૩. પરમ્પરભોજનસિક્ખાપદવણ્ણના

ગણભોજને વુત્તનયેનેવાતિ ભિક્ખું ઉપસઙ્કમિત્વા ‘‘તુમ્હે, ભન્તે, ઓદનેન નિમન્તેમિ, ઓદનં મે ગણ્હથા’’તિઆદિના (પાચિ. અટ્ઠ. ૨૧૭-૨૧૮) નયેન યેન કેનચિ વેવચનેન વા ભાસન્તરેન વા પઞ્ચન્નં ભોજનાનં અઞ્ઞતરસ્સ નામં ગહેત્વા નિમન્તેતીતિ વુત્તેનેવ નયેન. નિમન્તિતસ્સાતિ અકપ્પિયનિમન્તનેન નિમન્તિતસ્સ. અવિકપ્પેત્વાતિ સમ્મુખાસમ્મુખવસેન અવિકપ્પેત્વા, અપરિચ્ચજિત્વાતિ અત્થો. અયઞ્હિ ભત્તવિકપ્પના નામ સમ્મુખાપરમ્મુખાપિ વટ્ટતિ. તેનાહ ‘‘યો ભિક્ખુ પઞ્ચસુ સહધમ્મિકેસૂ’’તિઆદિ.

અઞ્ઞત્ર નિમન્તનભોજનવત્થુસ્મિન્તિ અઞ્ઞત્ર પઠમં નિમન્તિતા હુત્વા અઞ્ઞસ્મિં નિમન્તને ભુઞ્જનવત્થુસ્મિં. યદિ તિવિધા અનુપઞ્ઞત્તિ, અથ કસ્મા પરિવારે ‘‘ચતસ્સો અનુપઞ્ઞત્તિયો’’તિ વુત્તન્તિ આહ ‘‘પરિવારે પના’’તિઆદિ. વિકપ્પનમ્પિ ગહેત્વાતિ વિકપ્પનાનુજાનનમ્પિ અનુપઞ્ઞત્તિસમાનન્તિ અનુપઞ્ઞત્તિભાવેન ગહેત્વા. એકસંસટ્ઠાનીતિ એકસ્મિં મિસ્સિતાનિ. ઇદં વુત્તં હોતિ (પાચિ. અટ્ઠ. ૨૨૯) – દ્વે તીણિ કુલાનિ નિમન્તેત્વા એકસ્મિં ઠાને નિસીદાપેત્વા ઇતો ચિતો ચ આહરિત્વા ભત્તં આકિરન્તિ, સૂપબ્યઞ્જનં આકિરન્તિ, એકમિસ્સકં હોતિ, એત્થ અનાપત્તીતિ. સચે પન મૂલનિમન્તનં હેટ્ઠા હોતિ, પચ્છિમં પચ્છિમં ઉપરિ, તં ઉપરિતો પટ્ઠાય ભુઞ્જન્તસ્સ આપત્તિ. હત્થં પન અન્તો પવેસેત્વા પઠમનિમન્તનતો એકમ્પિ કબળં ઉદ્ધરિત્વા ભુત્તકાલતો પટ્ઠાય યથા તથા વા ભુઞ્જન્તસ્સ અનાપત્તિ. દ્વે તીણિ નિમન્તનાનિ એકતો વા કત્વા ભુઞ્જતીતિ દ્વે તીણિ નિમન્તનાનિ એકતો પક્ખિપિત્વા મિસ્સેત્વા એકં કત્વા ભુઞ્જતીતિ અત્થો. ‘‘સકલેન ગામેન વા’’તિઆદીસુ સકલેન ગામેન એકતો હુત્વા નિમન્તિતસ્સેવ યત્થ કત્થચિ ભુઞ્જતો અનાપત્તિ. પૂગેપિ એસેવ નયો. નિમન્તિયમાનો વા ‘‘ભિક્ખં ગહેસ્સામી’’તિ વદતીતિ ‘‘ભત્તં ગણ્હા’’તિ નિમન્તિયમાનો ‘‘ન મય્હં તવ ભત્તેન અત્થો, ભિક્ખં ગહેસ્સામી’’તિ ભણતિ. કિરિયાકિરિયન્તિ એત્થ ભોજનં કિરિયં, અવિકપ્પનં અકિરિયં.

પરમ્પરભોજનસિક્ખાપદવણ્ણના નિટ્ઠિતા.