૮. કુમારિભૂતવગ્ગો

૧-૫. પઠમકુમારિભૂતાદિસિક્ખાપદવણ્ણના

સબ્બપઠમા દ્વે મહાસિક્ખમાનાતિ ગબ્ભિનિવગ્ગે વુત્તા દ્વે સિક્ખમાના. ‘‘સિક્ખમાના’’ઇચ્ચેવ વત્તબ્બાતિ સમ્મુતિકમ્માદીસુ એવં વત્તબ્બા. ‘‘ગિહિગતા’’તિ વા ‘‘કુમારિભૂતા’’તિ વા ન વત્તબ્બાતિ સચે વદન્તિ, કમ્મં કુપ્પતીતિ અધિપ્પાયો.

ચતુત્થપઞ્ચમાનિ ઉત્તાનત્થાનેવ.

પઠમકુમારિભૂતાદિસિક્ખાપદવણ્ણના નિટ્ઠિતા.

૬-૮. ખીયનધમ્માદિસિક્ખાપદવણ્ણના

વુટ્ઠાપનસમ્મુતિયા યાચિતાયાતિ ઉપસમ્પદાસમ્મુતિયા યાચિતાય.

સત્તમટ્ઠમાનિ ઉત્તાનત્થાનેવ.

ખીયનધમ્માદિસિક્ખાપદવણ્ણના નિટ્ઠિતા.

૯. સોકાવાસસિક્ખાપદવણ્ણના

આગચ્છમાનાતિ આગચ્છન્તી.

સોકાવાસસિક્ખાપદવણ્ણના નિટ્ઠિતા.

૧૦. અનનુઞ્ઞાતસિક્ખાપદવણ્ણના

તેસં અત્થિભાવં અજાનન્તિયાતિ (પાચિ. અટ્ઠ. ૧૧૬૩) તેસં માતાદીનં અત્થિભાવં અજાનન્તિયા. અનનુઞ્ઞાતસમુટ્ઠાનન્તિ યં વાચતો, કાયવાચતો, વાચાચિત્તતો, કાયવાચાચિત્તતો ચ સમુટ્ઠાતિ, તં અનનુઞ્ઞાતસમુટ્ઠાનં. કથં? અબ્ભાનકમ્માદીસુ કેનચિદેવ કરણીયેન ખણ્ડસીમાયં નિસિન્ના ‘‘પક્કોસથ સિક્ખમાનં, ઇધેવ નં ઉપસમ્પાદેસ્સામા’’તિ ઉપસમ્પાદેતિ, એવં વાચતો સમુટ્ઠાતિ. ‘‘ઉપસ્સયતો ઉટ્ઠાય ઉપસમ્પાદેસ્સામી’’તિ વત્વા ખણ્ડસીમં ગચ્છન્તિયા કાયવાચતો સમુટ્ઠાતિ. દ્વીસુ ઠાનેસુ પણ્ણત્તિં જાનિત્વા વીતિક્કમં કરોન્તિયા વાચાચિત્તતો, કાયવાચાચિત્તતો ચ સમુટ્ઠાતિ. અનનુજાનાપેત્વા ઉપસમ્પાદનતો કિરિયાકિરિયં.

અનનુઞ્ઞાતસિક્ખાપદવણ્ણના નિટ્ઠિતા.

૧૧. પારિવાસિકસિક્ખાપદવણ્ણના

દારુણન્તિ પાપં. પતિમાનેન્તન્તિ ઓલોકેન્તં.

પારિવાસિકસિક્ખાપદવણ્ણના નિટ્ઠિતા.

૧૨. અનુવસ્સસિક્ખાપદવણ્ણના

એકન્તરિકન્તિ એકેન વસ્સેન અન્તરિકં કત્વા.

અનુવસ્સસિક્ખાપદવણ્ણના નિટ્ઠિતા.

૧૩. એકવસ્સસિક્ખાપદવણ્ણના

માતિકાયં એકં વસ્સં દ્વેતિ એકન્તરિકે એકેકસ્મિં સંવચ્છરે દ્વે. એકન્તરિકં વુટ્ઠાપેન્તિયાતિ ઇમસ્મિં વસ્સે એકં, પુન એકન્તરિકં એકન્તિ દ્વે વુટ્ઠાપેન્તિયા અનાપત્તિ.

એકવસ્સસિક્ખાપદવણ્ણના નિટ્ઠિતા.

કુમારિભૂતવગ્ગો અટ્ઠમો.