૧૦. નિબ્બાનરૂપસણ્ઠાનપઞ્હો

૧૦. ‘‘ભન્તે નાગસેન, ‘નિબ્બાનં નિબ્બાન’ન્તિ યં વદેસિ, સક્કા પન તસ્સ નિબ્બાનસ્સ રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતુ’’ન્તિ? ‘‘અપ્પટિભાગં, મહારાજ, નિબ્બાનં, ન સક્કા નિબ્બાનસ્સ રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતુ’’ન્તિ. ‘‘એતમ્પાહં, ભન્તે નાગસેન, ન સમ્પટિચ્છામિ, યં અત્થિધમ્મસ્સ નિબ્બાનસ્સ રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા અપઞ્ઞાપનં, કારણેન મં સઞ્ઞાપેહી’’તિ. ‘‘હોતુ, મહારાજ, કારણેન તં સઞ્ઞાપેસ્સામિ. અત્થિ, મહારાજ, મહાસમુદ્દો નામા’’તિ? ‘‘આમ, ભન્તે, અત્થેસો મહાસમુદ્દો’’તિ. ‘‘સચે તં, મહારાજ, કોચિ એવં પુચ્છેય્ય ‘કિત્તકં, મહારાજ, મહાસમુદ્દે ઉદકં, કતિ પન તે સત્તા, યે મહાસમુદ્દે પટિવસન્તી’તિ, એવં પુટ્ઠો ત્વં, મહારાજ, કિન્તિ તસ્સ બ્યાકરેય્યાસી’’તિ? ‘‘સચે મં, ભન્તે, કોચિ એવં પુચ્છેય્ય ‘કિત્તકં, મહારાજ, મહાસમુદ્દે ઉદકં, કતિ પન તે સત્તા, યે મહાસમુદ્દે પટિવસન્તી’તિ, તમહં, ભન્તે, એવં વદેય્યં ‘અપુચ્છિતબ્બં મં ત્વં અમ્ભો પુરિસ પુચ્છસિ, નેસા પુચ્છા કેનચિ પુચ્છિતબ્બા, ઠપનીયો એસો પઞ્હો. અવિભત્તો લોકક્ખાયિકેહિ મહાસમુદ્દો, ન સક્કા મહાસમુદ્દે ઉદકં પરિમિનિતું સત્તા વા યે તત્થ વાસમુપગતાતિ એવાહં ભન્તે તસ્સ પટિવચનં દદેય્ય’’’ન્તિ.

‘‘કિસ્સ પન, ત્વં મહારાજ, અત્થિધમ્મે મહાસમુદ્દે એવં પટિવચનં દદેય્યાસિ, નનુ વિગણેત્વા [મિનિત્વા (ક.)] તસ્સ આચિક્ખિતબ્બં ‘એત્તકં મહાસમુદ્દે ઉદકં, એત્તકા ચ સત્તા મહાસમુદ્દે પટિવસન્તી’’તિ? ‘‘ન સક્કા, ભન્તે, અવિસયો એસો પઞ્હો’’તિ.

‘‘યથા, મહારાજ, અત્થિધમ્મે યેવ મહાસમુદ્દે ન સક્કા ઉદકં પરિગણેતું [પરિમિનિતું (ક.)] સત્તા વા યે તત્થ વાસમુપગતા, એવમેવ ખો, મહારાજ, અત્થિધમ્મસ્સેવ નિબ્બાનસ્સ ન સક્કા રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતું, વિગણેય્ય, મહારાજ, ઇદ્ધિમા ચેતોવસિપ્પત્તો મહાસમુદ્દે ઉદકં તત્રાસયે ચ સત્તે, ન ત્વેવ સો ઇદ્ધિમા ચેતોવસિપ્પત્તો સક્કુણેય્ય નિબ્બાનસ્સ રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતું.

‘‘અપરમ્પિ, મહારાજ, ઉત્તરિં કારણં સુણોહિ, અત્થિધમ્મસ્સેવ નિબ્બાનસ્સ ન સક્કા રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતુન્તિ. અત્થિ, મહારાજ, દેવેસુ અરૂપકાયિકા નામ દેવા’’તિ. ‘‘આમ, ભન્તે, સુય્યતિ ‘અત્થિ દેવેસુ અરૂપકાયિકા નામ દેવા’’’તિ. ‘‘સક્કા પન, મહારાજ, તેસં અરૂપકાયિકાનં દેવાનં રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતુ’’ન્તિ? ‘‘ન હિ, ભન્તે’’તિ. ‘‘તેન હિ, મહારાજ, નત્થિ અરૂપકાયિકા દેવા’’તિ? ‘‘અત્થિ, ભન્તે, અરૂપકાયિકા દેવા, ન ચ સક્કા તેસં રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતુ’’ન્તિ. ‘‘યથા, મહારાજ, અત્થિસત્તાનં યેવ અરૂપકાયિકાનં દેવાનં ન સક્કા રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતું, એવમેવ ખો, મહારાજ, અત્થિધમ્મસ્સેવ નિબ્બાનસ્સ ન સક્કા રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતુ’’ન્તિ.

‘‘ભન્તે નાગસેન, હોતુ એકન્તસુખં નિબ્બાનં, ન ચ સક્કા તસ્સ રૂપં વા સણ્ઠાનં વા વયં વા પમાણં વા ઓપમ્મેન વા કારણેન વા હેતુના વા નયેન વા ઉપદસ્સયિતું. અત્થિ પન, ભન્તે, નિબ્બાનસ્સ ગુણં અઞ્ઞેહિ અનુપવિટ્ઠં કિઞ્ચિ ઓપમ્મનિદસ્સનમત્ત’’ન્તિ? ‘‘સરૂપતો, મહારાજ, નત્થિ, ગુણતો પન સક્કા કિઞ્ચિ ઓપમ્મનિદસ્સનમત્તં ઉપદસ્સયિતુ’’ન્તિ. ‘‘સાધુ, ભન્તે નાગસેન, યથાહં લભામિ નિબ્બાનસ્સ ગુણતોપિ એકદેસપરિદીપનમત્તં, તથા સીઘં બ્રૂહિ, નિબ્બાપેહિ મે હદયપરિળાહં વિનય સીતલમધુરવચનમાલુતેના’’તિ.

‘‘પદુમસ્સ, મહારાજ, એકો ગુણો નિબ્બાનં અનુપવિટ્ઠો, ઉદકસ્સ દ્વે ગુણા, અગદસ્સ તયો ગુણા, મહાસમુદ્દસ્સ ચત્તારો ગુણા, ભોજનસ્સ પઞ્ચ ગુણા, આકાસસ્સ દસ ગુણા, મણિરતનસ્સ તયો ગુણા, લોહિતચન્દનસ્સ તયો ગુણા, સપ્પિમણ્ડસ્સ તયો ગુણા, ગિરિસિખરસ્સ પઞ્ચ ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘પદુમસ્સ એકો ગુણો નિબ્બાનં અનુપવિટ્ઠો’તિ યં વદેસિ, કતમો પદુમસ્સ એકો ગુણો નિબ્બાનં અનુપવિટ્ઠો’’તિ? ‘‘યથા, મહારાજ, પદુમં અનુપલિત્તં ઉદકેન, એવમેવ ખો, મહારાજ, નિબ્બાનં સબ્બકિલેસેહિ અનુપલિત્તં. અયં, મહારાજ, પદુમસ્સ એકો ગુણો નિબ્બાનં અનુપવિટ્ઠો’’તિ.

‘‘ભન્તે નાગસેન, ‘ઉદકસ્સ દ્વે ગુણા નિબ્બાનં અનુપવિટ્ઠા’તિ યં વદેસિ, કતમે ઉદકસ્સ દ્વે ગુણા નિબ્બાનં અનુપવિટ્ઠા’’તિ? ‘‘યથા, મહારાજ, ઉદકં સીતલં પરિળાહનિબ્બાપનં, એવમેવ ખો, મહારાજ, નિબ્બાનં સીતલં સબ્બકિલેસપરિળાહનિબ્બાપનં. અયં, મહારાજ, ઉદકસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, ઉદકં કિલન્તતસિતપિપાસિતઘમ્માભિતત્તાનં જનપસુપજાનં પિપાસાવિનયનં, એવમેવ ખો, મહારાજ, નિબ્બાનં કામતણ્હાભવતણ્હાવિભવતણ્હાપિપાસાવિનયનં. અયં, મહારાજ, ઉદકસ્સ દુતિયો ગુણો નિબ્બાનં અનુપવિટ્ઠો. ઇમે ખો, મહારાજ, ઉદકસ્સ દ્વે ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘અગદસ્સ તયો ગુણા નિબ્બાનં અનુપવિટ્ઠા’તિ યં વદેસિ, કતમે અગદસ્સ તયો ગુણા નિબ્બાનં અનુપવિટ્ઠા’’તિ? ‘‘યથા, મહારાજ, અગદો વિસપીળિતાનં સત્તાનં પટિસરણં, એવમેવ ખો, મહારાજ, નિબ્બાનં કિલેસવિસપીળિતાનં સત્તાનં પટિસરણં. અયં, મહારાજ, અગદસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, અગદો રોગાનં અન્તકરો, એવમેવ ખો, મહારાજ, નિબ્બાનં સબ્બદુક્ખાનં અન્તકરં. અયં, મહારાજ, અગદસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, અગદો અમતં, એવમેવ ખો, મહારાજ, નિબ્બાનં અમતં. અયં, મહારાજ, અગદસ્સ તતિયો ગુણો નિબ્બાનં અનુપવિટ્ઠો. ઇમે ખો, મહારાજ, અગદસ્સ તયો ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘મહાસમુદ્દસ્સ ચત્તારો ગુણા નિબ્બાનં અનુપવિટ્ઠા’તિ યં વદેસિ, કતમે મહાસમુદ્દસ્સ ચત્તારો ગુણા નિબ્બાનં અનુપવિટ્ઠા’’તિ? ‘‘યથા, મહારાજ, મહાસમુદ્દો સુઞ્ઞો સબ્બકુણપેહિ, એવમેવ ખો, મહારાજ, નિબ્બાનં સુઞ્ઞં સબ્બકિલેસકુણપેહિ. અયં, મહારાજ, મહાસમુદ્દસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, મહાસમુદ્દો મહન્તો અનોરપારો, ન પરિપૂરતિ સબ્બસવન્તીહિ, એવમેવ ખો, મહારાજ, નિબ્બાનં મહન્તં અનોરપારં, ન પૂરતિ સબ્બસત્તેહિ. અયં, મહારાજ, મહાસમુદ્દસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, મહાસમુદ્દો મહન્તાનં ભૂતાનં આવાસો, એવમેવ ખો, મહારાજ, નિબ્બાનં મહન્તાનં અરહન્તાનં વિમલખીણાસવબલપ્પત્તવસીભૂતમહાભૂતાનં આવાસો. અયં, મહારાજ, મહાસમુદ્દસ્સ તતિયો ગુણો નિબ્બાનં અનુપવિટ્ઠો. પુન ચપરં, મહારાજ, મહાસમુદ્દો અપરિમિતવિવિધવિપુલવીચિપુપ્ફસંકુસુમિતો, એવમેવ ખો, મહારાજ, નિબ્બાનં અપરિમિતવિવિધવિપુલપરિસુદ્ધવિજ્જાવિમુત્તિપુપ્ફસંકુસુમિતં. અયં, મહારાજ, મહાસમુદ્દસ્સ ચતુત્થો ગુણો નિબ્બાનં અનુપવિટ્ઠો. ઇમે ખો, મહારાજ, મહાસમુદ્દસ્સ ચત્તારો ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘ભોજનસ્સ પઞ્ચ ગુણા નિબ્બાનં અનુપવિટ્ઠા’તિ યં વદેસિ, કતમે ભોજનસ્સ પઞ્ચ ગુણા નિબ્બાનં અનુપવિટ્ઠા’’તિ? ‘‘યથા, મહારાજ, ભોજનં સબ્બસત્તાનં આયુધારણં, એવમેવ ખો, મહારાજ, નિબ્બાનં સચ્છિકતં જરામરણનાસનતો આયુધારણં. અયં, મહારાજ, ભોજનસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, ભોજનં સબ્બસત્તાનં બલવડ્ઢનં, એવમેવ ખો, મહારાજ, નિબ્બાનં સચ્છિકતં સબ્બસત્તાનં ઇદ્ધિબલવડ્ઢનં. અયં, મહારાજ, ભોજનસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, ભોજનં સબ્બસત્તાનં વણ્ણજનનં, એવમેવ ખો, મહારાજ, નિબ્બાનં સચ્છિકતં સબ્બસત્તાનં ગુણવણ્ણજનનં. અયં, મહારાજ, ભોજનસ્સ તતિયો ગુણો નિબ્બાનં અનુપવિટ્ઠો. પુન ચપરં, મહારાજ, ભોજનં સબ્બસત્તાનં દરથવૂપસમનં, એવમેવ ખો, મહારાજ, નિબ્બાનં સચ્છિકતં સબ્બસત્તાનં સબ્બકિલેસદરથવૂપસમનં. અયં, મહારાજ, ભોજનસ્સ ચતુત્થો ગુણો નિબ્બાનં અનુપવિટ્ઠો. પુન ચપરં, મહારાજ, ભોજનં સબ્બસત્તાનં જિઘચ્છાદુબ્બલ્યપટિવિનોદનં, એવમેવ ખો, મહારાજ, નિબ્બાનં સચ્છિકતં સબ્બસત્તાનં સબ્બદુક્ખજિઘચ્છાદુબ્બલ્યપટિવિનોદનં. અયં, મહારાજ, ભોજનસ્સ પઞ્ચમો ગુણો નિબ્બાનં અનુપવિટ્ઠો. ઇમે ખો, મહારાજ, ભોજનસ્સ પઞ્ચ ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘આકાસસ્સ દસ ગુણા નિબ્બાનં અનુપવિટ્ઠા’તિ યં વદેસિ, કતમે આકાસસ્સ દસ ગુણા નિબ્બાનં અનુપવિટ્ઠા’’તિ? ‘‘યથા, મહારાજ, આકાસો ન જાયતિ, ન જીયતિ, ન મીયતિ, ન ચવતિ, ન ઉપ્પજ્જતિ, દુપ્પસહો, અચોરાહરણો, અનિસ્સિતો, વિહગગમનો, નિરાવરણો, અનન્તો. એવમેવ ખો, મહારાજ, નિબ્બાનં ન જાયતિ, ન જીયતિ, ન મીયતિ, ન ચવતિ, ન ઉપ્પજ્જતિ, દુપ્પસહં, અચોરાહરણં, અનિસ્સિતં, અરિયગમનં, નિરાવરણં, અનન્તં. ઇમે ખો, મહારાજ, આકાસસ્સ દસ ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘મણિરતનસ્સ તયો ગુણા નિબ્બાનં અનુપવિટ્ઠા’તિ યં વદેસિ, કતમે મણિરતનસ્સ તયો ગુણા નિબ્બાનં અનુપવિટ્ઠા’’તિ? ‘‘યથા, મહારાજ, મણિરતનં કામદદં, એવમેવ ખો, મહારાજ, નિબ્બાનં કામદદં. અયં, મહારાજ, મણિરતનસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, મણિરતનં હાસકરં, એવમેવ ખો, મહારાજ, નિબ્બાનં હાસકરં. અયં, મહારાજ, મણિરતનસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, મણિરતનં ઉજ્જોતત્તકરં, એવમેવ ખો, મહારાજ, નિબ્બાનં ઉજ્જોતત્તકરં [ઉજ્જોતત્થકરં (સી. પી.), ઉજ્જોતિતત્થકરં (સ્યા.)]. અયં, મહારાજ, મણિરતનસ્સ તતિયો ગુણો નિબ્બાનં અનુપવિટ્ઠો. ઇમે ખો, મહારાજ, મણિરતનસ્સ તયો ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘લોહિતચન્દનસ્સ તયો ગુણા નિબ્બાનં અનુપવિટ્ઠા’તિ યં વદેસિ, કતમે લોહિતચન્દનસ્સ તયો ગુણા નિબ્બાનં અનુપવિટ્ઠા’’તિ? ‘‘યથા, મહારાજ, લોહિતચન્દનં દુલ્લભં, એવમેવ ખો, મહારાજ, નિબ્બાનં દુલ્લભં. અયં, મહારાજ, લોહિતચન્દનસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, લોહિતચન્દનં અસમસુગન્ધં, એવમેવ ખો, મહારાજ, નિબ્બાનં અસમસુગન્ધં. અયં, મહારાજ, લોહિતચન્દનસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, લોહિતચન્દનં સજ્જનપસત્થં [સબ્બજનપસત્થં (સ્યા.)], એવમેવ ખો, મહારાજ, નિબ્બાનં અરિયસજ્જનપસત્થં. અયં, મહારાજ, લોહિતચન્દનસ્સ તતિયો ગુણો નિબ્બાનં અનુપવિટ્ઠો. ઇમે ખો, મહારાજ, લોહિતચન્દનસ્સ તયો ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘સપ્પિમણ્ડસ્સ તયો ગુણા નિબ્બાનં અનુપવિટ્ઠા’તિ યં વદેસિ, કતમે સપ્પિમણ્ડસ્સ તયો ગુણા નિબ્બાનં અનુપવિટ્ઠા’’તિ? ‘‘યથા, મહારાજ, સપ્પિમણ્ડો વણ્ણસમ્પન્નો, એવમેવ ખો, મહારાજ, નિબ્બાનં ગુણવણ્ણસમ્પન્નં. અયં, મહારાજ, સપ્પિમણ્ડસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, સપ્પિમણ્ડો ગન્ધસમ્પન્નો, એવમેવ ખો, મહારાજ, નિબ્બાનં સીલગન્ધસમ્પન્નં. અયં, મહારાજ, સપ્પિમણ્ડસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, સપ્પિમણ્ડો રસસમ્પન્નો, એવમેવ ખો, મહારાજ, નિબ્બાનં રસસમ્પન્નં. અયં, મહારાજ, સપ્પિમણ્ડસ્સ તતિયો ગુણો નિબ્બાનં અનુપવિટ્ઠો. ઇમે ખો, મહારાજ, સપ્પિમણ્ડસ્સ તયો ગુણા નિબ્બાનં અનુપવિટ્ઠા’’તિ.

‘‘ભન્તે નાગસેન, ‘ગિરિસિખરસ્સ પઞ્ચ ગુણા નિબ્બાનં અનુપવિટ્ઠા’તિ યં વદેસિ, કતમે ગિરિસિખરસ્સ પઞ્ચ ગુણા નિબ્બાનં અનુપવિટ્ઠા’’તિ? ‘‘યથા, મહારાજ, ગિરિસિખરં અચ્ચુગ્ગતં, એવમેવ ખો, મહારાજ, નિબ્બાનં અચ્ચુગતં. અયં, મહારાજ, ગિરિસિખરસ્સ પઠમો ગુણો નિબ્બાનં અનુપવિટ્ઠો. પુન ચપરં, મહારાજ, ગિરિસિખરં અચલં, એવમેવ ખો, મહારાજ, નિબ્બાનં અચલં. અયં, મહારાજ, ગિરિસિખરસ્સ દુતિયો ગુણો નિબ્બાનં અનુપવિટ્ઠો. પુન ચપરં, મહારાજ, ગિરિસિખરં દુરધિરોહં, એવમેવ ખો, મહારાજ, નિબ્બાનં દુરધિરોહં સબ્બકિલેસાનં. અયં, મહારાજ, ગિરિસિખરસ્સ તતિયો ગુણો નિબ્બાનં અનુપવિટ્ઠો. પુન ચપરં, મહારાજ, ગિરિસિખરં સબ્બબીજાનં અવિરૂહનં, એવમેવ ખો, મહારાજ, નિબ્બાનં સબ્બકિલેસાનં અવિરૂહનં. અયં, મહારાજ, ગિરિસિખરસ્સ ચતુત્થો ગુણો નિબ્બાનં અનુપવિટ્ઠો. પુન ચપરં, મહારાજ, ગિરિસિખરં અનુનયપ્પટિઘવિપ્પમુત્તં, એવમેવ ખો, મહારાજ, નિબ્બાનં અનુનયપ્પટિઘવિપ્પમુત્તં. અયં, મહારાજ, ગિરિસિખરસ્સ પઞ્ચમો ગુણો નિબ્બાનં અનુપવિટ્ઠો. ઇમે ખો, મહારાજ, ગિરિસિખરસ્સ પઞ્ચ ગુણા નિબ્બાનં અનુપવિટ્ઠા’’તિ. ‘‘સાધુ, ભન્તે નાગસેન, એવમેતં તથા સમ્પટિચ્છામી’’તિ.

નિબ્બાનરૂપસણ્ઠાનપઞ્હો દસમો.