૫. દુતિયસઙ્ગામસુત્તવણ્ણના

૧૨૬. પઞ્ચમે અબ્ભુય્યાસીતિ પરાજયે ગરહપ્પત્તો ‘‘આરામં ગન્ત્વા ભિક્ખૂનં કથાસલ્લાપં સુણાથા’’તિ રત્તિભાગે બુદ્ધરક્ખિતેન નામ વુડ્ઢપબ્બજિતેન ધમ્મરક્ખિતસ્સ વુડ્ઢપબ્બજિતસ્સ ‘‘સચે રાજા ઇમઞ્ચ ઉપાયં કત્વા ગચ્છેય્ય, પુન જિનેય્યા’’તિ વુત્તજયકારણં સુત્વા અભિઉય્યાસિ.

યાવસ્સ ઉપકપ્પતીતિ યાવ તસ્સ ઉપકપ્પતિ સય્હં હોતિ. યદા ચઞ્ઞેતિ યદા અઞ્ઞે. વિલુમ્પન્તીતિ તં વિલુમ્પિત્વા ઠિતપુગ્ગલં વિલુમ્પન્તિ. વિલુમ્પતીતિ વિલુમ્પિયતિ. ઠાનં હિ મઞ્ઞતીતિ ‘‘કારણ’’ન્તિ હિ મઞ્ઞતિ. યદાતિ યસ્મિં કાલે. જેતારં લભતે જયન્તિ જયન્તો પુગ્ગલો પચ્છા જેતારમ્પિ લભતિ. રોસેતારન્તિ ઘટ્ટેતારં. રોસકોતિ ઘટ્ટકો. કમ્મવિવટ્ટેનાતિ કમ્મપરિણામેન, તસ્સ વિલુમ્પનકમ્મસ્સ વિપાકદાનેન. સો વિલુત્તો વિલુપ્પતીતિ સો વિલુમ્પકો વિલુમ્પિયતિ. પઞ્ચમં.