(૧૪) છ દિટ્ઠિયો

૯૪૮. તત્થ કતમા છ દિટ્ઠિયો? ‘‘અત્થિ મે અત્તા’’તિ વા અસ્સ સચ્ચતો થેતતો દિટ્ઠિ ઉપ્પજ્જતિ, ‘‘નત્થિ મે અત્તા’’તિ વા અસ્સ સચ્ચતો થેતતો દિટ્ઠિ ઉપ્પજ્જતિ, ‘‘અત્તના વા અત્તાનં સઞ્જાનામી’’તિ વા અસ્સ સચ્ચતો થેતતો દિટ્ઠિ ઉપ્પજ્જતિ, ‘‘અત્તના વા અનત્તાનં સઞ્જાનામી’’તિ વા અસ્સ સચ્ચતો થેતતો દિટ્ઠિ ઉપ્પજ્જતિ, ‘‘અનત્તના વા અત્તાનં સઞ્જાનામી’’તિ વા અસ્સ સચ્ચતો થેતતો દિટ્ઠિ ઉપ્પજ્જતિ; અથ વા પનસ્સ એવંદિટ્ઠિ હોતિ – ‘‘સો મે અયં અત્તા વદો વેદેય્યો તત્ર તત્ર દીઘરત્તં કલ્યાણપાપકાનં કમ્માનં વિપાકં પચ્ચનુભોતિ. ન સો જાતો નાહોસિ, ન સો જાતો ન ભવિસ્સતિ, નિચ્ચો ધુવો સસ્સતો અવિપરિણામધમ્મો’’તિ વા પનસ્સ સચ્ચતો થેતતો દિટ્ઠિ ઉપ્પજ્જતિ. ઇમા છ દિટ્ઠિયો.

છક્કં.