૪. પરિસાસુત્તવણ્ણના

૯૬. ચતુત્થે ન બાહુલિકા હોન્તીતિ પચ્ચયબાહુલ્લિકા ન હોન્તિ. ન સાથલિકાતિ તિસ્સો સિક્ખા સિથિલં કત્વા ન ગણ્હન્તિ. ઓક્કમને નિક્ખિત્તધુરાતિ ઓક્કમનં વુચ્ચતિ અવગમનટ્ઠેન પઞ્ચ નીવરણાનિ, તેસુ નિક્ખિત્તધુરા. પવિવેકે પુબ્બઙ્ગમાતિ કાયચિત્તઉપધિવિવેકસઙ્ખાતે તિવિધેપિ વિવેકે પુબ્બઙ્ગમા. વીરિયં આરભન્તીતિ દુવિધમ્પિ વીરિયં પગ્ગણ્હન્તિ. અપ્પત્તસ્સાતિ ઝાનવિપસ્સનામગ્ગફલસઙ્ખાતસ્સ અપ્પત્તવિસેસસ્સ. સેસપદદ્વયેપિ એસેવ નયો. પચ્છિમા જનતાતિ સદ્ધિવિહારિકઅન્તેવાસિકાદયો. દિટ્ઠાનુગતિં આપજ્જતીતિ આચરિયુપજ્ઝાયેહિ કતં અનુકરોતિ. યં તાય જનતાય આચરિયુપજ્ઝાયેસુ દિટ્ઠં, તસ્સ અનુગતિં આપજ્જતિ નામ. અયં વુચ્ચતિ, ભિક્ખવે, અગ્ગવતી પરિસાતિ, ભિક્ખવે, અયં પરિસા અગ્ગપુગ્ગલવતી નામ વુચ્ચતિ.

ભણ્ડનજાતાતિ જાતભણ્ડના. કલહજાતાતિ જાતકલહા. ભણ્ડનન્તિ ચેત્થ કલહસ્સ પુબ્બભાગો, હત્થપરામાસાદિવસેન વીતિક્કમો કલહો નામ. વિવાદાપન્નાતિ વિરુદ્ધવાદં આપન્ના. મુખસત્તીહીતિ ગુણવિજ્ઝનટ્ઠેન ફરુસા વાચા ‘‘મુખસત્તિયો’’તિ વુચ્ચન્તિ, તાહિ મુખસત્તીહિ. વિતુદન્તા વિહરન્તીતિ વિજ્ઝન્તા વિચરન્તિ.

સમગ્ગાતિ સહિતા. સમ્મોદમાનાતિ સમપ્પવત્તમોદા. ખીરોદકીભૂતાતિ ખીરોદકં વિય ભૂતા. પિયચક્ખૂહીતિ ઉપસન્તેહિ મેત્તચક્ખૂહિ. પીતિ જાયતીતિ પઞ્ચવણ્ણા પીતિ ઉપ્પજ્જતિ. કાયો પસ્સમ્ભતીતિ નામકાયોપિ રૂપકાયોપિ વિગતદરથો હોતિ. પસ્સદ્ધકાયોતિ અસારદ્ધકાયો. સુખં વેદિયતીતિ કાયિકચેતસિકસુખં વેદિયતિ. સમાધિયતીતિ આરમ્મણે સમ્મા ઠપીયતિ.

થુલ્લફુસિતકેતિ મહાફુસિતકે. પબ્બતકન્દરપદરસાખાતિ એત્થ કન્દરો નામ ‘‘ક’’ન્તિ લદ્ધનામેન ઉદકેન દારિતો ઉદકભિન્નો પબ્બતપ્પદેસો, યો ‘‘નિતમ્ભો’’તિપિ ‘‘નદિકુઞ્જો’’તિપિ વુચ્ચતિ. પદરં નામ અટ્ઠ માસે દેવે અવસ્સન્તે ફલિતો ભૂમિપ્પદેસો. સાખાતિ કુસોબ્ભગામિનિયો ખુદ્દકમાતિકાયો. કુસોબ્ભાતિ ખુદ્દકઆવાટા. મહાસોબ્ભાતિ મહાઆવાટા. કુન્નદિયોતિ ખુદ્દકનદિયો. મહાનદિયોતિ ગઙ્ગાયમુનાદિકા મહાસરિતા.