૪. પહારસિક્ખાપદવણ્ણના

પહારં દદેય્યાતિ અન્તમસો ઉપ્પલપત્તં ઉપાદાય કાયકાયપ્પટિબદ્ધનિસ્સગ્ગિયાનં અઞ્ઞતરેન પહારં દદેય્ય. એવં પન પહારે દિન્ને હત્થો વા ભિજ્જતુ, પાદો વા સીસં વા, મરતુ વા, પાચિત્તિયમેવ. તેનાહ ‘‘પહરિતુકામતાયા’’તિઆદિ.

અનુપસમ્પન્નેતિ ગહટ્ઠે વા પબ્બજિતે વા ઇત્થિયા વા પુરિસે વા અન્તમસો તિરચ્છાનગતેપિ. સચે પન રત્તચિત્તો ઇત્થિં પહરતિ, સઙ્ઘાદિસેસો. કેનચિ વિહેઠિયમાનસ્સાતિ મનુસ્સેન વા તિરચ્છાનગતેન વા વિહેઠિયમાનસ્સ. મોક્ખાધિપ્પાયસ્સાતિ તતો અત્તનો મોક્ખં પત્થયમાનસ્સ. સચેપિ અન્તરામગ્ગે (પાચિ. અટ્ઠ. ૪૫૩) ચોરં વા પચ્ચત્થિકં વા વિહેઠેતુકામં દિસ્વા ‘‘ઉપાસક, એત્થેવ તિટ્ઠ, મા આગમિત્થા’’તિ વત્વા વચનં અનાદિયિત્વા આગચ્છન્તં ‘‘ગચ્છ રે’’તિ મુગ્ગરેન વા સત્થકેન વા પહરિત્વા યાતિ, સો ચે તેન પહારેન મરતિ, અનાપત્તિયેવ. વાળમિગેસુપિ એસેવ નયો.

પહારસિક્ખાપદવણ્ણના નિટ્ઠિતા.