नमो तस्स भगवतो अरहतो सम्मासम्बुद्धस्स

खुद्दकनिकाये

विमानवत्थुपाळि

१. इत्थिविमानं

१. पीठवग्गो

१. पठमपीठविमानवत्थु

१. ‘‘पीठं ते सोवण्णमयं उळारं, मनोजवं गच्छति येनकामं;

अलङ्कते मल्यधरे [माल्यधरे (स्या.)] सुवत्थे, ओभाससि विज्जुरिवब्भकूटं.

२. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.

३. ‘‘पुच्छामि तं देवि महानुभावे, मनुस्सभूता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

४. सा देवता अत्तमना, मोग्गल्लानेन [मोग्गलानेन (क.) एवमुपरिपि] पुच्छिता;

पञ्हं पुट्ठा वियाकासि, यस्स कम्मस्सिदं फलं.

५. ‘‘अहं मनुस्सेसु मनुस्सभूता, अब्भागतानासनकं अदासिं;

अभिवादयिं अञ्जलिकं अकासिं, यथानुभावञ्च अदासि दानं.

६. ‘‘तेन मेतादिसो वण्णो, तेन मे इध मिज्झति;

उप्पज्जन्ति च मे भोगा, ये केचि मनसो पिया.

७. ‘‘अक्खामि ते भिक्खु महानुभाव, मनुस्सभूता यमकासि पुञ्ञं;

तेनम्हि एवं जलितानुभावा, वण्णो च मे सब्बदिसा पभासती’’ति.

पठमपीठविमानं पठमं.

२. दुतियपीठविमानवत्थु

८. ‘‘पीठं ते वेळुरियमयं उळारं, मनोजवं गच्छति येनकामं;

अलङ्कते मल्यधरे सुवत्थे, ओभाससि विज्जुरिवब्भकूटं.

९. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.

१०. ‘‘पुच्छामि तं देवि महानुभावे, मनुस्सभूता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

११. सा देवता अत्तमना, मोग्गल्लानेन पुच्छिता;

पञ्हं पुट्ठा वियाकासि, यस्स कम्मस्सिदं फलं.

१२. ‘‘अहं मनुस्सेसु मनुस्सभूता, अब्भागतानासनकं अदासिं;

अभिवादयिं अञ्जलिकं अकासिं, यथानुभावञ्च अदासि दानं.

१३. ‘‘तेन मेतादिसो वण्णो, तेन मे इध मिज्झति;

उप्पज्जन्ति च मे भोगा, ये केचि मनसो पिया.

१४. ‘‘अक्खामि ते भिक्खु महानुभाव, मनुस्सभूता यमकासि पुञ्ञं;

तेनम्हि एवं जलितानुभावा, वण्णो च मे सब्बदिसा पभासती’’ति.

दुतियपीठविमानं दुतियं.

३. ततियपीठविमानवत्थु

१५. ‘‘पीठं ते सोवण्णमयं उळारं, मनोजवं गच्छति येनकामं;

अलङ्कते मल्यधरे सुवत्थे, ओभाससि विज्जुरिवब्भकूटं.

१६. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.

१७. ‘‘पुच्छामि तं देवि महानुभावे, मनुस्सभूता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

१८. सा देवता अत्तमना, मोग्गल्लानेन पुच्छिता;

पञ्हं पुट्ठा वियाकासि, यस्स कम्मस्सिदं फलं.

१९. ‘‘अप्पस्स कम्मस्स फलं ममेदं [ममेतं (क.)], येनम्हि [तेनम्हि (क.)] एवं जलितानुभावा;

अहं मनुस्सेसु मनुस्सभूता, पुरिमाय जातिया मनुस्सलोके.

२०. ‘‘अद्दसं विरजं भिक्खुं, विप्पसन्नमनाविलं;

तस्स अदासहं पीठं, पसन्ना सेहि पाणिभि.

२१. ‘‘तेन मेतादिसो वण्णो, तेन मे इध मिज्झति;

उप्पज्जन्ति च मे भोगा, ये केचि मनसो पिया.

२२. ‘‘अक्खामि ते भिक्खु महानुभाव, मनुस्सभूता यमकासि पुञ्ञं;

तेनम्हि एवं जलितानुभावा, वण्णो च मे सब्बदिसा पभासती’’ति.

ततियपीठविमानं ततियं.

४. चतुत्थपीठविमानवत्थु

२३. ‘‘पीठं ते वेळुरियमयं उळारं, मनोजवं गच्छति येनकामं;

अलङ्कते मल्यधरे सुवत्थे, ओभाससि विज्जुरिवब्भकूटं.

२४. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.

२५. ‘‘पुच्छामि तं देवि महानुभावे, मनुस्सभूता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

२६. सा देवता अत्तमना, मोग्गल्लानेन पुच्छिता;

पञ्हं पुट्ठा वियाकासि, यस्स कम्मस्सिदं फलं.

२७. ‘‘अप्पस्स कम्मस्स फलं ममेदं, येनम्हि एवं जलितानुभावा;

अहं मनुस्सेसु मनुस्सभूता, पुरिमाय जातिया मनुस्सलोके.

२८. ‘‘अद्दसं विरजं भिक्खुं, विप्पसन्नमनाविलं;

तस्स अदासहं पीठं, पसन्ना सेहि पाणिभि.

२९. ‘‘तेन मेतादिसो वण्णो, तेन मे इध मिज्झति;

उप्पज्जन्ति च मे भोगा, ये केचि मनसो पिया.

३०. ‘‘अक्खामि ते भिक्खु महानुभाव, मनुस्सभूता यमकासि पुञ्ञं;

तेनम्हि एवं जलितानुभावा, वण्णो च मे सब्बदिसा पभासती’’ति.

चतुत्थपीठविमानं चतुत्थं.

५. कुञ्जरविमानवत्थु

३१. ‘‘कुञ्जरो ते वरारोहो, नानारतनकप्पनो;

रुचिरो थामवा जवसम्पन्नो, आकासम्हि समीहति.

३२. ‘‘पदुमि पद्म [पदुम… (सी. स्या.) एवमुपरिपि] पत्तक्खि, पद्मुप्पलजुतिन्धरो;

पद्मचुण्णाभिकिण्णङ्गो, सोण्णपोक्खरमालधा [… मालवा (सी. स्या.)].

३३. ‘‘पदुमानुसटं मग्गं, पद्मपत्तविभूसितं.

ठितं वग्गुमनुग्घाती, मितं गच्छति वारणो.

३४. ‘‘तस्स पक्कममानस्स, सोण्णकंसा रतिस्सरा;

तेसं सुय्यति निग्घोसो, तुरिये पञ्चङ्गिके यथा.

३५. ‘‘तस्स नागस्स खन्धम्हि, सुचिवत्था अलङ्कता;

महन्तं अच्छरासङ्घं, वण्णेन अतिरोचसि.

३६. ‘‘दानस्स ते इदं फलं, अथो सीलस्स वा पन;

अथो अञ्जलिकम्मस्स, तं मे अक्खाहि पुच्छिता’’ति;

३७. सा देवता अत्तमना, मोग्गल्लानेन पुच्छिता;

पञ्हं पुट्ठा वियाकासि, यस्स कम्मस्सिदं फलं.

३८. ‘‘दिस्वान गुणसम्पन्नं, झायिं झानरतं सतं;

अदासिं पुप्फाभिकिण्णं, आसनं दुस्ससन्थतं.

३९. ‘‘उपड्ढं पद्ममालाहं, आसनस्स समन्ततो;

अब्भोकिरिस्सं पत्तेहि, पसन्ना सेहि पाणिभि.

४०. ‘‘तस्स कम्मकुसलस्स [कम्मस्स कुसलस्स (सी. पी.)], इदं मे ईदिसं फलं;

सक्कारो गरुकारो च, देवानं अपचिता अहं.

४१. ‘‘यो वे सम्माविमुत्तानं, सन्तानं ब्रह्मचारिनं;

पसन्नो आसनं दज्जा, एवं नन्दे यथा अहं.

४२. ‘‘तस्मा हि अत्तकामेन [अत्थकामेन (क.)], महत्तमभिकङ्खता;

आसनं दातब्बं होति, सरीरन्तिमधारिन’’न्ति.

कुञ्जरविमानं पञ्चमं.

६. पठमनावाविमानवत्थु

४३. ‘‘सुवण्णच्छदनं नावं, नारि आरुय्ह तिट्ठसि;

ओगाहसि पोक्खरणिं, पद्मं [पदुमं (सी. स्या.)] छिन्दसि पाणिना.

४४. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.

४५. ‘‘पुच्छामि तं देवि महानुभावे, मनुस्सभूता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

४६. सा देवता अत्तमना, मोग्गल्लानेन पुच्छिता;

पञ्हं पुट्ठा वियाकासि, यस्स कम्मस्सिदं फलं.

४७. ‘‘अहं मनुस्सेसु मनुस्सभूता, पुरिमाय जातिया मनुस्सलोके;

दिस्वान भिक्खू तसिते किलन्ते, उट्ठाय पातुं उदकं अदासिं.

४८. ‘‘यो वे किलन्तान पिपासितानं, उट्ठाय पातुं उदकं ददाति;

सीतोदका [सीतोदिका (सी.)] तस्स भवन्ति नज्जो, पहूतमल्या बहुपुण्डरीका.

४९. ‘‘तं आपगा [तमापगा (सी. क.)] अनुपरियन्ति सब्बदा, सीतोदका वालुकसन्थता नदी;

अम्बा च साला तिलका च जम्बुयो, उद्दालका पाटलियो च फुल्ला.

५०. ‘‘तं भूमिभागेहि उपेतरूपं, विमानसेट्ठं भुससोभमानं;

तस्सीध [तस्सेव (स्या.)] कम्मस्स अयं विपाको, एतादिसं पुञ्ञकता [कतपुञ्ञा (सी.)] लभन्ति.

५१. ‘‘तेन मेतादिसो वण्णो, तेन मे इध मिज्झति;

उप्पज्जन्ति च मे भोगा, ये केचि मनसो पिया.

५२. ‘‘अक्खामि ते भिक्खु महानुभाव, मनुस्सभूता यमकासि पुञ्ञं;

तेनम्हि एवं जलितानुभावा, वण्णो च मे सब्बदिसा पभासती’’ति.

पठमनावाविमानं छट्ठं.

७. दुतियनावाविमानवत्थु

५३. ‘‘सुवण्णच्छदनं नावं, नारि आरुय्ह तिट्ठसि;

ओगाहसि पोक्खरणिं, पद्मं छिन्दसि पाणिना.

५४. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.

५५. ‘‘पुच्छामि तं देवि महानुभावे, मनुस्सभुता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

५६. सा देवता अत्तमना, मोग्गल्लानेन पुच्छिता;

पञ्हं पुट्ठा वियाकासि, यस्स कम्मस्सिदं फलं.

५७. ‘‘अहं मनुस्सेसु मनुस्सभूता, पुरिमाय जातिया मनुस्सलोके;

दिस्वान भिक्खुं तसितं किलन्तं, उट्ठाय पातुं उदकं अदासिं.

५८. ‘‘यो वे किलन्तस्स पिपासितस्स, उट्ठाय पातुं उदकं ददाति;

सीतोदका तस्स भवन्ति नज्जो, पहूतमल्या बहुपुण्डरीका.

५९. ‘‘तं आपगा अनुपरियन्ति सब्बदा, सीतोदका वालुकसन्थता नदी;

अम्बा च साला तिलका च जम्बुयो, उद्दालका पाटलियो च फुल्ला.

६०. ‘‘तं भूमिभागेहि उपेतरूपं, विमानसेट्ठं भुससोभमानं;

तस्सीध कम्मस्स अयं विपाको, एतादिसं पुञ्ञकता लभन्ति.

६१. ‘‘तेन मेतादिसो वण्णो, तेन मे इध मिज्झति;

उप्पज्जन्ति च मे भोगा, ये केचि मनसो पिया.

६२. ‘‘अक्खामि ते भिक्खु महानुभाव, मनुस्सभूता यमकासि पुञ्ञं;

तेनम्हि एवं जलितानुभावा, वण्णो च मे सब्बदिसा पभासती’’ति.

दुतियनावाविमानं सत्तमं.

८. ततियनावाविमानवत्थु

६३. ‘‘सुवण्णच्छदनं नावं, नारि आरुय्ह तिट्ठसि;

ओगाहसि पोक्खरणिं, पद्मं छिन्दसि पाणिना.

६४. ‘‘कूटागारा निवेसा ते, विभत्ता भागसो मिता;

दद्दल्लमाना [दद्दळ्हमाना (क.)] आभन्ति, समन्ता चतुरो दिसा.

६५. ‘‘केन तेतादिसो वण्णो, केन ते इध मिज्झति;

उप्पज्जन्ति च ते भोगा, ये केचि मनसो पिया.