૧૦. નિબ્બાનસુખજાનનપઞ્હો

૧૦. રાજા આહ ‘‘ભન્તે નાગસેન, યો ન લભતિ નિબ્બાનં, જાનાતિ સો ‘સુખં નિબ્બાન’’’ન્તિ? ‘‘આમ, મહારાજ, યો ન લભતિ નિબ્બાનં, જાનાતિ સો ‘સુખં નિબ્બાન’’’ન્તિ. ‘‘કથં, ભન્તે નાગસેન, અલભન્તો જાનાતિ ‘સુખં નિબ્બાન’’’ન્તિ? ‘‘તં કિં મઞ્ઞસિ, મહારાજ, યેસં નચ્છિન્ના હત્થપાદા, જાનેય્યું તે, મહારાજ, ‘દુક્ખં હત્થપાદચ્છેદન’’’ન્તિ? ‘‘આમ, ભન્તે, જાનેય્યુ’’ન્તિ. ‘‘કથં જાનેય્યુ’’ન્તિ? ‘‘અઞ્ઞેસં, ભન્તે, છિન્નહત્થપાદાનં પરિદેવિતસદ્દં સુત્વા જાનન્તિ ‘દુક્ખં હત્થપાદચ્છેદન’’’ન્તિ. ‘‘એવમેવ ખો, મહારાજ, યેસં દિટ્ઠં નિબ્બાનં, તેસં સદ્દં સુત્વા જાનાતિ ‘સુખં નિબ્બાન’’’ન્તિ.

‘‘કલ્લોસિ, ભન્તે નાગસેના’’તિ.

નિબ્બાનસુખજાનનપઞ્હો દસમો.

નિબ્બાનવગ્ગો ચતુત્થો.

ઇમસ્મિં વગ્ગે દસ પઞ્હા.