६. पायासिवग्गो

१. पठमअगारियविमानवत्थु

१०४८. ‘‘यथा वनं चित्तलतं पभासति [पकासति (क.)], उय्यानसेट्ठं तिदसानमुत्तमं;

तथूपमं तुय्हमिदं विमानं, ओभासयं तिट्ठति अन्तलिक्खे.

१०४९. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१०५०. सो देवपुत्तो अत्तमनो, मोग्गल्लानेन पुच्छितो;

पञ्हं पुट्ठो वियाकासि, यस्स कम्मस्सिदं फलं.

१०५१. ‘‘अहञ्च भरिया च मनुस्सलोके, ओपानभूता घरमावसिम्ह;

अन्नञ्च पानञ्च पसन्नचित्ता, सक्कच्च दानं विपुलं अदम्ह.

१०५२. ‘‘तेन मेतादिसो वण्णो…पे…वण्णो च मे सब्बदिसा पभासती’’ति.

पठमअगारियविमानं पठमं.

२. दुतियअगारियविमानवत्थु

१०५४. ‘‘यथा वनं चित्तलतं पभासति, उय्यानसेट्ठं तिदसानमुत्तमं;

तथूपमं तुय्हमिदं विमानं, ओभासयं तिट्ठति अन्तलिक्खे.

१०५५. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१०५६. सो देवपुत्तो अत्तमनो…पे… यस्स कम्मस्सिदं फलं.

१०५७. ‘‘अहञ्च भरिया च मनुस्सलोके, ओपानभूता घरमावसिम्ह;

अन्नञ्च पानञ्च पसन्नचित्ता, सक्कच्च दानं विपुलं अदम्ह.

१०५८. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

दुतियअगारियविमानं दुतियं.

३. फलदायकविमानवत्थु

१०६०. ‘‘उच्चमिदं मणिथूणं विमानं, समन्ततो सोळस योजनानि;

कूटागारा सत्तसता उळारा, वेळुरियथम्भा रुचकत्थता सुभा.

१०६१. ‘‘तत्थच्छसि पिवसि खादसि च, दिब्बा च वीणा पवदन्ति वग्गुं;

अट्ठट्ठका सिक्खिता साधुरूपा, दिब्बा च कञ्ञा तिदसचरा उळारा;

नच्चन्ति गायन्ति पमोदयन्ति.

१०६२. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१०६३. सो देवपुत्तो अत्तमनो…पे… यस्स कम्मस्सिदं फलं.

१०६४. ‘‘फलदायी फलं विपुलं लभति, ददमुजुगतेसु पसन्नमानसो;

सो हि पमोदति [मोदति (सी. स्या. पी.)] सग्गगतो तिदिवे [तत्थ (क.)], अनुभोति च पुञ्ञफलं विपुलं.

१०६५. ‘‘तवेवाहं [तथेवाहं (सी. स्या. पी.)] महामुनि, अदासिं चतुरो फले.

१०६६. ‘‘तस्मा हि फलं अलमेव दातुं, निच्चं मनुस्सेन सुखत्थिकेन;

दिब्बानि वा पत्थयता सुखानि, मनुस्ससोभग्गतमिच्छता वा.

१०६७. ‘‘तेन मेतादिसो वण्णो…पे…

वण्णो च मे सब्बदिसा पभासती’’ति.

फलदायकविमानं ततियं.

४. पठमउपस्सयदायकविमानवत्थु

१०६९. ‘‘चन्दो यथा विगतवलाहके नभे, ओभासयं गच्छति अन्तलिक्खे;

तथूपमं तुय्हमिदं विमानं, ओभासयं तिट्ठति अन्तलिक्खे.

१०७०. ‘‘देविद्धिपत्तोसि महानुभावा, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१०७१. सो देवपुत्तो अत्तमनो…पे… यस्स कम्मस्सिदं फलं.

१०७२. ‘‘अहञ्च भरिया च मनुस्सलोके, उपस्सयं अरहतो अदम्ह;

अन्नञ्च पानञ्च पसन्नचित्ता, सक्कच्च दानं विपुलं अदम्ह.

१०७३. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

पठमउपस्सयदायकविमानं चतुत्थं.

५. दुतियउपस्सयदायकविमानवत्थु

१०७५. सूरियो यथा विगतवलाहके नभे…पे….

(यथा पुरिमविमानं तथा वित्थारेतब्बं).

१०७९. ‘‘तेन मेतादिसो वण्णो…पे…वण्णो च मे सब्बदिसा पभासती’’ति.

दुतियउपस्सयदायकविमानं पञ्चमं.

६. भिक्खादायकविमानवत्थु

१०८१. ‘‘उच्चमिदं मणिथूणं विमानं, समन्ततो द्वादस योजनानि;

कूटागारा सत्तसता उळारा, वेळुरियथम्भा रुचकत्थता सुभा.

१०८२. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१०८३. सो देवपुत्तो अत्तमनो…पे… यस्स कम्मस्सिदं फलं.

१०८४. ‘‘अहं मनुस्सेसु मनुस्सभूतो, दिस्वान भिक्खुं तसितं किलन्तं;

एकाहं भिक्खं पटिपादयिस्सं, समङ्गि भत्तेन तदा अकासिं.

१०८५. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

भिक्खादायकविमानं छट्ठं.

७. यवपालकविमानवत्थु

१०८७. ‘‘उच्चमिदं मणिथूणं विमानं…पे… वण्णो च ते सब्बदिसा पभासती’’ति.

१०८९. सो देवपुत्तो अत्तमनो…पे… यस्स कम्मस्सिदं फलं.

१०९०. ‘‘अहं मनुस्सेसु मनुस्सभूतो, अहोसिं यवपालको;

अद्दसं विरजं भिक्खुं, विप्पसन्नमनाविलं.

१०९१. ‘‘तस्स अदासहं भागं, पसन्नो सेहि पाणिभि;

कुम्मासपिण्डं दत्वान, मोदामि नन्दने वने.

१०९२. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

यवपालकविमानं सत्तमं.

८. पठमकुण्डलीविमानवत्थु

१०९४. ‘‘अलङ्कतो मल्यधरो सुवत्थो, सुकुण्डली कप्पितकेसमस्सु;

आमुत्तहत्थाभरणो यसस्सी, दिब्बे विमानम्हि यथापि चन्दिमा.

१०९५. ‘‘दिब्बा च वीणा पवदन्ति वग्गुं, अट्ठट्ठका सिक्खिता साधुरूपा;

दिब्बा च कञ्ञा तिदसचरा उळारा, नच्चन्ति गायन्ति पमोदयन्ति.

१०९६. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१०९७. सो देवपुत्तो अत्तमनो…पे… यस्स कम्मस्सिदं फलं.

१०९८. ‘‘अहं मनुस्सेसु मनुस्सभूतो, दिस्वान समणे सीलवन्ते;

सम्पन्नविज्जाचरणे यसस्सी, बहुस्सुते तण्हक्खयूपपन्ने;

अन्नञ्च पानञ्च पसन्नचित्तो, सक्कच्च दानं विपुलं अदासिं.

१०९९. ‘‘तेन मेतादिसो वण्णो…पे…वण्णो च मे सब्बदिसा पभासती’’ति.

पठमकुण्डलीविमानं अट्ठमं.

९. दुतियकुण्डलीविमानवत्थु

११०१. ‘‘अलङ्कतो मल्यधरो सुवत्थो, सुकुण्डली कप्पितकेसमस्सु;

आमुत्तहत्थाभरणो यसस्सी, दिब्बे विमानम्हि यथापि चन्दिमा.

११०२. ‘‘दिब्बा च वीणा पवदन्ति वग्गुं, अट्ठट्ठका सिक्खिता साधुरूपा;

दिब्बा च कञ्ञा तिदसचरा उळारा, नच्चन्ति गायन्ति पमोदयन्ति.

११०३. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

११०४. सो देवपुत्तो अत्तमनो…पे… यस्स कम्मस्सिदं फलं.

११०५. ‘‘अहं मनुस्सेसु मनुस्सभूतो, दिस्वान समणे साधुरूपे [सीलवन्ते (क.)];

सम्पन्नविज्जाचरणे यसस्सी, बहुस्सुते सीलवन्ते पसन्ने [सीलवतूपपन्ने (क. सी. क.)];

अन्नञ्च पानञ्च पसन्नचित्तो, सक्कच्च दानं विपुलं अदासिं.

११०६. ‘‘तेन मेतादिसो वण्णो…पे…वण्णो च मे सब्बदिसा पभासती’’ति.

दुतियकुण्डलीविमानं नवमं.

१०. (उत्तर) पायासिविमानवत्थु

११०८. ‘‘या देवराजस्स सभा सुधम्मा, यत्थच्छति देवसङ्घो समग्गो;

तथूपमं तुय्हमिदं विमानं, ओभासयं तिट्ठति अन्तलिक्खे.

११०९. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१११०. सो देवपुत्तो अत्तमनो…पे… यस्स कम्मस्सिदं फलं.

११११. ‘‘अहं मनुस्सेसु मनुस्सभूतो, रञ्ञो पायासिस्स अहोसिं माणवो;

लद्धा धनं संविभागं अकासिं, पिया च मे सीलवन्तो अहेसुं;

अन्नञ्च पानञ्च पसन्नचित्तो, सक्कच्च दानं विपुलं अदासिं.

१११२. ‘‘तेन मेतादिसो वण्णो…पे. …वण्णो च मे सब्बदिसा पभासती’’ति.

(उत्तर) पायासिविमानं [उत्तरविमानं (सी. स्या. अट्ठ.)] दसमं.

पायासिवग्गो छट्ठो निट्ठितो.

तस्सुद्दानं –

द्वे अगारिनो फलदायी, द्वे उपस्सयदायी भिक्खाय दायी;

यवपालको चेव द्वे, कुण्डलिनो पायासीति [पाठभेदो नत्थि];

पुरिसानं दुतियो वग्गो पवुच्चतीति.