૧૧. અભિજાનન્તસતિપઞ્હો

૧૧. રાજા આહ ‘‘ભન્તે નાગસેન, સબ્બા સતિ અભિજાનન્તી ઉપ્પજ્જતિ, ઉદાહુ કટુમિકાવ સતી’’તિ? ‘‘અભિજાનન્તીપિ, મહારાજ, કટુમિકાપિ સતી’’તિ. ‘‘એવઞ્હિ ખો, ભન્તે નાગસેન, સબ્બા સતિ અભિજાનન્તી, નત્થિ કટુમિકા સતી’’તિ? ‘‘યદિ નત્થિ, મહારાજ, કટુમિકા સતિ, નત્થિ કિઞ્ચિ સિપ્પિકાનં કમ્માયતનેહિ વા સિપ્પાયતનેહિ વા વિજ્જાટ્ઠાનેહિ વા કરણીયં, નિરત્થકા આચરિયા, યસ્મા ચ ખો, મહારાજ, અત્થિ કટુમિકા સતિ, તસ્મા અત્થિ કમ્માયતનેહિ વા સિપ્પાયતનેહિ વા વિજ્જાટ્ઠાનેહિ વા કરણીયં, અત્થો ચ આચરિયેહી’’તિ.

‘‘કલ્લોસિ, ભન્તે નાગસેના’’તિ.

અભિજાનન્તસતિપઞ્હો એકાદસમો.

સતિવગ્ગો છટ્ઠો.

ઇમસ્મિં વગ્ગે એકાદસ પઞ્હા.