૮. દસ્સનેનપહાતબ્બત્તિકવણ્ણના

દસ્સનેનપહાતબ્બત્તિકે દસ્સનેન પહાતબ્બો ધમ્મો ભાવનાય પહાતબ્બસ્સ ધમ્મસ્સ એકેનપિ પચ્ચયેન પચ્ચયો ન હોતીતિ ઇદં પટિચ્ચસમુપ્પાદવિભઙ્ગે વિચારિતનયેન વિચારેતબ્બન્તિ.

દસ્સનેનપહાતબ્બત્તિકવણ્ણના નિટ્ઠિતા.

પુચ્છાગણનગાથાયો

કુસલાદિ એકકત્તય-મથાદિ અન્તેન મજ્ઝિમન્તેન;

આદિ ચ મજ્ઝેન દુકા, તયો તિકેકો ચ વિઞ્ઞેય્યો.

તેસ્વેકેકં મૂલં કત્વા, તં સત્તસત્તકા પુચ્છા;

એકેકપચ્ચયે યથા, ભવન્તિ એકૂનપઞ્ઞાસ.

છસત્તતાધિકસતં, સહસ્સમેકઞ્ચ સુદ્ધિકે પુચ્છા;

એસ ચ નયોનુલોમે, પચ્ચનીયે ચાતિ નાઞ્ઞત્થ.

રાસિગુણિતસ્સ રાસિસ્સડ્ઢં, સહ રાસિકસ્સ પિણ્ડો સો;

રાસિસ્સ વા સહેકસ્સડ્ઢં, પુન રાસિના ગુણિતં.

ઇતિ હેતુમૂલકાદુક-તિકાદયો છચ્ચ સત્તતિસતા દ્વે;

ચતુવીસતેત્થ પુચ્છા, અડ્ઢુડ્ઢસહસ્સનહુતઞ્ચ.

તાસં યસ્મા સુદ્ધિક-નયો ન પચ્ચેકપચ્ચયે તસ્મા;

ચતુવીસતિગુણિતાનં, સસુદ્ધિકાનં અયં ગણના.

લક્ખત્તયં દ્વિનહુતં, પઞ્ચ સહસ્સાનિ સત્ત ચ સતાનિ;

દ્વાપઞ્ઞાસા એતા, અનુલોમે પિણ્ડિતા પુચ્છા.

અનુલોમસદિસગણના, ભવન્તિ પુચ્છાનયે ચ પચ્ચનીયે;

હાપેત્વા પન સેસે, નયદ્વયે સુદ્ધિકે લદ્ધા.

છપ્પઞ્ઞાસ ભવન્તિ પુચ્છા, છસતસહિતઞ્ચ લક્ખતેરસકં;

પુચ્છાનયેસુ ગણિતા, પટિચ્ચવારે ચતૂસ્વપિ.

સત્તહિ ગુણિતા કુસલત્તિકે દ્વયં, નવુતિઞ્ચેવ પઞ્ચસતા;

ચત્તારિ સહસ્સાનિ ચ, તથેકનવુતે ચ લક્ખકા.

નાદ્વાવીસતિ ગુણિતા, તિકેસુ સબ્બેસુ વીસતિ ચ કોટિ;

લક્ખત્તયં સહસ્સં, ચતુવીસતિ ચાપિ વિઞ્ઞેય્યા.

તિકપટ્ઠાનં.

એકકપચ્ચયે પન, નવ નવ કત્વા સસોળસદ્વિસતં;

હેતુદુકપઠમવારે, પઠમનયે સુદ્ધિકે પુચ્છા.

હેતાદિમૂલકનયે-સ્વેકેકસ્મિં દુકાદિભેદયુતે;

ચતુરાસીતિચતુસત-સહિતં સહસ્સદ્વયં પુચ્છા.

તા ચતુવીસતિગુણિતા, સસુદ્ધિકા એત્થ હોન્તિ અનુલોમે;

દ્વત્તિંસટ્ઠસતાધિક-સહસ્સનવકડ્ઢલક્ખકા.

એવં પચ્ચનીયે દ્વે, સુદ્ધિકરહિતા ચતૂસ્વતો હોન્તિ;

છન્નવુતટ્ઠસતટ્ઠ-તિંસસહસ્સદ્વિલક્ખકાનિ.

તા પન સત્તગુણા દ્વે, સત્તતિસતદ્વયં સહસ્સાનિ;

દ્વાસત્તતિ હોન્તિ તતો, સોળસ લક્ખાનિ હેતુદુકે.

તા સતગુણા દુકસતે, સતદ્વયં સત્તવીસતિ સહસ્સા;

દ્વાસત્તતિલક્ખાનિ ચ, સોળસકોટિ તતો પુચ્છા.

દુકપટ્ઠાનં.

દુકતિકપટ્ઠાને તિક-પક્ખેપો હોતિ એકમેકદુકે;

તસ્સ છસટ્ઠિગુણેન તે, છસટ્ઠિસતં દુકા હોન્તિ.

હેતુદુકલદ્ધપુચ્છા, ગુણિતા તેહિ ચ હોન્તિ તિકપદમેવ;

દુકપટ્ઠાને પુચ્છા, તાસં ગણના અયં ઞેય્યા.

દ્વાપઞ્ઞાસ સતાનિ ચ, નવેવ નહુતાનિ નવ ચ સટ્ઠિઞ્ચ;

લક્ખાનિ તીહિ સહિતં, સતં સહસ્સઞ્ચ કોટિનં.

દુકતિકપટ્ઠાનં.

તિકદુકપટ્ઠાને તિક-મેકેકં દ્વિસતભેદનં કત્વા;

દ્વાવીસદ્વિસતગુણા, ઞેય્યા કુસલત્તિકે લદ્ધા.

પુચ્છા અટ્ઠસતાધિક-ચતુસહસ્સદ્વિલક્ખયુત્તાનં;

કોટીનં છક્કમથો, કોટિસહસ્સાનિ ચત્તારિ.

તિકદુકપટ્ઠાનં.

તિકતિકપટ્ઠાને, તેસટ્ઠિવિધેકેકભેદના તુ તિકા;

તેહિ ચ ગુણિતા કુસલ-ત્તિકપુચ્છાપિ હોન્તિ પુચ્છા તા.

દ્વાદસ પઞ્ચસતા ચતુ-સટ્ઠિસહસ્સાનિ નવુતિ ચેકૂના;

લક્ખાનમેકસટ્ઠિ, દ્વાદસસતકોટિયો ચેવ.

તિકતિકપટ્ઠાનં.

દ્વયહીનદ્વયસતગુણો, એકેકો દુકદુકે તેહિ;

હેતુદુકે લદ્ધા સઙ્ખ્ય-ભેદેહિ ચ વડ્ઢિતા પુચ્છા.

છસતયુતાનિ પઞ્ચા-સીતિસહસ્સાનિ લક્ખનવકઞ્ચ;

એકાદસાપિ કોટિ, પુન કોટિસતાનિ તેત્તિંસ.

દુકદુકપટ્ઠાનં.

સમ્પિણ્ડિતા તુ પુચ્છા, અનુલોમે છબ્બિધેપિ પટ્ઠાને;

છત્તિંસતિસતસહસ્સ-ટ્ઠકયુતસત્તનહુતાનિ.

લક્ખાનિ છચ્ચ ચત્તા-લીસેવ નવાથ કોટિયો દસ ચ;

સત્તકોટિસતેહિ ચ, કોટિસહસ્સાનિ નવ હોન્તિ.

તા ચતુગુણિતા પુચ્છા, ચતુપ્પભેદે સમન્તપટ્ઠાને;

ચતુચત્તાલીસસતત્તયં, સહસ્સાનિ તેરસ ચ.

સત્તાસીતિ ચ લક્ખાનં, કોટીનઞ્ચ સત્તસત્તતિયો;

હોન્તિટ્ઠસતાનિટ્ઠ-તિંસસતસહસ્સાનિ ઇતિ ગણના.

પટ્ઠાનસ્સ પુચ્છાગણનગાથા.

પટ્ઠાનપકરણ-મૂલટીકા સમત્તા.

ઇતિ ભદન્તઆનન્દાચરિયકેન કતા લીનત્થપદવણ્ણના

અભિધમ્મસ્સ મૂલટીકા સમત્તા.