૫-૭. પઠમઆજાનીયસુત્તાદિવણ્ણના

૯૭-૯૯. પઞ્ચમે અઙ્ગેહીતિ ગુણઙ્ગેહિ. રાજારહોતિ રઞ્ઞો અરહો અનુચ્છવિકો. રાજભોગ્ગોતિ રઞ્ઞો ઉપભોગભૂતો. રઞ્ઞો અઙ્ગન્તિ રઞ્ઞો હત્થપાદાદિઅઙ્ગસમતાય અઙ્ગન્તેવ સઙ્ખં ગચ્છતિ. વણ્ણસમ્પન્નોતિ સરીરવણ્ણેન સમ્પન્નો. બલસમ્પન્નોતિ કાયબલેન સમ્પન્નો. આહુનેય્યોતિ આહુતિસઙ્ખાતં પિણ્ડપાતં પટિગ્ગહેતું યુત્તો. પાહુનેય્યોતિ પાહુનકભત્તસ્સ અનુચ્છવિકો. દક્ખિણેય્યોતિ દસવિધદાનવત્થુપરિચ્ચાગવસેન સદ્ધાદાનસઙ્ખાતાય દક્ખિણાય અનુચ્છવિકો. અઞ્જલિકરણીયોતિ અઞ્જલિપગ્ગહણસ્સ અનુચ્છવિકો. અનુત્તરં પુઞ્ઞક્ખેત્તં લોકસ્સાતિ સબ્બલોકસ્સ અસદિસં પુઞ્ઞવિરુહનટ્ઠાનં.

વણ્ણસમ્પન્નોતિ ગુણવણ્ણેન સમ્પન્નો. બલસમ્પન્નોતિ વીરિયબલેન સમ્પન્નો. જવસમ્પન્નોતિ ઞાણજવેન સમ્પન્નો. થામવાતિ ઞાણથામેન સમન્નાગતો. દળ્હપરક્કમોતિ થિરપરક્કમો. અનિક્ખિત્તધુરોતિ અટ્ઠપિતધુરો પગ્ગહિતધુરો, અગ્ગફલં અરહત્તં અપ્પત્વા વીરિયધુરં ન નિક્ખિપિસ્સામીતિ એવં પટિપન્નો. ઇમસ્મિં સુત્તે ચતુસચ્ચવસેન સોતાપત્તિમગ્ગો, સોતાપત્તિમગ્ગેન ચ ઞાણજવસમ્પન્નતા કથિતાતિ. છટ્ઠે તીણિ ચ મગ્ગાનિ તીણિ ચ ફલાનિ, તીહિ મગ્ગફલેહિ ચ ઞાણજવસમ્પન્નતા કથિતા. સત્તમે અરહત્તફલં, અરહત્તફલેનેવ ચ મગ્ગકિચ્ચં કથિતં. ફલં પન જવિતજવેન ઉપ્પજ્જનતો જવોતિ ચ વત્તું વટ્ટતિ.