૩. વિકાલગામપ્પવેસનસિક્ખાપદવણ્ણના

ચારિત્તેતિ ચારિત્તસિક્ખાપદે. ઉપચારન્તિ દુતિયલેડ્ડુપાતં. અઞ્ઞં ગામં ગચ્છન્તાનં પુન આપુચ્છનકિચ્ચં નત્થીતિ ઉસ્સાહં અપ્પટિપ્પસ્સમ્ભેત્વા અઞ્ઞં ગામં ગચ્છન્તાનં ગામસતમ્પિ હોતુ, પુન આપુચ્છનકિચ્ચં નત્થીતિ અત્થો. તેનાહ ‘‘સચે પના’’તિઆદિ. ઉસ્સાહન્તિ ગામપ્પવિસનુસ્સાહં. અન્તરારામાદીસુ (પાચિ. અટ્ઠ. ૫૧૫) ન કેવલં અનાપુચ્છા ગચ્છન્તસ્સેવ, કાયબન્ધનં અબન્ધિત્વા સઙ્ઘાટિં અપારુપિત્વા ગચ્છન્તસ્સાપિ અનાપત્તિ. આપદાસૂતિ સીહો વા બ્યગ્ઘો વા આગચ્છતિ, મેઘો વા ઉટ્ઠેતિ, અઞ્ઞો વા કોચિ ઉપદ્દવો ઉપ્પજ્જતિ, અનાપત્તિ. એવરૂપાસુ આપદાસુ બહિગામતો અન્તોગામં પવિસિતું વટ્ટતિ.

વિકાલગામપ્પવેસનસિક્ખાપદવણ્ણના નિટ્ઠિતા.