૧૦૭. વસ્સૂપનાયિકાનુજાનનકથા

૧૮૪. વસ્સૂપનાયિકક્ખન્ધકે ‘‘અનનુઞ્ઞાતો’’તિ ઇમિના અપઞ્ઞત્તોતિ એત્થ ઞાધાતુયા અનુજાનનત્થં દસ્સેતિ, ‘‘અસંવિહિતો’’તિ ઇમિના ઞાધાતુયા ઠપનત્થં. તેધાતિ તે ઇધ. ઇધસદ્દો સાસનઞ્ચ લોકઞ્ચ દેસઞ્ચ પદપૂરણઞ્ચ ઉપાદાય વત્તતિ, ઇધ પન પદપૂરણેતિ દસ્સેન્તો આહ ‘‘ઇધસદ્દો નિપાતમત્તો’’તિ. સંહનનં સઙ્ઘાતો, વિનાસોતિ અત્થો. ઇતિ ઇમમત્થં દસ્સેતિ ‘‘વિનાસ’’ન્તિ ઇમિના. સકુન્તકસદ્દો સકુણપરિયાયોતિ આહ ‘‘સકુણા’’તિ. સકુણાતિ ચ વિહઙ્ગમા. તે હિ આકાસે ગન્તું સક્કોન્તીતિ સકુણાતિ વુચ્ચન્તિ. સંકસાયિસ્સન્તીતિ એત્થ ‘‘સં કસે અચ્છને’’તિ ધાતુપાઠેસુ (સદ્દનીતિધાતુમાલાયં ૧૬ સકારન્તધાતુ) વુત્તત્તા સંપુબ્બો કસેધાતુ અચ્છનત્થોતિ આહ ‘‘વસિસ્સન્તી’’તિ. એકારન્તોયં ધાતુ. નિબદ્ધવાસન્તિ નિચ્ચવાસં. વસ્સાનનામકેતિ વસ્સાનઉતુનામકે. વસ્સાનસ્સ ચતુમાસત્તા ‘‘તેમાસે’’તિ વુત્તં. વસ્સૂપનાયિકાતિ એત્થ નીધાતુ ગમનત્થોતિ આહ ‘‘વસ્સૂપગમનાની’’તિ. અપરજ્જૂતિ પુણ્ણમિતો અપરં અહન્તિ અપરજ્જુ, અહત્થે જ્જુપચ્ચયો, અત્થતો પાટિપદદિવસો. અયં અપરજ્જુસદ્દો પઠમન્તનિપાતો. અસ્સાતિ આસળ્હીપુણ્ણમિયા. અસમાનાધિકરણવિસયો બાહિરત્થસમાસોયં, અતિક્કન્તાય સતિયાતિ યોજના. અપરસ્મિં દિવસેતિ પાટિપદદિવસે. અસ્સાતિ સાવણમાસપુણ્ણમિયા. તસ્માતિ યસ્મા ચ અપરજ્જુગતા, યસ્મા ચ માસગતા, તસ્મા. ‘‘અનન્તરે પાટિપદદિવસે’’તિ ઇમિના પાળિયં અપરજ્જુગતાય આસળ્હિયા અનન્તરે પાટિપદદિવસે પુરિમિકા ઉપગન્તબ્બાતિ અત્થં દસ્સેતિ. આસળ્હિયાતિ આસળ્હીપુણ્ણમિયા. પચ્છિમનયેપિ માસગતાય આસળ્હિયા અનન્તરે પાટિપદદિવસે પચ્છિમિકા ઉપગન્તબ્બાતિ અત્થો દટ્ઠબ્બો. આસળ્હિયાતિ આસળ્હીપુણ્ણમિયા સમીપે પવત્તત્તા આસળ્હીસઙ્ખાતાય સાવણપુણ્ણમિયાતિ અત્થો. પાટિપદદિવસેયેવ વસ્સં ઉપગન્તબ્બન્તિ સમ્બન્ધો. સકિં વાતિઆદીસુ વાસદ્દો અનિયમવિકપ્પત્થો. નિચ્છારેત્વાતિ નિચ્ચારેત્વા, ઉચ્ચારેત્વાતિ અત્થો. અફુટ્ઠક્ખરસઞ્ઞોગેહિ પરો ક્વચિ ફુટ્ઠત્તમાપજ્જતિ ‘‘નિક્ખમતી’’તિઆદીસુ વિય. તસ્મા પરસ્સ ચકારસ્સ છકારં કત્વા ‘‘નિચ્છારેત્વા’’તિ વુત્તં.