१०. (उत्तर) पायासिविमानवत्थु

११०८. ‘‘या देवराजस्स सभा सुधम्मा, यत्थच्छति देवसङ्घो समग्गो;

तथूपमं तुय्हमिदं विमानं, ओभासयं तिट्ठति अन्तलिक्खे.

११०९. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१११०. सो देवपुत्तो अत्तमनो…पे… यस्स कम्मस्सिदं फलं.

११११. ‘‘अहं मनुस्सेसु मनुस्सभूतो, रञ्ञो पायासिस्स अहोसिं माणवो;

लद्धा धनं संविभागं अकासिं, पिया च मे सीलवन्तो अहेसुं;

अन्नञ्च पानञ्च पसन्नचित्तो, सक्कच्च दानं विपुलं अदासिं.

१११२. ‘‘तेन मेतादिसो वण्णो…पे. …वण्णो च मे सब्बदिसा पभासती’’ति.

(उत्तर) पायासिविमानं [उत्तरविमानं (सी. स्या. अट्ठ.)] दसमं.

पायासिवग्गो छट्ठो निट्ठितो.

तस्सुद्दानं –

द्वे अगारिनो फलदायी, द्वे उपस्सयदायी भिक्खाय दायी;

यवपालको चेव द्वे, कुण्डलिनो पायासीति [पाठभेदो नत्थि];

पुरिसानं दुतियो वग्गो पवुच्चतीति.