૨. સુદ્ધકાળકસિક્ખાપદવણ્ણના

કાળકાનન્તિ સભાવેન વા રજનેન વા કાળકાનં. યથાહ ‘‘કાળકં નામ દ્વે કાળકાનિ જાતિયા કાળકં વા રજનકાળકં વા’’તિ. અઞ્ઞેહિ અમિસ્સિતાનન્તિ અઞ્ઞેહિ અમિસ્સિતકાળકાનન્તિ અત્થો. ‘‘યથા પઠમે ‘એકેનાપિ કોસિયંસુના’તિ (કઙ્ખા. અટ્ઠ. કોસિયસિક્ખાપદવણ્ણના) વુત્તં, તથા ઇધાપિ ‘એકેનાપિ અઞ્ઞેન અમિસ્સેત્વા’તિ અવુત્તત્તા અઞ્ઞેન પન મિસ્સકભોગેપિ અપઞ્ઞાયમાનરૂપકં ચે ‘સુદ્ધકાળક’મિચ્ચેવ વુચ્ચતી’’તિ (વજિર. ટી. પારાજિક ૫૪૭) વદન્તિ.

એત્થ ચ ‘‘ઇદં મે, ભન્તે, સુદ્ધકાળકાનં એળકલોમાનં સન્થત’’ન્તિઆદિના (પારા. ૫૪૯) નિસ્સજ્જનવિધાનં વેદિતબ્બં. સેસન્તિ પુબ્બપયોગદુક્કટચતુક્કપાચિત્તિયાદિકં. અઙ્ગેસુ પન ‘‘સુદ્ધકાળકભાવો’’તિ અયં વિસેસો.

સુદ્ધકાળકસિક્ખાપદવણ્ણના નિટ્ઠિતા.