૪. ઘટીકારસુત્તં

૧૦૫. એકમન્તં ઠિતો ખો ઘટીકારો દેવપુત્તો ભગવતો સન્તિકે ઇમં ગાથં અભાસિ –

‘‘અવિહં ઉપપન્નાસે, વિમુત્તા સત્ત ભિક્ખવો;

રાગદોસપરિક્ખીણા, તિણ્ણા લોકે વિસત્તિક’’ન્તિ.

‘‘કે ચ તે અતરું પઙ્કં, મચ્ચુધેય્યં સુદુત્તરં;

કે હિત્વા માનુસં દેહં, દિબ્બયોગં ઉપચ્ચગુ’’ન્તિ.

‘‘ઉપકો પલગણ્ડો [ફલગણ્ડો (ક.)] ચ, પુક્કુસાતિ ચ તે તયો;

ભદ્દિયો ખણ્ડદેવો ચ, બાહુરગ્ગિ ચ સઙ્ગિયો [બાહુદન્તી ચ પિઙ્ગિયો (સી. સ્યા.)];

તે હિત્વા માનુસં દેહં, દિબ્બયોગં ઉપચ્ચગુ’’ન્તિ.

‘‘કુસલી ભાસસી તેસં, મારપાસપ્પહાયિનં;

કસ્સ તે ધમ્મમઞ્ઞાય, અચ્છિદું ભવબન્ધન’’ન્તિ.

‘‘ન અઞ્ઞત્ર ભગવતા, નાઞ્ઞત્ર તવ સાસના;

યસ્સ તે ધમ્મમઞ્ઞાય, અચ્છિદું ભવબન્ધનં.

‘‘યત્થ નામઞ્ચ રૂપઞ્ચ, અસેસં ઉપરુજ્ઝતિ;

તં તે ધમ્મં ઇધઞ્ઞાય, અચ્છિદું ભવબન્ધન’’ન્તિ.

‘‘ગમ્ભીરં ભાસસી વાચં, દુબ્બિજાનં સુદુબ્બુધં;

કસ્સ ત્વં ધમ્મમઞ્ઞાય, વાચં ભાસસિ ઈદિસ’’ન્તિ.

‘‘કુમ્ભકારો પુરે આસિં, વેકળિઙ્ગે ઘટીકરો;

માતાપેત્તિભરો આસિં, કસ્સપસ્સ ઉપાસકો.

‘‘વિરતો મેથુના ધમ્મા, બ્રહ્મચારી નિરામિસો;

અહુવા તે સગામેય્યો, અહુવા તે પુરે સખા.

‘‘સોહમેતે પજાનામિ, વિમુત્તે સત્ત ભિક્ખવો;

રાગદોસપરિક્ખીણે, તિણ્ણે લોકે વિસત્તિક’’ન્તિ.

‘‘એવમેતં તદા આસિ, યથા ભાસસિ ભગ્ગવ;

કુમ્ભકારો પુરે આસિ, વેકળિઙ્ગે ઘટીકરો.

‘‘માતાપેત્તિભરો આસિ, કસ્સપસ્સ ઉપાસકો;

વિરતો મેથુના ધમ્મા, બ્રહ્મચારી નિરામિસો;

અહુવા મે સગામેય્યો, અહુવા મે પુરે સખા’’તિ.

‘‘એવમેતં પુરાણાનં, સહાયાનં અહુ સઙ્ગમો;

ઉભિન્નં ભાવિતત્તાનં, સરીરન્તિમધારિન’’ન્તિ.