૬૮. સન્નિપાતાનુજાનનાદિકથા

૧૩૨. ઉપોસથક્ખન્ધકે તરન્તિ ઓતરન્તિ એત્થાતિ તિત્થં, ઉદકતિત્થં, તિત્થં વિયાતિ તિત્થં, લદ્ધીતિ આહ ‘‘તિત્થં વુચ્ચતિ લદ્ધી’’તિ. લદ્ધિ હિ બહૂનં લદ્ધિકાનં ઓતરણટ્ઠાનત્તા તિત્થં નામ. અઞ્ઞન્તિ સાસનિકલદ્ધિતો અઞ્ઞં. એતેસન્તિ પરિબ્બાજકાનં. ઇતોતિ ઇમસ્મા સાસનિકલદ્ધિતો. યન્તિ યં ધમ્મજાતં. તેસન્તિ અઞ્ઞતિત્થિયાનં પરિબ્બાજકાનં. તે લભન્તીતિ એત્થ તસદ્દો મનુસ્સવિસયોતિ આહ ‘‘તે મનુસ્સા’’તિ. મૂગસૂકરાતિ એત્થ થૂલસરીરસ્સ સૂકરસ્સ સદ્દમત્તસ્સાપિ અભાવતો મૂગસૂકરો નામાતિ આહ ‘‘થૂલસરીરસૂકરા’’તિ.

૧૩૫. અસ્સાતિ ભિક્ખુનો. સોતિ સમ્પજાનમુસાવાદો. કિન્તિ કિં આપત્તિ. દુક્કટન્તિ પદસ્સ દુક્કટં કમ્મન્તિ આસઙ્કા ભવેય્યાતિ આહ ‘‘દુક્કટાપત્તી’’તિ. સા ચ ખો દુક્કટાપત્તિ મુસાવાદલક્ખણેન ન હોતીતિ યોજના. કેન હોતીતિ આહ ‘‘ભગવતો પન વચનેના’’તિ. વચનેનાતિ ચ ‘‘સમ્પજાનમુસાવાદે કિં હોતિ? દુક્કટં હોતી’’તિ (મહાવ. ૧૩૫) વચનેન. અકિરિયસમુટ્ઠાનાતિ આવિ કત્તબ્બાય આપત્તિયા અકરણેન અકિરિયસમુટ્ઠાના.

મનુજેનાતિ મનુસ્સેન. વાચાતિ વાચાય. યકારસ્સ હિ લોપો. ગિરન્તિ સદ્દં. પરેતિ અઞ્ઞે પુગ્ગલે. વાચસિકન્તિ વાચાતો સમુટ્ઠિતં. અયં પનેત્થ યોજના – ભિક્ખુ કેનચિ આસન્ને ઠિતેન મનુજેન વાચાય અનાલપન્તો હોતિ, પરે દૂરે ઠિતે પુગ્ગલે સન્ધાય ગિરં મહાસદ્દં નો ચ ભણેય્ય, એવમ્પિ વાચસિકમેવ આપજ્જેય્યાતિ.

અન્તરાયિકોતિ એત્થ કરોત્યત્થે ણિકપચ્ચયોતિ આહ ‘‘અન્તરાયકરો’’તિ. ‘‘કિમત્થાયા’’તિ ઇમિના કિસ્સાતિ એત્થ તદત્થે ચતુત્થીતિ દસ્સેતિ, હેત્વત્થોપિ યુજ્જતેવ. સબ્બત્થાતિ સબ્બેસુ ‘‘દુતિયસ્સ ઝાનસ્સ અધિગમાયા’’તિઆદીસુ. ઇતીતિઆદિ નિગમનં. ઉદ્દેસતો ચાતિ ‘‘સુણાતુ મે ભન્તે સઙ્ઘો’’તિઆદિઉદ્દેસતો ચ. નિદ્દેસતો ચાતિ ‘‘પાતિમોક્ખન્તિ આદિમેત’’ન્તિઆદિનિદ્દેસતો ચ.

૧૩૬. દેવસિકન્તિ એત્થ ણિકપચ્ચયો વિચ્છત્થે હોતીતિ આહ ‘‘દિવસે દિવસે’’તિ. તતિયે ચ સત્તમે ચ પક્ખેતિ એકસ્સ ઉતુનો અટ્ઠસુ પક્ખેસુ તતિયે ચ સત્તમે ચ પક્ખે. ‘‘વચનતો’’તિ પદં ‘‘વટ્ટતી’’તિ પદે ઞાપકહેતુ. તથારૂપે પચ્ચયેતિ તથારૂપે વિકતિચારિત્તસઙ્ખાતે પચ્ચયે. અનુવત્તિતબ્બન્તિ અનુમતિં વત્તિતબ્બં. વચનતોપીતિ પિસદ્દો પુબ્બે ઞાપકહેતું સમ્પિણ્ડેતિ. એતન્તિ ‘‘યસ્મિં તસ્મિં ચાતુદ્દસે વા પન્નરસે વા ઉદ્દિસિતું વટ્ટતી’’તિ વચનં.