઆદીસુ એવં વિનિચ્છયો વેદિતબ્બોતિ યોજના. પુરિમિકા ચ ન પઞ્ઞાયતીતિ એત્થ પુરે ભવા પુરિમા, સા એવ પુરિમિકા, પાટિપદતિથી. નાનાસીમાય દ્વીસુ આવાસેસુ વસ્સં ઉપગચ્છન્તસ્સ દુતિયે ‘‘વસિસ્સામી’’તિ પઠમાવાસસ્સ ઉપચારતો નિક્ખન્તમત્તે પઠમસેનાસનગ્ગાહસ્સ પસ્સમ્ભનં સન્ધાય વુત્તં ‘‘પુરિમિકા ચ ન પઞ્ઞાયતી’’તિ. અરુણં અનુટ્ઠાપેત્વાતિ વસ્સં ઉપગમનવિહારે અરુણં અનુટ્ઠાપેત્વા. તદહેવાતિ તસ્મિં વસ્સૂપગમનઅહનિ એવ, પક્કન્તસ્સાપીતિ સમ્બન્ધો. પિસદ્દસ્સ ગરહત્થં દસ્સેન્તો આહ ‘‘કો પન વાદો’’તિઆદિ. આલયોતિ ચિત્તસ્સ અલ્લીયનં. અસતિયાતિ સતિપમુટ્ઠેન. વસ્સં ન ઉપેતીતિ ‘‘ઇમસ્મિં વિહારે ઇમં તેમાસં વસ્સં ઉપેમી’’તિ (મહાવ. અટ્ઠ. ૧૮૪) વચીભેદં કત્વા વસ્સં ન ઉપેતિ.

સત્તાહન્તિ સત્તાહેન, અનાગતાયાતિ સમ્બન્ધો. નવમિતોતિ પુબ્બકત્તિકમાસસ્સ જુણ્હપક્ખનવમિતો, પચ્છિમકત્તિકમાસસ્સ જુણ્હપક્ખનવમિતો વા. મા વા આગચ્છતુ, અનાપત્તીતિ વસ્સંવુત્થત્તા મા વા આગચ્છતુ, અનાપત્તીતિ અત્થો.

ઇતિ વસ્સૂપનાયિકક્ખન્ધકવણ્ણનાય યોજના સમત્તા.