૧૦૯. સત્તાહકરણીયાનુજાનનકથા

૧૮૭. સત્તાહકરણીયેસુ એવં વિનિચ્છયો વેદિતબ્બોતિ યોજના. ‘‘સત્તાહકરણીયેના’’તિ પદસ્સ સત્તમીસમાસઞ્ચ અનીયસદ્દસ્સ કમ્મત્થઞ્ચ દસ્સેન્તો આહ ‘‘સત્તાહબ્ભન્તરે યં કત્તબ્બ’’ન્તિ. તત્થ ‘‘સત્તાહબ્ભન્તરે’’તિ ઇમિના સત્તમીસમાસં દસ્સેતિ, ‘‘કત્તબ્બ’’ન્તિ ઇમિના કમ્મત્થં. ‘‘સત્તાહબ્ભન્તરે’’તિ ઇમિના સત્તાહસ્સ અબ્ભન્તરં સત્તાહન્તિ ઉત્તરપદલોપં દસ્સેતિ. પહિતે ગન્તુન્તિ એત્થ પહિતેસદ્દસ્સ કત્તુકમ્માનિ દસ્સેતું વુત્તં ‘‘ભિક્ખુઆદીહિ દૂતે’’તિ. તત્થ ‘‘ભિક્ખુઆદીહી’’તિ ઇમિના કત્તારં દસ્સેતિ, ‘‘દૂતે’’તિ ઇમિના કમ્મં. સત્તાહન્તિ એત્થ ઉત્તરપદલોપઞ્ચ ભુમ્મત્થે ઉપયોગવચનઞ્ચ દસ્સેન્તો આહ ‘‘અન્તોસત્તાહેયેવા’’તિ. તત્થેવાતિ તસ્મિં પહિતટ્ઠાનેયેવ. ‘‘ન ઉટ્ઠાપેતબ્બો’’તિ ઇમિના ‘‘સત્તાહેયેવા’’તિ એત્થ એવસદ્દસ્સ ફલં દસ્સેતિ.

૧૮૯. રસો એતસ્મિં અત્થીતિ રસવતીતિ વુત્તે ભત્તગેહં ગહેતબ્બન્તિ આહ ‘‘ભત્તગેહં વુચ્ચતી’’તિ. ભત્તગેહન્તિ ભત્તપચનગેહં. પુરાયં સુત્તન્તોતિ એત્થ પુરા અયન્તિ પદચ્છેદં કત્વા પુરાસદ્દો યાવપરિયાયોતિ આહ ‘‘યાવ અયં સુત્તન્તો’’તિ. ન પલુજ્જતીતિ એત્થ લુજધાતુ વિનાસત્થોતિ આહ ‘‘ન વિનસ્સતી’’તિ. પરિસઙ્ખતન્તિ પરિસઙ્ખરિતબ્બં. સબ્બત્થાતિ સબ્બેસુ પહિતેસુ. ઇમિનાવ કપ્પિયવચનેનાતિ ઇમિના એવ કપ્પિયેન તિવાક્યસઙ્ખાતેન વચનેન. એતેસન્તિ એતેસં તિણ્ણં વાક્યાનં. વેવચનેનાતિ ‘‘યઞ્ઞઞ્ચ યજિતું, સુત્તઞ્ચ ઉગ્ગણ્હિતું, સમણે ચ દસ્સિતુ’’ન્તિ પરિયાયેન. સત્તસૂતિ ઉપાસક ઉપાસિક ભિક્ખુભિક્ખુની સિક્ખમાન સામણેર સામણેરી સઙ્ખાતાસુ સત્તસુ.