૪. પુઞ્ઞાભિસન્દવગ્ગો

૧. પઠમપુઞ્ઞાભિસન્દસુત્તં

૧૦૨૭. સાવત્થિનિદાનં. ‘‘ચત્તારોમે, ભિક્ખવે, પુઞ્ઞાભિસન્દા કુસલાભિસન્દા સુખસ્સાહારા. કતમે ચત્તારો? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. અયં પઠમો પુઞ્ઞાભિસન્દો કુસલાભિસન્દો સુખસ્સાહારો.

‘‘પુન ચપરં, ભિક્ખવે, અરિયસાવકો ધમ્મે અવેચ્ચપ્પસાદેન સમન્નાગતો હોતિ – સ્વાક્ખાતો ભગવતા ધમ્મો…પે… પચ્ચત્તં વેદિતબ્બો વિઞ્ઞૂહીતિ. અયં દુતિયો પુઞ્ઞાભિસન્દો કુસલાભિસન્દો સુખસ્સાહારો.

‘‘પુન ચપરં, ભિક્ખવે, અરિયસાવકો સઙ્ઘે અવેચ્ચપ્પસાદેન સમન્નાગતો હોતિ – સુપ્પટિપન્નો ભગવતો સાવકસઙ્ઘો…પે… અનુત્તરં પુઞ્ઞક્ખેત્તં લોકસ્સાતિ. અયં તતિયો પુઞ્ઞાભિસન્દો કુસલાભિસન્દો સુખસ્સાહારો.

‘‘પુન ચપરં, ભિક્ખવે, અરિયસાવકો અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. અયં ચતુત્થો પુઞ્ઞાભિસન્દો કુસલાભિસન્દો સુખસ્સાહારો. ઇમે ખો, ભિક્ખવે, ચત્તારો પુઞ્ઞાભિસન્દા કુસલાભિસન્દા સુખસ્સાહારા’’તિ. પઠમં.

૨. દુતિયપુઞ્ઞાભિસન્દસુત્તં

૧૦૨૮. ‘‘ચત્તારોમે, ભિક્ખવે, પુઞ્ઞાભિસન્દા કુસલાભિસન્દા સુખસ્સાહારા. કતમે ચત્તારો? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. અયં પઠમો પુઞ્ઞાભિસન્દો કુસલાભિસન્દો સુખસ્સાહારો.

‘‘પુન ચપરં, ભિક્ખવે, અરિયસાવકો ધમ્મે…પે… સઙ્ઘે…પે….

‘‘પુન ચપરં, ભિક્ખવે, અરિયસાવકો વિગતમલમચ્છેરેન ચેતસા અગારં અજ્ઝાવસતિ મુત્તચાગો પયતપાણિ વોસ્સગ્ગરતો યાચયોગો દાનસંવિભાગરતો. અયં ચતુત્થો પુઞ્ઞાભિસન્દો કુસલાભિસન્દો સુખસ્સાહારો. ઇમે ખો, ભિક્ખવે, ચત્તારો પુઞ્ઞાભિસન્દા કુસલાભિસન્દા સુખસ્સાહારા’’તિ. દુતિયં.

૩. તતિયપુઞ્ઞાભિસન્દસુત્તં

૧૦૨૯. ‘‘ચત્તારોમે, ભિક્ખવે, પુઞ્ઞાભિસન્દા કુસલાભિસન્દા સુખસ્સાહારા. કતમે ચત્તારો? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. અયં પઠમો પુઞ્ઞાભિસન્દો કુસલાભિસન્દો સુખસ્સાહારો.

‘‘પુન ચપરં, ભિક્ખવે, અરિયસાવકો ધમ્મે…પે… સઙ્ઘે…પે….

‘‘પુન ચપરં, ભિક્ખવે, અરિયસાવકો પઞ્ઞવા હોતિ ઉદયત્થગામિનિયા પઞ્ઞાય સમન્નાગતો અરિયાય નિબ્બેધિકાય સમ્મા દુક્ખક્ખયગામિનિયા. અયં ચતુત્થો પુઞ્ઞાભિસન્દો કુસલાભિસન્દો સુખસ્સાહારો. ઇમે ખો, ભિક્ખવે, ચત્તારો પુઞ્ઞાભિસન્દા કુસલાભિસન્દા સુખસ્સાહારા’’તિ. તતિયં.

૪. પઠમદેવપદસુત્તં

૧૦૩૦. સાવત્થિનિદાનં. ચત્તારિમાનિ, ભિક્ખવે, દેવાનં દેવપદાનિ અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાય.

કતમાનિ ચત્તારિ? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ઇદં પઠમં દેવાનં દેવપદં અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાય.

‘‘પુન ચપરં, ભિક્ખવે, અરિયસાવકો ધમ્મે…પે… સઙ્ઘે…પે….

‘‘પુન ચપરં, ભિક્ખવે, અરિયસાવકો અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. ઇદં ચતુત્થં દેવાનં દેવપદં અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાય. ઇમાનિ ખો, ભિક્ખવે, ચત્તારિ દેવાનં દેવપદાનિ અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાયા’’તિ. ચતુત્થં.

૫. દુતિયદેવપદસુત્તં

૧૦૩૧. ‘‘ચત્તારિમાનિ, ભિક્ખવે, દેવાનં દેવપદાનિ અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાય.

‘‘કતમાનિ ચત્તારિ? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. સો ઇતિ પટિસઞ્ચિક્ખતિ – ‘કિં નુ ખો દેવાનં દેવપદ’ન્તિ? સો એવં પજાનાતિ – ‘અબ્યાબજ્ઝપરમે ખ્વાહં એતરહિ દેવે સુણામિ. ન ચ ખો પનાહં કિઞ્ચિ બ્યાબાધેમિ તસં વા થાવરં વા. અદ્ધાહં દેવપદધમ્મસમન્નાગતો વિહરામી’’’તિ. ઇદં પઠમં દેવાનં દેવપદં અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાય.

‘‘પુન ચપરં, ભિક્ખવે, અરિયસાવકો ધમ્મે…પે… સઙ્ઘે…પે….

‘‘પુન ચપરં, ભિક્ખવે, અરિયસાવકો અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. સો ઇતિ પટિસઞ્ચિક્ખતિ – ‘કિં નુ ખો દેવાનં દેવપદ’ન્તિ? સો એવં પજાનાતિ – ‘અબ્યાબજ્ઝપરમે ખ્વાહં એતરહિ દેવે સુણામિ. ન ખો પનાહં કિઞ્ચિ બ્યાબાધેમિ તસં વા થાવરં વા. અદ્ધાહં દેવપદધમ્મસમન્નાગતો વિહરામી’તિ. ઇદં ચતુત્થં દેવાનં દેવપદં અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાય. ઇમાનિ ખો, ભિક્ખવે, ચત્તારિ દેવાનં દેવપદાનિ અવિસુદ્ધાનં સત્તાનં વિસુદ્ધિયા અપરિયોદાતાનં સત્તાનં પરિયોદપનાયા’’તિ. પઞ્ચમં.

૬. દેવસભાગસુત્તં

૧૦૩૨. ‘‘ચતૂહિ, ભિક્ખવે, ધમ્મેહિ સમન્નાગતં અત્તમના દેવા સભાગતં કથેન્તિ. કતમેહિ ચતૂહિ? ઇધ, ભિક્ખવે, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. યા તા દેવતા બુદ્ધે અવેચ્ચપ્પસાદેન સમન્નાગતા ઇતો ચુતા તત્રૂપપન્ના તાસં એવં હોતિ – ‘યથારૂપેન ખો મયં બુદ્ધે અવેચ્ચપ્પસાદેન સમન્નાગતા તતો ચુતા ઇધૂપપન્ના, અરિયસાવકોપિ તથારૂપેન બુદ્ધે અવેચ્ચપ્પસાદેન સમન્નાગતો એહીતિ દેવાનં સન્તિકે’’’તિ.

‘‘પુન ચપરં, ભિક્ખવે, અરિયસાવકો ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. યા તા દેવતા અરિયકન્તેહિ સીલેહિ સમન્નાગતા ઇતો ચુતા તત્રૂપપન્ના તાસં એવં હોતિ – ‘યથારૂપેહિ ખો મયં અરિયકન્તેહિ સીલેહિ સમન્નાગતા તતો ચુતા ઇધૂપપન્ના, અરિયસાવકોપિ તથારૂપેહિ અરિયકન્તેહિ સીલેહિ સમન્નાગતો એહીતિ દેવાનં સન્તિકે’તિ. ઇમેહિ ખો, ભિક્ખવે, ચતૂહિ ધમ્મેહિ સમન્નાગતં અત્તમના દેવા સભાગતં કથેન્તી’’તિ. છટ્ઠં.

૭. મહાનામસુત્તં

૧૦૩૩. એકં સમયં ભગવા સક્કેસુ વિહરતિ કપિલવત્થુસ્મિં નિગ્રોધારામે. અથ ખો મહાનામો સક્કો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો મહાનામો સક્કો ભગવન્તં એતદવોચ –

‘‘કિત્તાવતા નુ ખો, ભન્તે, ઉપાસકો હોતી’’તિ? ‘‘યતો ખો, મહાનામ, બુદ્ધં સરણં ગતો હોતિ, ધમ્મં સરણં ગતો હોતિ, સઙ્ઘં સરણં ગતો હોતિ – એત્તાવતા ખો, મહાનામ, ઉપાસકો હોતી’’તિ.

‘‘કિત્તાવતા પન, ભન્તે, ઉપાસકો સીલસમ્પન્નો હોતી’’તિ? ‘‘યતો ખો, મહાનામ, ઉપાસકો પાણાતિપાતા પટિવિરતો હોતિ, અદિન્નાદાના પટિવિરતો હોતિ, કામેસુમિચ્છાચારા પટિવિરતો હોતિ, મુસાવાદા પટિવિરતો હોતિ, સુરામેરયમજ્જપ્પમાદટ્ઠાના પટિવિરતો હોતિ, – એત્તાવતા ખો, મહાનામ, ઉપાસકો સીલસમ્પન્નો હોતી’’તિ.

‘‘કિત્તાવતા પન, ભન્તે, ઉપાસકો સદ્ધાસમ્પન્નો હોતી’’તિ? ‘‘ઇધ, મહાનામ, ઉપાસકો સદ્ધો હોતિ, સદ્દહતિ તથાગતસ્સ બોધિં – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. એત્તાવતા ખો, મહાનામ, ઉપાસકો સદ્ધાસમ્પન્નો હોતી’’તિ.

‘‘કિત્તાવતા પન, ભન્તે, ઉપાસકો ચાગસમ્પન્નો હોતી’’તિ? ‘‘ઇધ, મહાનામ, ઉપાસકો વિગતમલમચ્છેરેન ચેતસા અગારં અજ્ઝાવસતિ મુત્તચાગો પયતપાણિ વોસ્સગ્ગરતો યાચયોગો દાનસંવિભાગરતો – એત્તાવતા ખો, મહાનામ, ઉપાસકો ચાગસમ્પન્નો હોતી’’તિ.

‘‘કિત્તાવતા પન, ભન્તે, ઉપાસકો પઞ્ઞાસમ્પન્નો હોતી’’તિ? ‘‘ઇધ, મહાનામ, ઉપાસકો પઞ્ઞવા હોતિ ઉદયત્થગામિનિયા પઞ્ઞાય સમન્નાગતો અરિયાય નિબ્બેધિકાય સમ્મા દુક્ખક્ખયગામિનિયા – એત્તાવતા ખો, મહાનામ, ઉપાસકો પઞ્ઞાસમ્પન્નો હોતી’’તિ. સત્તમં.

૮. વસ્સસુત્તં

૧૦૩૪. ‘‘સેય્યથાપિ, ભિક્ખવે, ઉપરિપબ્બતે થુલ્લફુસિતકે દેવે વસ્સન્તે તં ઉદકં યથાનિન્નં પવત્તમાનં પબ્બતકન્દરપદરસાખા પરિપૂરેતિ, પબ્બતકન્દરપદરસાખા પરિપૂરા કુસોબ્ભે પરિપૂરેન્તિ, કુસોબ્ભા પરિપૂરા મહાસોબ્ભે પરિપૂરેન્તિ, મહાસોબ્ભા પરિપૂરા કુન્નદિયો પરિપૂરેન્તિ, કુન્નદિયો પરિપૂરા મહાનદિયો પરિપૂરેન્તિ, મહાનદિયો પરિપૂરા મહાસમુદ્દં [મહાસમુદ્દસાગરં (સબ્બત્થ) સં. નિ. ૪.૭૦] પરિપૂરેન્તિ; એવમેવ ખો, ભિક્ખવે, અરિયસાવકસ્સ યો ચ બુદ્ધે અવેચ્ચપ્પસાદો, યો ચ ધમ્મે અવેચ્ચપ્પસાદો, યો ચ સઙ્ઘે અવેચ્ચપ્પસાદો, યાનિ ચ અરિયકન્તાનિ સીલાનિ – ઇમે ધમ્મા સન્દમાના પારં ગન્ત્વા આસવાનં ખયાય સંવત્તન્તી’’તિ. અટ્ઠમં.

૯. કાળિગોધસુત્તં

૧૦૩૫. એકં સમયં ભગવા સક્કેસુ વિહરતિ કપિલવત્થુસ્મિં નિગ્રોધારામે. અથ ખો ભગવા પુબ્બણ્હસમયં નિવાસેત્વા પત્તચીવરમાદાય યેન કાળિગોધાય સાકિયાનિયા નિવેસનં તેનુપસઙ્કમિ; ઉપસઙ્કમિત્વા પઞ્ઞત્તે આસને નિસીદિ. અથ ખો કાળિગોધા સાકિયાની યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો કાળિગોધં સાકિયાનિં ભગવા એતદવોચ –

‘‘ચતૂહિ ખો, ગોધે, ધમ્મેહિ સમન્નાગતા અરિયસાવિકા સોતાપન્ના હોતિ અવિનિપાતધમ્મા નિયતા સમ્બોધિપરાયણા. કતમેહિ ચતૂહિ? ઇધ, ગોધે, અરિયસાવિકા બુદ્ધે અવેચ્ચપ્પસાદેન સમન્નાગતા હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે…પે… સઙ્ઘે…પે… વિગતમલમચ્છેરેન ચેતસા અગારં અજ્ઝાવસતિ મુત્તચાગા પયતપાણિની [પયતપાણી (સબ્બત્થ) ૩.૩૦ મોગ્ગલ્લાનસુત્તં ઓલોકેતબ્બં] વોસ્સગ્ગરતા યાચયોગા દાનસંવિભાગરતા. ઇમેહિ ખો, ગોધે, ચતૂહિ ધમ્મેહિ સમન્નાગતા અરિયસાવિકા સોતાપન્ના હોતિ અવિનિપાતધમ્મા નિયતા સમ્બોધિપરાયણા’’તિ.

‘‘યાનિમાનિ, ભન્તે, ભગવતા ચત્તારિ સોતાપત્તિયઙ્ગાનિ દેસિતાનિ, સંવિજ્જન્તે તે ધમ્મા મયિ, અહઞ્ચ તેસુ ધમ્મેસુ સન્દિસ્સામિ. અહઞ્હિ, ભન્તે, બુદ્ધે અવેચ્ચપ્પસાદેન સમન્નાગતા – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. ધમ્મે…પે… સઙ્ઘે…પે… યં ખો પન કિઞ્ચિ કુલે દેય્યધમ્મં સબ્બં તં અપ્પટિવિભત્તં સીલવન્તેહિ કલ્યાણધમ્મેહી’’તિ. ‘‘લાભા તે, ગોધે, સુલદ્ધં તે, ગોધે! સોતાપત્તિફલં તયા, ગોધે, બ્યાકત’’ન્તિ. નવમં.

૧૦. નન્દિયસક્કસુત્તં

૧૦૩૬. એકં સમયં ભગવા સક્કેસુ વિહરતિ કપિલવત્થુસ્મિં નિગ્રોધારામે. અથ ખો નન્દિયો સક્કો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો નન્દિયો સક્કો ભગવન્તં એતદવોચ – ‘‘યસ્સેવ નુ ખો, ભન્તે, અરિયસાવકસ્સ ચત્તારિ સોતાપત્તિયઙ્ગાનિ સબ્બેન સબ્બં સબ્બથા સબ્બં નત્થિ સ્વેવ નુ ખો, ભન્તે, અરિયસાવકો પમાદવિહારી’’તિ.

‘‘‘યસ્સ ખો, નન્દિય, ચત્તારિ સોતાપત્તિયઙ્ગાનિ સબ્બેન સબ્બં સબ્બથા સબ્બં નત્થિ તમહં બાહિરો પુથુજ્જનપક્ખે ઠિતો’તિ વદામિ. અપિ ચ, નન્દિય, યથા અરિયસાવકો પમાદવિહારી ચેવ હોતિ, અપ્પમાદવિહારી ચ તં સુણાહિ, સાધુકં મનસિ કરોહિ; ભાસિસ્સામી’’તિ. ‘‘એવં, ભન્તે’’તિ ખો નન્દિયો સક્કો ભગવતો પચ્ચસ્સોસિ. ભગવા એતદવોચ –

‘‘કથઞ્ચ, નન્દિય, અરિયસાવકો પમાદવિહારી હોતિ? ઇધ નન્દિય, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. સો તેન બુદ્ધે અવેચ્ચપ્પસાદેન સન્તુટ્ઠો ન ઉત્તરિ વાયમતિ દિવા પવિવેકાય, રત્તિં પટિસલ્લાનાય. તસ્સ એવં પમત્તસ્સ વિહરતો પામોજ્જં ન હોતિ. પામોજ્જે અસતિ, પીતિ ન હોતિ. પીતિયા અસતિ, પસ્સદ્ધિ ન હોતિ. પસ્સદ્ધિયા અસતિ, દુક્ખં વિહરતિ. દુક્ખિનો ચિત્તં ન સમાધિયતિ. અસમાહિતે ચિત્તે ધમ્મા ન પાતુભવન્તિ. ધમ્માનં અપાતુભાવા પમાદવિહારી ત્વેવ સઙ્ખ્યં ગચ્છતિ.

‘‘પુન ચપરં, નન્દિય, અરિયસાવકો ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. સો તેહિ અરિયકન્તેહિ સીલેહિ સન્તુટ્ઠો ન ઉત્તરિ વાયમતિ દિવા પવિવેકાય રત્તિં પટિસલ્લાનાય. તસ્સ એવં પમત્તસ્સ વિહરતો પામોજ્જં ન હોતિ. પામોજ્જે અસતિ, પીતિ ન હોતિ. પીતિયા અસતિ, પસ્સદ્ધિ ન હોતિ. પસ્સદ્ધિયા અસતિ, દુક્ખં વિહરતિ. દુક્ખિનો ચિત્તં ન સમાધિયતિ. અસમાહિતે ચિત્તે ધમ્મા ન પાતુભવન્તિ. ધમ્માનં અપાતુભાવા પમાદવિહારી ત્વેવ સઙ્ખ્યં ગચ્છતિ. એવં ખો, નન્દિય, અરિયસાવકો પમાદવિહારી હોતિ.

‘‘કથઞ્ચ, નન્દિય, અરિયસાવકો અપ્પમાદવિહારી હોતિ? ઇધ, નન્દિય, અરિયસાવકો બુદ્ધે અવેચ્ચપ્પસાદેન સમન્નાગતો હોતિ – ઇતિપિ સો ભગવા…પે… સત્થા દેવમનુસ્સાનં બુદ્ધો ભગવાતિ. સો તેન બુદ્ધે અવેચ્ચપ્પસાદેન અસન્તુટ્ઠો ઉત્તરિ વાયમતિ દિવા પવિવેકાય રત્તિં પટિસલ્લાનાય. તસ્સ એવં અપ્પમત્તસ્સ વિહરતો પામોજ્જં જાયતિ. પમુદિતસ્સ પીતિ જાયતિ. પીતિમનસ્સ કાયો પસ્સમ્ભતિ. પસ્સદ્ધકાયો સુખં વેદિયતિ. સુખિનો ચિત્તં સમાધિયતિ. સમાહિતે ચિત્તે ધમ્મા પાતુભવન્તિ. ધમ્માનં પાતુભાવા અપ્પમાદવિહારી ત્વેવ સઙ્ખ્યં ગચ્છતિ.

‘‘પુન ચપરં, નન્દિય, અરિયસાવકો ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો હોતિ અખણ્ડેહિ…પે… સમાધિસંવત્તનિકેહિ. સો તેહિ અરિયકન્તેહિ સીલેહિ અસન્તુટ્ઠો ઉત્તરિ વાયમતિ દિવા પવિવેકાય રત્તિં પટિસલ્લાનાય. તસ્સ એવં અપ્પમત્તસ્સ વિહરતો પામોજ્જં જાયતિ. પમુદિતસ્સ પીતિ જાયતિ. પીતિમનસ્સ કાયો પસ્સમ્ભતિ. પસ્સદ્ધકાયો સુખં વેદિયતિ. સુખિનો ચિત્તં સમાધિયતિ. સમાહિતે ચિત્તે ધમ્મા પાતુભવન્તિ. ધમ્માનં પાતુભાવા અપ્પમાદવિહારી ત્વેવ સઙ્ખ્યં ગચ્છતિ. એવં ખો, નન્દિય, અરિયસાવકો અપ્પમાદવિહારી હોતી’’તિ. દસમં.

પુઞ્ઞાભિસન્દવગ્ગો ચતુત્થો.

તસ્સુદ્દાનં –

અભિસન્દા તયો વુત્તા, દુવે દેવપદાનિ ચ;

સભાગતં મહાનામો, વસ્સં કાળી ચ નન્દિયાતિ.