૧. સહધમ્મિકસિક્ખાપદવણ્ણના

સહધમ્મિકં વુચ્ચમાનોતિ સહધમ્મિકેન વુચ્ચમાનો. કરણત્થે ચેતં ઉપયોગવચનં. ‘‘પઞ્ચહિ સહધમ્મિકેહિ સિક્ખિતબ્બત્તા, તેસં વા સન્તકત્તા ‘સહધમ્મિક’ન્તિ લદ્ધનામેન બુદ્ધપઞ્ઞત્તેન સિક્ખાપદેન વુચ્ચમાનોતિ અત્થો’’તિ (કઙ્ખા. અટ્ઠ. દુબ્બચસિક્ખાપદવણ્ણના; પારા. અટ્ઠ. ૨.૪૨૫-૪૨૬) દુબ્બચસિક્ખાપદે વુત્તત્તા ‘‘સહધમ્મિકં વુચ્ચમાનોતિ ઇમસ્સત્થો દુબ્બચસિક્ખાપદે વુત્તો’’તિ વુત્તં. અનાદરિયભયાતિ અનાદરકરણે ભયા, તત્થ પાચિત્તિયભયાતિ અત્થો. લેસેન એવં વદન્તસ્સાતિ ઉજુકં ‘‘ન સિક્ખિસ્સામી’’તિ અવત્વા ‘‘યાવ ન અઞ્ઞં ભિક્ખુ’’ન્તિઆદિના લેસેન વદન્તસ્સ.

સહધમ્મિકસિક્ખાપદવણ્ણના નિટ્ઠિતા.