(૩૫. ક) અયોનિસો મનસિકારો

૯૩૬. તત્થ કતમો અયોનિસો મનસિકારો? અનિચ્ચે ‘‘નિચ્ચ’’ન્તિ અયોનિસો મનસિકારો, દુક્ખે ‘‘સુખ’’ન્તિ અયોનિસો મનસિકારો, અનત્તનિ ‘‘અત્તા’’તિ અયોનિસો મનસિકારો, અસુભે ‘‘સુભ’’ન્તિ અયોનિસો મનસિકારો, સચ્ચવિપ્પટિકુલેન વા ચિત્તસ્સ આવટ્ટના અનાવટ્ટના આભોગો સમન્નાહારો મનસિકારો – અયં વુચ્ચતિ ‘‘અયોનિસો મનસિકારો’’.

(ખ) કુમ્મગ્ગસેવના

તત્થ કતમા કુમ્મગ્ગસેવના? તત્થ કતમો કુમ્મગ્ગો? મિચ્છાદિટ્ઠિ, મિચ્છાસઙ્કપ્પો, મિચ્છાવાચા, મિચ્છાકમ્મન્તો, મિચ્છાઆજીવો, મિચ્છાવાયામો, મિચ્છાસતિ, મિચ્છાસમાધિ – અયં વુચ્ચતિ ‘‘કુમ્મગ્ગો’’. યા ઇમસ્સ કુમ્મગ્ગસ્સ સેવના નિસેવના સંસેવના ભજના સમ્ભજના ભત્તિ સમ્ભત્તિ તંસમ્પવઙ્કતા – અયં વુચ્ચતિ ‘‘કુમ્મગ્ગસેવના’’.

(ગ) ચેતસો ચ લીનત્તં

તત્થ કતમં ચેતસો ચ લીનત્તં? યા ચિત્તસ્સ અકલ્યતા અકમ્મઞ્ઞતા ઓલીયના સલ્લીયના લીનં લીયના લીયિતત્તં થિનં થિયના થિયિતત્તં ચિત્તસ્સ – ઇદં વુચ્ચતિ ‘‘ચેતસો ચ લીનત્તં’’.

તિકં.