૭૧. સીમાનુજાનનકથા

૧૩૮. નિમિત્તા કિત્તેતબ્બાતિ નિમિત્તાનિ કિત્તેતબ્બાનિ. નિકારસ્સ હિ આકારો. નિમિત્તં કતોતિ એસો પબ્બતો નિમિત્તં કતોતિ યોજના. એસેવ નયો પરતોપિ. ‘‘એસેવ નયો’’તિ ઇમિના ‘‘પુરત્થિમાય દિસાય કિં નિમિત્તં? પાસાણો ભન્તે, એસો પાસાણો નિમિત્ત’’ન્તિ અત્થં અતિદિસતિ. એસેવ નયો સેસેસુપિ. કેવલં પન વનઉદકેસુ ‘‘એતં વનં, એતં ઉદક’’ન્તિ વત્તબ્બં. નદિયં ‘‘એસા નદી’’તિ વત્તબ્બા. એત્થ પનાતિ એતિસ્સં ઉત્તરાયં અનુદિસાયં પન. હીતિ ફલજોતકો. તત્થાતિ ‘‘નિમિત્તા કિત્તેતબ્બા’’તિ વચને. સીમમણ્ડલન્તિ સીમબિમ્બં. સમ્બન્ધન્તેનાતિ પુરિમનિમિત્તેન પચ્છિમનિમિત્તં સમ્બન્ધન્તેન. ઇમિના એકન્તરિકાદિવસેન નિમિત્તકિત્તનં ન વટ્ટતિ નિમિત્તેનપિ નિમિત્તાનં સમ્બન્ધાભાવતોતિ દસ્સેતિ. પુરિમનિમિત્તેન પચ્છિમનિમિત્તસ્સ સમ્બન્ધે સતિ અજ્જ એકં નિમિત્તં કિત્તેત્વા સ્વે એકં નિમિત્તં કિત્તેત્વાતિ એવં કાલન્તરેપિ નિમિત્તં કિત્તેત્વા સમ્મનિતું વટ્ટતીતિ વદન્તિ.

પબ્બતોતિ એત્થ પબ્બં વુચ્ચતિ ફળુ, તં એતસ્મિં અત્થીતિ પબ્બતો. વાલિકરાસિસ્સ સુદ્ધપંસુપબ્બતપસઙ્ગત્તા વુત્તં ‘‘વાલિકરાસિ પન ન વટ્ટતી’’તિ. ઇતરોપીતિ વાલિકરાસિતો અઞ્ઞોપિ તિવિધો પબ્બતો. હત્થિપ્પમાણતોતિ અડ્ઢટ્ઠમરતનહત્થિપમાણતો. ચતૂસુ દિસાસૂતિ વિહારસ્સ ચતૂસુ દિસાસુ. ચતૂહિ વા તીહિ વાતિ એત્થ વાસદ્દેન તતો અધિકાનિપિ ગહેતબ્બાનિ. એકેન વા નિમિત્તેનાતિ યોજના. ઇતોતિ પબ્બતનિમિત્તતો. તસ્માતિ યસ્મા એકેન નિમિત્તેન ન વટ્ટતિ, તસ્મા. તન્તિ પબ્બતં. તસ્માતિ એકસ્સેવ નિમિત્તસ્સ કિત્તિતત્તા. યો પબ્બતો અત્થિ, તં પબ્બતન્તિ યોજના. અન્તોતિ પબ્બતસ્સ અન્તો.

તતિયભાગં વાતિ એત્થ વાસદ્દેન પઠમભાગોપિ એકદેસોપિ ગહેતબ્બો. તસ્સાતિ તત્તકસ્સ પદેસસ્સ. તતિયભાગાદિતો અપરં સબ્બપબ્બતં અન્તોકત્વા સમ્મતં દસ્સેન્તો આહ ‘‘સચે’’તિઆદિ.

પાસાણનિમિત્તે એવં વિનિચ્છયો વેદિતબ્બોતિ યોજના. પસતિ ઘનભાવેન બન્ધતીતિ પાસાણો. અયગુળોપિ પાસાણસઙ્ખમેવ ગચ્છતિ તેન તસ્સ સદિસત્તા. અયગુળોપીતિ એત્થ પિસદ્દેન તમ્બકંસવટ્ટલોહસુવણ્ણરજતાદયોપિ સઙ્ગણ્હાતિ. યો કોચીતિ સિલાપવાળમણિઆદીસુ યો કોચિ. દ્વત્તિંસપલગુળપિણ્ડપરિમાણતા સણ્ઠાનતો ગહેતબ્બા, ન તુલિત્વા ગણનવસેન. ખુદ્દકતરો પાસાણોતિ યોજના. યો પિટ્ઠિપાસાણો વા યો ઉટ્ઠિતપાસાણો વાતિ યોજના કાતબ્બા – ઉત્તરવાક્યે તસદ્દસ્સ અનિયમનિદ્દેસવચનત્તા ‘‘પાસાણસઙ્ખંયેવા’’તિ એત્થ એવકારેન ‘‘ન પબ્બતસઙ્ખ’’ન્તિ અત્થં દસ્સેતિ. મહતો પિટ્ઠિપાસાણસ્સાતિ આયામવિત્થારુબ્બેધતો મહન્તસ્સ પિટ્ઠિપાસાણસ્સ સક્કસ્સ પણ્ડુકમ્બલપિટ્ઠિપાસાણસ્સ વિય. તન્તિ પિટ્ઠિપાસાણં. ન વટ્ટતીતિ કિત્તેતું ન વટ્ટતિ. હીતિ લદ્ધદોસજોતકો. તન્તિ પિટ્ઠિપાસાણં. સીમાયાતિ સીમતો. વિહારોપીતિ ન કેવલં નિમિત્તમેવ, વિહારોપિ. પિટ્ઠિપાસાણો ન કિત્તેતબ્બોતિ સમ્બન્ધો. કિત્તેત્વાતિ એત્થ ‘‘પિટ્ઠિપાસાણ’’ન્તિ યોજેતબ્બં.

વનનિમિત્તે એવં વિનિચ્છયો વેદિતબ્બોતિ યોજના. વનિયતિ મયૂરકોકિલાદીહિ સત્તેહિ સમ્ભજિયતીતિ વનં, વનન્તિ સમ્ભજન્તિ એત્થાતિ વા વનં. તચો એવ સારો એતેસન્તિ તચસારો, તાલનાળિકેરાદયો. આદિસદ્દેન વેણુઆદયો સઙ્ગણ્હાતિ. અન્તો સારો એતેસન્તિ અન્તોસારા, સાકસાલાદયો. આદિસદ્દેન ખદિરાદયો સઙ્ગણ્હાતિ. અન્તોસારમિસ્સકાનન્તિ અન્તોસારેહિ રુક્ખેહિ મિસ્સકાનં. રુક્ખાનં વનન્તિ એત્થ અવયવઅવયવિભાવેન સમ્બન્ધો વેદિતબ્બો. ઇમિના તિણવનં રુક્ખવનન્તિ એત્થ ‘‘તિણાનં વન’’ન્તિ વા ‘‘રુક્ખાનં વન’’ન્તિ વા અત્થં દસ્સેતિ. તિણમેવ વનં, રુક્ખોયેવ વનન્તિ અત્થોપિ યુજ્જતેવ. ચત્તારો વા પઞ્ચ વા રુક્ખાતિ ચતુપઞ્ચરુક્ખા, તે મત્તં પમાણમેત્થાતિ ચતુપઞ્ચરુક્ખમત્તં વનં, તતોતિ ચતુપઞ્ચરુક્ખમત્તતો. એકદેસન્તિ વનસ્સ એકદેસં. વનમજ્ઝેતિ વનસ્સ વેમજ્ઝે, વનસ્સૂપરીતિ અત્થો. રુક્ખન્તરેસુ એવ હિ વિહારં કરોન્તિ. એકદેસન્તિ વનસ્સ એકદેસં. તત્થાતિ વને. ‘‘ઠિતવન’’ન્તિ પદં ‘‘કિત્તેત્વા’’તિ પદે અવુત્તકમ્મં, ‘‘ન કિત્તેતબ્બ’’ન્તિ પદે વુત્તકમ્મં.

રુક્ખનિમિત્તે એવં વિનિચ્છયો વેદિતબ્બોતિ યોજના. રુક્ખિયતિ ફલાદિકામેહિ સંવરિયતિ રક્ખિયતીતિ રુક્ખો, મહિયં રુહતીતિ વા રુક્ખો. જીવમાનકોતિ લોકવોહારવસેન મૂલઙ્કુરાદિહરિતસઙ્ખાતજીવમાનકો. પરિણાહતોતિ વિસાલભાવતો. સૂચિદણ્ડકપમાણોતિ સૂચિયા લેખનિયા દણ્ડભૂતવેળુપમાણો. સો વેળુ કનિટ્ઠઙ્ગુલિપમાણોતિ દટ્ઠબ્બો. તતોતિ અટ્ઠઙ્ગુલુબ્બેધસૂચિદણ્ડકપમાણપરિણાહરુક્ખતો. વંસનળકસરાવાદીસૂતિ વંસો ચ નળકો ચ સરાવો ચ વંસનળકસરાવા, તે આદયો યેસં કપાલાદીનન્તિ વંસનળકસરાવાદયો, તેસુ. તતોતિ વંસાદિતો. તંખણમ્પીતિ તસ્મિં નિમિત્તક્ખણેપિ. અકારણન્તિ અપમાણં. એતન્તિ નવમૂલસાખાનિગ્ગમનં. વત્તું વટ્ટતીતિ સામઞ્ઞનામેનપિ વિસેસનામેનપિ વત્તું વટ્ટતિ. ઇમિના પબ્બતાદીસુપિ ‘‘પબ્બતો’’તિ સામઞ્ઞનામેનપિ ‘‘વઙ્કપબ્બતો વેપુલ્લપબ્બતો’’તિ વિસેસનામેનપિ વત્તું વટ્ટતીતિ દસ્સેતિ.

મગ્ગનિમિત્તે એવં વિનિચ્છયો વેદિતબ્બોતિ યોજના. મગ્ગિયતિ પથિકેહિ, મગ્ગમૂળ્હેહિ વા અન્વેસિયતીતિ મગ્ગો. યો યાદિસો જઙ્ઘમગ્ગો વા સકટમગ્ગો વા વિનિવિજ્ઝિત્વા દ્વે તીણિ ગામન્તરાનિ ગચ્છતિ, સો તાદિસો જઙ્ઘમગ્ગો વા સકટમગ્ગો વા વટ્ટતીતિ યોજના. ઉક્કમિત્વાતિ પક્કમિત્વા. યો જઙ્ઘમગ્ગો ઓતરતિ, સો ન વટ્ટતીતિ યોજના. અવળઞ્જાતિ અપરિભોગા. ગમનં જનેતીતિ જઙ્ઘો. જણ્ણુગોપ્ફકાનં મજ્ઝપદેસો. સહ અત્થેન પણિયધનેનાતિ સત્થો, જઙ્ઘેન વિચરન્તો સત્થો જઙ્ઘસત્થો. સકતિ સમત્થેતિ ભારં વહિતુન્તિ સકટો, તેન વિચરન્તો સત્થો સકટસત્થો. જઙ્ઘસત્થો ચ સકટસત્થો ચ જઙ્ઘસકટસત્થા, તેહિ. હીતિ સચ્ચં, યસ્મા વા. એતન્તિ નિમિત્તં.

કોણન્તિ વિહારકોણં. ગતં પન મગ્ગન્તિ યોજના. પરભાગેતિ વિહારં પરિક્ખિપિત્વા ગચ્છન્તેહિ ચતૂહિ મગ્ગેહિ પરભાગે. દસસુ નામેસૂતિ સતિપટ્ઠાનટ્ઠકથાદીસુ આગતેસુ ‘‘મગ્ગો પન્થો પથો પજ્જો’’તિઆદીસુ, અભિધાનાદીસુ (દી. નિ. અટ્ઠ. ૨.૩૭૩; મ. નિ. અટ્ઠ. ૧.૧૦૬) ચ આગતેસુ ‘‘મગ્ગો પન્થો પથો અદ્ધા’’તિઆદીસુ દસસુ મગ્ગનામેસુ. યેન કેનચિ નામેનાતિ ઇમિના પબ્બતાદીસુપિ ‘‘પબ્બતો ગિરિ સેલો અદ્દિ નગો અચલો સિલુચ્ચયો સિખરી ભૂધરો’’તિઆદીસુ અનેકેસુ નામેસુ યેન કેનચિ નામેન કિત્તેતું વટ્ટતીતિ દસ્સેતિ.

વમ્મિકનિમિત્તે એવં વિનિચ્છયો વેદિતબ્બોતિ યોજના. ઉપચિકાહિ વમિયતિ, સરબૂઘરગોલિકાદયો સત્તે વમતીતિ વા વમ્મિકો. તંદિવસજાતોતિ તસ્મિં નિમિત્તકિત્તિતદિવસે જાતો. તતોતિ અટ્ઠઙ્ગુલુબ્બેધગોવિસાણપમાણવમ્મીકતો.

નદીનિમિત્તે એવં વિનિચ્છયો વેદિતબ્બોતિ યોજના. નદતિ સન્દતીતિ નદી, નદન્તો એતિ ગચ્છતીતિ વા નદી. યસ્સાતિ નદિયા, સોતન્તિ સમ્બન્ધો. ‘‘અન્વદ્ધમાસ’’ન્તિઆદિના એકપક્ખે તિક્ખત્તું એકમાસે છક્ખત્તું વસ્સન્તભાવં દીપેતિ. વિગતમત્તે સતીતિ સમ્બન્ધો. ‘‘ઈદિસે’’તિ ઇમિના ‘‘અન્વદ્ધમાસ’’ન્તિઆદિઅત્થં અતિદિસતિ. તિમણ્ડલન્તિ હેટ્ઠા જાણુમણ્ડલં, ઉપરિ નાભિમણ્ડલન્તિ તિમણ્ડલં. યત્થ કત્થચીતિ તિત્થે વા અતિત્થે વા. ઉદકેન તેમિયતીતિ યોજના, તિન્તિયતીતિ અત્થો. ન કેવલં નિમિત્તેયેવ અયં નદી હોતિ, અથ ખો નદીપારગમનાદિકેપીતિ આહ ‘‘ભિક્ખુનિયા’’તિઆદિ. ઇદં ‘‘નદીપારગમનેપી’’તિ પદેનેવ સમ્બન્ધિતબ્બં.

યા પનાતિ નદી પન, ગતાતિ યોજના. તન્તિ નદિં. વતિન્તિ પાળિં. રુક્ખપાદેતિ રુક્ખસ્સ મૂલે. ઉદકઞ્ચ આવરણં અજ્ઝોત્થરિત્વા પવત્તતિયેવાતિ યોજના. યથાતિ યેનાકારેન. અપવત્તમાના હોતીતિ સમ્બન્ધો.

દુબ્બુટ્ઠિકાલેતિ ગિમ્હસદિસે દુબ્બુટ્ઠિકાલે. ‘‘નિરુદકભાવેના’’તિ ઇમિના ‘‘આવરણભાવેના’’તિ વિસેસનં નિવત્તેતિ. સાતિ ઉદકમાતિકા. સમ્પાદેન્તી હુત્વા નિચ્ચં પવત્તતીતિ યોજના. નિમિત્તં કાતું ન વટ્ટતીતિ મનુસ્સેહિ નીહટત્તા, સયઞ્ચ અગમનત્તા ન વટ્ટતિ. યા પનાતિ ઉદકમાતિકા પન. મૂલેતિ પઠમકાલે. કાલન્તરેન નદી હોતીતિ સમ્બન્ધો. તન્તિ ઉદકમાતિકં.

ઉદકનિમિત્તે એવં વિનિચ્છયો વેદિતબ્બોતિ યોજના. ઉદતિ પસવતીતિ ઉદકં. ભૂમિગતમેવ ઉદકન્તિ સમ્બન્ધો. તઞ્ચાતિ ભૂમિગતઉદકઞ્ચ. આવાટ…પે… સમુદ્દાદીસુ ઠિતં અપવત્તનકઉદકન્તિ યોજના. ઉક્ખેપિમન્તિ ઉક્ખિપિત્વા ગહિતં. તન્તિ વચનં. સૂકરખતાયપીતિ સૂકરેહિ ખતાય વાપિયાપિ. તંખણઞ્ઞેવાતિ તસ્મિં નિમિત્તે કિત્તનક્ખણેયેવ. આવાટોયેવ ખુદ્દકટ્ઠેન આવાટકં. તન્તિ નિમિત્તસઞ્ઞાકરણં. કાતુઞ્ચાતિ સયં કાતુઞ્ચ. કારાપેતુઞ્ચાતિ પરેહિ કારાપેતુઞ્ચ. કસ્મા લાભસીમાયં ન વટ્ટતિ? લાભસીમા હિ અઞ્ઞેસં પીળનં કરોતીતિ. ઇતિ ઇમમત્થં નયતો દસ્સેન્તો આહ ‘‘સમાનસંવાસકસીમા’’તિઆદિ. એત્થાતિ સમાનસંવાસકસીમાયં.

અટ્ઠદિસં સન્ધાય અટ્ઠ નિમિત્તાનિ વુત્તાનીતિ દટ્ઠબ્બં. સાતિ સીમા. એકેન વા નિમિત્તેનાતિ યોજના. તિણ્ણં નિમિત્તાનં કિત્તને નિમિત્તાનં ઠિતદિસં સલ્લક્ખેત્વા ‘‘પુરત્થિમાય દિસાયા’’તિઆદિના કિત્તેતબ્બં. નિમિત્તાનં સતકિત્તને સીમાય અટ્ઠદિસં સલ્લક્ખેત્વા એકિસ્સાયપિ દિસાય બહુનિમિત્તાનિ કિત્તેતબ્બાનિ. સિઙ્ઘાટકસણ્ઠાનાતિ તિણ્ણં મગ્ગાનં સમાગમટ્ઠાને સિઙ્ઘાટકસણ્ઠાના, તિકોણા નામ હોતીતિ અધિપ્પાયો. ચતુરસ્સાતિ સમચતુરસ્સા. સિઙ્ઘાટકસણ્ઠાનાતિ ચતુન્નં મગ્ગાનં સમોધાનટ્ઠાને સિઙ્ઘાટકસણ્ઠાના. અડ્ઢચન્દમુદિઙ્ગાદિસણ્ઠાના પન નિમિત્તાનં ઠિતસણ્ઠાનેન હોતીતિ દટ્ઠબ્બા. તન્તિ સીમં. બન્ધિતુકામેહિ નિસ્સઞ્ચારસમયે બન્ધિતબ્બાતિ સમ્બન્ધો. બદ્ધસીમવિહારાનન્તિ બદ્ધા સીમા એતેસૂતિ બદ્ધસીમા, તે એવ વિહારાતિ બદ્ધસીમવિહારા, તેસં. દિસાચારિકભિક્ખૂનન્તિ દિસાસુ ચારિકભિક્ખૂનં. તત્થાતિ તસ્મિં એકગામખેત્તે, ભિક્ખૂનં પેસેતબ્બન્તિ સમ્બન્ધો. એકજ્ઝન્તિ એકતો. અઞ્ઞાનિપીતિ સીમબન્ધગામખેત્તતો અઞ્ઞાનિપિ. મહાપદુમત્થેરો પન આહાતિ યોજના. તતોતિ તેહિ નાનાગામખેત્તેહિ. આગન્તબ્બન્તિ સામીચિદસ્સનવસેન વુત્તં. તેનાહ ‘‘આગમનમ્પિ અનાગમનમ્પિ વટ્ટતી’’તિ. એકસીમભાવતો વુત્તં ‘‘અન્તોનિમિત્તગતેહિ આગન્તબ્બ’’ન્તિ.

એવં સન્નિપતિતેસુ સન્તેસુ સીમા બન્ધિતબ્બાતિ સમ્બન્ધો. પરિયન્તં કત્વાતિ હેટ્ઠિમપરિયન્તં કત્વા.

પબ્બજ્જૂપસમ્પદાદીનન્તિ એત્થ ભણ્ડુકમ્માપુચ્છનં (મહાવ. અટ્ઠ. ૯૮; વિ. સઙ્ગ. અટ્ઠ. ૧૪૪) સન્ધાય પબ્બજ્જાગહણં વુત્તં. ખણ્ડસીમાતિ વિહારપચ્ચન્તં ખણ્ડિતં વિય છિન્દિતં વિય પવત્તા સીમા ખણ્ડસીમા. તન્તિ ખણ્ડસીમં. વત્તં જાનિતબ્બન્તિ એત્થ વત્તં વિત્થારેન્તો આહ ‘‘સચે હી’’તિઆદિ. સીમન્તિ ખણ્ડસીમં. યથાતિ યેનાકારેન બન્ધિયમાનેતિ સમ્બન્ધો. તસ્સા પમાણં દસ્સેન્તો આહ ‘‘સા’’તિઆદિ. સાતિ ખણ્ડસીમા. અબ્ભાનકમ્મે સદ્ધિં કમ્મારહેન વીસતિ ભિક્ખૂ સન્ધાય વુત્તં ‘‘એકવીસતિ ભિક્ખૂ’’તિ. તતોતિ એકવીસતિભિક્ખુતો. ગણ્હન્તીપીતિ એત્થ પિસદ્દો સહસ્સતો ઓરં પન પગેવાતિ દસ્સેતિ. સહસ્સતો અધિકં ગણ્હન્તીપિ વિહારપચ્ચન્તે ખણ્ડિતે ખણ્ડસીમાયેવ નામ. તન્તિ ખણ્ડસીમં.

તત્રાતિ ખણ્ડસીમમહાસીમાસુ આધારે ભુમ્મં. અથાતિ અનન્તરં. એવન્તિ ઇમાય અવિપ્પવાસકમ્મવાચાય સમ્મનિયમાને. હીતિ ફલજોતકો. સીમન્તિ સમાનસંવાસકસીમં. ન સક્ખિસ્સન્તીતિ પઠમં અવિપ્પવાસં અસમૂહનિત્વા સીમં સમૂહનિતું ન સક્ખિસ્સન્તિ. સીમન્તરિકપાસાણાતિ દ્વિન્નં સીમાનં અન્તરે વેમજ્ઝે ઠપિતા પાસાણા. ચતુરઙ્ગુલપમાણાપીતિ પિસદ્દો એકઙ્ગુલિપમાણાપિ વટ્ટતીતિ દસ્સેતિ.

સમન્તાતિ ખણ્ડસીમાય સમન્તા. અનુપરિયાયન્તેહીતિ અનુક્કમેન ખણ્ડસીમપરિયાયન્તેહિ ભિક્ખૂહીતિ સમ્બન્ધો. તતોતિ તેહિ સીમન્તરિકપાસાણેહિ, દ્વિન્નં સીમાનં નિમિત્તાનિ પઠમં કિત્તેત્વા પચ્છા તાસુ યં ઇચ્છન્તિ, તં બન્ધિતબ્બભાવં દસ્સેન્તો આહ ‘‘સચે પના’’તિઆદિ. યથિચ્છિતં બન્ધિતું વટ્ટન્તોપિ પોરાણાચિણ્ણં દસ્સેતું વુત્તં ‘‘એવં સન્તેપી’’તિઆદિ. ઉભિન્નમ્પીતિ દ્વીસુ સીમાસુ ઠિતાનં ઉભિન્નમ્પિ કમ્મન્તિ સમ્બન્ધો. હીતિ સચ્ચં, યસ્મા વા.

ચસદ્દો વાક્યારમ્ભજોતકો. એસા સીમા નામાતિ યોજના. તત્થાતિ પિટ્ઠિપાસાણાદીસુ પઞ્ચસુ ઠાનેસુ. નિમિત્તપાસાણા યથાઠાને ન તિટ્ઠન્તીતિ પિટ્ઠિપાસાણસ્સુપરિ નિમિત્તપાસાણં ઠપિતમત્તં સન્ધાય વુત્તં. પિટ્ઠિપાસાણં પન વિજ્ઝિત્વા નિમિત્તપાસાણં તત્થ નિખણિત્વા યથા ઠાના ન ચાવેન્તિ, તથા ઠપેન્તિ. એવં સન્તે યથાઠાને તિટ્ઠન્તિયેવાતિ દટ્ઠબ્બં. ન સીમાતિ સીમાય પથવિસન્ધારકં ઉદકં પરિયન્તંકત્વા ગતત્તા સીમા ન ઝાયતિ.

કુટિગેહેપીતિ એત્થ કુટીતિ ચ ગેહન્તિ ચ અગારસ્સેવ નામં. અગારઞ્હિ સીતાદિદુક્ખસ્સ કુટનટ્ઠેન છિન્દનટ્ઠેન ચ નાનાદબ્બસમ્ભારસ્સ ગહણટ્ઠેન ચ કુટિગેહન્તિ વુચ્ચતિ. કુટિ એવ ગેહં કુટિગેહં, તસ્મિમ્પિ. ભિત્તિં અકિત્તેત્વાતિ ઇદં ઇટ્ઠકદારુમયં ભિત્તિં સન્ધાય વુત્તં. સચે સિલામયા ભિત્તિ નિમિત્તૂપગા ભવેય્ય, ભિત્તિપિ કિત્તેતબ્બા. અન્તો કરિત્વાતિ કુટિગેહસ્સ ભિત્તિયા વા અન્તો કત્વા. પમુખેતિ કુટિગેહસ્સ આલિન્દે. નિબ્બોદકપતનટ્ઠાનેતિ નિગ્ગલિત્વા ઉદકસ્સ પતનટ્ઠાને. એવં સમ્મતાય સીમાયાતિ યોજના.

‘‘કુટ્ટં અકિત્તેત્વા’’તિ ઇદં પુરિમનયેનેવ વેદિતબ્બં. અન્તોતિ લેણસ્સ, કુટ્ટસ્સ વા અન્તો. ઓકાસેતિ એકવીસતિયા ભિક્ખૂનં ઓકાસે. એવન્તિ ઇમિનાકારેન સમ્મનિયમાને. અન્તોતિ ભિત્તિયા અન્તો.

હેટ્ઠા ન ઓતરતીતિ હેટ્ઠા આકાસતલત્તા ન ઓતરતિ. નનુ થમ્ભે અનુસારિત્વા ઓતરણો ભવેય્ય, કસ્મા ન ઓતરતીતિ? થમ્ભાનમુપરિ એકવીસતિયા ભિક્ખૂનં ઓકાસાભાવતોતિ દટ્ઠબ્બં. હેટ્ઠા ઓતરણાકારં દસ્સેન્તો આહ ‘‘સચે પના’’તિઆદિ. તુલાનન્તિ થમ્ભાનમુપરિ તિરિયવસેન ઠિતાનં રુક્ખવિસેસાનં. ઉટ્ઠહિત્વાતિ ભૂમિતો ઉટ્ઠહિત્વા. તુલારુક્ખેહીતિ તુલાસઙ્ખાતેહિ રુક્ખેહિ. ‘‘એકસમ્બન્ધો’’તિ ઇમિના ન કેવલં તુલારુક્ખેહેવ એકસમ્બન્ધો, ચતૂસુ દિસાસુ ચતુન્નં ભિત્તીનં અઞ્ઞમઞ્ઞમ્પિ સમ્બન્ધોતિ દસ્સેતિ. હેટ્ઠાપિ ઓતરતીતિ ભિત્તીનમુપરિ એકવીસતિયા ભિક્ખૂનં ઓકાસપહોનકત્તા વુત્તં. સચે થમ્ભમત્થકે…પે… હોતીતિ ઇમિના બહૂહિ થમ્ભેહિ કતપાસાદસ્સ એકેકસ્મિં થમ્ભમત્થકે એકવીસતિયા ભિક્ખૂનં ઓકાસે સતિ હેટ્ઠા ઓતરતીતિ દસ્સેતિ. નિય્યૂહકાદીસૂતિ નાગદન્તકાદીસુ. આદિસદ્દેન ભિત્તિખિલાદયો સઙ્ગણ્હાતિ. ભિત્તિ ચાતિ ઇટ્ઠકદારુમયા ભિત્તિ ચ. સચે સિલામયા ભિત્તિ ચ થમ્ભા ચ હોન્તિ, કિત્તેતબ્બા. ભિત્તિલગ્ગેતિ ભિત્તીસુ લગ્ગે, ભિત્તીનં વા લગ્ગટ્ઠાને. હેટ્ઠાપાસાદસ્સાતિ હેટ્ઠાપાસાદે ‘‘ઠિત’’ઇતિ પદે સમ્બન્ધો. હેટ્ઠાપાસાદસ્સ વા થમ્ભાનન્તિ યોજના. હેટ્ઠા સમ્મતાય સીમાય ઉપરિ આરોહનાકારં દસ્સેન્તો આહ ‘‘સચે પના’’તિઆદિ. નિબ્બોદકપતનટ્ઠાનેતિ છદનકોટિયં.

તત્થાતિ તસ્મિં તલે. પિટ્ઠિપાસાણે સીમં બન્ધન્તિ વિય બન્ધન્તીતિ યોજના. તેનેવ પરિચ્છેદેનાતિ તેનેવ તલપરિચ્છેદેન. તાલમૂલપબ્બતેપીતિ એત્થ તાલમૂલં નામ હેટ્ઠા મહન્તં હુત્વા અનુપુબ્બેન તનુકં હોતિ, તેન સદિસે પબ્બતેપિ. વિતાનસણ્ઠાનોતિ ઉલ્લોચસ્સ સણ્ઠાનો. ચતૂસુ દિસાસુ નિગ્ગતસાખરુક્ખસણ્ઠાનો વા ખુજ્જરુક્ખસણ્ઠાનો વા હોતિ. યથા પબ્બતો વિતાનસણ્ઠાનો હોતિ, એવં મુદિઙ્ગસણ્ઠાનો વા હોતિ પણવસણ્ઠાનો વાતિ યોજના. તત્થ મુદિઙ્ગો મજ્ઝે થૂલો હોતિ, મૂલે ચ અન્તે ચ તનુકો. પણવો મજ્ઝે તનુકો હોતિ, મૂલે ચ અગ્ગે ચ થૂલો. તેસં સણ્ઠાનો મુદિઙ્ગસણ્ઠાનો વા પણવસણ્ઠાનો વા. હેટ્ઠા વાતિ મુદિઙ્ગસણ્ઠાનસ્સ પબ્બતસ્સ હેટ્ઠા વા. મજ્ઝે વાતિ પણવસણ્ઠાનસ્સ મજ્ઝે વા. દ્વે કૂટાનીતિ દ્વે સિખરાનિ. કૂટન્તરન્તિ કૂટાનં મજ્ઝં. ચિનિત્વા વાતિ ઇટ્ઠકસિલાહિ ચિનિત્વા વા. પૂરેત્વા વાતિ પંસુવાલિકાહિ પૂરેત્વા વા.

સપ્પફણસદિસોતિ સપ્પસ્સ ફણેન સદિસો, ખુજ્જો પબ્બતોતિ અત્થો. આકાસપબ્ભારન્તિ ભિત્તિયા અપરિક્ખિત્તં આકાસસઙ્ખાતં પબ્ભારં. સીમપ્પમાણોતિ સદ્ધિં અન્તોસુસિરેન સીમપ્પમાણો. અગ્ગકોટિન્તિ અગ્ગસઙ્ખાતં કોટિં. સચે પન પબ્બતસ્સ હેટ્ઠા અન્તોલેણં હોતીતિ સમ્બન્ધો. ઉપરિમસ્સાતિ અન્તોલેણસ્સ ઉપરિ ઠિતસ્સ. પારતોતિ બાહિરતો. અસ્સાતિ પબ્બતસ્સ બહીતિ સમ્બન્ધો. ઓરતોતિ અન્તતો. લેણં હોતીતિ સમ્બન્ધો. કિત્તકં મહન્તન્તિ આહ ‘‘સીમાપરિચ્છેદમતિક્કમિત્વા ઠિત’’ન્તિ. કિત્તકં ખુદ્દકન્તિ આહ ‘‘સબ્બપચ્છિમસીમાપરિમાણ’’ન્તિ. તન્તિ ખુદ્દકં લેણં. અતિખુદ્દકન્તિ સબ્બપચ્છિમસીમાપરિમાણાભાવતો અતિખુદ્દકં. તતોતિ ઉપરિસીમતો. બહીતિ સીમતો બહિ. ‘‘યદિ સીમપ્પમાણં, સીમા હોતિયેવા’’તિ ઇમિના યદિ ન સીમપ્પમાણં, ન સીમા હોતિયેવાતિ દસ્સેતિ.

તન્તિ ખણ્ડસીમં. પૂરેત્વાતિ ઇટ્ઠકમત્તિકાદીહિ પૂરેત્વા. અટ્ટં બન્ધિત્વાતિ અટ્ટાલકં બન્ધિત્વા. ઉમઙ્ગનદીતિ એત્થ ઉકારો ઓકારવિપરીતો, તસ્મા પથવિયં ઓતરિત્વા પવિસિત્વા મઙ્ગતિ ગચ્છતીતિ ઉમઙ્ગાતિ અત્થો દટ્ઠબ્બો. ઉમઙ્ગાચ સા નદી ચેતિ ઉમઙ્ગનદી. તત્થાતિ ઉમઙ્ગનદિયં. હેટ્ઠાપથવિતલે ઠિતોતિ સીમાય હેટ્ઠાપથવિતલે ઇદ્ધિયા ઠિતો.

સીમામાળકેતિ ખણ્ડસીમાય માળકે. વટરુક્ખોતિ નિગ્રોધરુક્ખો. તતોતિ વટરુક્ખતો. નિગ્ગતપારોહોતિ પવદ્ધંવ હુત્વા રુક્ખો આરોહતિ અનેનાતિ પારોહો, એકો મૂલવિસેસો. નિગ્ગતો પારોહો નિગ્ગતપારોહો. મહાસીમં સોધેત્વાતિ એત્થ સોધનં નામ મહાસીમગતાનં ભિક્ખૂનં હત્થપાસાનયનં, સીમતો વા બહિકરણં. બહિદ્ધાતિ દ્વીહિ સીમાહિ બહિદ્ધા. ‘‘બહિટ્ઠા’’તિપિ પાઠો. બહિ ઠિતા કાતબ્બાતિ અત્થો. અનાહચ્ચાતિ મહાસીમાય પથવીતલં વા તત્થજાતરુક્ખાદીનિ વા ન આહનિત્વા. એવન્તિ યથા ખણ્ડસીમાય, એવં તથાતિ અત્થો. સીમામાળકેતિ ખણ્ડસીમામાળકે.

સીમામાળકેતિ દ્વિન્નં સીમાનં અઙ્ગણે. સીમામાળકસ્સાતિ કમ્મસ્સ કતટ્ઠાનસ્સ સીમામાળકસ્સ. વેહાસટ્ઠિતસાખાયાતિ કમ્મસ્સ અકતટ્ઠાને સીમામાળકે ઉટ્ઠિતાય વેહાસે ઠિતાય સાખાય. તસ્સાતિ ભિક્ખુનો પાદા વા નિવાસનપારુપનં વાતિ સમ્બન્ધો. પુરિમનયેપીતિ ‘‘સીમામાળકે વટરુક્ખો હોતી’’તિઆદિના વુત્તે પુરિમનયેપિ. તત્રાતિ પુરિમનયે. ઉક્ખિપાપેત્વા કાતું ન વટ્ટતીતિ દ્વીહિ સીમાહિ ઉટ્ઠિતરુક્ખસ્સ સાખા વા તતો નિગ્ગતપારોહો વા દ્વીસુ સીમાસુ પથવીતલં વા તત્થ જાતરુક્ખાદીનિ વા આહચ્ચ ઠિતત્તા ઉક્ખિપાપેત્વા કાતું ન વટ્ટતિ. આનેતબ્બોતિ એત્થ દ્વિકમ્મિકાય નીધાતુયા અપધાનકમ્મસ્સેવ વુત્તત્તા ‘‘ભિક્ખૂ’’તિ પધાનકમ્મં અજ્ઝાહરિતબ્બં. અબ્ભુગ્ગચ્છતીતિ અબ્ભં આકાસં ઉગ્ગચ્છતિ. તત્રાતિ પબ્બતે. કસ્મા આનેતબ્બોતિ આહ ‘‘બજ્ઝમાનાયેવ હી’’તિઆદિ. તત્થ બજ્ઝમાનાયેવાતિ કમ્મવાચાય બજ્ઝમાનાયેવ. ઇમિના અબદ્ધસીમા પમાણરહિતં દેસં ઓતરતીતિ દસ્સેતિ. યંકિઞ્ચીતિ યંકિઞ્ચિ પબ્બતાદિ. યત્થ કત્થચીતિ યસ્મિં કસ્મિંચિ ઠાને. એકસમ્બન્ધેનાતિ બદ્ધસીમાય એકસમ્બન્ધેન. ઇતીતિ તસ્મા આનેતબ્બોતિ યોજના.

૧૪૦. તીણિ યોજનાનિ તિયોજનં. ‘‘પમાણ’’ન્તિ ઇમિના પરમસદ્દસ્સ અતિરેકઉત્તમત્થે નિવત્તેતિ. એતિસ્સાતિ સીમાય. સમ્મનન્તેન ભિક્ખુનાતિ સમ્બન્ધો. કોણતો મિનિતં કોણન્તિ યોજના. હીતિ સચ્ચં, યસ્મા વા. આપત્તિઞ્ચાતિ દુક્કટાપત્તિઞ્ચ.

પારયતીતિ અજ્ઝોત્થરતિ. ‘‘કિતકાભિધેય્યલિઙ્ગા’’તિ (કચ્ચાયનસારે ૪૫ ગાથાયં) વચનતો અભિધેય્યભૂતં સીમં સન્ધાય ઇત્થિલિઙ્ગવસેન પારાતિ વુત્તં. નદિયાતિ ઉપયોગત્થે સામિવચનં. નદિન્તિ હિ અત્થો. નદિં અજ્ઝોત્થરમાનં સીમન્તિ સમ્બન્ધો. એત્થાતિ નદિપારસીમાયં. યત્થસ્સાતિ એત્થ યત્થ અસ્સાતિ પદવિભાગં દસ્સેન્તો આહ ‘‘યત્થ નદિયા’’તિઆદિ. ‘‘નદિયા’’તિ ઇમિના યંસદ્દસ્સ વિસયં દસ્સેતિ. ધુવનાવાતિ એત્થ ધુવસદ્દો નિચ્ચત્થોતિ આહ ‘‘નિચ્ચસઞ્ચરણનાવા’’તિ. ઇમિના ધુવેન નિચ્ચેન સઞ્ચરણનાવા ધુવનાવાતિ વચનત્થં દસ્સેતિ. અસ્સાતિ હોતિ, ભવેય્ય વા. નાવાય પમાણં દસ્સેન્તો આહ ‘‘યા’’તિઆદિ. તત્થ યાતિ નાવા. પાજનપુરિસેનાતિ એત્થ પાજનં નામ એકો નાવાય ગમનૂપકરણવિસેસો. સો હિ પજતિ નાવા ગચ્છતિ અનેનાતિ પાજનન્તિ વુચ્ચતિ. જકારસ્સ ચકારં કત્વા પાચનન્તિપિ યુજ્જતેવ. તસ્સ ગાહકેન પુરિસેન સદ્ધિન્તિ અત્થો. સા નાવા નીતાતિ સમ્બન્ધો. ઉદ્ધં વા અધો વાતિ નદિયા પટિસોતં વા હેટ્ઠાસોતં વા. થેનેહિ વાતિ ચોરેહિ વા. કિઞ્ચાપિ હટા, પન તથાપિ અવસ્સં લબ્ભનેય્યા, ધુવનાવાવ હોતીતિ યોજના. વાતેન વાતિ માલુતેન વા ‘‘છિન્ન’’ઇતિ સમ્બન્ધો. વીચીહીતિ તરઙ્ગેહિ. તરઙ્ગો હિ વિચિત્તાકારેન ચિનોતિ વડ્ઢતીતિ વીચીતિ વુચ્ચતિ. કિઞ્ચાપિ નદીમજ્ઝં નીતા, પન તથાપિ અવસ્સં આહરિતબ્બા, ધુવનાવાવ હોતીતિ યોજના. ઓગતેતિ ઓતરિત્વા ગતે. થલં ઉસ્સારિતાતિ થલં ઉક્ખિપિત્વા સારિતા પાપિતા નાવાપીતિ સમ્બન્ધો. વિસઙ્ખતપદરાતિ સઙ્ખતવિરહિતફલકા વા. ધુવનાવાવ હોતીતિ નિમિત્તકિત્તનકાલે નિચ્ચસઞ્ચરણનાવત્તા ધુવનાવાવ હોતીતિ અધિપ્પાયો. તત્રાતિ ‘‘ધુવનાવા’’તિવચને. નિમિત્તં વા સીમા વા કમ્મવાચાય ગચ્છતીતિ એત્થ કિઞ્ચાપિ ન નિમિત્તં કમ્મવાચાય ગચ્છતિ, સીમાય પન અવિનાભાવતો વુત્તં ‘‘કમ્મવાચાય ગચ્છતી’’તિ. તસ્માતિ યસ્માવ નાવાય આગચ્છન્તાપિ ભગવતા અનુઞ્ઞાતા, તસ્મા.

યત્થાતિ નદિપારસીમસમ્મનનટ્ઠાને. રુક્ખસઙ્ઘાટમયોતિ રુક્ખસમૂહેન કતો. પદરબદ્ધોતિ ફલકેહિ બદ્ધો. સઞ્ચરણયોગ્ગોતિ સઞ્ચરણક્ખમો. પાળિયં ‘‘અસ્સા’’તિ ઠાને અટ્ઠકથાયં ‘‘અત્થી’’તિ વુત્તત્તા ‘‘અસ્સા’’તિપદસ્સ હોતીતિ અત્થોયેવ દટ્ઠબ્બો. તંખણઞ્ઞેવાતિ તસ્મિં નિમિત્તકિત્તક્ખણેયેવ. રુક્ખં છિન્દિત્વા કતોતિ સમ્બન્ધો. એકપદિકસેતૂતિ એકેન પદેન ગમનયોગ્ગો એકપદિકો, સોયેવ સેતૂતિ એકપદિકસેતુ. અકપ્પિયસેતું દસ્સેન્તો આહ ‘‘સચે પના’’તિઆદિ. તેનાતિ સેતુના. સઞ્ચરિતું ન સક્કા હોતીતિ યોજના.

યત્થાતિ યસ્મિં નદિપારસીમસમ્મનનટ્ઠાને. અભિમુખતિત્થેયેવાતિ સીમાય અભિમુખતિત્થે એવ. ધુવનાવા વા ધુવસેતુ વા અભિમુખતિત્થતો ઈસકં ઉદ્ધં આરોહન્તોપિ અધો ઓરોહન્તોપિ કપ્પતીતિ દસ્સેન્તો આહ ‘‘સચે’’તિઆદિ. ઈસકન્તિ એકઉસભ દ્વિઉસભાદિવસેન મનં અપ્પમત્તં. ઉદ્ધં વાતિ અભિમુખતિત્થતો ઉપરિ વા. અધો વાતિ તતો હેટ્ઠા વા. ગાવુતમત્તબ્ભન્તરેતિ ગાવુતપમાણસ્સ ઠાનસ્સ અબ્ભન્તરે.

સહનિમિત્તકિત્તનવિધિના સમ્મનિતબ્બવિધિં દસ્સેન્તો આહ ‘‘ઇમઞ્ચ પના’’તિઆદિ. દ્વીસુ તીરેસુ ઠાતુમસક્કુણેય્યત્તા વુત્તં ‘‘એકસ્મિં તીરે ઠત્વા’’તિ. તતોતિ નિમિત્તતો. અત્તાનન્તિ નિમિત્તકિત્તનં વિનયધરં સન્ધાય વુત્તં. પરિક્ખિપન્તેનાતિ પરિયાયન્તેન. તસ્સાતિ તત્તકસ્સ પરિચ્છેદસ્સ. સમ્મુખટ્ઠાનેતિ અધોસોતે નદિતીરે ઠિતસ્સ નિમિત્તસ્સ સમ્મુખટ્ઠાને. તતોતિ નિમિત્તતો. તસ્સાતિ તત્તકસ્સ પરિચ્છેદસ્સ. સમ્મુખા નદિતીરે નિમિત્તં અત્થીતિ સમ્બન્ધો. સઙ્ઘટેતબ્બન્તિ સમ્બન્ધિતબ્બં. અથાતિ નિમિત્તકિત્તનતો પચ્છા. ‘‘સબ્બનિમિત્તાનં અન્તો ઠિતે ભિક્ખૂ હત્થપાસગતે કત્વા’’તિ ઇદં સબ્બં એકં ગામખેત્તં બ્યાપેત્વા સમ્મનિતભાવં સન્ધાય વુત્તં. સચે સકલં ગામખેત્તં અબ્યાપેત્વા એકદેસે સમ્મનિતં હોતિ, નિમિત્તતો બહિ ઠિતે ભિક્ખૂપિ હત્થપાસગતે કત્વા સમ્મનિતબ્બા. કમ્મન્તિ સીમસમ્મુતિકમ્મં. ‘‘ઠપેત્વા નદિ’’ન્તિવચનસ્સ કારણં દસ્સેન્તો આહ ‘‘નદી પન બદ્ધસીમસઙ્ખ્યં ન ગચ્છતી’’તિ.

દીપકો હોતીતિ એત્થ દીપોતિ અન્તરદીપો. સો હિ યસ્મા જલમજ્ઝે દિપ્પતિ, યસ્મા ચ દ્વિધા આપો એત્થ સન્દતિ, તસ્મા દીપોતિ વુચ્ચતિ, સોયેવ ખુદ્દકટ્ઠેન દીપકો. કકારો હિ ખુદ્દકત્થવાચકો. તન્તિ દીપકં. અત્તનાતિ વિનયધરેન. ઓરિમન્તે ચ પારિમન્તે ચાતિ અધોસોતે નદિતીરે ઠિતસ્સ નિમિત્તસ્સ સમ્મુખે ઓરિમન્તે ચ પારિમન્તે ચ. પરતીરે નિમિત્તં કિત્તેત્વાતિ સમ્બન્ધો. કિસ્સ સમ્મુખટ્ઠાને નિમિત્તન્તિ આહ ‘‘નદિયા ઓરિમતીરે નિમિત્તસ્સ સમ્મુખટ્ઠાને’’તિ. તતોતિ નિમિત્તતો. સમ્મુખા નિમિત્તં અત્થીતિ સમ્બન્ધો. પારિમન્તે ચ ઓરિમન્તે ચાતિ પરતીરે ઉપરિસોતે ઠિતસ્સ નિમિત્તસ્સ સમ્મુખે પારિમન્તે ચ ઓરિમન્તે ચ. પઠમકિત્તિતનિમિત્તેનાતિ ઓરિમતીરે ઉપરિસોતે પઠમં કિત્તિતેન નિમિત્તેન. એકા સીમા ઇમસ્સાતિ એકસીમો, દીપકો. ‘‘તીરદ્વયઞ્ચા’’તિ પદમપેક્ખિત્વા ‘‘એકસીમ’’ન્તિ સમ્બન્ધિતબ્બં. વચ્ચમનપેક્ખિત્વા ‘‘એકસીમા’’તિપિ નિચ્ચઇત્થિલિઙ્ગવસેન પાઠો અત્થિ.

ઉદ્ધં વા અધો વાતિ એત્થ વાસદ્દો અનિયમવિકપ્પત્થો. અથાતિ તસ્મિં અધિકતરે સતીતિ યોજના. વિહારસીમપરિચ્છેદનિમિત્તસ્સ ઉજુકમેવાતિ સચે દીપકો અધો અધિકતરો હોતિ, ઓરિમતીરે અધોસોતે ઠિતસ્સ વિહારસીમપરિચ્છેદનિમિત્તસ્સ ઉજુકમેવ. સિખરન્તિ સિઙ્ગં. તઞ્હિ સિખં મત્થકં રાતિ ગણ્હાતીતિ સિખરન્તિ વુચ્ચતિ. તતોતિ દીપકસ્સ પારિમન્તનિમિત્તતો. પરતીરનિમિત્તાનિ કિત્તેત્વાતિ સમ્બન્ધો. અયં દીપકસ્સ વિહારસીમપરિચ્છેદતો અધો અધિકતરે વિનિચ્છયો. ઉદ્ધં અધિકતરેપિ ઇમિનાનુસારેન વેદિતબ્બોતિ સો ન દસ્સિતો. પબ્બતસણ્ઠાનાતિ પબ્બતેન સમં ઠાનં એતિસ્સાતિ પબ્બતસણ્ઠાના.

ઉદ્ધમ્પિ અધોપીતિ પિસદ્દો સમુચ્ચયત્થો. ઉભોપિ સિખરાનીતિ ઉદ્ધં સિખરં, અધો સિખરન્તિ ઉભોપિ સિખરાનિ. મુદિઙ્ગસણ્ઠાનાતિ મૂલે ચ અગ્ગે ચ તનુકસ્સ મજ્ઝે થૂલસ્સ મુદિઙ્ગસ્સ સણ્ઠાના.

સબ્બપઠમેન નયેનાતિ ઉદ્ધં અધિકનયસ્સ, અધો અધિકનયસ્સ, ઉદ્ધંઅધોઅધિકનયસ્સ ચાતિ સબ્બેસં નયાનં પઠમેન વિહારસીમદીપકાનં સમેન નયેન. પણવસણ્ઠાનાતિ મૂલે ચ અગ્ગે ચ થૂલસ્સ મજ્ઝેતનુકસ્સ પણવસ્સ સણ્ઠાના.