૧૦૮. વસ્સાનેચારિકાપટિક્ખેપાદિકથા

૧૮૫. આપત્તિ વેદિતબ્બાતિ અનપેક્ખગમનેન ઉપચારાતિક્કમે સાપેક્ખગમનેન અઞ્ઞત્થ અરુણુટ્ઠાપને આપત્તિ વેદિતબ્બા. વિહારગણનાય આપત્તિયો વેદિતબ્બાતિ એત્થ વસ્સૂપનાયિકદિવસે વસ્સં અનુપગન્તુકામતાચિત્તેન વિહારં અતિક્કમેય્ય, વિહારગણનાય આપત્તિયો વેદિતબ્બા. તમેવત્થં વિત્થારેન્તો આહ ‘‘સચે હી’’તિઆદિ. તં દિવસન્તિ તસ્મિં વસ્સૂપગમનદિવસે. સતં આપત્તિયોતિ એત્થ સતન્તિ સઙ્ખ્યાપધાનત્તા એકવચનન્તિ સદ્દસત્થેસુ વુત્તં. એકા એવ આપત્તીતિ અત્તનો વિહારસ્સ અતિક્કમનેયેવ એકા એવ આપત્તિ. કેનચિ અન્તરાયેન અનુપગતેનાતિ સમ્બન્ધો.

વસ્સનામો ઇમસ્સત્થીતિ વસ્સોતિ વચનત્થં દસ્સેન્તો આહ ‘‘વસ્સનામક’’ન્તિ. ‘‘પઠમં માસ’’ન્તિ ઇમિના અઞ્ઞપદસ્સ સરૂપં દસ્સેતિ. પઠમં માસન્તિ ચતૂસુ વસ્સમાસેસુ પઠમં માસં. ઉક્કડ્ઢિતુકામોતિ ઉપરિ કડ્ઢિતુકામો. આસળ્હીમાસમેવ, ન સાવણમાસન્તિ અત્થો. જુણ્હસદ્દો ચન્દપભાયુત્તો માસોતિ આહ ‘‘માસે’’તિ. ચન્દપભાયુત્તો માસોતિ આહ ‘‘માસે’’તિ. ચન્દપભાયુત્તો હિ માસો જોતતિ દિપ્પતીતિ જુણ્હોતિ વુચ્ચતિ. તસ્મા ‘‘માસે’’તિ સામઞ્ઞતો વુત્તેપિ પુણ્ણમિયુત્તો માસોવ ગહેતબ્બો. કાચિ પરિહાનિ નામાતિ કિઞ્ચિ સીલાદીનં હાયનં નામ. અઞ્ઞસ્મિમ્પીતિ વસ્સૂપગમનતો અઞ્ઞસ્મિમ્પિ. ધમ્મિકેતિ ધમ્મેન યુત્તે.