નમો તસ્સ ભગવતો અરહતો સમ્માસમ્બુદ્ધસ્સ

અભિધમ્મપિટકે

વિભઙ્ગપાળિ

૧. ખન્ધવિભઙ્ગો

૧. સુત્તન્તભાજનીયં

૧. પઞ્ચક્ખન્ધા – રૂપક્ખન્ધો, વેદનાક્ખન્ધો, સઞ્ઞાક્ખન્ધો, સઙ્ખારક્ખન્ધો, વિઞ્ઞાણક્ખન્ધો.

૧. રૂપક્ખન્ધો

૨. તત્થ કતમો રૂપક્ખન્ધો? યં કિઞ્ચિ રૂપં અતીતાનાગતપચ્ચુપ્પન્નં અજ્ઝત્તં વા બહિદ્ધા વા ઓળારિકં વા સુખુમં વા હીનં વા પણીતં વા યં દૂરે સન્તિકે વા, તદેકજ્ઝં અભિસઞ્ઞૂહિત્વા અભિસઙ્ખિપિત્વા – અયં વુચ્ચતિ રૂપક્ખન્ધો.

૩. તત્થ કતમં રૂપં અતીતં? યં રૂપં અતીતં નિરુદ્ધં વિગતં વિપરિણતં અત્થઙ્ગતં અબ્ભત્થઙ્ગતં ઉપ્પજ્જિત્વા વિગતં અતીતં અતીતંસેન સઙ્ગહિતં, ચત્તારો ચ મહાભૂતા ચતુન્નઞ્ચ મહાભૂતાનં ઉપાદાયરૂપં – ઇદં વુચ્ચતિ રૂપં અતીતં.

તત્થ કતમં રૂપં અનાગતં? યં રૂપં અજાતં અભૂતં અસઞ્જાતં અનિબ્બત્તં અનભિનિબ્બત્તં અપાતુભૂતં અનુપ્પન્નં અસમુપ્પન્નં અનુટ્ઠિતં અસમુટ્ઠિતં અનાગતં અનાગતંસેન સઙ્ગહિતં, ચત્તારો ચ મહાભૂતા ચતુન્નઞ્ચ મહાભૂતાનં ઉપાદાયરૂપં – ઇદં વુચ્ચતિ રૂપં અનાગતં.

તત્થ કતમં રૂપં પચ્ચુપ્પન્નં? યં રૂપં જાતં ભૂતં સઞ્જાતં નિબ્બત્તં અભિનિબ્બત્તં પાતુભૂતં ઉપ્પન્નં સમુપ્પન્નં ઉટ્ઠિતં સમુટ્ઠિતં પચ્ચુપ્પન્નં પચ્ચુપ્પન્નંસેન સઙ્ગહિતં, ચત્તારો ચ મહાભૂતા ચતુન્નઞ્ચ મહાભૂતાનં ઉપાદાયરૂપં – ઇદં વુચ્ચતિ રૂપં પચ્ચુપ્પન્નં.

૪. તત્થ કતમં રૂપં અજ્ઝત્તં? યં રૂપં તેસં તેસં સત્તાનં અજ્ઝત્તં પચ્ચત્તં નિયકં પાટિપુગ્ગલિકં ઉપાદિન્નં, ચત્તારો ચ મહાભૂતા ચતુન્નઞ્ચ મહાભૂતાનં ઉપાદાયરૂપં – ઇદં વુચ્ચતિ રૂપં અજ્ઝત્તં.

તત્થ કતમં રૂપં બહિદ્ધા? યં રૂપં તેસં તેસં પરસત્તાનં પરપુગ્ગલાનં અજ્ઝત્તં પચ્ચત્તં નિયકં પાટિપુગ્ગલિકં ઉપાદિન્નં, ચત્તારો ચ મહાભૂતા ચતુન્નઞ્ચ મહાભૂતાનં ઉપાદાયરૂપં – ઇદં વુચ્ચતિ રૂપં બહિદ્ધા.

૫. તત્થ કતમં રૂપં ઓળારિકં? ચક્ખાયતનં…પે… ફોટ્ઠબ્બાયતનં – ઇદં વુચ્ચતિ રૂપં ઓળારિકં.

તત્થ કતમં રૂપં સુખુમં? ઇત્થિન્દ્રિયં…પે… કબળીકારો [કબળિંકારો (સી. સ્યા.)] આહારો – ઇદં વુચ્ચતિ રૂપં સુખુમં.

૬. તત્થ કતમં રૂપં હીનં? યં રૂપં તેસં તેસં સત્તાનં ઉઞ્ઞાતં અવઞ્ઞાતં હીળિતં પરિભૂતં અચિત્તીકતં હીનં હીનમતં હીનસમ્મતં અનિટ્ઠં અકન્તં અમનાપં, રૂપા સદ્દા ગન્ધા રસા ફોટ્ઠબ્બા – ઇદં વુચ્ચતિ રૂપં હીનં.

તત્થ કતમં રૂપં પણીતં? યં રૂપં તેસં તેસં સત્તાનં અનુઞ્ઞાતં અનવઞ્ઞાતં અહીળિતં અપરિભૂતં ચિત્તીકતં પણીતં પણીતમતં પણીતસમ્મતં ઇટ્ઠં કન્તં મનાપં, રૂપા સદ્દા ગન્ધા રસા ફોટ્ઠબ્બા – ઇદં વુચ્ચતિ રૂપં પણીતં. તં તં વા પન રૂપં ઉપાદાયુપાદાય રૂપં હીનં પણીતં દટ્ઠબ્બં.

૭. તત્થ કતમં રૂપં દૂરે? ઇત્થિન્દ્રિયં…પે… કબળીકારો આહારો, યં વા પનઞ્ઞમ્પિ અત્થિ રૂપં અનાસન્ને અનુપકટ્ઠે દૂરે અસન્તિકે – ઇદં વુચ્ચતિ રૂપં દૂરે.

તત્થ કતમં રૂપં સન્તિકે? ચક્ખાયતનં…પે… ફોટ્ઠબ્બાયતનં, યં વા પનઞ્ઞમ્પિ અત્થિ રૂપં આસન્ને ઉપકટ્ઠે અવિદૂરે સન્તિકે – ઇદં વુચ્ચતિ રૂપં સન્તિકે. તં તં વા પન રૂપં ઉપાદાયુપાદાય રૂપં દૂરે સન્તિકે દટ્ઠબ્બં.

૨. વેદનાક્ખન્ધો

૮. તત્થ કતમો વેદનાક્ખન્ધો? યા કાચિ વેદના અતીતાનાગતપચ્ચુપ્પન્ના અજ્ઝત્તા વા બહિદ્ધા વા ઓળારિકા વા સુખુમા વા હીના વા પણીતા વા યા દૂરે સન્તિકે વા, તદેકજ્ઝં અભિસઞ્ઞૂહિત્વા અભિસઙ્ખિપિત્વા – અયં વુચ્ચતિ વેદનાક્ખન્ધો.

૯. તત્થ કતમા વેદના અતીતા? યા વેદના અતીતા નિરુદ્ધા વિગતા વિપરિણતા અત્થઙ્ગતા અબ્ભત્થઙ્ગતા ઉપ્પજ્જિત્વા વિગતા અતીતા અતીતંસેન સઙ્ગહિતા, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના અતીતા.

તત્થ કતમા વેદના અનાગતા? યા વેદના અજાતા અભૂતા અસઞ્જાતા અનિબ્બત્તા અનભિનિબ્બત્તા અપાતુભૂતા અનુપ્પન્ના અસમુપ્પન્ના અનુટ્ઠિતા અસમુટ્ઠિતા અનાગતા અનાગતંસેન સઙ્ગહિતા, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના અનાગતા.

તત્થ કતમા વેદના પચ્ચુપ્પન્ના? યા વેદના જાતા ભૂતા સઞ્જાતા નિબ્બત્તા અભિનિબ્બત્તા પાતુભૂતા ઉપ્પન્ના સમુપ્પન્ના ઉટ્ઠિતા સમુટ્ઠિતા પચ્ચુપ્પન્ના પચ્ચુપ્પન્નંસેન સઙ્ગહિતા, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના પચ્ચુપ્પન્ના.

૧૦. તત્થ કતમા વેદના અજ્ઝત્તા? યા વેદના તેસં તેસં સત્તાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના અજ્ઝત્તા.

તત્થ કતમા વેદના બહિદ્ધા? યા વેદના તેસં તેસં પરસત્તાનં પરપુગ્ગલાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, સુખા વેદના દુક્ખા વેદના અદુક્ખમસુખા વેદના – અયં વુચ્ચતિ વેદના બહિદ્ધા.

૧૧. તત્થ કતમા વેદના ઓળારિકા સુખુમા? અકુસલા વેદના ઓળારિકા, કુસલાબ્યાકતા વેદના સુખુમા. કુસલાકુસલા વેદના ઓળારિકા, અબ્યાકતા વેદના સુખુમા. દુક્ખા વેદના ઓળારિકા, સુખા ચ અદુક્ખમસુખા ચ વેદના સુખુમા. સુખદુક્ખા વેદના ઓળારિકા, અદુક્ખમસુખા વેદના સુખુમા. અસમાપન્નસ્સ વેદના ઓળારિકા, સમાપન્નસ્સ વેદના સુખુમા. સાસવા વેદના ઓળારિકા, અનાસવા વેદના સુખુમા. તં તં વા પન વેદનં ઉપાદાયુપાદાય વેદના ઓળારિકા સુખુમા દટ્ઠબ્બા.

૧૨. તત્થ કતમા વેદના હીના પણીતા? અકુસલા વેદના હીના, કુસલાબ્યાકતા વેદના પણીતા. કુસલાકુસલા વેદના હીના, અબ્યાકતા વેદના પણીતા. દુક્ખા વેદના હીના, સુખા ચ અદુક્ખમસુખા ચ વેદના પણીતા. સુખદુક્ખા વેદના હીના, અદુક્ખમસુખા વેદના પણીતા. અસમાપન્નસ્સ વેદના હીના, સમાપન્નસ્સ વેદના પણીતા. સાસવા વેદના હીના, અનાસવા વેદના પણીતા. તં તં વા પન વેદનં ઉપાદાયુપાદાય વેદના હીના પણીતા દટ્ઠબ્બા.

૧૩. તત્થ કતમા વેદના દૂરે? અકુસલા વેદના કુસલાબ્યાકતાહિ વેદનાહિ દૂરે; કુસલાબ્યાકતા વેદના અકુસલાય વેદનાય દૂરે; કુસલા વેદના અકુસલાબ્યાકતાહિ વેદનાહિ દૂરે; અકુસલાબ્યાકતા વેદના કુસલાય વેદનાય દૂરે; અબ્યાકતા વેદના કુસલાકુસલાહિ વેદનાહિ દૂરે; કુસલાકુસલા વેદના અબ્યાકતાય વેદનાય દૂરે. દુક્ખા વેદના સુખાય ચ અદુક્ખમસુખાય ચ વેદનાહિ દૂરે; સુખા ચ અદુક્ખમસુખા ચ વેદના દુક્ખાય વેદનાય દૂરે; સુખા વેદના દુક્ખાય ચ અદુક્ખમસુખાય ચ વેદનાહિ દૂરે; દુક્ખા ચ અદુક્ખમસુખા ચ વેદના સુખાય વેદનાય દૂરે; અદુક્ખમસુખા વેદના સુખદુક્ખાહિ વેદનાહિ દૂરે; સુખદુક્ખા વેદના અદુક્ખમસુખાય વેદનાય દૂરે. અસમાપન્નસ્સ વેદના સમાપન્નસ્સ વેદનાય દૂરે; સમાપન્નસ્સ વેદના અસમાપન્નસ્સ વેદનાય દૂરે. સાસવા વેદના અનાસવાય વેદનાય દૂરે; અનાસવા વેદના સાસવાય વેદનાય દૂરે – અયં વુચ્ચતિ વેદના દૂરે.

તત્થ કતમા વેદના સન્તિકે? અકુસલા વેદના અકુસલાય વેદનાય સન્તિકે; કુસલા વેદના કુસલાય વેદનાય સન્તિકે; અબ્યાકતા વેદના અબ્યાકતાય વેદનાય સન્તિકે. દુક્ખા વેદના દુક્ખાય વેદનાય સન્તિકે; સુખા વેદના સુખાય વેદનાય સન્તિકે; અદુક્ખમસુખા વેદના અદુક્ખમસુખાય વેદનાય સન્તિકે. અસમાપન્નસ્સ વેદના અસમાપન્નસ્સ વેદનાય સન્તિકે; સમાપન્નસ્સ વેદના સમાપન્નસ્સ વેદનાય સન્તિકે. સાસવા વેદના સાસવાય વેદનાય સન્તિકે; અનાસવા વેદના અનાસવાય વેદનાય સન્તિકે. અયં વુચ્ચતિ વેદના સન્તિકે. તં તં વા પન વેદનં ઉપાદાયુપાદાય વેદના દૂરે સન્તિકે દટ્ઠબ્બા.

૩. સઞ્ઞાક્ખન્ધો

૧૪. તત્થ કતમો સઞ્ઞાક્ખન્ધો? યા કાચિ સઞ્ઞા અતીતાનાગતપચ્ચુપ્પન્ના અજ્ઝત્તા વા બહિદ્ધા વા ઓળારિકા વા સુખુમા વા હીના વા પણીતા વા યા દૂરે સન્તિકે વા તદેકજ્ઝં અભિસઞ્ઞૂહિત્વા અભિસઙ્ખિપિત્વા – અયં વુચ્ચતિ સઞ્ઞાક્ખન્ધો.

૧૫. તત્થ કતમા સઞ્ઞા અતીતા? યા સઞ્ઞા અતીતા નિરુદ્ધા વિગતા વિપરિણતા અત્થઙ્ગતા અબ્ભત્થઙ્ગતા ઉપ્પજ્જિત્વા વિગતા અતીતા અતીતંસેન સઙ્ગહિતા, ચક્ખુસમ્ફસ્સજા સઞ્ઞા સોતસમ્ફસ્સજા સઞ્ઞા ઘાનસમ્ફસ્સજા સઞ્ઞા જિવ્હાસમ્ફસ્સજા સઞ્ઞા કાયસમ્ફસ્સજા સઞ્ઞા મનોસમ્ફસ્સજા સઞ્ઞા – અયં વુચ્ચતિ સઞ્ઞા અતીતા.

તત્થ કતમા સઞ્ઞા અનાગતા? યા સઞ્ઞા અજાતા અભૂતા અસઞ્જાતા અનિબ્બત્તા અનભિનિબ્બત્તા અપાતુભૂતા અનુપ્પન્ના અસમુપ્પન્ના અનુટ્ઠિતા અસમુટ્ઠિતા અનાગતા અનાગતંસેન સઙ્ગહિતા, ચક્ખુસમ્ફસ્સજા સઞ્ઞા સોતસમ્ફસ્સજા સઞ્ઞા ઘાનસમ્ફસ્સજા સઞ્ઞા જિવ્હાસમ્ફસ્સજા સઞ્ઞા કાયસમ્ફસ્સજા સઞ્ઞા મનોસમ્ફસ્સજા સઞ્ઞા – અયં વુચ્ચતિ સઞ્ઞા અનાગતા.

તત્થ કતમા સઞ્ઞા પચ્ચુપ્પન્ના? યા સઞ્ઞા જાતા ભૂતા સઞ્જાતા નિબ્બત્તા અભિનિબ્બત્તા પાતુભૂતા ઉપ્પન્ના સમુપ્પન્ના ઉટ્ઠિતા સમુટ્ઠિતા પચ્ચુપ્પન્ના પચ્ચુપ્પન્નંસેન સઙ્ગહિતા, ચક્ખુસમ્ફસ્સજા સઞ્ઞા સોતસમ્ફસ્સજા સઞ્ઞા ઘાનસમ્ફસ્સજા સઞ્ઞા જિવ્હાસમ્ફસ્સજા સઞ્ઞા કાયસમ્ફસ્સજા સઞ્ઞા મનોસમ્ફસ્સજા સઞ્ઞા – અયં વુચ્ચતિ સઞ્ઞા પચ્ચુપ્પન્ના.

૧૬. તત્થ કતમા સઞ્ઞા અજ્ઝત્તા? યા સઞ્ઞા તેસં તેસં સત્તાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, ચક્ખુસમ્ફસ્સજા સઞ્ઞા સોતસમ્ફસ્સજા સઞ્ઞા ઘાનસમ્ફસ્સજા સઞ્ઞા જિવ્હાસમ્ફસ્સજા સઞ્ઞા કાયસમ્ફસ્સજા સઞ્ઞા મનોસમ્ફસ્સજા સઞ્ઞા – અયં વુચ્ચતિ સઞ્ઞા અજ્ઝત્તા.

તત્થ કતમા સઞ્ઞા બહિદ્ધા? યા સઞ્ઞા તેસં તેસં પરસત્તાનં પરપુગ્ગલાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, ચક્ખુસમ્ફસ્સજા સઞ્ઞા સોતસમ્ફસ્સજા સઞ્ઞા ઘાનસમ્ફસ્સજા સઞ્ઞા જિવ્હાસમ્ફસ્સજા સઞ્ઞા કાયસમ્ફસ્સજા સઞ્ઞા મનોસમ્ફસ્સજા સઞ્ઞા – અયં વુચ્ચતિ સઞ્ઞા બહિદ્ધા.

૧૭. તત્થ કતમા સઞ્ઞા ઓળારિકા સુખુમા? પટિઘસમ્ફસ્સજા સઞ્ઞા ઓળારિકા, અધિવચનસમ્ફસ્સજા સઞ્ઞા સુખુમા. અકુસલા સઞ્ઞા ઓળારિકા, કુસલાબ્યાકતા સઞ્ઞા સુખુમા. કુસલાકુસલા સઞ્ઞા ઓળારિકા, અબ્યાકતા સઞ્ઞા સુખુમા. દુક્ખાય વેદનાય સમ્પયુત્તા સઞ્ઞા ઓળારિકા, સુખાય ચ અદુક્ખમસુખાય ચ વેદનાહિ સમ્પયુત્તા સઞ્ઞા સુખુમા. સુખદુક્ખાહિ વેદનાહિ સમ્પયુત્તા સઞ્ઞા ઓળારિકા, અદુક્ખમસુખાય વેદનાય સમ્પયુત્તા સઞ્ઞા સુખુમા. અસમાપન્નસ્સ સઞ્ઞા ઓળારિકા, સમાપન્નસ્સ સઞ્ઞા સુખુમા. સાસવા સઞ્ઞા ઓળારિકા, અનાસવા સઞ્ઞા સુખુમા. તં તં વા પન સઞ્ઞં ઉપાદાયુપાદાય સઞ્ઞા ઓળારિકા સુખુમા દટ્ઠબ્બા.

૧૮. તત્થ કતમા સઞ્ઞા હીના પણીતા? અકુસલા સઞ્ઞા હીના, કુસલાબ્યાકતા સઞ્ઞા પણીતા. કુસલાકુસલા સઞ્ઞા હીના, અબ્યાકતા સઞ્ઞા પણીતા. દુક્ખાય વેદનાય સમ્પયુત્તા સઞ્ઞા હીના, સુખાય ચ અદુક્ખમસુખાય ચ વેદનાહિ સમ્પયુત્તા સઞ્ઞા પણીતા. સુખદુક્ખાહિ વેદનાહિ સમ્પયુત્તા સઞ્ઞા હીના, અદુક્ખમસુખાય વેદનાય સમ્પયુત્તા સઞ્ઞા પણીતા. અસમાપન્નસ્સ સઞ્ઞા હીના, સમાપન્નસ્સ સઞ્ઞા પણીતા. સાસવા સઞ્ઞા હીના, અનાસવા સઞ્ઞા પણીતા. તં તં વા પન સઞ્ઞં ઉપાદાયુપાદાય સઞ્ઞા હીના પણીતા દટ્ઠબ્બા.

૧૯. તત્થ કતમા સઞ્ઞા દૂરે? અકુસલા સઞ્ઞા કુસલાબ્યાકતાહિ સઞ્ઞાહિ દૂરે; કુસલાબ્યાકતા સઞ્ઞા અકુસલાય સઞ્ઞાય દૂરે; કુસલા સઞ્ઞા અકુસલાબ્યાકતાહિ સઞ્ઞાહિ દૂરે; અકુસલાબ્યાકતા સઞ્ઞા કુસલાય સઞ્ઞાય દૂરે. અબ્યાકતા સઞ્ઞા કુસલાકુસલાહિ સઞ્ઞાહિ દૂરે; કુસલાકુસલા સઞ્ઞા અબ્યાકતાય સઞ્ઞાય દૂરે. દુક્ખાય વેદનાય સમ્પયુત્તા સઞ્ઞા સુખાય ચ અદુક્ખમસુખાય ચ વેદનાહિ સમ્પયુત્તાહિ સઞ્ઞાહિ દૂરે; સુખાય ચ અદુક્ખમસુખાય ચ વેદનાહિ સમ્પયુત્તા સઞ્ઞા દુક્ખાય વેદનાય સમ્પયુત્તાય સઞ્ઞાય દૂરે; સુખાય વેદનાય સમ્પયુત્તા સઞ્ઞા દુક્ખાય ચ અદુક્ખમસુખાય ચ વેદનાહિ સમ્પયુત્તાહિ સઞ્ઞાહિ દૂરે; દુક્ખાય ચ અદુક્ખમસુખાય ચ વેદનાહિ સમ્પયુત્તા સઞ્ઞા સુખાય વેદનાય સમ્પયુત્તાય સઞ્ઞાય દૂરે; અદુક્ખમસુખાય વેદનાય સમ્પયુત્તા સઞ્ઞા સુખદુક્ખાહિ વેદનાહિ સમ્પયુત્તાહિ સઞ્ઞાહિ દૂરે; સુખદુક્ખાહિ વેદનાહિ સમ્પયુત્તા સઞ્ઞા અદુક્ખમસુખાય વેદનાય સમ્પયુત્તાય સઞ્ઞાય દૂરે. અસમાપન્નસ્સ સઞ્ઞા સમાપન્નસ્સ સઞ્ઞાય દૂરે; સમાપન્નસ્સ સઞ્ઞા અસમાપન્નસ્સ સઞ્ઞાય દૂરે. સાસવા સઞ્ઞા અનાસવાય સઞ્ઞાય દૂરે; અનાસવા સઞ્ઞા સાસવાય સઞ્ઞાય દૂરે – અયં વુચ્ચતિ સઞ્ઞા દૂરે.

તત્થ કતમા સઞ્ઞા સન્તિકે? અકુસલા સઞ્ઞા અકુસલાય સઞ્ઞાય સન્તિકે; કુસલા સઞ્ઞા કુસલાય સઞ્ઞાય સન્તિકે; અબ્યાકતા સઞ્ઞા અબ્યાકતાય સઞ્ઞાય સન્તિકે. દુક્ખાય વેદનાય સમ્પયુત્તા સઞ્ઞા દુક્ખાય વેદનાય સમ્પયુત્તાય સઞ્ઞાય સન્તિકે; સુખાય વેદનાય સમ્પયુત્તા સઞ્ઞા સુખાય વેદનાય સમ્પયુત્તાય સઞ્ઞાય સન્તિકે; અદુક્ખમસુખાય વેદનાય સમ્પયુત્તા સઞ્ઞા અદુક્ખમસુખાય વેદનાય સમ્પયુત્તાય સઞ્ઞાય સન્તિકે. અસમાપન્નસ્સ સઞ્ઞા અસમાપન્નસ્સ સઞ્ઞાય સન્તિકે; સમાપન્નસ્સ સઞ્ઞા સમાપન્નસ્સ સઞ્ઞાય સન્તિકે. સાસવા સઞ્ઞા સાસવાય સઞ્ઞાય સન્તિકે; અનાસવા સઞ્ઞા અનાસવાય સઞ્ઞાય સન્તિકે. અયં વુચ્ચતિ સઞ્ઞા સન્તિકે. તં તં વા પન સઞ્ઞં ઉપાદાયુપાદાય સઞ્ઞા દૂરે સન્તિકે દટ્ઠબ્બા.

૪. સઙ્ખારક્ખન્ધો

૨૦. તત્થ કતમો સઙ્ખારક્ખન્ધો? યે કેચિ સઙ્ખારા અતીતાનાગતપચ્ચુપ્પન્ના અજ્ઝત્તા વા બહિદ્ધા વા ઓળારિકા વા સુખુમા વા હીના વા પણીતા વા યે દૂરે સન્તિકે વા, તદેકજ્ઝં અભિસઞ્ઞૂહિત્વા અભિસઙ્ખિપિત્વા – અયં વુચ્ચતિ સઙ્ખારક્ખન્ધો.

૨૧. તત્થ કતમે સઙ્ખારા અતીતા? યે સઙ્ખારા અતીતા નિરુદ્ધા વિગતા વિપરિણતા અત્થઙ્ગતા અબ્ભત્થઙ્ગતા ઉપ્પજ્જિત્વા વિગતા અતીતા અતીતંસેન સઙ્ગહિતા, ચક્ખુસમ્ફસ્સજા ચેતના સોતસમ્ફસ્સજા ચેતના ઘાનસમ્ફસ્સજા ચેતના જિવ્હાસમ્ફસ્સજા ચેતના કાયસમ્ફસ્સજા ચેતના મનોસમ્ફસ્સજા ચેતના – ઇમે વુચ્ચન્તિ સઙ્ખારા અતીતા.

તત્થ કતમે સઙ્ખારા અનાગતા? યે સઙ્ખારા અજાતા અભૂતા અસઞ્જાતા અનિબ્બત્તા અનભિનિબ્બત્તા અપાતુભૂતા અનુપ્પન્ના અસમુપ્પન્ના અનુટ્ઠિતા અસમુટ્ઠિતા અનાગતા અનાગતંસેન સઙ્ગહિતા, ચક્ખુસમ્ફસ્સજા ચેતના સોતસમ્ફસ્સજા ચેતના ઘાનસમ્ફસ્સજા ચેતના જિવ્હાસમ્ફસ્સજા ચેતના કાયસમ્ફસ્સજા ચેતના મનોસમ્ફસ્સજા ચેતના – ઇમે વુચ્ચન્તિ સઙ્ખારા અનાગતા.

તત્થ કતમે સઙ્ખારા પચ્ચુપ્પન્ના? યે સઙ્ખારા જાતા ભૂતા સઞ્જાતા નિબ્બત્તા અભિનિબ્બત્તા પાતુભૂતા ઉપ્પન્ના સમુપ્પન્ના ઉટ્ઠિતા સમુટ્ઠિતા પચ્ચુપ્પન્ના પચ્ચુપ્પન્નંસેન સઙ્ગહિતા, ચક્ખુસમ્ફસ્સજા ચેતના સોતસમ્ફસ્સજા ચેતના ઘાનસમ્ફસ્સજા ચેતના જિવ્હાસમ્ફસ્સજા ચેતના કાયસમ્ફસ્સજા ચેતના મનોસમ્ફસ્સજા ચેતના – ઇમે વુચ્ચન્તિ સઙ્ખારા પચ્ચુપ્પન્ના.

૨૨. તત્થ કતમે સઙ્ખારા અજ્ઝત્તા? યે સઙ્ખારા તેસં તેસં સત્તાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, ચક્ખુસમ્ફસ્સજા ચેતના સોતસમ્ફસ્સજા ચેતના ઘાનસમ્ફસ્સજા ચેતના જિવ્હાસમ્ફસ્સજા ચેતના કાયસમ્ફસ્સજા ચેતના મનોસમ્ફસ્સજા ચેતના – ઇમે વુચ્ચન્તિ સઙ્ખારા અજ્ઝત્તા.

તત્થ કતમે સઙ્ખારા બહિદ્ધા? યે સઙ્ખારા તેસં તેસં પરસત્તાનં પરપુગ્ગલાનં અજ્ઝત્તં પચ્ચત્તં નિયકા પાટિપુગ્ગલિકા ઉપાદિન્ના, ચક્ખુસમ્ફસ્સજા ચેતના સોતસમ્ફસ્સજા ચેતના ઘાનસમ્ફસ્સજા ચેતના જિવ્હાસમ્ફસ્સજા ચેતના કાયસમ્ફસ્સજા ચેતના મનોસમ્ફસ્સજા ચેતના – ઇમે વુચ્ચન્તિ સઙ્ખારા બહિદ્ધા.

૨૩. તત્થ કતમે સઙ્ખારા ઓળારિકા સુખુમા? અકુસલા સઙ્ખારા ઓળારિકા, કુસલાબ્યાકતા સઙ્ખારા સુખુમા. કુસલાકુસલા સઙ્ખારા ઓળારિકા, અબ્યાકતા સઙ્ખારા સુખુમા. દુક્ખાય વેદનાય સમ્પયુત્તા સઙ્ખારા ઓળારિકા, સુખાય ચ અદુક્ખમસુખાય ચ વેદનાહિ સમ્પયુત્તા સઙ્ખારા સુખુમા. સુખદુક્ખાહિ વેદનાહિ સમ્પયુત્તા સઙ્ખારા ઓળારિકા, અદુક્ખમસુખાય વેદનાય સમ્પયુત્તા સઙ્ખારા સુખુમા. અસમાપન્નસ્સ સઙ્ખારા ઓળારિકા, સમાપન્નસ્સ સઙ્ખારા સુખુમા. સાસવા સઙ્ખારા ઓળારિકા, અનાસવા સઙ્ખારા સુખુમા. તે તે વા પન સઙ્ખારે ઉપાદાયુપાદાય સઙ્ખારા ઓળારિકા સુખુમા દટ્ઠબ્બા.

૨૪. તત્થ કતમે સઙ્ખારા હીના પણીતા? અકુસલા સઙ્ખારા હીના, કુસલાબ્યાકતા સઙ્ખારા પણીતા. કુસલાકુસલા સઙ્ખારા હીના, અબ્યાકતા સઙ્ખારા પણીતા. દુક્ખાય વેદનાય સમ્પયુત્તા સઙ્ખારા હીના, સુખાય ચ અદુક્ખમસુખાય ચ વેદનાહિ સમ્પયુત્તા સઙ્ખારા પણીતા. સુખદુક્ખાહિ વેદનાહિ સમ્પયુત્તા સઙ્ખારા હીના, અદુક્ખમસુખાય વેદનાય સમ્પયુત્તા સઙ્ખારા પણીતા. અસમાપન્નસ્સ સઙ્ખારા હીના, સમાપન્નસ્સ સઙ્ખારા પણીતા. સાસવા સઙ્ખારા હીના, અનાસવા સઙ્ખારા પણીતા. તે તે વા પન સઙ્ખારે ઉપાદાયુપાદાય સઙ્ખારા હીના પણીતા દટ્ઠબ્બા.

૨૫. તત્થ કતમે સઙ્ખારા દૂરે? અકુસલા સઙ્ખારા કુસલાબ્યાકતેહિ સઙ્ખારેહિ દૂરે; કુસલાબ્યાકતા સઙ્ખારા અકુસલેહિ સઙ્ખારેહિ દૂરે; કુસલા સઙ્ખારા અકુસલાબ્યાકતેહિ સઙ્ખારેહિ દૂરે; અકુસલાબ્યાકતા સઙ્ખારા કુસલેહિ સઙ્ખારેહિ દૂરે; અબ્યાકતા સઙ્ખારા કુસલાકુસલેહિ સઙ્ખારેહિ દૂરે; કુસલાકુસલા સઙ્ખારા અબ્યાકતેહિ સઙ્ખારેહિ દૂરે. દુક્ખાય વેદનાય સમ્પયુત્તા સઙ્ખારા સુખાય ચ અદુક્ખમસુખાય ચ વેદનાહિ સમ્પયુત્તેહિ સઙ્ખારેહિ દૂરે; સુખાય ચ અદુક્ખમસુખાય ચ વેદનાહિ સમ્પયુત્તા સઙ્ખારા દુક્ખાય વેદનાય સમ્પયુત્તેહિ સઙ્ખારેહિ દૂરે; સુખાય વેદનાય સમ્પયુત્તા સઙ્ખારા દુક્ખાય ચ અદુક્ખમસુખાય ચ વેદનાહિ સમ્પયુત્તેહિ સઙ્ખારેહિ દૂરે; દુક્ખાય ચ અદુક્ખમસુખાય ચ વેદનાહિ સમ્પયુત્તા સઙ્ખારા સુખાય વેદનાય સમ્પયુત્તેહિ સઙ્ખારેહિ દૂરે; અદુક્ખમસુખાય વેદનાય સમ્પયુત્તા સઙ્ખારા સુખદુક્ખાહિ વેદનાહિ સમ્પયુત્તેહિ સઙ્ખારેહિ દૂરે; સુખદુક્ખાહિ વેદનાહિ સમ્પયુત્તા સઙ્ખારા અદુક્ખમસુખાય વેદનાય સમ્પયુત્તેહિ સઙ્ખારેહિ દૂરે. અસમાપન્નસ્સ સઙ્ખારા સમાપન્નસ્સ સઙ્ખારેહિ દૂરે; સમાપન્નસ્સ સઙ્ખારા અસમાપન્નસ્સ સઙ્ખારેહિ દૂરે. સાસવા સઙ્ખારા અનાસવેહિ સઙ્ખારેહિ દૂરે; અનાસવા સઙ્ખારા સાસવેહિ સઙ્ખારેહિ દૂરે. ઇમે વુચ્ચન્તિ સઙ્ખારા દૂરે.

તત્થ કતમે સઙ્ખારા સન્તિકે? અકુસલા સઙ્ખારા અકુસલાનં સઙ્ખારાનં સન્તિકે; કુસલા સઙ્ખારા કુસલાનં સઙ્ખારાનં સન્તિકે; અબ્યાકતા સઙ્ખારા અબ્યાકતાનં સઙ્ખારાનં સન્તિકે. દુક્ખાય વેદનાય સમ્પયુત્તા સઙ્ખારા દુક્ખાય વેદનાય સમ્પયુત્તાનં સઙ્ખારાનં સન્તિકે; સુખાય વેદનાય સમ્પયુત્તા સઙ્ખારા સુખાય વેદનાય સમ્પયુત્તાનં સઙ્ખારાનં સન્તિકે; અદુક્ખમસુખાય વેદનાય સમ્પયુત્તા સઙ્ખારા અદુક્ખમસુખાય વેદનાય સમ્પયુત્તાનં સઙ્ખારાનં સન્તિકે. અસમાપન્નસ્સ સઙ્ખારા અસમાપન્નસ્સ સઙ્ખારાનં સન્તિકે; સમાપન્નસ્સ સઙ્ખારા સમાપન્નસ્સ સઙ્ખારાનં સન્તિકે. સાસવા સઙ્ખારા સાસવાનં સઙ્ખારાનં સન્તિકે; અનાસવા સઙ્ખારા અનાસવાનં સઙ્ખારાનં સન્તિકે. ઇમે વુચ્ચન્તિ સઙ્ખારા સન્તિકે. તે તે વા પન સઙ્ખારે ઉપાદાયુપાદાય સઙ્ખારા દૂરે સન્તિકે દટ્ઠબ્બા.

૫. વિઞ્ઞાણક્ખન્ધો

૨૬. તત્થ કતમો વિઞ્ઞાણક્ખન્ધો? યં કિઞ્ચિ વિઞ્ઞાણં અતીતાનાગતપચ્ચુપ્પન્નં અજ્ઝત્તં વા બહિદ્ધા વા ઓળારિકં વા સુખુમં વા હીનં વા પણીતં વા યં દૂરે સન્તિકે વા, તદેકજ્ઝં અભિસઞ્ઞૂહિત્વા અભિસઙ્ખિપિત્વા – અયં વુચ્ચતિ વિઞ્ઞાણક્ખન્ધો.

૨૭. તત્થ કતમં વિઞ્ઞાણં અતીતં? યં વિઞ્ઞાણં અતીતં નિરુદ્ધં વિગતં વિપરિણતં અત્થઙ્ગતં અબ્ભત્થઙ્ગતં ઉપ્પજ્જિત્વા વિગતં અતીતં અતીતંસેન સઙ્ગહિતં, ચક્ખુવિઞ્ઞાણં સોતવિઞ્ઞાણં ઘાનવિઞ્ઞાણં જિવ્હાવિઞ્ઞાણં કાયવિઞ્ઞાણં મનોવિઞ્ઞાણં – ઇદં વુચ્ચતિ વિઞ્ઞાણં અતીતં.

તત્થ કતમં વિઞ્ઞાણં અનાગતં? યં વિઞ્ઞાણં અજાતં અભૂતં અસઞ્જાતં અનિબ્બત્તં અનભિનિબ્બત્તં અપાતુભૂતં અનુપ્પન્નં અસમુપ્પન્નં અનુટ્ઠિતં અસમુટ્ઠિતં અનાગતં અનાગતંસેન સઙ્ગહિતં, ચક્ખુવિઞ્ઞાણં સોતવિઞ્ઞાણં ઘાનવિઞ્ઞાણં જિવ્હાવિઞ્ઞાણં કાયવિઞ્ઞાણં મનોવિઞ્ઞાણં – ઇદં વુચ્ચતિ વિઞ્ઞાણં અનાગતં.

તત્થ કતમં વિઞ્ઞાણં પચ્ચુપ્પન્નં? યં વિઞ્ઞાણં જાતં ભૂતં સઞ્જાતં નિબ્બત્તં અભિનિબ્બત્તં પાતુભૂતં ઉપ્પન્નં સમુપ્પન્નં ઉટ્ઠિતં સમુટ્ઠિતં પચ્ચુપ્પન્નં પચ્ચુપ્પન્નંસેન સઙ્ગહિતં, ચક્ખુવિઞ્ઞાણં સોતવિઞ્ઞાણં ઘાનવિઞ્ઞાણં જિવ્હાવિઞ્ઞાણં કાયવિઞ્ઞાણં મનોવિઞ્ઞાણં – ઇદં વુચ્ચતિ વિઞ્ઞાણં પચ્ચુપ્પન્નં.

૨૮. તત્થ કતમં વિઞ્ઞાણં અજ્ઝત્તં? યં વિઞ્ઞાણં તેસં તેસં સત્તાનં અજ્ઝત્તં પચ્ચત્તં નિયકં પાટિપુગ્ગલિકં ઉપાદિન્નં, ચક્ખુવિઞ્ઞાણં સોતવિઞ્ઞાણં ઘાનવિઞ્ઞાણં જિવ્હાવિઞ્ઞાણં કાયવિઞ્ઞાણં મનોવિઞ્ઞાણં – ઇદં વુચ્ચતિ વિઞ્ઞાણં અજ્ઝત્તં.

તત્થ કતમં વિઞ્ઞાણં બહિદ્ધા? યં વિઞ્ઞાણં તેસં તેસં પરસત્તાનં પરપુગ્ગલાનં અજ્ઝત્તં પચ્ચત્તં નિયકં પાટિપુગ્ગલિકં ઉપાદિન્નં, ચક્ખુવિઞ્ઞાણં સોતવિઞ્ઞાણં ઘાનવિઞ્ઞાણં જિવ્હાવિઞ્ઞાણં કાયવિઞ્ઞાણં મનોવિઞ્ઞાણં – ઇદં વુચ્ચતિ વિઞ્ઞાણં બહિદ્ધા.

૨૯. તત્થ કતમં વિઞ્ઞાણં ઓળારિકં સુખુમં? અકુસલં વિઞ્ઞાણં ઓળારિકં, કુસલાબ્યાકતા વિઞ્ઞાણા સુખુમા. કુસલાકુસલા વિઞ્ઞાણા ઓળારિકા, અબ્યાકતં વિઞ્ઞાણં સુખુમં. દુક્ખાય વેદનાય સમ્પયુત્તં વિઞ્ઞાણં ઓળારિકં, સુખાય ચ અદુક્ખમસુખાય ચ વેદનાહિ સમ્પયુત્તા વિઞ્ઞાણા સુખુમા. સુખદુક્ખાહિ વેદનાહિ સમ્પયુત્તા વિઞ્ઞાણા ઓળારિકા, અદુક્ખમસુખાય વેદનાય સમ્પયુત્તં વિઞ્ઞાણં સુખુમં. અસમાપન્નસ્સ વિઞ્ઞાણં ઓળારિકં, સમાપન્નસ્સ વિઞ્ઞાણં સુખુમં. સાસવં વિઞ્ઞાણં ઓળારિકં, અનાસવં વિઞ્ઞાણં સુખુમં. તં તં વા પન વિઞ્ઞાણં ઉપાદાયુપાદાય વિઞ્ઞાણં ઓળારિકં સુખુમં દટ્ઠબ્બં.

૩૦. તત્થ કતમં વિઞ્ઞાણં હીનં પણીતં? અકુસલં વિઞ્ઞાણં હીનં, કુસલાબ્યાકતા વિઞ્ઞાણા પણીતા. કુસલાકુસલા વિઞ્ઞાણા હીના, અબ્યાકતં વિઞ્ઞાણં પણીતં. દુક્ખાય વેદનાય સમ્પયુત્તં વિઞ્ઞાણં હીનં, સુખાય ચ અદુક્ખમસુખાય ચ વેદનાહિ સમ્પયુત્તા વિઞ્ઞાણા પણીતા. સુખદુક્ખાહિ વેદનાહિ સમ્પયુત્તા વિઞ્ઞાણા હીના, અદુક્ખમસુખાય વેદનાય સમ્પયુત્તં વિઞ્ઞાણં પણીતં. અસમાપન્નસ્સ વિઞ્ઞાણં હીનં, સમાપન્નસ્સ વિઞ્ઞાણં પણીતં. સાસવં વિઞ્ઞાણં હીનં, અનાસવં વિઞ્ઞાણં પણીતં. તં તં વા પન વિઞ્ઞાણં ઉપાદાયુપાદાય વિઞ્ઞાણં હીનં પણીતં દટ્ઠબ્બં.

૩૧. તત્થ કતમં વિઞ્ઞાણં દૂરે? અકુસલં વિઞ્ઞાણં કુસલાબ્યાકતેહિ વિઞ્ઞાણેહિ દૂરે; કુસલાબ્યાકતા વિઞ્ઞાણા અકુસલા વિઞ્ઞાણા દૂરે; કુસલં વિઞ્ઞાણં અકુસલાબ્યાકતેહિ વિઞ્ઞાણેહિ દૂરે; અકુસલાબ્યાકતા વિઞ્ઞાણા કુસલા વિઞ્ઞાણા દૂરે; અબ્યાકતં વિઞ્ઞાણં કુસલાકુસલેહિ વિઞ્ઞાણેહિ દૂરે; કુસલાકુસલા વિઞ્ઞાણા અબ્યાકતા વિઞ્ઞાણા દૂરે. દુક્ખાય વેદનાય સમ્પયુત્તં વિઞ્ઞાણં સુખાય ચ અદુક્ખમસુખાય ચ વેદનાહિ સમ્પયુત્તેહિ વિઞ્ઞાણેહિ દૂરે; સુખાય ચ અદુક્ખમસુખાય ચ વેદનાહિ સમ્પયુત્તા વિઞ્ઞાણા દુક્ખાય વેદનાય સમ્પયુત્તા વિઞ્ઞાણા દૂરે; સુખાય વેદનાય સમ્પયુત્તં વિઞ્ઞાણં દુક્ખાય ચ અદુક્ખમસુખાય ચ વેદનાહિ સમ્પયુત્તેહિ વિઞ્ઞાણેહિ દૂરે; દુક્ખાય ચ અદુક્ખમસુખાય ચ વેદનાહિ સમ્પયુત્તા વિઞ્ઞાણા સુખાય વેદનાય સમ્પયુત્તા વિઞ્ઞાણા દૂરે; અદુક્ખમસુખાય વેદનાય સમ્પયુત્તં વિઞ્ઞાણં સુખદુક્ખાહિ વેદનાહિ સમ્પયુત્તેહિ વિઞ્ઞાણેહિ દૂરે; સુખદુક્ખાહિ વેદનાહિ સમ્પયુત્તા વિઞ્ઞાણા અદુક્ખમસુખાય વેદનાય સમ્પયુત્તા વિઞ્ઞાણા દૂરે. અસમાપન્નસ્સ વિઞ્ઞાણં સમાપન્નસ્સ વિઞ્ઞાણા દૂરે; સમાપન્નસ્સ વિઞ્ઞાણં અસમાપન્નસ્સ વિઞ્ઞાણા દૂરે. સાસવં વિઞ્ઞાણં અનાસવા વિઞ્ઞાણા દૂરે; અનાસવં વિઞ્ઞાણં સાસવા વિઞ્ઞાણા દૂરે – ઇદં વુચ્ચતિ વિઞ્ઞાણં દૂરે.

તત્થ કતમં વિઞ્ઞાણં સન્તિકે? અકુસલં વિઞ્ઞાણં અકુસલસ્સ વિઞ્ઞાણસ્સ સન્તિકે; કુસલં વિઞ્ઞાણં કુસલસ્સ વિઞ્ઞાણસ્સ સન્તિકે; અબ્યાકતં વિઞ્ઞાણં અબ્યાકતસ્સ વિઞ્ઞાણસ્સ સન્તિકે. દુક્ખાય વેદનાય સમ્પયુત્તં વિઞ્ઞાણં દુક્ખાય વેદનાય સમ્પયુત્તસ્સ વિઞ્ઞાણસ્સ સન્તિકે; સુખાય વેદનાય સમ્પયુત્તં વિઞ્ઞાણં સુખાય વેદનાય સમ્પયુત્તસ્સ વિઞ્ઞાણસ્સ સન્તિકે; અદુક્ખમસુખાય વેદનાય સમ્પયુત્તં વિઞ્ઞાણં અદુક્ખમસુખાય વેદનાય સમ્પયુત્તસ્સ વિઞ્ઞાણસ્સ સન્તિકે. અસમાપન્નસ્સ વિઞ્ઞાણં અસમાપન્નસ્સ વિઞ્ઞાણસ્સ સન્તિકે; સમાપન્નસ્સ વિઞ્ઞાણં સમાપન્નસ્સ વિઞ્ઞાણસ્સ સન્તિકે. સાસવં વિઞ્ઞાણં સાસવસ્સ વિઞ્ઞાણસ્સ સન્તિકે; અનાસવં વિઞ્ઞાણં અનાસવસ્સ વિઞ્ઞાણસ્સ સન્તિકે – ઇદં વુચ્ચતિ વિઞ્ઞાણં સન્તિકે. તં તં વા પન વિઞ્ઞાણં ઉપાદાયુપાદાય વિઞ્ઞાણં દૂરે સન્તિકે દટ્ઠબ્બં.

સુત્તન્તભાજનીયં.

૨. અભિધમ્મભાજનીયં

૩૨. પઞ્ચક્ખન્ધા – રૂપક્ખન્ધો, વેદનાક્ખન્ધો, સઞ્ઞાક્ખન્ધો, સઙ્ખારક્ખન્ધો, વિઞ્ઞાણક્ખન્ધો.

૧. રૂપક્ખન્ધો

૩૩. તત્થ કતમો રૂપક્ખન્ધો? એકવિધેન રૂપક્ખન્ધો – સબ્બં રૂપં ન હેતુ, અહેતુકં, હેતુવિપ્પયુત્તં, સપ્પચ્ચયં, સઙ્ખતં, રૂપં, લોકિયં, સાસવં, સંયોજનિયં, ગન્થનિયં, ઓઘનિયં, યોગનિયં, નીવરણિયં, પરામટ્ઠં, ઉપાદાનિયં, સંકિલેસિકં, અબ્યાકતં, અનારમ્મણં, અચેતસિકં, ચિત્તવિપ્પયુત્તં, નેવવિપાકનવિપાકધમ્મધમ્મં, અસંકિલિટ્ઠસંકિલેસિકં, ન સવિતક્કસવિચારં, ન અવિતક્કવિચારમત્તં, અવિતક્કઅવિચારં, ન પીતિસહગતં, ન સુખસહગતં, ન ઉપેક્ખાસહગતં, નેવ દસ્સનેન ન ભાવનાય પહાતબ્બં, નેવ દસ્સનેન ન ભાવનાય પહાતબ્બહેતુકં, નેવાચયગામિનાપચયગામી, નેવસેક્ખનાસેક્ખં, પરિત્તં, કામાવચરં, ન રૂપાવચરં, ન અરૂપાવચરં, પરિયાપન્નં, નો અપરિયાપન્નં, અનિયતં, અનિય્યાનિકં, ઉપ્પન્નં, છહિ વિઞ્ઞાણેહિ વિઞ્ઞેય્યં, અનિચ્ચં, જરાભિભૂતં. એવં એકવિધેન રૂપક્ખન્ધો.

દુવિધેન રૂપક્ખન્ધો – અત્થિ રૂપં ઉપાદા, અત્થિ રૂપં નો ઉપાદા [નુપાદા (સી. ક.)]. અત્થિ રૂપં ઉપાદિન્નં, અત્થિ રૂપં અનુપાદિન્નં. અત્થિ રૂપં ઉપાદિન્નુપાદાનિયં, અત્થિ રૂપં અનુપાદિન્નુપાદાનિયં. અત્થિ રૂપં સનિદસ્સનં, અત્થિ રૂપં અનિદસ્સનં. અત્થિ રૂપં સપ્પટિઘં, અત્થિ રૂપં અપ્પટિઘં. અત્થિ રૂપં ઇન્દ્રિયં, અત્થિ રૂપં ન ઇન્દ્રિયં. અત્થિ રૂપં મહાભૂતં, અત્થિ રૂપં ન મહાભૂતં. અત્થિ રૂપં વિઞ્ઞત્તિ, અત્થિ રૂપં ન વિઞ્ઞત્તિ. અત્થિ રૂપં ચિત્તસમુટ્ઠાનં, અત્થિ રૂપં ન ચિત્તસમુટ્ઠાનં. અત્થિ રૂપં ચિત્તસહભુ, અત્થિ રૂપં ન ચિત્તસહભુ. અત્થિ રૂપં ચિત્તાનુપરિવત્તિ, અત્થિ રૂપં ન ચિત્તાનુપરિવત્તિ. અત્થિ રૂપં અજ્ઝત્તિકં, અત્થિ રૂપં બાહિરં. અત્થિ રૂપં ઓળારિકં, અત્થિ રૂપં સુખુમં. અત્થિ રૂપં દૂરે, અત્થિ રૂપં સન્તિકે…પે… અત્થિ રૂપં કબળીકારો આહારો, અત્થિ રૂપં ન કબળીકારો આહારો. એવં દુવિધેન રૂપક્ખન્ધો.

(યથા રૂપકણ્ડે વિભત્તં, તથા ઇધ વિભજિતબ્બં.)

તિવિધેન રૂપક્ખન્ધો – યં તં રૂપં અજ્ઝત્તિકં તં ઉપાદા, યં તં રૂપં બાહિરં તં અત્થિ ઉપાદા, અત્થિ નો ઉપાદા. યં તં રૂપં અજ્ઝત્તિકં તં ઉપાદિન્નં, યં તં રૂપં બાહિરં તં અત્થિ ઉપાદિન્નં, અત્થિ અનુપાદિન્નં. યં તં રૂપં અજ્ઝત્તિકં તં ઉપાદિન્નુપાદાનિયં, યં તં રૂપં બાહિરં તં અત્થિ ઉપાદિન્નુપાદાનિયં, અત્થિ અનુપાદિન્નુપાદાનિયં…પે… યં તં રૂપં અજ્ઝત્તિકં તં ન કબળીકારો આહારો, યં તં રૂપં બાહિરં તં અત્થિ કબળીકારો આહારો, અત્થિ ન કબળીકારો આહારો. એવં તિવિધેન રૂપક્ખન્ધો.

ચતુબ્બિધેન રૂપક્ખન્ધો – યં તં રૂપં ઉપાદા તં અત્થિ ઉપાદિન્નં, અત્થિ અનુપાદિન્નં; યં તં રૂપં નો ઉપાદા તં અત્થિ ઉપાદિન્નં, અત્થિ અનુપાદિન્નં. યં તં રૂપં ઉપાદા તં અત્થિ ઉપાદિન્નુપાદાનિયં, અત્થિ અનુપાદિન્નુપાદાનિયં; યં તં રૂપં નો ઉપાદા તં અત્થિ ઉપાદિન્નુપાદાનિયં, અત્થિ અનુપાદિન્નુપાદાનિયં. યં તં રૂપં ઉપાદા તં અત્થિ સપ્પટિઘં, અત્થિ અપ્પટિઘં; યં તં રૂપં નો ઉપાદા તં અત્થિ સપ્પટિઘં, અત્થિ અપ્પટિઘં. યં તં રૂપં ઉપાદા તં અત્થિ ઓળારિકં, અત્થિ સુખુમં; યં તં રૂપં નો ઉપાદા તં અત્થિ ઓળારિકં, અત્થિ સુખુમં. યં તં રૂપં ઉપાદા તં અત્થિ દૂરે, અત્થિ સન્તિકે; યં તં રૂપં નો ઉપાદા તં અત્થિ દૂરે, અત્થિ સન્તિકે…પે… દિટ્ઠં, સુતં, મુતં, વિઞ્ઞાતં રૂપં. એવં ચતુબ્બિધેન રૂપક્ખન્ધો.

પઞ્ચવિધેન રૂપક્ખન્ધો – પથવીધાતુ, આપોધાતુ, તેજોધાતુ, વાયોધાતુ, યઞ્ચ રૂપં ઉપાદા. એવં પઞ્ચવિધેન રૂપક્ખન્ધો.

છબ્બિધેન રૂપક્ખન્ધો – ચક્ખુવિઞ્ઞેય્યં રૂપં, સોતવિઞ્ઞેય્યં રૂપં, ઘાનવિઞ્ઞેય્યં રૂપં, જિવ્હાવિઞ્ઞેય્યં રૂપં, કાયવિઞ્ઞેય્યં રૂપં, મનોવિઞ્ઞેય્યં રૂપં. એવં છબ્બિધેન રૂપક્ખન્ધો.

સત્તવિધેન રૂપક્ખન્ધો – ચક્ખુવિઞ્ઞેય્યં રૂપં, સોતવિઞ્ઞેય્યં રૂપં, ઘાનવિઞ્ઞેય્યં રૂપં, જિવ્હાવિઞ્ઞેય્યં રૂપં, કાયવિઞ્ઞેય્યં રૂપં, મનોધાતુવિઞ્ઞેય્યં રૂપં, મનોવિઞ્ઞાણધાતુવિઞ્ઞેય્યં રૂપં. એવં સત્તવિધેન રૂપક્ખન્ધો.

અટ્ઠવિધેન રૂપક્ખન્ધો – ચક્ખુવિઞ્ઞેય્યં રૂપં, સોતવિઞ્ઞેય્યં રૂપં, ઘાનવિઞ્ઞેય્યં રૂપં, જિવ્હાવિઞ્ઞેય્યં રૂપં, કાયવિઞ્ઞેય્યં રૂપં અત્થિ સુખસમ્ફસ્સં, અત્થિ દુક્ખસમ્ફસ્સં, મનોધાતુવિઞ્ઞેય્યં રૂપં, મનોવિઞ્ઞાણધાતુવિઞ્ઞેય્યં રૂપં. એવં અટ્ઠવિધેન રૂપક્ખન્ધો.

નવવિધેન રૂપક્ખન્ધો – ચક્ખુન્દ્રિયં, સોતિન્દ્રિયં, ઘાનિન્દ્રિયં, જિવ્હિન્દ્રિયં, કાયિન્દ્રિયં, ઇત્થિન્દ્રિયં, પુરિસિન્દ્રિયં, જીવિતિન્દ્રિયં, યઞ્ચ રૂપં ન ઇન્દ્રિયં. એવં નવવિધેન રૂપક્ખન્ધો.

દસવિધેન રૂપક્ખન્ધો – ચક્ખુન્દ્રિયં, સોતિન્દ્રિયં, ઘાનિન્દ્રિયં, જિવ્હિન્દ્રિયં, કાયિન્દ્રિયં, ઇત્થિન્દ્રિયં, પુરિસિન્દ્રિયં, જીવિતિન્દ્રિયં, ન ઇન્દ્રિયં રૂપં અત્થિ સપ્પટિઘં, અત્થિ અપ્પટિઘં. એવં દસવિધેન રૂપક્ખન્ધો.

એકાદસવિધેન રૂપક્ખન્ધો – ચક્ખાયતનં, સોતાયતનં, ઘાનાયતનં, જિવ્હાયતનં, કાયાયતનં, રૂપાયતનં, સદ્દાયતનં, ગન્ધાયતનં, રસાયતનં, ફોટ્ઠબ્બાયતનં, યઞ્ચ રૂપં અનિદસ્સનઅપ્પટિઘં ધમ્માયતનપરિયાપન્નં. એવં એકાદસવિધેન રૂપક્ખન્ધો.

અયં વુચ્ચતિ રૂપક્ખન્ધો.

૨. વેદનાક્ખન્ધો

૩૪. તત્થ કતમો વેદનાક્ખન્ધો? એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સહેતુકો, અત્થિ અહેતુકો.

તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો.

ચતુબ્બિધેન વેદનાક્ખન્ધો – અત્થિ કામાવચરો, અત્થિ રૂપાવચરો, અત્થિ અરૂપાવચરો, અત્થિ અપરિયાપન્નો.

પઞ્ચવિધેન વેદનાક્ખન્ધો – અત્થિ સુખિન્દ્રિયં, અત્થિ દુક્ખિન્દ્રિયં, અત્થિ સોમનસ્સિન્દ્રિયં, અત્થિ દોમનસ્સિન્દ્રિયં, અત્થિ ઉપેક્ખિન્દ્રિયં. એવં પઞ્ચવિધેન વેદનાક્ખન્ધો.

છબ્બિધેન વેદનાક્ખન્ધો – ચક્ખુસમ્ફસ્સજા વેદના, સોતસમ્ફસ્સજા વેદના, ઘાનસમ્ફસ્સજા વેદના, જિવ્હાસમ્ફસ્સજા વેદના, કાયસમ્ફસ્સજા વેદના, મનોસમ્ફસ્સજા વેદના. એવં છબ્બિધેન વેદનાક્ખન્ધો.

સત્તવિધેન વેદનાક્ખન્ધો – ચક્ખુસમ્ફસ્સજા વેદના, સોતસમ્ફસ્સજા વેદના, ઘાનસમ્ફસ્સજા વેદના, જિવ્હાસમ્ફસ્સજા વેદના, કાયસમ્ફસ્સજા વેદના, મનોધાતુસમ્ફસ્સજા વેદના, મનોવિઞ્ઞાણધાતુસમ્ફસ્સજા વેદના. એવં સત્તવિધેન વેદનાક્ખન્ધો.

અટ્ઠવિધેન વેદનાક્ખન્ધો – ચક્ખુસમ્ફસ્સજા વેદના, સોતસમ્ફસ્સજા વેદના, ઘાનસમ્ફસ્સજા વેદના, જિવ્હાસમ્ફસ્સજા વેદના, કાયસમ્ફસ્સજા વેદના અત્થિ સુખા, અત્થિ દુક્ખા, મનોધાતુસમ્ફસ્સજા વેદના, મનોવિઞ્ઞાણધાતુસમ્ફસ્સજા વેદના. એવં અટ્ઠવિધેન વેદનાક્ખન્ધો.

નવવિધેન વેદનાક્ખન્ધો – ચક્ખુસમ્ફસ્સજા વેદના, સોતસમ્ફસ્સજા વેદના, ઘાનસમ્ફસ્સજા વેદના, જિવ્હાસમ્ફસ્સજા વેદના, કાયસમ્ફસ્સજા વેદના, મનોધાતુસમ્ફસ્સજા વેદના, મનોવિઞ્ઞાણધાતુસમ્ફસ્સજા વેદના અત્થિ કુસલા, અત્થિ અકુસલા, અત્થિ અબ્યાકતા. એવં નવવિધેન વેદનાક્ખન્ધો.

દસવિધેન વેદનાક્ખન્ધો – ચક્ખુસમ્ફસ્સજા વેદના, સોતસમ્ફસ્સજા વેદના, ઘાનસમ્ફસ્સજા વેદના, જિવ્હાસમ્ફસ્સજા વેદના, કાયસમ્ફસ્સજા વેદના અત્થિ સુખા, અત્થિ દુક્ખા, મનોધાતુસમ્ફસ્સજા વેદના, મનોવિઞ્ઞાણધાતુસમ્ફસ્સજા વેદના અત્થિ કુસલા, અત્થિ અકુસલા, અત્થિ અબ્યાકતા. એવં દસવિધેન વેદનાક્ખન્ધો.

૩૫. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સહેતુકો, અત્થિ અહેતુકો.

તિવિધેન વેદનાક્ખન્ધો – અત્થિ વિપાકો, અત્થિ વિપાકધમ્મધમ્મો, અત્થિ નેવવિપાકનવિપાકધમ્મધમ્મો. અત્થિ ઉપાદિન્નુપાદાનિયો, અત્થિ અનુપાદિન્નુપાદાનિયો, અત્થિ અનુપાદિન્નઅનુપાદાનિયો. અત્થિ સંકિલિટ્ઠસંકિલેસિકો, અત્થિ અસંકિલિટ્ઠસંકિલેસિકો, અત્થિ અસંકિલિટ્ઠઅસંકિલેસિકો. અત્થિ સવિતક્કસવિચારો, અત્થિ અવિતક્કવિચારમત્તો, અત્થિ અવિતક્કઅવિચારો. અત્થિ દસ્સનેન પહાતબ્બો, અત્થિ ભાવનાય પહાતબ્બો, અત્થિ નેવ દસ્સનેન ન ભાવનાય પહાતબ્બો. અત્થિ દસ્સનેન પહાતબ્બહેતુકો, અત્થિ ભાવનાય પહાતબ્બહેતુકો, અત્થિ નેવ દસ્સનેન ન ભાવનાય પહાતબ્બહેતુકો. અત્થિ આચયગામી, અત્થિ અપચયગામી, અત્થિ નેવાચયગામિનાપચયગામી. અત્થિ સેક્ખો, અત્થિ અસેક્ખો, અત્થિ નેવસેક્ખનાસેક્ખો. અત્થિ પરિત્તો, અત્થિ મહગ્ગતો, અત્થિ અપ્પમાણો. અત્થિ પરિત્તારમ્મણો, અત્થિ મહગ્ગતારમ્મણો, અત્થિ અપ્પમાણારમ્મણો. અત્થિ હીનો, અત્થિ મજ્ઝિમો, અત્થિ પણીતો. અત્થિ મિચ્છત્તનિયતો, અત્થિ સમ્મત્તનિયતો, અત્થિ અનિયતો. અત્થિ મગ્ગારમ્મણો, અત્થિ મગ્ગહેતુકો, અત્થિ મગ્ગાધિપતિ. અત્થિ ઉપ્પન્નો, અત્થિ અનુપ્પન્નો, અત્થિ ઉપ્પાદી. અત્થિ અતીતો, અત્થિ અનાગતો, અત્થિ પચ્ચુપ્પન્નો. અત્થિ અતીતારમ્મણો, અત્થિ અનાગતારમ્મણો, અત્થિ પચ્ચુપ્પન્નારમ્મણો. અત્થિ અજ્ઝત્તો, અત્થિ બહિદ્ધો, અત્થિ અજ્ઝત્તબહિદ્ધો. અત્થિ અજ્ઝત્તારમ્મણો, અત્થિ બહિદ્ધારમ્મણો, અત્થિ અજ્ઝત્તબહિદ્ધારમ્મણો…પે…. એવં દસવિધેન વેદનાક્ખન્ધો.

૩૬. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ હેતુસમ્પયુત્તો, અત્થિ હેતુવિપ્પયુત્તો…પે… અત્થિ ન હેતુસહેતુકો, અત્થિ ન હેતુઅહેતુકો. અત્થિ લોકિયો, અત્થિ લોકુત્તરો. અત્થિ કેનચિ વિઞ્ઞેય્યો, અત્થિ કેનચિ ન વિઞ્ઞેય્યો. અત્થિ સાસવો, અત્થિ અનાસવો. અત્થિ આસવસમ્પયુત્તો, અત્થિ આસવવિપ્પયુત્તો. અત્થિ આસવવિપ્પયુત્તસાસવો, અત્થિ આસવવિપ્પયુત્તઅનાસવો. અત્થિ સંયોજનિયો, અત્થિ અસંયોજનિયો. અત્થિ સંયોજનસમ્પયુત્તો, અત્થિ સંયોજનવિપ્પયુત્તો. અત્થિ સંયોજનવિપ્પયુત્તસંયોજનિયો, અત્થિ સંયોજનવિપ્પયુત્તઅસંયોજનિયો. અત્થિ ગન્થનિયો, અત્થિ અગન્થનિયો. અત્થિ ગન્થસમ્પયુત્તો, અત્થિ ગન્થવિપ્પયુત્તો. અત્થિ ગન્થવિપ્પયુત્તગન્થનિયો, અત્થિ ગન્થવિપ્પયુત્તઅગન્થનિયો. અત્થિ ઓઘનિયો, અત્થિ અનોઘનિયો. અત્થિ ઓઘસમ્પયુત્તો, અત્થિ ઓઘવિપ્પયુત્તો. અત્થિ ઓઘવિપ્પયુત્તઓઘનિયો, અત્થિ ઓઘવિપ્પયુત્તઅનોઘનિયો. અત્થિ યોગનિયો, અત્થિ અયોગનિયો. અત્થિ યોગસમ્પયુત્તો, અત્થિ યોગવિપ્પયુત્તો. અત્થિ યોગવિપ્પયુત્તયોગનિયો, અત્થિ યોગવિપ્પયુત્તઅયોગનિયો. અત્થિ નીવરણિયો, અત્થિ અનીવરણિયો. અત્થિ નીવરણસમ્પયુત્તો, અત્થિ નીવરણવિપ્પયુત્તો. અત્થિ નીવરણવિપ્પયુત્તનીવરણિયો, અત્થિ નીવરણવિપ્પયુત્તઅનીવરણિયો. અત્થિ પરામટ્ઠો, અત્થિ અપરામટ્ઠો. અત્થિ પરામાસસમ્પયુત્તો, અત્થિ પરામાસવિપ્પયુત્તો. અત્થિ પરામાસવિપ્પયુત્તપરામટ્ઠો, અત્થિ પરામાસવિપ્પયુત્તઅપરામટ્ઠો. અત્થિ ઉપાદિન્નો, અત્થિ અનુપાદિન્નો. અત્થિ ઉપાદાનિયો, અત્થિ અનુપાદાનિયો. અત્થિ ઉપાદાનસમ્પયુત્તો, અત્થિ ઉપાદાનવિપ્પયુત્તો. અત્થિ ઉપાદાનવિપ્પયુત્તઉપાદાનિયો, અત્થિ ઉપાદાનવિપ્પયુત્તઅનુપાદાનિયો. અત્થિ સંકિલેસિકો, અત્થિ અસંકિલેસિકો. અત્થિ સંકિલિટ્ઠો, અત્થિ અસંકિલિટ્ઠો. અત્થિ કિલેસસમ્પયુત્તો, અત્થિ કિલેસવિપ્પયુત્તો. અત્થિ કિલેસવિપ્પયુત્તસંકિલેસિકો, અત્થિ કિલેસવિપ્પયુત્તઅસંકિલેસિકો. અત્થિ દસ્સનેન પહાતબ્બો, અત્થિ ન દસ્સનેન પહાતબ્બો. અત્થિ ભાવનાય પહાતબ્બો, અત્થિ ન ભાવનાય પહાતબ્બો. અત્થિ દસ્સનેન પહાતબ્બહેતુકો, અત્થિ ન દસ્સનેન પહાતબ્બહેતુકો. અત્થિ ભાવનાય પહાતબ્બહેતુકો, અત્થિ ન ભાવનાય પહાતબ્બહેતુકો. અત્થિ સવિતક્કો, અત્થિ અવિતક્કો. અત્થિ સવિચારો, અત્થિ અવિચારો. અત્થિ સપ્પીતિકો, અત્થિ અપ્પીતિકો. અત્થિ પીતિસહગતો, અત્થિ ન પીતિસહગતો. અત્થિ કામાવચરો, અત્થિ ન કામાવચરો. અત્થિ રૂપાવચરો, અત્થિ ન રૂપાવચરો. અત્થિ અરૂપાવચરો, અત્થિ ન અરૂપાવચરો. અત્થિ પરિયાપન્નો, અત્થિ અપરિયાપન્નો. અત્થિ નિય્યાનિકો, અત્થિ અનિય્યાનિકો. અત્થિ નિયતો, અત્થિ અનિયતો. અત્થિ સઉત્તરો, અત્થિ અનુત્તરો. અત્થિ સરણો, અત્થિ અરણો.

તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે…. એવં દસવિધેન વેદનાક્ખન્ધો.

૩૭. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સરણો, અત્થિ અરણો.

તિવિધેન વેદનાક્ખન્ધો – અત્થિ વિપાકો, અત્થિ વિપાકધમ્મધમ્મો, અત્થિ નેવવિપાકનવિપાકધમ્મધમ્મો. અત્થિ ઉપાદિન્નુપાદાનિયો…પે… અત્થિ અજ્ઝત્તારમ્મણો, અત્થિ બહિદ્ધારમ્મણો, અત્થિ અજ્ઝત્તબહિદ્ધારમ્મણો…પે…. એવં દસવિધેન વેદનાક્ખન્ધો.

દુકમૂલકં.

૩૮. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સહેતુકો, અત્થિ અહેતુકો.

તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે…. એવં દસવિધેન વેદનાક્ખન્ધો.

૩૯. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ હેતુસમ્પયુત્તો, અત્થિ હેતુવિપ્પયુત્તો.

તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે…. એવં દસવિધેન વેદનાક્ખન્ધો.

૪૦. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ ન હેતુસહેતુકો, અત્થિ ન હેતુઅહેતુકો. અત્થિ લોકિયો, અત્થિ લોકુત્તરો. અત્થિ કેનચિ વિઞ્ઞેય્યો, અત્થિ કેનચિ ન વિઞ્ઞેય્યો. અત્થિ સાસવો, અત્થિ અનાસવો. અત્થિ આસવસમ્પયુત્તો, અત્થિ આસવવિપ્પયુત્તો. અત્થિ આસવવિપ્પયુત્તસાસવો, અત્થિ આસવવિપ્પયુત્તઅનાસવો…પે… અત્થિ સરણો, અત્થિ અરણો.

તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે…. એવં દસવિધેન વેદનાક્ખન્ધો.

૪૧. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સહેતુકો, અત્થિ અહેતુકો.

તિવિધેન વેદનાક્ખન્ધો – અત્થિ વિપાકો, અત્થિ વિપાકધમ્મધમ્મો, અત્થિ નેવવિપાકનવિપાકધમ્મધમ્મો. અત્થિ ઉપાદિન્નુપાદાનિયો, અત્થિ અનુપાદિન્નુપાદાનિયો, અત્થિ અનુપાદિન્નઅનુપાદાનિયો. અત્થિ સંકિલિટ્ઠસંકિલેસિકો, અત્થિ અસંકિલિટ્ઠસંકિલેસિકો, અત્થિ અસંકિલિટ્ઠઅસંકિલેસિકો. અત્થિ સવિતક્કસવિચારો, અત્થિ અવિતક્કવિચારમત્તો, અત્થિ અવિતક્કઅવિચારો. અત્થિ દસ્સનેન પહાતબ્બો, અત્થિ ભાવનાય પહાતબ્બો, અત્થિ નેવ દસ્સનેન ન ભાવનાય પહાતબ્બો. અત્થિ દસ્સનેન પહાતબ્બહેતુકો, અત્થિ ભાવનાય પહાતબ્બહેતુકો, અત્થિ નેવ દસ્સનેન ન ભાવનાય પહાતબ્બહેતુકો. અત્થિ આચયગામી, અત્થિ અપચયગામી, અત્થિ નેવાચયગામિનાપચયગામી. અત્થિ સેક્ખો, અત્થિ અસેક્ખો, અત્થિ નેવસેક્ખનાસેક્ખો. અત્થિ પરિત્તો, અત્થિ મહગ્ગતો, અત્થિ અપ્પમાણો. અત્થિ પરિત્તારમ્મણો, અત્થિ મહગ્ગતારમ્મણો, અત્થિ અપ્પમાણારમ્મણો. અત્થિ હીનો, અત્થિ મજ્ઝિમો, અત્થિ પણીતો. અત્થિ મિચ્છત્તનિયતો, અત્થિ સમ્મત્તનિયતો, અત્થિ અનિયતો. અત્થિ મગ્ગારમ્મણો, અત્થિ મગ્ગહેતુકો, અત્થિ મગ્ગાધિપતિ. અત્થિ ઉપ્પન્નો, અત્થિ અનુપ્પન્નો, અત્થિ ઉપ્પાદી. અત્થિ અતીતો, અત્થિ અનાગતો, અત્થિ પચ્ચુપ્પન્નો. અત્થિ અતીતારમ્મણો, અત્થિ અનાગતારમ્મણો, અત્થિ પચ્ચુપ્પન્નારમ્મણો. અત્થિ અજ્ઝત્તો, અત્થિ બહિદ્ધો, અત્થિ અજ્ઝત્તબહિદ્ધો. અત્થિ અજ્ઝત્તારમ્મણો, અત્થિ બહિદ્ધારમ્મણો, અત્થિ અજ્ઝત્તબહિદ્ધારમ્મણો…પે…. એવં દસવિધેન વેદનાક્ખન્ધો.

૪૨. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ હેતુસમ્પયુત્તો, અત્થિ હેતુવિપ્પયુત્તો. અત્થિ ન હેતુસહેતુકો, અત્થિ ન હેતુઅહેતુકો. અત્થિ લોકિયો, અત્થિ લોકુત્તરો. અત્થિ કેનચિ વિઞ્ઞેય્યો, અત્થિ કેનચિ ન વિઞ્ઞેય્યો. અત્થિ સાસવો, અત્થિ અનાસવો. અત્થિ આસવસમ્પયુત્તો, અત્થિ આસવવિપ્પયુત્તો. અત્થિ આસવવિપ્પયુત્તસાસવો, અત્થિ આસવવિપ્પયુત્તઅનાસવો. અત્થિ સંયોજનિયો, અત્થિ અસંયોજનિયો…પે… અત્થિ સરણો, અત્થિ અરણો.

તિવિધેન વેદનાક્ખન્ધો – અત્થિ અજ્ઝત્તારમ્મણો, અત્થિ બહિદ્ધારમ્મણો, અત્થિ અજ્ઝત્તબહિદ્ધારમ્મણો…પે…. એવં દસવિધેન વેદનાક્ખન્ધો.

તિકમૂલકં.

૪૩. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સહેતુકો, અત્થિ અહેતુકો.

તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે…. એવં દસવિધેન વેદનાક્ખન્ધો.

૪૪. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ હેતુસમ્પયુત્તો, અત્થિ હેતુવિપ્પયુત્તો.

તિવિધેન વેદનાક્ખન્ધો – અત્થિ વિપાકો, અત્થિ વિપાકધમ્મધમ્મો, અત્થિ નેવવિપાકનવિપાકધમ્મધમ્મો…પે…. એવં દસવિધેન વેદનાક્ખન્ધો.

૪૫. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ ન હેતુસહેતુકો, અત્થિ ન હેતુઅહેતુકો.

તિવિધેન વેદનાક્ખન્ધો – અત્થિ ઉપાદિન્નુપાદાનિયો, અત્થિ અનુપાદિન્નુપાદાનિયો, અત્થિ અનુપાદિન્નઅનુપાદાનિયો…પે…. એવં દસવિધેન વેદનાક્ખન્ધો.

૪૬. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ લોકિયો, અત્થિ લોકુત્તરો.

તિવિધેન વેદનાક્ખન્ધો – અત્થિ સંકિલિટ્ઠસંકિલેસિકો, અત્થિ અસંકિલિટ્ઠસંકિલેસિકો, અત્થિ અસંકિલિટ્ઠઅસંકિલેસિકો…પે…. એવં દસવિધેન વેદનાક્ખન્ધો.

૪૭. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ કેનચિ વિઞ્ઞેય્યો, અત્થિ કેનચિ ન વિઞ્ઞેય્યો.

તિવિધેન વેદનાક્ખન્ધો – અત્થિ સવિતક્કસવિચારો, અત્થિ અવિતક્કવિચારમત્તો, અત્થિ અવિતક્કઅવિચારો…પે…. એવં દસવિધેન વેદનાક્ખન્ધો.

૪૮. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સાસવો, અત્થિ અનાસવો.

તિવિધેન વેદનાક્ખન્ધો – અત્થિ દસ્સનેન પહાતબ્બો, અત્થિ ભાવનાય પહાતબ્બો, અત્થિ નેવ દસ્સનેન ન ભાવનાય પહાતબ્બો…પે…. એવં દસવિધેન વેદનાક્ખન્ધો.

૪૯. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ આસવસમ્પયુત્તો, અત્થિ આસવવિપ્પયુત્તો.

તિવિધેન વેદનાક્ખન્ધો – અત્થિ દસ્સનેન પહાતબ્બહેતુકો, અત્થિ ભાવનાય પહાતબ્બહેતુકો, અત્થિ નેવ દસ્સનેન ન ભાવનાય પહાતબ્બહેતુકો…પે…. એવં દસવિધેન વેદનાક્ખન્ધો.

૫૦. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ આસવવિપ્પયુત્તસાસવો, અત્થિ આસવવિપ્પયુત્તઅનાસવો.

તિવિધેન વેદનાક્ખન્ધો – અત્થિ આચયગામી, અત્થિ અપચયગામી, અત્થિ નેવાચયગામિનાપચયગામી…પે…. એવં દસવિધેન વેદનાક્ખન્ધો.

૫૧. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સંયોજનિયો, અત્થિ અસંયોજનિયો.

તિવિધેન વેદનાક્ખન્ધો – અત્થિ સેક્ખો, અત્થિ અસેક્ખો, અત્થિ નેવસેક્ખનાસેક્ખો…પે…. એવં દસવિધેન વેદનાક્ખન્ધો.

૫૨. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સંયોજનસમ્પયુત્તો, અત્થિ સંયોજનવિપ્પયુત્તો.

તિવિધેન વેદનાક્ખન્ધો – અત્થિ પરિત્તો, અત્થિ મહગ્ગતો, અત્થિ અપ્પમાણો…પે…. એવં દસવિધેન વેદનાક્ખન્ધો.

૫૩. એકવિધેન વેદનાક્ખન્ધો – ફસ્સસમ્પયુત્તો.

દુવિધેન વેદનાક્ખન્ધો – અત્થિ સંયોજનવિપ્પયુત્તસંયોજનિયો, અત્થિ સંયોજનવિપ્પયુત્તઅસંયોજનિયો.

તિવિધેન વેદનાક્ખન્ધો – અત્થિ પરિત્તારમ્મણો, અત્થિ મહગ્ગતારમ્મણો, અત્થિ અપ્પમાણારમ્મણો…પે…. એવં દસવિધેન વેદનાક્ખન્ધો.