૯. છત્તુપાહનવગ્ગો

૧-૨. છત્તુપાહનાદિસિક્ખાપદવણ્ણના

વુત્તલક્ખણં છત્તન્તિ ‘‘છત્તં નામ તીણિ છત્તાનિ – સેતચ્છત્તં, કિલઞ્જચ્છત્તં, પણ્ણચ્છત્તં મણ્ડલબદ્ધં, સલાકબદ્ધ’’ન્તિ (પાચિ. ૧૧૮૧) એવં પદભાજને વુત્તલક્ખણં છત્તં. તાદિસં ઠાનં પત્વાતિ ગચ્છકદ્દમાદીસુ તં તં ઠાનં પત્વા.

છત્તસ્સેવાતિ કદ્દમાદીનિ પત્વા ઉપાહના ઓમુઞ્ચિત્વા છત્તસ્સેવ ધારણં. ઉપાહનાનંયેવ વાતિ ગચ્છાદીનિ દિસ્વા છત્તં અપનામેત્વા ઉપાહનાનંયેવ ધારણં.

દુતિયં ઉત્તાનત્થમેવ.

છત્તુપાહનાદિસિક્ખાપદવણ્ણના નિટ્ઠિતા.

૩-૫. સઙ્ઘાણિઆદિસિક્ખાપદવણ્ણના

સઙ્ઘાણિન્તિ કટિયં અનુભવિતબ્બં આભરણં. તેનાહ ‘‘યં કિઞ્ચિ કટૂપગ’’ન્તિ.

ચતુત્થપઞ્ચમાનિ ઉત્તાનત્થાનેવ.

સઙ્ઘાણિઆદિસિક્ખાપદવણ્ણના નિટ્ઠિતા.

૬. વાસિતકસિક્ખાપદવણ્ણના

ગન્ધવાસિતકેનાતિ ગન્ધપરિભાવિતેન.

વાસિતકસિક્ખાપદવણ્ણના નિટ્ઠિતા.

૭-૧૦. ભિક્ખુનિઉમ્મદ્દાપનાદિસિક્ખાપદવણ્ણના

ગિલાનાયાતિ (પાચિ. અટ્ઠ. ૧૨૦૮) અન્તમસો મગ્ગગમનપરિસ્સમેનાપિ આબાધિકાય. આપદાસૂતિ ચોરભયાદિના સરીરકમ્પનાદીસુ.

અટ્ઠમનવમદસમેસુ કિઞ્ચિ વત્તબ્બં નત્થિ.

ભિક્ખુનિઉમ્મદ્દાપનાદિસિક્ખાપદવણ્ણના નિટ્ઠિતા.

૧૧. અનાપુચ્છાસિક્ખાપદવણ્ણના

ઉપચારં સન્ધાયાતિ સમન્તા દ્વાદસહત્થૂપચારં સન્ધાય.

અનાપુચ્છાસિક્ખાપદવણ્ણના નિટ્ઠિતા.

૧૨. પઞ્હાપુચ્છનસિક્ખાપદવણ્ણના

અનોદિસ્સાતિ ‘‘અમુકસ્મિં નામ ઠાને પુચ્છામી’’તિ એવં અનિયમેત્વા કેવલં ‘‘પુચ્છિતબ્બં અત્થિ, પુચ્છામિ, અય્યા’’તિ એવં વત્વા.

પઞ્હાપુચ્છનસિક્ખાપદવણ્ણના નિટ્ઠિતા.

૧૩. અસંકચ્ચિકસિક્ખાપદવણ્ણના

પરિક્ખિત્તસ્સ ગામસ્સ પરિક્ખેપં, અપરિક્ખિત્તસ્સ ઉપચારં અતિક્કમન્તિયા વા ઓક્કમન્તિયા વાતિ એત્થ પરિક્ખિત્તસ્સ ગામસ્સ પરિક્ખેપં અતિક્કમન્તિયા વા અપરિક્ખિત્તસ્સ ગામસ્સ ઉપચારં ઓક્કમન્તિયા વાતિ યથાક્કમં સમ્બન્ધો વેદિતબ્બો. આપદાસૂતિ મહગ્ઘં સંકચ્ચિકં પારુપિત્વા ગચ્છન્તિયા ઉપદ્દવો ઉપ્પજ્જતિ, એવરૂપાસુ આપદાસુ.

અસંકચ્ચિકસિક્ખાપદવણ્ણના નિટ્ઠિતા.

છત્તુપાહનવગ્ગો નવમો.

ઇતિ કઙ્ખાવિતરણિયા પાતિમોક્ખવણ્ણનાય

વિનયત્થમઞ્જૂસાયં લીનત્થપ્પકાસનિયં

ભિક્ખુનિપાતિમોક્ખે પાચિત્તિયવણ્ણના નિટ્ઠિતા.

અસાધારણસમુટ્ઠાનવણ્ણના

અચિત્તકાનીતિ (સારત્થ. ટી. પાચિત્તિય ૩.૧૨૧૪) ‘‘નચ્ચ’’ન્તિઆદિના અજાનિત્વા દસ્સનાદિં કરોન્તિયા આપત્તિસમ્ભવતો વત્થુઅજાનનચિત્તેન અચિત્તકાનિ. લોકવજ્જાનીતિ ‘‘નચ્ચ’’ન્તિઆદિના જાનિત્વા દસ્સનાદિં કરોન્તિયા અકુસલેનેવ આપજ્જનતો લોકવજ્જાનિ. તેનાહ ‘‘અયં પનેત્થ અધિપ્પાયો’’તિઆદિ સચિત્તકાનીતિ ‘‘ચોરી’’તિઆદિના વત્થું જાનિત્વા કરણેયેવ આપત્તિસમ્ભવતો સચિત્તકાનિ. ઉપસમ્પદાદીનં એકન્તાકુસલચિત્તેનેવ અકત્તબ્બત્તા પણ્ણત્તિવજ્જાનિ. ‘‘ઇધ સચિત્તકાચિત્તકતા પણ્ણત્તિજાનનાજાનનતાય અગ્ગહેટ્ઠા વત્થુજાનનાજાનનતાય ગહેતબ્બ’’ન્તિ વદન્તિ.

અસાધારણસમુટ્ઠાનવણ્ણના નિટ્ઠિતા.