૧૦. નન્દકલિચ્છવિસુત્તં

૧૦૨૬. એકં સમયં ભગવા વેસાલિયં વિહરતિ મહાવને કૂટાગારસાલાયં. અથ ખો નન્દકો લિચ્છવિમહામત્તો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો નન્દકં લિચ્છવિમહામત્તં ભગવા એતદવોચ –

‘‘ચતૂહિ ખો, નન્દક, ધમ્મેહિ સમન્નાગતો અરિયસાવકો સોતાપન્નો હોતિ અવિનિપાતધમ્મો નિયતો સમ્બોધિપરાયણો. કતમેહિ ચતૂહિ? ઇધ, નન્દક, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. ઇમેહિ ખો, નન્દક, ચતૂહિ ધમ્મેહિ સમન્નાગતો અરિયસાવકો સોતાપન્નો હોતિ અવિનિપાતધમ્મો નિયતો સમ્બોધિપરાયણો.

‘‘ઇમેહિ ચ પન, નન્દક, ચતૂહિ ધમ્મેહિ સમન્નાગતો અરિયસાવકો આયુના સંયુત્તો હોતિ દિબ્બેનપિ માનુસેનપિ; વણ્ણેન સંયુત્તો હોતિ દિબ્બેનપિ માનુસેનપિ; સુખેન સંયુત્તો હોતિ દિબ્બેનપિ માનુસેનપિ; યસેન સંયુત્તો હોતિ દિબ્બેનપિ માનુસેનપિ; આધિપતેય્યેન સંયુત્તો હોતિ દિબ્બેનપિ માનુસેનપિ. તં ખો પનાહં, નન્દક, નાઞ્ઞસ્સ સમણસ્સ વા બ્રાહ્મણસ્સ વા સુત્વા વદામિ. અપિ ચ યદેવ મયા સામં ઞાતં સામં દિટ્ઠં સામં વિદિતં, તદેવાહં વદામી’’તિ.

એવં વુત્તે અઞ્ઞતરો પુરિસો નન્દકં લિચ્છવિમહામત્તં એતદવોચ – ‘‘નહાનકાલો, ભન્તે’’તિ. ‘‘અલં દાનિ, ભણે, એતેન બાહિરેન નહાનેન. અલમિદં અજ્ઝત્તં નહાનં ભવિસ્સતિ, યદિદં – ભગવતિ પસાદો’’તિ. દસમં.

સરણાનિવગ્ગો તતિયો.

તસ્સુદ્દાનં –

મહાનામેન દ્વે વુત્તા, ગોધા ચ સરણા દુવે;

દુવે અનાથપિણ્ડિકા, દુવે વેરભયેન ચ;

લિચ્છવી દસમો વુત્તો, વગ્ગો તેન પવુચ્ચતીતિ.