૪. નન્દનસુત્તં

૯૫. એકમન્તં ઠિતો ખો નન્દનો દેવપુત્તો ભગવન્તં ગાથાય અજ્ઝભાસિ –

‘‘પુચ્છામિ તં ગોતમ ભૂરિપઞ્ઞ,

અનાવટં ભગવતો ઞાણદસ્સનં;

કથંવિધં સીલવન્તં વદન્તિ,

કથંવિધં પઞ્ઞવન્તં વદન્તિ;

કથંવિધો દુક્ખમતિચ્ચ ઇરિયતિ,

કથંવિધં દેવતા પૂજયન્તી’’તિ.

‘‘યો સીલવા પઞ્ઞવા ભાવિતત્તો,

સમાહિતો ઝાનરતો સતીમા;

સબ્બસ્સ સોકા વિગતા પહીના,

ખીણાસવો અન્તિમદેહધારી.

‘‘તથાવિધં સીલવન્તં વદન્તિ,

તથાવિધં પઞ્ઞવન્તં વદન્તિ;

તથાવિધો દુક્ખમતિચ્ચ ઇરિયતિ,

તથાવિધં દેવતા પૂજયન્તી’’તિ.