૫. દીપિકઙ્ગપઞ્હો

૫. ‘‘ભન્તે નાગસેન, ‘દીપિકસ્સ દ્વે અઙ્ગાનિ ગહેતબ્બાની’તિ યં વદેસિ, કતમાનિ તાનિ દ્વે અઙ્ગાનિ ગહેતબ્બાની’’તિ? ‘‘યથા, મહારાજ, દીપિકો અરઞ્ઞે તિણગહનં વા વનગહનં વા પબ્બતગહનં વા નિસ્સાય નિલીયિત્વા મિગે ગણ્હાતિ, એવમેવ ખો, મહારાજ, યોગિના યોગાવચરેન વિવેકં સેવિતબ્બં અરઞ્ઞં રુક્ખમૂલં પબ્બતં કન્દરં ગિરિગુહં સુસાનં વનપત્થં અબ્ભોકાસં પલાલપુઞ્જં અપ્પસદ્દં અપ્પનિગ્ઘોસં વિજનવાતં મનુસ્સરાહસેય્યકં પટિસલ્લાનસારુપ્પં; વિવેકં સેવમાનો હિ, મહારાજ, યોગી યોગાવચરો નચિરસ્સેવ છળભિઞ્ઞાસુ ચ વસિભાવં પાપુણાતિ. ઇદં, મહારાજ, દીપિકસ્સ પઠમં અઙ્ગં ગહેતબ્બં. ભાસિતમ્પેતં, મહારાજ, થેરેહિ ધમ્મસઙ્ગાહકેહિ –

‘‘‘યથાપિ દીપિકો નામ, નિલીયિત્વા ગણ્હતે [ગણ્હતી (સી. પી.)] મિગે;

તથેવાયં બુદ્ધપુત્તો, યુત્તયોગો વિપસ્સકો;

અરઞ્ઞં પવિસિત્વાન, ગણ્હાતિ ફલમુત્તમ’ન્તિ.

‘‘પુન ચપરં, મહારાજ, દીપિકો યં કિઞ્ચિ પસું વધિત્વા વામેન પસ્સેન પતિતં ન ભક્ખેતિ. એવમેવ ખો, મહારાજ, યોગિના યોગાવચરેન વેળુદાનેન વા પત્તદાનેન વા પુપ્ફદાનેન વા ફલદાનેન વા સિનાનદાનેન વા મત્તિકાદાનેન વા ચુણ્ણદાનેન વા દન્તકટ્ઠદાનેન વા મુખોદકદાનેન વા ચાતુકમ્યતાય વા મુગ્ગસુપ્યતાય [મુગ્ગસુપ્પતાય (સી. પી.)] વા પારિભટ [પારિભટ્ટતાય (સી. પી.)] યતાય વા જઙ્ઘપેસનીયેન વા વેજ્જકમ્મેન વા દૂતકમ્મેન વા પહિણગમનેન વા પિણ્ડપટિપિણ્ડેન વા દાનાનુપ્પદાનેન વા વત્થુવિજ્જાય વા નક્ખત્તવિજ્જાય વા અઙ્ગવિજ્જાય [નગવિજ્જાય (ક.)] વા અઞ્ઞતરઞ્ઞતરેન વા બુદ્ધપ્પટિકુટ્ઠેન મિચ્છાજીવેન નિપ્ફાદિતં ભોજનં ન ભુઞ્જિતબ્બં [પરિભુઞ્જિતબ્બં (સી. પી.)] વામેન પસ્સેન પતિતં પસું વિય દીપિકો. ઇદં, મહારાજ, દીપિકસ્સ દુતિયં અઙ્ગં ગહેતબ્બં. ભાસિતમ્પેતં, મહારાજ, થેરેન સારિપુત્તેન ધમ્મસેનાપતિના –

‘‘‘વચીવિઞ્ઞત્તિવિપ્ફારા, ઉપ્પન્નં મધુપાયસં;

સચે ભુત્તો ભવેય્યાહં, સાજીવો ગરહિતો મમ.

‘‘‘યદિપિ મે અન્તગુણં, નિક્ખમિત્વા બહી ચરે;

નેવ ભિન્દેય્યમાજીવં, ચજમાનોપિ જીવિત’’’ન્તિ.

દીપિકઙ્ગપઞ્હો પઞ્ચમો.