૧૦. નાનાતિત્થિયસાવકસુત્તં

૧૧૧. એવં મે સુતં – એકં સમયં ભગવા રાજગહે વિહરતિ વેળુવને કલન્દકનિવાપે. અથ ખો સમ્બહુલા નાનાતિત્થિયસાવકા દેવપુત્તા અસમો ચ સહલિ [સહલી (સી. સ્યા. કં. પી.)] ચ નીકો [નિઙ્કો (સી. પી.), નિકો (સ્યા. કં.)] ચ આકોટકો ચ વેગબ્ભરિ ચ [વેટમ્બરી ચ (સી. સ્યા. કં. પી.)] માણવગામિયો ચ અભિક્કન્તાય રત્તિયા અભિક્કન્તવણ્ણા કેવલકપ્પં વેળુવનં ઓભાસેત્વા યેન ભગવા તેનુપસઙ્કમિંસુ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠંસુ. એકમન્તં ઠિતો ખો અસમો દેવપુત્તો પૂરણં કસ્સપં આરબ્ભ ભગવતો સન્તિકે ઇમં ગાથં અભાસિ –

‘‘ઇધ છિન્દિતમારિતે, હતજાનીસુ કસ્સપો;

ન પાપં સમનુપસ્સતિ, પુઞ્ઞં વા પન અત્તનો;

સ વે વિસ્સાસમાચિક્ખિ, સત્થા અરહતિ માનન’’ન્તિ.

અથ ખો સહલિ દેવપુત્તો મક્ખલિં ગોસાલં આરબ્ભ ભગવતો સન્તિકે ઇમં ગાથં અભાસિ –

‘‘તપોજિગુચ્છાય સુસંવુતત્તો,

વાચં પહાય કલહં જનેન;

સમોસવજ્જા વિરતો સચ્ચવાદી,

ન હિ નૂન તાદિસં કરોતિ [ન હ નુન તાદી પકરોતિ (સી. સ્યા. કં.)] પાપ’’ન્તિ.

અથ ખો નીકો દેવપુત્તો નિગણ્ઠં નાટપુત્તં [નાથપુત્તં (સી.)] આરબ્ભ ભગવતો સન્તિકે ઇમં ગાથં અભાસિ –

‘‘જેગુચ્છી નિપકો ભિક્ખુ, ચાતુયામસુસંવુતો;

દિટ્ઠં સુતઞ્ચ આચિક્ખં, ન હિ નૂન કિબ્બિસી સિયા’’તિ.

અથ ખો આકોટકો દેવપુત્તો નાનાતિત્થિયે આરબ્ભ ભગવતો સન્તિકે ઇમં ગાથં અભાસિ –

‘‘પકુધકો કાતિયાનો નિગણ્ઠો,

યે ચાપિમે મક્ખલિપૂરણાસે;

ગણસ્સ સત્થારો સામઞ્ઞપ્પત્તા,

ન હિ નૂન તે સપ્પુરિસેહિ દૂરે’’તિ.

અથ ખો વેગબ્ભરિ દેવપુત્તો આકોટકં દેવપુત્તં ગાથાય પચ્ચભાસિ –

‘‘સહાચરિતેન [સહારવેનાપિ (ક. સી.), સગારવેનાપિ (પી.)] છવો સિગાલો [સિઙ્ગાલો (ક.)],

ન કોત્થુકો સીહસમો કદાચિ;

નગ્ગો મુસાવાદી ગણસ્સ સત્થા,

સઙ્કસ્સરાચારો ન સતં સરિક્ખો’’તિ.

અથ ખો મારો પાપિમા બેગબ્ભરિં દેવપુત્તં અન્વાવિસિત્વા ભગવતો સન્તિકે ઇમં ગાથં અભાસિ –

‘‘તપોજિગુચ્છાય આયુત્તા, પાલયં પવિવેકિયં;

રૂપે ચ યે નિવિટ્ઠાસે, દેવલોકાભિનન્દિનો;

તે વે સમ્માનુસાસન્તિ, પરલોકાય માતિયા’’તિ.

અથ ખો ભગવા, ‘મારો અયં પાપિમા’ ઇતિ વિદિત્વા, મારં પાપિમન્તં ગાથાય પચ્ચભાસિ –

‘‘યે કેચિ રૂપા ઇધ વા હુરં વા,

યે ચન્તલિક્ખસ્મિં પભાસવણ્ણા;

સબ્બેવ તે તે નમુચિપ્પસત્થા,

આમિસંવ મચ્છાનં વધાય ખિત્તા’’તિ.

અથ ખો માણવગામિયો દેવપુત્તો ભગવન્તં આરબ્ભ ભગવતો સન્તિકે ઇમા ગાથાયો અભાસિ –

‘‘વિપુલો રાજગહીયાનં, ગિરિસેટ્ઠો પવુચ્ચતિ;

સેતો હિમવતં સેટ્ઠો, આદિચ્ચો અઘગામિનં.

‘‘સમુદ્દો ઉદધિનં સેટ્ઠો, નક્ખત્તાનઞ્ચ ચન્દિમા [નક્ખત્તાનંવ ચન્દિમા (ક.)];

સદેવકસ્સ લોકસ્સ, બુદ્ધો અગ્ગો પવુચ્ચતી’’તિ.

નાનાતિત્થિયવગ્ગો તતિયો.

તસ્સુદ્દાનં –

સિવો ખેમો ચ સેરી ચ, ઘટી જન્તુ ચ રોહિતો;

નન્દો નન્દિવિસાલો ચ, સુસિમો નાનાતિત્થિયેન તે દસાતિ.

દેવપુત્તસંયુત્તં સમત્તં.